Photo Viral: ಡಿವೈಎಸ್​ಪಿ ಮಗಳಿಗೆ ಕೆಲಸದ ವೇಳೆ ಸಲ್ಯೂಟ್​ ಹೊಡೆದ ಇನ್ಸ್​ಪೆಕ್ಟರ್​ ಅಪ್ಪ

ಸರ್ಕಲ್​​ ಇನ್​​​ಸ್ಪೆಕ್ಟರ್​ ಆಗಿರುವ ತಂದೆ ಡಿವೈಎಸ್​ಪಿ ಹುದ್ದೆಯಲ್ಲಿರುವ ಮಗಳಿಗೆ ಸಲ್ಯೂಟ್​ ಹೊಡೆದ ಅದ್ಭುತ ದೃಶ್ಯ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿದೆ. 

ಸರ್ಕಲ್​ ಇನ್​ಸ್ಪೆಕ್ಟರ್ ಆಗಿರುವ​ ವೈ ಶ್ಯಾಮ್​​ ಸುಂದರ್​​ ಅವರು ಗುಂಟೂರ್​ ಜಿಲ್ಲೆಯ ಉಪ ಪೊಲೀಸ್ ವರಿಷ್ಠಾಧಿಕಾರಿ ಹುದ್ದೆಯಲ್ಲಿರುವ(DYSP) ಮಗಳು ಎಂಡ್ಲೂರು​ ಜೆಸ್ಸಿ ಪ್ರಶಾಂತಿ ಅವರಿಗೆ ಸಲ್ಯೂಟ್​ ಹೊಡೆದಿದ್ದಾರೆ. ತಿರುಪತಿಯಲ್ಲಿ ನಡೆದ ಇಗ್ನೈಟ್​ ಕಾರ್ಯಕ್ರಮದ ವೇಳೆ ಹಾಜರಾಗಿದ್ದ ತಂದೆ-ಮಗಳ ಅದ್ಭುತ ದೃಶ್ಯವನ್ನು ನೆರೆದಿದ್ದ ಹಿರಿಯ ಪೊಲೀಸ್​ ಅಧಿಕಾರಿಗಳು ಕ್ಯಾಮೆರಾದ ಮೂಲಕ ಸೆರೆಹಿಡಿದಿದ್ದಾರೆ.

ತಿರುಪತಿಯಲ್ಲಿ ರಾಜ್ಯ ಪೊಲೀಸ್​​ ಕರ್ತವ್ಯ ಸಭೆಯನ್ನು ಆಯೋಜಿಸಲಾಗಿತ್ತು. Ignite​ ಎಂಬ ಹೆಸರಿನಲ್ಲಿ ಈ ಸಭೆಯನ್ನು ನಡೆಸಲಾಗುತ್ತಿದೆ. ಜನವರಿ 4ರಿಂದ ಪ್ರಾರಂಭವಾಗಿ 7ರವರೆಗೆ ಈ ಕಾರ್ಯಕ್ರಮ ನಡೆಯಲಿದೆ. ಈ ವೇಳೆ ಸರ್ಕಲ್​ ಇನ್​​​ಸ್ಪೆಕ್ಟರ್​  ವೈ ಶ್ಯಾಮ್​ ಸುಂದರ್​ ಅವರು ತಮ್ಮ ಮಗಳನ್ನು ಕಂಡು ಹತ್ತಿರ ಬಂದು ಸಲ್ಯೂಟ್​ ಹೊಡೆದಿದ್ದಾರೆ. ತಂದೆ ತನಗೆ ಸಲ್ಯೂಟ್​​ ಹೊಡೆಯುತ್ತಿರುವದನ್ನು ಗಮನಿಸಿದ ಡಿವೈಎಸ್​ಪಿ ಜೆಸ್ಸಿ ಪ್ರಶಾಂತಿ ಅವರು ಅಪ್ಪ ಎಂದು ಕರೆದಿದ್ದಾರೆ.

ಈ ಬಗ್ಗೆ ಮಾತನಾಡಿದ್ದ ಗುಂಟೂರು ಡಿವೈಎಸ್​ಸಿ ಜೆಸ್ಸಿ ಪ್ರಶಾಂತಿ, ನನ್ನ ತಂದೆ ನನಗೆ ಸಲ್ಯೂಟ್​ ಮಾಡಿದರು . ನಾವು ಕರ್ತವ್ಯದಲ್ಲಿರುವಾಗ ಭೇಟಿ ಆಗುತ್ತಿರುವುದು ಇದೇ ಮೊದಲು. ತಂದೆ ನನಗೆ ಸಲ್ಯೂಟ್​​ ಹೊಡೆದಾಗ ನಾನು ಆರಾಮಧಾಯವಾಗಿರಲಿಲ್ಲ. ನನಗೆ ನಮಸ್ಕರಿಸಬೇಡಿ ಎಂದು ಹೇಳಿದೆ. ಮತ್ತೆ ನಾನು ಕೂಡ ಅವರಿಗೆ ಸೆಲ್ಯೂಟ್​ ಹೊಡೆದೆ ಎಂದು ಹೇಳಿದರು.

ನಂತರ ಮಾತು ಮುಂದುವರಿಸಿದ ಅವರು, ನನ್ನ ತಂದೆ ನನಗೆ ಸ್ಫೂರ್ತಿ, ಅವರು ಪಟ್ಟು ಬಿಡದೆ ಸೇವೆ ಸಲ್ಲಿಸುತ್ತಿರುವುದನ್ನು ಕಂಡು ನಾನು ಬೆಳೆದಿದ್ದೇನೆ. ಅವರು ಅನೇಕರಿಗೆ ತಮ್ಮ ಕೈಯಲ್ಲಾದಷ್ಟು ಸಹಾಯ ಮಾಡುತ್ತಾ ಬಂದಿದ್ದಾರೆ. ಅದನ್ನು ಕಂಡ ನಾನು ಈ ವಿಭಾಗವನ್ನು ಆಯ್ಕೆ ಮಾಡಲು ಕಾರಣವೆಂದು ಹೇಳಬಹುದು. ಇಲಾಖೆಯ ಬಗ್ಗೆ ನನಗೆ ಸಕಾರಾತ್ಮಕ ದೃಷ್ಟಕೋನವಿದೆ ಎಂದರು.

#APPolice1stDutyMeet brings a family together!

Circle Inspector Shyam Sundar salutes his own daughter Jessi Prasanti who is a Deputy Superintendent of Police with pride and respect at #IGNITE which is being conducted at #Tirupati.

A rare & heartwarming sight indeed!#DutyMeet pic.twitter.com/5r7EUfnbzB

— Andhra Pradesh Police (@APPOLICE100) January 3, 2021

Yendluru Jessy Prasanthi  2018ರ ಬ್ಯಾಚ್​ ಆಗಿದ್ದಾರೆ. ಇಲಾಖೆಗೆ ಸೇರಿ ಕರ್ತವ್ಯದಲ್ಲಿದ್ದಾಗ ಇದೇ ಮೊದಲ ಬಾರಿಗೆ ತಂದೆಯೊಂದಿಗೆ ಮುಖಾಮುಖಿಯಾಗಿದ್ದಾರೆ.

ಸದ್ಯ ಸಾಮಾಜಿಕ ಜಾಲತಾಣದಲ್ಲಿ ಡಿವೈಎಸ್​ಪಿ ಮಗಳು ಮತ್ತು ಸರ್ಕಲ್​ ಇನ್​​ಸ್ಪೆಕ್ಟರ್​ ತಂದೆಯ ಈ ಅದ್ಭುತ ದೃಶ್ಯ ವೈರಲ್​ ಆಗುತ್ತಿದೆ. ಅನೇಕರು ಅಪ್ಪ-ಮಗಳ ಕಂಡು ಹಾರೈಸುತ್ತಿದ್ದಾರೆ.