ತಾಯ್ನಾಡು ಸ್ವರ್ಗವೆನಿಸುತ್ತಿದೆ!; 18 ವರ್ಷದ ಬಳಿಕ ಪಾಕಿಸ್ತಾನಿ ಜೈಲಿನಿಂದ ಬಿಡುಗಡೆಯಾದ ಮಹಾರಾಷ್ಟ್ರದ ಮಹಿಳೆ

ಮುಂಬೈ (ಜ. 27): ಕೆಲವೊಮ್ಮೆ ಅದೃಷ್ಟ ಕೈಕೊಟ್ಟರೆ ಸಣ್ಣಪುಟ್ಟ ತಪ್ಪಿಗೂ ನಾವು ದೊಡ್ಡ ಶಿಕ್ಷೆಯನ್ನೇ ಅನುಭವಿಸಬೇಕಾಗುತ್ತದೆ. ಅದಕ್ಕೆ ನಿದರ್ಶನವೆಂಬಂತೆ ಮಹಾರಾಷ್ಟ್ರದ ಔರಂಗಾಬಾದ್​ನ 65 ವರ್ಷದ ಮಹಿಳೆಯೊಬ್ಬರು ಪಾಕಿಸ್ತಾನದಲ್ಲಿ ಪಾಸ್​ಪೋರ್ಟ್​ ಕಳೆದುಕೊಂಡ ಪರಿಣಾಮ 18 ವರ್ಷಗಳ ಕಾಲ ಪಾಕಿಸ್ತಾನಿ ಜೈಲಿನಲ್ಲಿ ಇರಬೇಕಾಯಿತು. ಸುಮಾರು 2 ದಶಕಗಳ ನಂತರ ಅವರು ತಾಯ್ನಾಡಿಗೆ ವಾಪಾಸಾಗಿದ್ದು, ಕೊನೆಗೂ ತಮ್ಮವರನ್ನು ಸೇರಿಕೊಂಡಿದ್ದಾರೆ.

ಮಹಾರಾಷ್ಟ್ರದ ಔರಂಗಾಬಾದ್​ನ ಹಸೀನಾ ಬೇಗಂ ಎಂಬ ಮಹಿಳೆ 18 ವರ್ಷಗಳ ಹಿಂದೆ ತಮ್ಮ ಗಂಡನ ಸಂಬಂಧಿಕರನ್ನು ಭೇಟಿಯಾಗಲು ಪಾಕಿಸ್ತಾನಕ್ಕೆ ಹೋಗಿದ್ದರು. ಆದರೆ, ದುರಾದೃಷ್ಟವೆಂಬಂತೆ ಅಲ್ಲಿ ಅವರು ತಮ್ಮ ಪಾಸ್​ಪೋರ್ಟ್​ ಕಳೆದುಕೊಂಡಿದ್ದರು. ಆಗ ಅವರಿಗೆ ತಾನಿನ್ನು ಮನೆಗೆ ವಾಪಾಸ್ ಹೋಗಲು 18 ವರ್ಷಗಳು ಬೇಕಾಗುತ್ತದೆ ಎಂ ಕಲ್ಪನೆಯೂ ಇರಲಿಲ್ಲ! ಲಾಹೋರ್​ನಲ್ಲಿ ಪಾಸ್​ಪೋರ್ಟ್​ ಕಳೆದುಕೊಂಡಿದ್ದ ಆಕೆಯನ್ನು ಪಾಕಿಸ್ತಾನದ ಜೈಲಿಗೆ ಹಾಕಲಾಗಿತ್ತು. ಆಕೆಯ ಗುರುತಿಗೆ ಬೇರಾವುದೇ ಸಾಕ್ಷಿ ಇರದಿದ್ದ ಕಾರಣದಿಂದ ಆಕೆಯ ಮೇಲೆ ಅನುಮಾನಗೊಂಡು ಜೈಲಿಗೆ ಕಳುಹಿಸಲಾಗಿತ್ತು. ಬರೋಬ್ಬರಿ 18 ವರ್ಷಗಳ ಬಳಿಕ ಅವರು ಅಲ್ಲಿಂದ ಬಿಡುಗಡೆಯಾಗಿದ್ದು, ನಿನ್ನೆ ಔರಂಗಾಬಾದ್​ಗೆ ಮರಳಿದ್ದಾರೆ.

65-year-old woman freed from Pakistani jail, returns to Aurangabad

Read @ANI Story | https://t.co/1IM5FtTFkv pic.twitter.com/x10Vr1yTjh

— ANI Digital (@ani_digital) January 27, 2021

ಈ ಬಗ್ಗೆ ಖುಷಿ ಹಂಚಿಕೊಂಡಿರುವ ಹಸೀನಾ ಬೇಗಂ, ಈ 18 ವರ್ಷಗಳ ಕಾಲ ನಾನು ಸಾಕಷ್ಟು ನೋವು, ಏಕಾಂತ, ಹತಾಷೆಯನ್ನು ಅನುಭವಿಸಿದ್ದೇನೆ. ನನ್ನನ್ನು ಬಲವಂತದಿಂದ ಪಾಕಿಸ್ತಾನದ ಜೈಲಿನಲ್ಲಿ ಬಂಧಿಸಿಟ್ಟಿದ್ದರು. ಪರದೇಶದಲ್ಲಿ ಹೋಗಿ ಜೈಲಿನಲ್ಲಿ ಬಂಧಿಯಾದ ಆ ಅನುಭವ ಬೇರಾರಿಗೂ ಆಗುವುದು ಬೇಡ. ನನ್ನ ದೇಶಕ್ಕೆ ವಾಪಾಸ್​ ಬಂದ ನಂತರ ನನ್ನ ಮನಸಿಗೆ ನೆಮ್ಮದಿ, ಶಾಂತಿ ಸಿಕ್ಕಿದಂತೆನಿಸುತ್ತಿದೆ. ನಾನು ಸ್ವರ್ಗದಲ್ಲಿದ್ದೇನೇನೋ ಎನಿಸುವಷ್ಟು ಸಂತೋಷವಾಗುತ್ತಿದೆ ಎಂದಿದ್ದಾರೆ.

ಇದನ್ನೂ ಓದಿ: ಗಂಡನ ಮೊಬೈಲ್​ನಲ್ಲಿದ್ದ ತನ್ನದೇ ಹಳೆ ಫೋಟೋ ನೋಡಿ ಚಾಕುವಿನಿಂದ ಇರಿದ ಹೆಂಡತಿ!

ಹಸೀನಾ ಬೇಗಂ ಔರಂಗಾಬಾದ್​ನ ರಷೀದ್​ಪುರದ ನಿವಾಸಿಯಾಗಿದ್ದು, ಉತ್ತರ ಪ್ರದೇಶದ ಸಹರಾನ್ಪುರದ ದಿಲ್ಶದ್ ಅಹಮದ್ ಎಂಬುವವರನ್ನು ಮದುವೆಯಾಗಿದ್ದರು. ಲಾಹೋರ್​ನಲ್ಲಿದ್ದ ತನ್ನ ಗಂಡನ ಸಂಬಂಧಿಕರ ಮನೆಗೆ 18 ವರ್ಷಗಳ ಹಿಂದೆ ಹೋಗಿದ್ದ ಹಸೀನಾ ಬೇಗಂ ಪಾಸ್​ಪೋರ್ಟ್​ ಕಳೆದುಕೊಂಡಿದ್ದರಿಂದ ಜೈಲು ಪಾಲಾಗಿದ್ದರು. ಭಾರತದ ನಿವಾಸಿಯಾದ ತಾನು ಅಮಾಯಕಳು, ತನ್ನದೇನೂ ತಪ್ಪಿಲ್ಲ ಎಂದು ಪಾಕಿಸ್ತಾನದ ಕೋರ್ಟ್​ ಮುಂದೆ ನಡೆದ ವಿಚಾರವನ್ನು ಹೇಳಿದರೂ ಆಕೆಯ ಮೇಲಿನ ಅನುಮಾನದಿಂದ ಜೈಲು ಶಿಕ್ಷೆ ವಿಧಿಸಲಾಗಿತ್ತು.

ಹಸೀನಾ ಬೇಗಂ ಹೆಸರಿನಲ್ಲಿ ಔರಂಗಾಬಾದ್​ನಲ್ಲಿ ಮನೆಯಿದೆ. ಆಕೆ ಇಲ್ಲಿಯ ನಿವಾಸಿ ಎಂದು ಔರಂಗಾಬಾದ್​ ಪೊಲೀಸರು ಪಾಕಿಸ್ತಾನಕ್ಕೆ ಮಾಹಿತಿ ರವಾನೆ ಮಾಡಿ, ಖಚಿತಪಡಿಸಿದ್ದರು. ಈ ಹಿನ್ನೆಲೆಯಲ್ಲಿ ಹಸೀನಾ ಬೇಗಂ ಅವರನ್ನು ಕಳೆದ ವಾರ ಬಿಡುಗಡೆ ಮಾಡಿದ ಪಾಕಿಸ್ತಾನ ಭಾರತೀಯ ಅಧಿಕಾರಿಗಳಿಗೆ ಹಸ್ತಾಂತರಿಸಿತ್ತು.