Hardik Patel: ಮೋದಿ ವಾರಸುದಾರ ಆಗ್ತಾರಾ ಹಾರ್ದಿಕ್ ಪಟೇಲ್?

ಹಾರ್ದಿಕ್ ಪಟೇಲ್, ನರೇಂದ್ರ ಮೋದಿ

ಹಾರ್ದಿಕ್ ಪಟೇಲ್, ನರೇಂದ್ರ ಮೋದಿ

ಆದರೆ ಇಷ್ಟು ದೊಡ್ಡ ಗೆಲುವಿನ ನಂತರವೂ ಹಾರ್ದಿಕ್ ಪಟೇಲ್ ಜಯಭೇರಿ ಇದೀಗ ಮೂಲ ಬಿಜೆಪಿ ಕಾರ್ಯಕರ್ತರಲ್ಲಿ ಸ್ವಲ್ಪ ಅಸಮಾಧಾನವನ್ನೂ ಉಂಟುಮಾಡಿದೆ ಎನ್ನಲಾಗುತ್ತಿದೆ. 

  • News18 Kannada
  • Last Updated :
  • Gujarat, India
  • Share this:

ಕಾಂಗ್ರೆಸ್ ಬಿಟ್ಟು ಕಮಲ ಮುಡಿದಿದ್ದ ಹಾರ್ದಿಕ್ ಪಟೇಲ್ ಒಂದಲ್ಲ ಎರಡಲ್ಲ, ಬರೋಬ್ಬರಿ 50 ಸಾವಿರ ಮತಗಳಿಂದ ಗುಜರಾತ್ ವಿಧಾನಸಭಾ ಚುನಾವಣೆಯಲ್ಲಿ (Gujarat Election Result 2022) ಜಯಭೇರಿ ಬಾರಿಸಿದ್ದಾರೆ. ಗುಜರಾತ್ ಮುಖ್ಯಮಂತ್ರಿಯಾಗಿ ಭೂಪೇಂದ್ರ ಪಟೇಲ್ (Bhupendra Patel) ಪದಗ್ರಹಣ ನಡೆಸುತ್ತಾರೆ ಎಂದು ಈಗಾಗಲೇ ಬಿಜೆಪಿ ಸ್ಪಷ್ಟಪಡಿಸಿದೆ. ಆದರೆ ಪ್ರಧಾನಿ ನರೇಂದ್ರ ಮೋದಿಯವರ (PM Narendra Modi) ನಂತರ ಗುಜರಾತ್​ನಲ್ಲಿ ಹಾರ್ದಿಕ್ ಪಟೇಲ್​ ಎಂಬ ಯುವ ನಾಯಕತ್ವಕ್ಕೆ ಭಾರೀ ಬೆಂಬಲ ವ್ಯಕ್ತವಾಗಿದೆ.  ಹೀಗಾಗಿ ಮೋದಿ ನಂತರ ಗುಜರಾತ್​ಗೆ ಹಾರ್ದಿಕ್ ಪಟೇಲ್  (Hardik Patel) ದೊಡ್ಡ ಮಟ್ಟದ ನಾಯಕರಾಗಿ ಹೊರಹೊಮ್ಮುವರೇ ಎಂಬ ಆಯಾಮಗಳೂ ವ್ಯಕ್ತವಾಗುತ್ತಿವೆ. 


ಗುಜರಾತ್​ನಲ್ಲಿ ಬಿಜೆಪಿ ಮೇಲೆ  ಪಾಟೀದಾರ್ ಸಮುದಾಯ ಮುನಿಸಿಕೊಂಡಿತ್ತು. ಆದರೆ ಪಾಟೀದಾರ್ ಸಮುದಾಯದ ಮತ ಪಡೆಯುವುದು ಬಿಜೆಪಿಗೆ ಅನಿವಾರ್ಯವಾಗಿತ್ತು.  ಆದರೆ ಪಾಟೀದಾರ್ ಮತ ಬ್ಯಾಂಕ್​ನ್ನು ಬಿಜೆಪಿ ಬುಟ್ಟಿಗೆ ಹಾಕಿದ್ದು ಇದೇ ಹಾರ್ದಿಕ್ ಪಟೇಲ್. ಅವರು ಬಿಜೆಪಿ ಸೇರಿದ್ದೂ ಒಂಥರಾ ವಿಚಿತ್ರವೇ!


ಮೋದಿ ಕಂಡರೆ  ಕೆಂಡ ಕಾರುತ್ತಿದ್ದ ಹಾರ್ದಿಕ್
ಕಾಂಗ್ರೆಸ್​ನಿಂದ ಬಿಜೆಪಿಗೆ ವಲಸೆ ಬಂದಿದ್ದ ಪಾಟೀದಾರ್ ನಾಯಕ ಹಾರ್ದಿಕ್, ಬಿಜೆಪಿಯಿಂದ ಸ್ಪರ್ಧಿಸಿದ್ದರು. ಅವರ ಬಿಜೆಪಿ ಸೇರ್ಪಡೆಗೆ ಸ್ವತಃ ಬಿಜೆಪಿಯ ಮೂಲ ಕಾರ್ಯಕರ್ತರಿಂದಲೇ ಭಾರೀ ವಿರೋಧ ವ್ಯಕ್ತವಾಗಿತ್ತು. ಬಿಜೆಪಿ ಸೇರ್ಪಡೆಗೂ ಮುನ್ನ ಹಾರ್ದಿಕ್ ಪಟೇಲ್ ಪ್ರಧಾನಿ ನರೇಂದ್ರ ಮೋದಿ ಮತ್ತು ಗೃಹ ಸಚಿವ ಅಮಿತ್ ಶಾ ಇಬ್ಬರನ್ನೂ ಹಿಗ್ಗಾಮುಗ್ಗಾ ಟೀಕಿಸುತ್ತಿದ್ದರು.  


ಯುವ ನಾಯಕ ಎಂದೇ ಬಿಂಬಿತರಾಗಿದ್ರು
ಪಾಟೀದಾರ್ ಮೀಸಲಾತಿ ಚಳವಳಿಯಿಂದ ಮುನ್ನೆಲೆಗೆ ಬಂದವರು ಹಾರ್ದಿಕ್ ಪಟೇಲ್. ಪಟೇಲ್ ಸಮುದಾಯಕ್ಕೆ ಮೀಸಲಾತಿ ನೀಡಬೇಕೆಂದು ನಡೆಸಿದ್ದ ಹೋರಾಟದಿಂದ ಹಾರ್ದಿಕ್ ಭಾರೀ ಹೆಸರು ಗಳಿಸಿದ್ದರು.  ಈ ಹೋರಾಟದಿಂದ ಗುಜರಾತ್​ನ ಯುವ ಸಮುದಾಯದ ನಾಯಕ ಎಂದೇ ರಾಷ್ಟ್ರದಾದ್ಯಂತ ಬಿಂಬಿತವಾಗಿದ್ದರು.


ಕಾಂಗ್ರೆಸ್​ನಲ್ಲೇ ಮೂಲೆಗುಂಪು
ಈ ಚಳವಳಿಯ ಮೂಲಕ ರಾಜಕೀಯಕ್ಕೆ ಜಿಗಿದ ಹಾರ್ದಿಕ್ ಪಟೇಲ್ ಮೊದಲು ಕಾಂಗ್ರೆಸ್​ ಸೇರಿದ್ದರು. ಆದರೆ ಕಾಂಗ್ರೆಸ್​ನ ನಾಯಕತ್ವದ ಜೊತೆ ಅವರಿಗೆ ಹೊಂದಾಣಿಕೆ ಆಗಲಿಲ್ವಂತೆ. ಅಲಲ್ದೇ ಕಾಂಗ್ರೆಸ್ ನಾಯಕರಿಂದಲೇ ಅವರು ಮೂಲೆಗುಂಪಾಗಿದ್ದರು.  ಇದೇ ಕಾರಣದಿಂದ ಕಾಂಗ್ರೆಸ್​ನಿಂದ ಬಿಜೆಪಿಗೆ ಜಿಗಿದ ಹಾರ್ದಿಕ್​ಗೆ ಭಾರೀ ಸ್ವಾಗತ ಸಿಕ್ಕಿತು. ಆದರೆ ಅವರಿಗೆ ಬಿಜೆಪಿಯ ಮೂಲ ಕಾರ್ಯಕರ್ತರಿಂದ ಅಸಮಧಾನದ ಹೊಗೆ ಎದ್ದಿತ್ತು.


ಬಿಜೆಪಿಯಿಂದ ಭರ್ಜರಿ ಆಫರ್!
ನಂತರ ಗುಜರಾತ್​ನಲ್ಲಿ ಚುನಾವಣಾ ಕಾವು ನಿಧಾನವಾಗಿ ಹೆಚ್ಚುತ್ತಾ ಸಾಗಿತ್ತು. ಹಾರ್ದಿಕ್ ಪಟೇಲ್​ರನ್ನು ಪಾಟೀದಾರ ಸಮುದಾಯದ ಮತಬೇಟೆ ನಡೆಸಲೆಂದೇ ಬಿಜೆಪಿಗೆ ಸೇರಿಸಿಕೊಳ್ಳಲಾಗಿದೆ ಎಂಬುದು ಆಗೆಲ್ಲ ಖಚಿತವಾಗಿತ್ತು. ಅಲ್ಲದೇ ಬಿಜೆಪಿ ಹಾರ್ದಿಕ್ ಪಟೇಲ್​ ಅವರಿಗೆ ವಿರಾಮಗಾಂ ವಿಧಾನಸಭಾ ಕ್ಷೇತ್ರದ ಟಿಕೆಟ್ ಸಹ ಘೋಷಿಸಿತ್ತು.


ವಿವಿಧ ಭರವಸೆ ನೀಡಿದ್ದ ಹಾರ್ದಿಕ್ ಪಟೇಲ್
ಚುನಾವಣಾ ಪ್ರಚಾರದ ವೇಳೆ ಹಾರ್ದಿಕ್ ಪಟೇಲ್ ವಿರಾಮಗಾಂ ಜಿಲ್ಲೆಯ ಸ್ಥಾನಮಾನ ನೀಡುವುದು ಸೇರಿದಂತೆ ಹಲವು ಭರವಸೆಗಳನ್ನು ನೀಡಿದ್ದರು. ಅಷ್ಟೇ ಅಲ್ಲ, ಆಧುನಿಕ ಕ್ರೀಡಾ ಸಂಕೀರ್ಣ, ಶಾಲೆಗಳು, ಮಂಡಲ್ ತಾಲೂಕು, ನಲ್ ಸರೋವರದ ಬಳಿ ತಲಾ 50 ಹಾಸಿಗೆಗಳ ಆಸ್ಪತ್ರೆಗಳು, ವಿರಾಮಗಾಂ ಪಟ್ಟಣದಲ್ಲಿ ಸರ್ಕಾರದ ವತಿಯಿಂದ 1,000 ಮನೆಗಳು, ಕೈಗಾರಿಕಾ ವಸಾಹತು, ಉದ್ಯಾನಗಳು ಇತ್ಯಾದಿಗಳನ್ನು ನಿರ್ಮಿಸುವುದಾಗಿಯೂ ಅವರು ಭರವಸೆ ನೀಡಿದ್ದಾರೆ.


ಬಿಜೆಪಿ ಗೆಲುವಿಗೆ ಇದೆ ಹತ್ತಾರು ಕಾರಣ
ಗುಜರಾತ್ ಐತಿಹಾಸಿಕ ಗೆಲುವಿಗೆ ಹತ್ತಾರು ಕಾರಣಗಳಿವೆ. ಬಿಜೆಪಿಯ ಪ್ರತಿಹೆಜ್ಜೆಯಲ್ಲೂ ಗೆಲುವಿನ ಲೆಕ್ಕಾಚಾರ ಹಾಕಿತ್ತು. ಹೋರಾಟದ ಮೂಲಕವೇ ಮೇಲೆ ಬಂದ ಹಾರ್ದಿಕ್ ಪಟೇಲ್, ಅಲ್ಪೇಶ್ ಠಾಕೂರ್​ಗೆ ಮಣೆ ಹಾಕಿತ್ತು. ಸೌರಾಷ್ಟ್ರ ಭಾಗದಲ್ಲಿ ಎಎಪಿ ಎಂಟ್ರಿಯಿಂದ ಕಾಂಗ್ರೆಸ್ ಬಲ ಕಳೆದುಕೊಂಡಿದ್ದು, ಬಿಜೆಪಿಗೆ ವರವಾಯ್ತು.


ಇದನ್ನೂ ಓದಿ: Gujarat Election Result 2022: ಖರ್ಗೆಯ 'ರಾವಣ' ಹೇಳಿಕೆಯಿಂದ ಮೋದಿ ಫ್ಯಾಕ್ಟರ್​ವರೆಗೆ, ಬಿಜೆಪಿಗೆ ಲಾಭ ತಂದುಕೊಟ್ಟ 5 ಕಾರಣಗಳು!


ನರೇಂದ್ರ ಮೋದಿ ಆಧುನಿಕ ಗುಜರಾತ್​ನ ನಿರ್ಮಾತೃ ಎಂಬ ಸಂದೇಶ ವರ್ಕೌಟ್ ಆಯ್ತು. ಬಿಜೆಪಿ ಸಂಘಟನೆ, ದೊಡ್ಡಮಟ್ಟದ ಪ್ರಚಾರದ ಮೆರವಣಿಗೆಗಳು, ಕಾಂಗ್ರೆಸ್​ನಲ್ಲಿ ಪ್ರಚಾರದ ಕೊರತೆ, ಚುನಾವಣೆ ಮರೆತು ಭಾರತ್ ಜೋಡೋ ಯಾತ್ರೆ ನಡೆಸಿದ್ದು, ಬಿಜೆಪಿ ಸಕ್ಸಸ್​ಗೆ ಕಾರಣವಾಯ್ತು. ಅದರಲ್ಲೂ ಮೋದಿಗೆ ರಾವಣನ ಜೊತೆ ಹೋಲಿಕೆ ಮಾಡಿದ್ದು ಕಾಂಗ್ರೆಸ್​ಗೆ ಪೆಟ್ಟು ಕೊಟ್ಟಿತು.


ಹಾರ್ದಿಕ್​ಗೆ ಸಿಗುತ್ತಾ ಬಿಜೆಪಿ ಚುಕ್ಕಾಣಿ?
ಆದರೆ ಬಿಜೆಪಿ ತಾನು ಕಾರ್ಯಕರ್ತರ ಪಕ್ಷ ಎಂಬುದನ್ನು ಗುಜರಾತ್​ನಲ್ಲೂ ಸಾರಿದೆ. ಹಲವು ಘಟಾನುಘಟಿ ನಾಯಕರಿಗೆ ಟಿಕೆಟ್ ನಿರಾಕರಿಸಿ ಸ್ಪಷ್ಟ ಸಂದೇಶ ರವಾನಿಸಿತ್ತು. ಹೀಗಾಗಿ ಬಿಜೆಪಿಯಿಂದ ಹಾರ್ದಿಕ್ ಪಟೇಲ್ ಗೆದ್ದರೇ ವಿನಃ, ಸ್ವತಃ ಹಾರ್ದಿಕ್ ಪಟೇಲ್​ಗೆ ಬಿಜೆಪಿ ಚುಕ್ಕಾಣಿ ನೀಡುವ ಕುರಿತು ಅನುಮಾನಗಳಿದ್ದೇ ಇದೆ.  ಆದರೆ ಹಾರ್ದಿಕ್ ಪಟೇಲ್​ಗೆ ಸಚಿವ ಸಂಪುಟದಲ್ಲಿ ಉನ್ನತ ಜವಾಬ್ದಾರಿ ಸಿಗುವುದಂತೂ ಬಹುತೇಕ ಖಚಿತಗೊಂಡಿದೆ.  


ಇದನ್ನೂ ಓದಿ: Himachal Pradesh Assembly Elections 2022: ಯಾರಾಗ್ತಾರೆ ಹಿಮಾಚಲದ ಮುಖ್ಯಮಂತ್ರಿ, ಈ ಮಹಿಳಾ ನಾಯಕಿ ಕೈಗೆ ರಾಜ್ಯದ ಚುಕ್ಕಾಣಿ?


ಇಷ್ಟು ದೊಡ್ಡ ಗೆಲುವಿನ ನಂತರವೂ ಹಾರ್ದಿಕ್ ಪಟೇಲ್ ಜಯಭೇರಿ ಇದೀಗ ಮೂಲ ಬಿಜೆಪಿ ಕಾರ್ಯಕರ್ತರಲ್ಲಿ ಸ್ವಲ್ಪ ಅಸಮಾಧಾನವನ್ನೂ ಉಂಟುಮಾಡಿದೆ ಎನ್ನಲಾಗುತ್ತಿದೆ.  ಇದಕ್ಕೆಲ್ಲ ಕಾರಣ ಹುಡುಕಿ ಹೊರಟರೆ ಸ್ವತಃ ಹಾರ್ದಿಕ್ ಪಟೇಲ್ ಅವರೇ ಎದುರು ನಿಲ್ಲುತ್ತಾರೆ.

Published by:ಗುರುಗಣೇಶ ಡಬ್ಗುಳಿ
First published: