ತೇಜಸ್ ಯುದ್ಧವಿಮಾನ ಖರೀದಿಗೆ ಹೆಚ್ಎಎಲ್ ಜೊತೆ 48,000 ಕೋಟಿ ರೂ ಒಪ್ಪಂದಕ್ಕೆ ಸಹಿ

ಬೆಂಗಳೂರು(ಫೆ. 03): ಸಿಲಿಕಾನ್ ಸಿಟಿಯಲ್ಲಿ ನಡೆಯುತ್ತಿರುವ ಏರೋ ಇಂಡಿಯಾ ಶೋನ ಮೊದಲ ದಿನ ಹೆಚ್​ಎಎಲ್ ಸಂಸ್ಥೆಗೆ ಭರ್ಜರಿ ಒಪ್ಪಂದ ಸಿಕ್ಕಿದೆ. 83 ತೇಜಸ್ ಲೈಟ್ ಕಾಂಬಾಟ್ ಯುದ್ಧವಿಮಾನಗಳ ಖರೀದಿಗಾಗಿ ಹೆಚ್​ಎಎಲ್ ಜೊತೆ ಸರ್ಕಾರ 48,000 ಕೋಟಿ ರೂ ಒಪ್ಪಂದಕ್ಕೆ ಇಂದು ಅಧಿಕೃತವಾಗಿ ಸಹಿ ಹಾಕಿದೆ. ಇವತ್ತಿನ ಏರೋ ಇಂಡಿಯಾ ಶೋನ ಉದ್ಘಾಟನಾ ಸಮಾರಂಭದಲ್ಲಿ ರಕ್ಷಣಾ ಇಲಾಖೆ ಡಿಜಿ ವಿ ಎಲ್ ಕಾಂತ ರಾವ್ ಅವರು ಒಪ್ಪಂದವನ್ನ ಹೆಚ್​ಎಲ್​ನ ಛೇರ್ಮನ್ ಮತ್ತು ಎಂಡಿ ಆರ್ ಮಾಧವನ್ ಅವರಿಗೆ ಹಸ್ತಾಂತರಿಸಿದರು. ಈ ವೇಳೆ ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಕೂಡ ಉಪಸ್ಥಿತರಿದ್ದರು.

ಹೆಚ್​ಎಲ್ ಸಂಸ್ಥೆಯೇ ತೇಜಸ್ ಅನ್ನ ದೇಶೀಯವಾಗಿ ಅಭಿವೃದ್ಧಿಪಡಿಸಿದೆ. ತೇಜಸ್ ಹಗುರ ಯುದ್ಧವಿಮಾನವಾದರೂ ಬಹಳ ಶಕ್ತಿಶಾಲಿಯಾಗಿದೆ. ಸಿಂಗಲ್ ಎಂಜಿನ್​ನ ಮಲ್ಟಿ ರೋಲ್ ಸೂಪರ್ ಸಾನಿಕ್ ಫೈಟರ್ ವಿಮಾನವಾಗಿರುವ ತೇಜಸ್ ಎಂಥದ್ದೇ ಅಪಾಯದ ವಾತಾವರಣದಲ್ಲೂ ಕ್ಷಮತೆಯಿಂದ ಕಾರ್ಯನಿರ್ವಹಿಸಬಲ್ಲುದು. ಭಾರತದ ವಾಯುಪಡೆಗೆ ಈ ಯುದ್ಧವಿಮಾನಗಳು ಪ್ರಬಲ ಅಸ್ತ್ರವೆನಿಸಲಿವೆ.

ಹೆಚ್​ಎಎಲ್​ನಿಂದ 73 ತೇಜಸ್ ಮಾರ್ಕ್-1A ಮತ್ತು 10 ಎಲ್​ಸಿಎ ಮಾರ್ಕ್-1 ತರಬೇತಿ ವಿಮಾನಗಳನ್ನ ಖರೀದಿಸುವ ಒಪ್ಪಂದಕ್ಕೆ ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದಲ್ಲಿ ಕಳೆದ ತಿಂಗಳು ನಡೆದ ಸಂಪುಟ ಭದ್ರತಾ ಸಮಿತಿ ಅನುಮೋದನೆ ನೀಡಿತ್ತು.

ಇದನ್ನೂ ಓದಿ: ಭಾರತದೊಂದಿಗಿನ ಬಂದರು ಅಭಿವೃದ್ಧಿ ಒಪ್ಪಂದ ರದ್ದುಗೊಳಿಸಿ ಶಾಕ್ ಕೊಟ್ಟ ಶ್ರೀಲಂಕಾ

“ಹೆಚ್​ಎಎಲ್ ದೇಶೀಯವಾಗಿ ಅಭಿವೃದ್ಧಿಪಡಿಸಿರುವ 83 ಹೊಸ ತೇಜಸ್ MK1A ಎಲ್​ಸಿಎಗಳನ್ನ ಖರೀದಿಸಲು ಭಾರತೀಯ ವಾಯು ಪಡೆ 48 ಸಾವಿರ ಕೋಟಿ ರೂ ಮೊತ್ತದ ಆರ್ಡರ್​ಗಳನ್ನ ನೀಡಿದ್ದು ನನಗೆ ಸಂತಸ ತಂದಿದೆ. ಇದು ಮೇಕ್ ಇನ್ ಇಂಡಿಯಾ ಆಶಯದಲ್ಲಿ ನಡೆದ ಅತಿದೊಡ್ಡ ರಕ್ಷಣಾ ಒಪ್ಪಂಕವಾಗಿದೆ” ಎಂದು ಈ ವೇಳೆ ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಪ್ರತಿಕ್ರಿಯಿಸಿದ್ದಾರೆ.