H1N2: ಕೆನಡಾದಲ್ಲಿ ಮೊದಲ ಹೆಚ್​1ಎನ್​2 ಸೋಂಕು ಪತ್ತೆ; ಅಪರೂಪದ ಈ ಹಂದಿಜ್ವರದ ಬಗ್ಗೆ ಇಲ್ಲಿದೆ ಮಾಹಿತಿ

ನವದೆಹಲಿ (ನ. 5): ಕೊರೋನಾ ಎಂಬ ಮಾರಣಾಂತಿಕ ವೈರಸ್​ ಇಡೀ ವಿಶ್ವವನ್ನೇ ಆವರಿಸಿಕೊಂಡು, ಲಕ್ಷಾಂತರ ಜನರ ಜೀವವನ್ನೇ ಬಲಿ ತೆಗೆದುಕೊಂಡಿದೆ. ಕೊರೋನಾಗೆ ಚಿಕಿತ್ಸೆ ಕಂಡುಹಿಡಿಯಲು ಎಲ್ಲ ದೇಶಗಳ ವಿಜ್ಞಾನಿಗಳು ಪರದಾಡುತ್ತಿರುವಾಗ ಕೆನಡಾದಲ್ಲಿ ಮತ್ತೊಂದು ಬಗೆಯ ಹಂದಿಜ್ವರ ಕಾಣಿಸಿಕೊಂಡಿದೆ. ಈ ಬಗ್ಗೆ ನಿನ್ನೆ ಕೆನಡಾದ ಅಲ್ಬರ್ಟಾದ ಆರೋಗ್ಯಾಧಿಕಾರಿ  ಡಾ. ಡೀನಾ ಹಿನ್ಶಾ ಪ್ರಕಟಣೆ ಹೊರಡಿಸಿದ್ದು, ವ್ಯಕ್ತಿಯೊಬ್ಬರು ಅತ್ಯಂತ ಅಪರೂಪದ ಹೆಚ್​1ಎನ್​ ಸೋಂಕಿಗೆ ತುತ್ತಾಗಿರುವ ಮೊದಲ ಪ್ರಕರಣ ಕೆನಡಾದಲ್ಲಿ ಪತ್ತೆಯಾಗಿದೆ ಎಂದು ತಿಳಿಸಿದೆ.

ಅಕ್ಟೋಬರ್ ಅಂತ್ಯದಲ್ಲಿ ಕೆನಡಾದಲ್ಲಿ ಈ ವೈರಸ್​ ಕಾಣಿಸಿಕೊಂಡಿದ್ದು, ವ್ಯಕ್ತಿಯೊಬ್ಬರಿಗೆ ಅತ್ಯಂತ ಅಪರೂಪದ ಹಂದಿಜ್ವರದ ಲಕ್ಷಣಗಳು ಕಾಣಿಸಿಕೊಂಡಿದೆ. ಆದರೆ, ಆರಂಭಿಕ ಹಂತದಲ್ಲೇ ಈ ಸೋಂಕು ಪತ್ತೆಯಾಗಿರುವುದರಿಂದ ವ್ಯಕ್ತಿಯ ಜೀವಕ್ಕೆ ಯಾವುದೇ ಅಪಾಯವಿಲ್ಲ. ಕೆನಡಾ ಮೂಲದವರಲ್ಲೇ ಈ ಹೆಚ್​1ಎನ್​2 ಸೋಂಕು ಪತ್ತೆಯಾಗಿದ್ದು, ಔಷಧಿ ಕಂಡುಹಿಡಿಯುವ ಬಗ್ಗೆ ಅಧ್ಯಯನಗಳು ನಡೆಯುತ್ತಿವೆ ಎಂದು ಕೆನಡಾ ಆರೋಗ್ಯಾಧಿಕಾರಿಗಳು ತಿಳಿಸಿದ್ದಾರೆ.

ಈ ಸೋಂಕು ಕಾಣಿಸಿಕೊಂಡ ರೋಗಿ ಅತಿಯಾದ ಚಳಿ, ಜ್ವರ, ಸುಸ್ತಿನಿಂದ ಬಳಲುತ್ತಿದ್ದರು. ಕೊರೋನಾ ಸೋಂಕು ತಗುಲಿರಬಹುದು ಎಂದು ಪರೀಕ್ಷೆ ಮಾಡಿದಾಗ ಹೆಚ್​1ಎನ್​2 ಸೋಂಕು ಹರಡಿರುವುದು ಪತ್ತೆಯಾಗಿದೆ. ಸದ್ಯದ ಮಟ್ಟಿಗೆ ಈ ವೈರಸ್ ಬೇರೆಯವರಿಗೂ ಹರಡುತ್ತದೆಯಾ? ಎಂಬ ಬಗ್ಗೆ ಯಾವುದೇ ಖಚಿತ ಮಾಹಿತಿ ಸಿಕ್ಕಿಲ್ಲ. ಕೆನಡಾದಲ್ಲಿ ಇದು ಹೆಚ್​1ಎನ್​2 ಮೊದಲ ಪ್ರಕರಣವಾಗಿರುವುದರಿಂದ ಇನ್ನಷ್ಟು ಅಧ್ಯಯನಗಳು ನಡೆಯಬೇಕಿದೆ.

ಇದನ್ನೂ ಓದಿ: ಬೆಂಗಳೂರಿನಲ್ಲಿ ಸೆಕ್ಯುರಿಟಿಗೆ ಮಾರಕಾಸ್ತ್ರಗಳಿಂದ ಹೆದರಿಸಿ ದರೋಡೆ ಮಾಡಿದ್ದ ಐವರ ಬಂಧನ

ಹೆಚ್​1ಎನ್​2 ವೈರಸ್​ ಹೇಗೆ ರೋಗಿಯ ದೇಹದೊಳಗೆ ಪ್ರವೇಶಿಸಿತು? ಈ ಸೋಂಕು ಸಾಂಕ್ರಾಮಿಕವೇ? ಯಾವೆಲ್ಲ ರೀತಿಯಲ್ಲಿ ಈ ವೈರಸ್ ಹರಡುತ್ತದೆ ಎಂಬ ಬಗ್ಗೆ ಕೆನಡಾದ ಆರೋಗ್ಯ ಇಲಾಖೆ ಅಧ್ಯಯನ ನಡೆಸುತ್ತಿದೆ. 2005ರಿಂದ ಇಡೀ ವಿಶ್ವಾದ್ಯಂತ ಇದುವರೆಗೂ ಕೇವಲ 27 ಹೆಚ್​1ಎನ್​2 ಸೋಂಕು ಹರಡಿರುವ​ ಪ್ರಕರಣಗಳು ಪತ್ತೆಯಾಗಿವೆ. ಹೆಚ್​1ಎನ್​1 ರೀತಿಯ ಲಕ್ಷಣಗಳನ್ನೇ ಹೊಂದಿರುವ ಈ ವೈರಸ್​ ಬಗ್ಗೆ ಇನ್ನೂ ಅಧ್ಯಯನಗಳು ನಡೆಯುತ್ತಿವೆ. ಕೆನಡಾದಲ್ಲಿ ಇದು ಮೊದಲ ಪ್ರಕರಣವಾಗಿದೆ.

ಹಂದಿಯ ಉತ್ಪನ್ನಗಳನ್ನು ಸೇವಿಸುವುದರಿಂದ ಅಥವಾ ಆಹಾರದ ಮೂಲಕವೇ ಹೆಚ್​1ಎನ್​2 ಸೋಂಕು ಹರಡುತ್ತದೆ ಎನ್ನಲು ಸಾಧ್ಯವಿಲ್ಲ. ಸದ್ಯದ ಮಾಹಿತಿ ಪ್ರಕಾರ ಇದು ಸೋಂಕಿತ ಹಂದಿಯಿಂದ ಹರಡುತ್ತದೆ. ಹಾಗೇ, ಮನುಷ್ಯನಿಂದ ಮನುಷ್ಯನಿಗೆ ಸುಲಭವಾಗಿ ಹರಡುವುದಿಲ್ಲ ಎಂದು ಕೆನಡಾದ ಚೀಫ್ ಪಬ್ಲಿಕ್ ಹೆಲ್ತ್​ ಆಫೀಸರ್ ತೆರೆಸಾ ಟಾಮ್ ಟ್ವೀಟ್ ಮಾಡಿದ್ದಾರೆ.