Flipkart, Swiggy IT Raid - ಬೆಂಗಳೂರಿನಲ್ಲಿ ಫ್ಲಿಪ್​ಕಾರ್ಟ್, ಸ್ವಿಗ್ಗಿ ಕಚೇರಿಗಳ ಮೇಲೆ ಐಟಿ ದಾಳಿ

ಬೆಂಗಳೂರು(ಜ. 08): ತೆರಿಗೆ ವಂಚನೆ ಆರೋಪ ಹಿನ್ನೆಲೆಯಲ್ಲಿ ಫ್ಲಿಪ್ ಕಾರ್ಟ್ ಮತ್ತು ಸ್ವಿಗ್ಗಿ ಸಂಸ್ಥೆಗಳ ಕಚೇರಿಗಳ ಮೇಲೆ ಆದಾಯ ತೆರಿಗೆ ಅಧಿಕಾರಿಗಳಿಂದ ಈ ವಾರ ದಾಳಿ ನಡೆದಿದೆ ಎಂದು ರಾಯ್ಟರ್ಸ್ ಸುದ್ದಿ ಸಂಸ್ಥೆ ವರದಿ ಮಾಡಿದೆ. ಅಮೆರಿಕದ ವಾಲ್​ಮಾರ್ಟ್ ಒಡೆತನದ ಫ್ಲಿಪ್​ಕಾರ್ಟ್ ಹಾಗೂ ಸ್ಥಳೀಯ ಫೂಡ್ ಆ್ಯಪ್ ಸ್ವಿಗ್ಗಿಯ ಥರ್ಡ್ ಪಾರ್ಟಿ ವ್ಯವಹಾರಿಗಳು ತೆರಿಗೆ ವಂಚನೆ ಎಸಗಿದ್ದಾರೆಂಬ ಆರೋಪ ಕೇಳಿಬಂದ ಹಿನ್ನೆಲೆಯಲ್ಲಿ ಆದಾಯ ತೆರಿಗೆ ಇಲಾಖೆ ಈ ದಾಳಿ ನಡೆಸಿರುವುದು ತಿಳಿದುಬಂದಿದೆ.

ಫ್ಲಿಪ್​ಕಾರ್ಟ್​ನ ಲಾಜಿಸ್ಟಿಕ್ಸ್ ಅಂಗವಾಗಿರುವ ಇನ್ಸ್​ಟಾಕಾರ್ಟ್ ಸಂಸ್ಥೆಯ ಕಚೇರಿಯಲ್ಲಿ ನಿನ್ನೆ ರಾತ್ರಿಯವರೆಗೂ ಐಟಿ ಅಧಿಕಾರಿಗಳು ಶೋಧ ನಡೆಸಿದರು. ಸುಮಾರು 20 ಅಧಿಕಾರಿಗಳ ತಂಡ ಈ ಕಚೇರಿಗೆ ಭೇಟಿ ಕೊಟ್ಟು ಕಂಪನಿಯ ವೆಂಡರ್​ಗಳಿಗೆ ನೀಡಲಾದ ಇನ್​ವಾಯ್ಸ್ ಮೊದಲಾದ ಕಡತಗಳನ್ನ ಪರಿಶೀಲಿಸದರೆಂದು ರಾಯ್ಟರ್ಸ್ ಸುದ್ದಿ ಸಂಸ್ಥೆ ತನ್ನ ಮೂಲವನ್ನ ಉಲ್ಲೇಖಿಸಿ ವರದಿ ಮಾಡಿದೆ.

ಫ್ಲಿಪ್​ಕಾರ್ಟ್ ಸಂಸ್ಥೆ ಕೂಡ ಈ ಬಗ್ಗೆ ಹೇಳಿಕೆ ನೀಡಿದ್ದು, ತಮ್ಮ ಕಂಪನಿ ಎಲ್ಲಾ ರೀತಿಯ ತೆರಿಗೆ ಮತ್ತು ಕಾನೂನು ನಿಯಮಗಳಿಗೆ ಬದ್ಧವಾಗಿದೆ. ಐಟಿ ಅಧಿಕಾರಿಗಳಿಗೆ ಅಗತ್ಯವಿರುವ ಮಾಹಿತಿ ಒದಗಿಸಿ ಸಹಕರಿಸುತ್ತಿದ್ದೇವೆ ಎಂದು ಹೇಳಿದೆ.

ಇದನ್ನೂ ಓದಿ: Chinese Vaccine - ಚೀನೀ ವ್ಯಾಕ್ಸಿನ್ ಅಪಾಯಕಾರಿ ಎಂದು ಹೇಳಿ ಪೇಚಿಗಿಟ್ಟುಕೊಂಡ ಚೀನೀ ವೈದ್ಯ

ಇನ್ನು, ದಕ್ಷಿಣ ಆಫ್ರಿಕಾದ ನ್ಯಾಸ್ಪರ್ಸ್ ಎಂಬ ಕಂಪನಿಯ ಬಂಡವಾಳ ಹೊಂದಿರುವ ಸ್ವಿಗ್ಗಿ ಸಂಸ್ಥೆ ಕೂಡ ತಾನು ತೆರಿಗೆ ವಂಚನೆ ಮಾಡಿಲ್ಲ ಎಂದಿದೆ. ಈ ವೇಳೆ ಆದಾಯ ತೆರಿಗೆ ಇಲಾಖೆಯಿಂದ ಯಾವುದೇ ಪ್ರತಿಕ್ರಿಯೆ ಅಥವಾ ಹೇಳಿಕೆ ಬಂದಿಲ್ಲ.