ತ್ರಿಕೋನಾಕೃತಿಯಲ್ಲಿ ನಿರ್ಮಾಣವಾಗುತ್ತಿರುವ ಹೊಸ ಸಂಸತ್​​ ಭವನದಲ್ಲಿರಲಿದೆ ಈ ವಿಶೇಷ ಸೌಲಭ್ಯಗಳು

ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಅವರು ಇಂದು ನೂತನ ಸಂಸತ್​ ಕಟ್ಟಡಕ್ಕೆ ಶಿಲಾನ್ಯಾಸ ನೇರವೇರಿಸಿದ್ದಾರೆ. ಅತ್ಯಾಧುನಿಕ ವಿನ್ಯಾಸದ ಈ ಕಟ್ಟಡ ಇಂಧನ ದಕ್ಷತೆಯಿಂದ ಕೂಡಿರಲಿದೆ. ಪ್ರಸ್ತತವಿರುವ ಸಂಸತ್​ ಭವನದ ಪಕ್ಕದಲ್ಲಿಯೇ ಈ ಹೊಸ ಕಟ್ಟಡ ಕೂಡ ತಲೆಎತ್ತಲಿದೆ. ತ್ರಿಕೋನಾಕೃತಿಯಲ್ಲಿ ನಿರ್ಮಿಸಲಾಗುತ್ತಿರುವ ಈ ಕಟ್ಟಡ ಹೆಚ್ಚು ಭದ್ರತಾ ಸೌಲಭ್ಯವನ್ನು ಹೊಂದಿರಲಿದೆ. ನೂತನ ಕಟ್ಟಡದಲ್ಲಿ ಲೋಕಸಭೆಯೂ ಈಗಿರುವ ಗಾತ್ರದ ಮೂರು ಪಟ್ಟು ದೊಡ್ಡದಾಗಿರಲಿದೆ. ಅಲ್ಲದೇ ರಾಜ್ಯಸಭೆ ಕೂಡ  ಹೆಚ್ಚು ವಿಶಾಲವಾಗಿರಲಿದೆ. ಇನ್ನು ಈ ಹೊಸ ಸಂಸತ್​ ಕಟ್ಟಡಕ್ಕೆ ಹಸಿರು ತಂತ್ರಜ್ಞಾನವನ್ನು ಬಳಸಿಕೊಳ್ಳಲಾಗುತ್ತಿದೆ. ಈ ಮೂಲಕ ಪರಿಸರ ಸ್ನೇಹಿ ವಸ್ತುಗಳಿಗೆ ಉತ್ತೇಜಿಸಲಾಗುವುದು. ಅಲ್ಲದೇ ಆರ್ಥಿಕ ಪುನರುಜ್ಜೀವನ ಸೇರಿದಂತೆ ಉದ್ಯೋಗ ಸೃಷ್ಟಿಗೆ ಅವಕಾಶ ಕಲ್ಪಿಸಲಾಗಿದೆ. ಹೊಸ ಕಟ್ಟಡ ನಿರ್ಮಾಣ ಕಾರ್ಯದ ಹಿನ್ನಲೆ ಪ್ರಸ್ತುತ ಸಂಸತ್​ಭವನದ ಮುಂದೆ ಸ್ಥಾಪಿಸಲಾಗಿರುವ ಐದು ಪ್ರತಿಮೆಗಳನ್ನು ತಾತ್ಕಾಲಿಕವಾಗಿ ಸ್ಥಳಾಂತರಗೊಳಿಸಲಾಗಿದೆ. ಕಟ್ಟಡ ನಿರ್ಮಾಣ ಕಾರ್ಯ ಮುಗಿದ ಬಳಿಕ ಇವುಗಳನ್ನು ಪುನಃ ಪ್ರತಿಷ್ಠಾಪಿಸಲಾಗುವುದು ಎಂದು ಪಿಟಿಐ ವರದಿ ಮಾಡಿದೆ.

ಈ ಹೊಸ ಸಂಸತ್​ ಭವನವನ್ನು ಸೆಂಟ್ರಲ್​ ವಿಸ್ಟಾ ಪುನರಾಭಿವೃದ್ಧಿ ಯೋಜನೆಯಡಿಯಲ್ಲಿ ನಿರ್ಮಿಸಲಾಗುವುದು. 21 ತಿಂಗಳ ಅವಧಿಯೊಳಗೆ ಹೊಸ ಸಂಸತ್​ ಕಾರ್ಯ ನಿರ್ಮಾಣ ಪೂರ್ಣಗೊಳ್ಳುವ ಸಾಧ್ಯತೆ ಇದೆ

ಹೊಸ ಸಂಸತ್​ ಭವನದಲ್ಲಿ ಪ್ರತಿ ಸಂಸದರಿಗೆ ಪ್ರತ್ಯೇಕ ಕಚೇರಿ ವ್ಯವಸ್ಥೆ ಮಾಡಲಾಗಿದೆ. ಅಲ್ಲದೇ ಕಾಗದ ರಹಿತ ಆಡಳಿತಕ್ಕೆ ಒತ್ತು ನೀಡಲು ಡಿಜಿಟಲ್​ ಇಂಟರ್​​ಪೇಸ್​ಗೆ ಒತ್ತು ನೀಡಲಾಗಿದೆ. ಜೊತೆಗೆ ಭಾರತದ ಪ್ರಜಾಪ್ರಭುತ್ವದ ಪ್ರದರ್ಶನಕ್ಕೆ ದೊಡ್ಡದಾದ ಸಂವಿಧಾನ ಕೋಣೆ, ಗ್ರಂಥಾಲಯ, ಸಂಸದರಿಗೆ ವಿಶ್ರಾಂತಿ ಕೋಣೆ, ಬಹು ಸಮಿತಿ ಕೊಠಡಿ, ಡೈನಿಂಗ್​ ಸ್ಥಳ ಮತ್ತು ವಿಶಾಲವಾದ ಪಾರ್ಕಿಂಗ್​ ಸ್ಥಳ ವ್ಯವಸ್ಥೆ ಮಾಡಲಾಗಿದೆ.

ಇದನ್ನು ಓದಿ: ನೂತನ ಸಂಸತ್ ಭವನದ ಕಟ್ಟಡಕ್ಕೆ ಶಿಲಾನ್ಯಾಸ ನೆರವೇರಿಸಿದ ಪ್ರಧಾನಿ ನರೇಂದ್ರ ಮೋದಿ

ಸಂಸತ್​ ಭವನದ ಎದುರಿರುವ ಗೇಟ್​ ನಂ 1ರ ಮುಂದಿರುವ ಮಹಾತ್ಮ ಗಾಂಧಿ ಅವರ 16 ಅಡಿ ಎತ್ತರದ ಪ್ರತಿಮೆಯನ್ನು ತಾತ್ಕಲಿಕವಾಗಿ ಸ್ಥಳಾಂತರಗೊಳಿಸಲಾಗುತ್ತಿದೆ. ಈ ಪ್ರತಿಮೆಯ ಎದುರೇ ಸಂಸದರ ಪ್ರತಿಭಟನೆ, ಸಭೆಗಳು ಹಾಗೂ ಪತ್ರಿಕಾ ಗೋಷ್ಠಿಗಳು ನಡೆಯುತ್ತಿದ್ದವು. ಮಹಾತ್ಮಗಾಂಧಿ ಅವರು ಧ್ಯಾನ ಭಂಗಿಯಲ್ಲಿರುವ ಈ ಪ್ರತಿಮೆಯನ್ನು 1993ರ ಅಕ್ಟೋಬರ್​ ಎರಡರಂದು ಅಂದಿನ ರಾಷ್ಟ್ರಾಧ್ಯಕ್ಷರಾದ ಡಾ. ಶಂಕರ್​ ದಯಾಳ್​ ಶರ್ಮಾ ಅವರು ಅನಾವಣಗೊಳಿಸಿದ್ದರು. ರಾಮ್​ ಸುತಾರ್​ ಈ ಪ್ರತಿಮೆಯನ್ನು ನಿರ್ಮಾಣ ಮಾಡಿದ್ದರು. ಈ ಪ್ರತಿಮೆಯನ್ನು ನಗರಾಭಿವೃದ್ಧಿ ಸಚಿವಾಲಯ ದಾನ ಮಾಡಿದೆ ಎಂದು ರಾಜ್ಯಸಭಾ ಜಾಲತಾಣದಲ್ಲಿನ ಮಾಹಿತಿ ತಿಳಿಸಿದೆ.

ಹೊಸ ಸಂಸತ್​ ನಿರ್ಮಾಣವನ್ನು ಟಾಟಾ ಪ್ರಾಜೆಕ್ಟ್​ ಲಿಮಿಟೆಡ್​ ಗುತ್ತಿಗೆ ಪಡೆದಿದೆ. ಸೆಪ್ಟೆಂಬರ್​ನಲ್ಲಿ ಕರೆಯಲಾದ ಬಿಡ್​ನಲ್ಲಿ ಟಾಟಾ 861.90 ಕೋಟಿ ವೆಚ್ಚದಲ್ಲಿ ಕಟ್ಟಡ ನಿರ್ಮಾಣ ಮಾಡುವುದಾಗಿ ತಿಳಿಸಿ, ಬಿಡ್​ ಗೆದ್ದಿತ್ತು.  ಹೊಸ ಸಂಸತ್​ ಭವನ ನಿರ್ಮಾಣವಾದ ಬಳಿಕ ಪ್ರಸ್ತುತ ಸಂಸತ್​ ಕಟ್ಟಡವನ್ನು ಬೇರೆ ಉಪಯೋಗಕ್ಕೆ ಬಳಸಲಾಗುವುದು.