HOME » NEWS » National-international » KANNADA NEWS FIR FILED AGAINST BJP MLA AND HIS FAMILY FOR RAPING WIDOW DURING UTTAR PRADESH ASSEMBLY ELECTION SCT

2017ರ ಉತ್ತರ ಪ್ರದೇಶ ಚುನಾವಣೆ ವೇಳೆ ಅತ್ಯಾಚಾರ; ಬಿಜೆಪಿ ಶಾಸಕ ಸೇರಿ 6 ಜನರ ಮೇಲೆ ಕೇಸ್ ದಾಖಲು

ಅತ್ಯಾಚಾರ ಆರೋಪದ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಬಿಜೆಪಿ ಶಾಸಕ ರವೀಂದ್ರನಾಥ್ ತ್ರಿಪಾಠಿ, ಒಂದುವೇಳೆ ಈ ಆರೋಪ ನಿಜವೆಂದು ತನಿಖೆಯಲ್ಲಿ ಸಾಬೀತಾದರೆ ನಾನು ಮತ್ತು ನಮ್ಮ ಕುಟುಂಬದವರು ನೇಣಿಗೇರಲು ಸಿದ್ಧರಿದ್ದೇವೆ ಎಂದಿದ್ದಾರೆ.

Sushma Chakre | news18-kannada
Updated:February 20, 2020, 8:35 AM IST
2017ರ ಉತ್ತರ ಪ್ರದೇಶ ಚುನಾವಣೆ ವೇಳೆ ಅತ್ಯಾಚಾರ; ಬಿಜೆಪಿ ಶಾಸಕ ಸೇರಿ 6 ಜನರ ಮೇಲೆ ಕೇಸ್ ದಾಖಲು
ಸಾಂದರ್ಭಿಕ ಚಿತ್ರ
  • Share this:
ಲಕ್ನೋ (ಫೆ. 20): ಮಹಿಳೆಯೊಬ್ಬರನ್ನು ಹೋಟೆಲ್​ ರೂಮಿನಲ್ಲಿಟ್ಟು 1 ತಿಂಗಳ ಕಾಲ ನಿರಂತರವಾಗಿ ಅತ್ಯಾಚಾರವೆಸಗಿದ್ದ ಉತ್ತರ ಪ್ರದೇಶದ ಬಿಜೆಪಿ ಶಾಸಕ ರವೀಂದ್ರನಾಥ್ ತ್ರಿಪಾಠಿ ಮತ್ತು ಇತರೆ 6 ಜನರ ಮೇಲೆ ಕೇಸು ದಾಖಲಿಸಿಕೊಳ್ಳಲಾಗಿದೆ.

ಉತ್ತರ ಪ್ರದೇಶದ ಭದೋಹಿಯಲ್ಲಿ 2017ರಲ್ಲಿ ನಡೆದಿದ್ದ ಈ ಘಟನೆಯ ಬಗ್ಗೆ ಕಳೆದ ವಾರ ದೂರು ದಾಖಲಾಗಿತ್ತು. ಭದೋಹಿಯ ಬಿಜೆಪಿ ಶಾಸಕ ರವೀಂದ್ರನಾಥ್ ತ್ರಿಪಾಠಿ ಮತ್ತು 6 ಜನರ ವಿರುದ್ಧ 40 ವರ್ಷದ ಮಹಿಳೆಯೊಬ್ಬರು ಅತ್ಯಾಚಾರದ ಆರೋಪ ಮಾಡಿದ್ದರು. ಸಂತ್ರಸ್ತ ಮಹಿಳೆಯ ಗಂಡ 2007ರಲ್ಲಿ ಸಾವನ್ನಪ್ಪಿದ್ದರು. ಅದಾದ ನಂತರ 2014ರಲ್ಲಿ ಆಕೆ ಶಾಸಕ ರವೀಂದ್ರನಾಥ್ ತ್ರಿಪಾಠಿ ಅವರ ಅಣ್ಣನ ಮಗನನ್ನು ಭೇಟಿಯಾಗಿದ್ದರು.

ಈ ವೇಳೆ ತನ್ನ ಮೇಲೆ ಬಿಜೆಪಿ ಶಾಸಕ ಮತ್ತು 6 ಜನ ಸೇರಿ ನಿರಂತರವಾಗಿ ಅತ್ಯಾಚಾರ ನಡೆಸಿದ್ದಾರೆ. ಹಲವು ವರ್ಷಗಳ ಕಾಲ ತನ್ನ ಮೇಲೆ ಲೈಂಗಿಕ ದೌರ್ಜನ್ಯ ನಡೆಸಲಾಗಿದೆ. ಈ ವಿಷಯವನ್ನು ಯಾರಿಗೂ ಹೇಳದಂತೆ ಬೆದರಿಕೆ ಹಾಕಿದ್ದರಿಂದ ಸುಮ್ಮನಾಗಿದ್ದೆ ಎಂದು ಪೊಲೀಸರಿಗೆ ನೀಡಿರುವ ದೂರಿನಲ್ಲಿ ಸಂತ್ರಸ್ತೆ ತಿಳಿಸಿದ್ದರು.

ಇದನ್ನೂ ಓದಿ: ಗಂಡನ ಕನಸು ನನಸಾಗಿಸಲು ಸೇನೆ ಸೇರಿದ ಹೆಂಡತಿ; ಇದು ಹುತಾತ್ಮ ಯೋಧನ ಪತ್ನಿಯ ಮನಕಲಕುವ ಕತೆ

ತಮ್ಮ ಮೇಲಿನ ಆರೋಪದ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಬಿಜೆಪಿ ಶಾಸಕ ರವೀಂದ್ರನಾಥ್ ತ್ರಿಪಾಠಿ, ಆ ಮಹಿಳೆ ಯಾರೆಂದು ನನಗೆ ಗೊತ್ತಿಲ್ಲ. ಈ ಪ್ರಕರಣದ ಬಗ್ಗೆ ನನಗೆ ಯಾವುದೇ ಮಾಹಿತಿಯಿಲ್ಲ. ವಿನಾಕಾರಣ ನನ್ನ ವರ್ಚಸ್ಸಿಗೆ ಧಕ್ಕೆಯುಂಟು ಮಾಡಲು ಈ ಆರೋಪ ಮಾಡಲಾಗಿದೆ. ನನ್ನ ಮೇಲೆ ದೂರು ಬಂದಿರುವುದರಿಂದ ತನಿಖೆಗೆ ಸಹಕರಿಸುತ್ತೇನೆ. ಒಂದುವೇಳೆ ಈ ಆರೋಪ ನಿಜವೆಂದು ತನಿಖೆಯಲ್ಲಿ ಸಾಬೀತಾದರೆ ನಾನು ಮತ್ತು ನಮ್ಮ ಕುಟುಂಬದವರು ನೇಣಿಗೇರಲು ಸಿದ್ಧರಿದ್ದೇವೆ ಎಂದಿದ್ದಾರೆ.

ನಾನು ನಮ್ಮ ಕ್ಷೇತ್ರದ ಭೂ ಮಾಫಿಯಾ ಮತ್ತು ಕ್ರಿಮಿನಲ್​ಗಳ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲು ಆದೇಶ ನೀಡಿದ್ದೆ. ಗ್ಯಾನ್​ಪುರದ ಶಾಸಕ ವಿಜಯ್ ಮಿಶ್ರಾ ಮೇಲೂ 78 ಕ್ರಿಮಿನಲ್ ಕೇಸುಗಳಿದ್ದವು. ಹೀಗಾಗಿ, ಆ ದ್ವೇಷವನ್ನು ತೀರಿಸಿಕೊಳ್ಳಲು ಆತನ ಕಡೆಯವರೇ ನಮ್ಮ ಮೇಲೆ ಈ ರೀತಿ ದೂರು ಕೊಡಿಸಿದ್ದಾರೆ. 2017ರ ಚುನಾವಣೆ ಸಮಯದಲ್ಲೇ ಆ ಮಹಿಳೆಯ ಮೇಲೆ ಅತ್ಯಾಚಾರ ನಡೆದಿದ್ದರೆ ಇಷ್ಟು ದಿನ ಆಕೆ ಯಾಕೆ ದೂರು ನೀಡಲಿಲ್ಲ? ಇದೆಲ್ಲವೂ ನನ್ನನ್ನು ರಾಜಕೀಯವಾಗಿ ಮುಗಿಸುವ ಸಂಚು ಎಂದು ತ್ರಿಪಾಠಿ ಆರೋಪಿಸಿದ್ದಾರೆ.

ಇದನ್ನೂ ಓದಿ: ಬಿಜೆಪಿ ಶಾಸಕನ ಮೇಲೆ ಅತ್ಯಾಚಾರದ ಆರೋಪ; 1 ತಿಂಗಳ ನರಕಯಾತನೆಯ ಕತೆ ಬಿಚ್ಚಿಟ್ಟ ಸಂತ್ರಸ್ತೆಬಿಜೆಪಿ ಶಾಸಕ ತ್ರಿಪಾಠಿ ಅವರ ಅಣ್ಣನ ಮಗ 2017ರಲ್ಲಿ 1 ತಿಂಗಳ ಕಾಲ ಆಕೆಯನ್ನು ಭದೋಹಿಯ ಖಾಸಗಿ ಹೋಟೆಲ್​ನ ರೂಮಿನಲ್ಲಿ ಇರಿಸಿದ್ದ. ಆಗ ಉತ್ತರ ಪ್ರದೇಶದಲ್ಲಿ ಚುನಾವಣೆ ನಡೆಯುತ್ತಿತ್ತು. ಆ 1 ತಿಂಗಳ ಕಾಲ ಪ್ರತಿದಿನವೂ ಶಾಸಕ ಮತ್ತು ಆತನ ಕುಟುಂಬದ 6 ಜನರು ಆಕೆಯ ಮೇಲೆ ಅತ್ಯಾಚಾರ ನಡೆಸುತ್ತಿದ್ದರು ಎಂದು ದೂರಿನಲ್ಲಿ ತಿಳಿಸಲಾಗಿತ್ತು. ಈ ಪ್ರಕರಣವನ್ನು ಹೆಚ್ಚುವರಿ ಸೂಪರಿಂಟೆಂಡೆಂಟ್ ಆಫ್​ ಪೊಲೀಸ್​ಗೆ ಹಸ್ತಾಂತರಿಸಲಾಗಿತ್ತು. ಬಿಜೆಪಿ ಶಾಸಕನ ಹೆಸರೂ ಅತ್ಯಾಚಾರ ಪ್ರಕರಣದಲ್ಲಿ ಕೇಳಿಬಂದಿದ್ದರಿಂದ ಈ ಪ್ರಕರಣ ಭಾರೀ ಸಂಚಲನ ಸೃಷ್ಟಿಸಿತ್ತು. ಹೀಗಾಗಿ, ಈ ಕೇಸನ್ನು ಹಿರಿಯ ಪೊಲೀಸ್ ಅಧಿಕಾರಿಗಳಿಗೆ ವಹಿಸಲಾಗಿತ್ತು.

 
First published: February 20, 2020, 8:35 AM IST
ಮತ್ತಷ್ಟು ಓದಿರಿ
ಮುಂದಿನ ಸುದ್ದಿ

Top Stories