‘ಮೆಡಿಕಲ್ ಓದು ಮಗಳೆ‘ ಎಂದಿದ್ದೇ ತಪ್ಪಾಯ್ತು; ಕರಾಟೆ ಬೆಲ್ಟ್​​ನಿಂದ ಅಮ್ಮನನ್ನೇ ಸಾಯಿಸಿದ ಮಗಳು

ಮುಂಬೈ(ಆ.10): ನಮ್ಮ ಸುತ್ತ-ಮುತ್ತಲೂ ಅನೇಕ ಭಯಾನಕ ಘಟನೆಗಳು ನಡೆಯುತ್ತಿರುತ್ತವೆ. ಕ್ಷುಲ್ಲಕ ಕಾರಣಕ್ಕೆ ಜಗಳ, ಆ ಜಗಳ ಅತಿರೇಕಕ್ಕೆ ಹೋದರೆ ಕೊಲೆ. ಹೀಗೆ ಇಂತಹ ಘಟನೆಗಳು ನಮ್ಮ ಕಣ್ಮುಂದೆ ನಡೆಯುತ್ತವೆ. ಮಹಾನಗರಿ ಮುಂಬೈನಲ್ಲಿ ಮಗಳು ತನ್ನ ತಾಯಿಯನ್ನೇ ಕೊಲೆ ಮಾಡಿರುವ ಘಟನೆ ನಡೆದಿದೆ. ಇದು ನಿಜಕ್ಕೂ ಎಲ್ಲರಿಗೂ ಶಾಕಿಂಗ್​ ಸುದ್ದಿಯಾಗಿದೆ. 15 ವರ್ಷದ ಹುಡುಗಿ ಈ ಹೀನ ಕೃತ್ಯ ಎಸಗಿದ್ದಾಳೆ.

ಓದುವ ವಿಚಾರಕ್ಕೆ ಅಮ್ಮ-ಮಗಳ ನಡುವೆ ಜಗಳ ಶುರುವಾಗಿತ್ತು. ಮೊದಲು ಮಾತಿಗೆ ಮಾತು ಬೆಳೆದು ಬಳಿಕ ಜಗಳಕ್ಕೆ ತಿರುಗಿತು. ಈ ಜಗಳ ಇನ್ನೂ ಅತಿರೇಕಕ್ಕೆ ಹೋಯಿತು. ಆಗ ಮಗಳು ಕರಾಟೆ ಬೆಲ್ಟ್​​ನಿಂದ ತಾಯಿಯನ್ನು ಕತ್ತು ಬಿಗಿದು ಸಾಯಿಸಿದ್ದಾಳೆ. ಕೊಲೆ ಮಾಡಿದ ಬಳಿಕ ಸಹಜ ಸಾವು ಎಂದು ಬಿಂಬಿಸಲು ಯತ್ನಿಸಿದ್ದಾಳೆ.

ಈ ಘಟನೆ ಜುಲೈ 30ರಂದು ನವಿ ಮುಂಬೈನ ಐರೋಲಿ ಪ್ರದೇಶದಲ್ಲಿ ಘಟನೆ ನಡೆದಿದ್ದು, ತಡವಾಗಿ ಬೆಳಕಿಗೆ ಬಂದಿದೆ. ಇತ್ತೀಚೆಗೆ ಮೆಡಿಕಲ್​ ಕೋರ್ಸ್​​ಗೆ ಸಂಬಂಧಪಟ್ಟಂತೆ ತಾಯಿ-ಮಗಳ ನಡುವೆ ಜಗಳ ನಡೆಯುತ್ತಿತ್ತು. ತಾಯಿಗೆ ತನ್ನ ಮಗಳು ವೈದ್ಯಕೀಯ ಕೋರ್ಸ್​​ ಮಾಡಬೇಕೆಂಬ ಆಸೆ ಇತ್ತು. ಆದರೆ ಮಗಳಿಗೆ ಓದಲು ಇಷ್ಟವಿರಲಿಲ್ಲ. ಹೀಗಾಗಿ ಇದೇ ವಿಷಯಕ್ಕೆ ಅಮ್ಮ-ಮಗಳ ನಡುವೆ ಜಗಳಗಳಾಗುತ್ತಿದ್ದವು ಎಂದು ಪೊಲೀಸರು ತಿಳಿಸಿದ್ದಾರೆ.

ಇದನ್ನೂ ಓದಿ:Explained: ಒಬಿಸಿ ಪಟ್ಟಿಯಲ್ಲಿ ಬದಲಾವಣೆ ನಡೆಸಲು ಕಾರಣವೇನು? ಮಸೂದೆ ಅಂಗೀಕಾರವಾದರೆ ನಡೆಯುವ ಬದಲಾವಣೆಗಳೇನು?

ಕಳೆದ ತಿಂಗಳು ಸಹ ಮಗಳು ತನ್ನ ತಾಯಿ ವಿರುದ್ಧ ಪೊಲೀಸರಿಗೆ ದೂರು ನೀಡಿದ್ದಳು. ಬಳಿಕ ಪೊಲೀಸರು ಆಕೆಯ ಕುಟುಂಬಸ್ಥರನ್ನು ಕರೆದು ಕೌನ್ಸೆಲಿಂಗ್​ ನಡೆಸಿದ್ದರು. ಜುಲೈ 30ರಂದು ಹುಡುಗಿ ಪೊಲೀಸರಿಗೆ ಕರೆ ಮಾಡಿ ನನ್ನ ತಾಯಿ ಕುಸಿದು ಬಿದ್ದು, ಸಾವನ್ನಪ್ಪಿದ್ದಾರೆ ಎಂದು ಹೇಳಿದಳು. ಕೂಡಲೇ ಪೊಲೀಸರು ಸ್ಥಳಕ್ಕೆ ಬಂದು ಪರಿಶೀಲನೆ ನಡೆಸಿದರು. ಬಳಿಕ ಮಹಿಳೆಯ ಮೃತದೇಹವನ್ನು ಫಾರೆನ್ಸಿಕ್​ ಪರೀಕ್ಷೆಗೆ ಕಳುಹಿಸಿದರು. ಆಗ ಮಹಿಳೆಯನ್ನು ಕತ್ತು ಹಿಸುಕಿ ಕೊಲೆ ಮಾಡಲಾಗಿದೆ ಎಂದು ವರದಿ ಬಂತು.

ಪೊಲೀಸರು ಮಹಿಳೆಯ ಮಗಳನ್ನು ಕರೆದು ವಿಚಾರಣೆ ನಡೆಸಿದಾಗ ಆಕೆಯೇ ತನ್ನ ತಾಯಿಯನ್ನು ಕೊಲೆ ಮಾಡಿದ್ದಾಳೆ ಎಂದು ತಿಳಿದು ಬಂದಿತು. ಕರಾಟೆ ಬೆಲ್ಟ್​​ನ್ನು ತನ್ನ ಅಮ್ಮನ ಕತ್ತಿಗೆ ಬಿಗಿದು ಸಾಯಿಸಿದ್ದಾಳೆ ಎಂದು ಪೊಲೀಸರು ತಿಳಿಸಿದರು.

ಇದನ್ನೂ ಓದಿ:ನೀರಜ್‌ ಚೋಪ್ರಾ ಜೊತೆ ರೂಮ್ ಶೇರಿಂಗ್ ಎಂದರೆ ನನಗೆ ಭಯ‘..! ಗೆಳೆಯ ತೇಜಸ್ವಿನ್ ಹೀಗೇಕೆ ಹೇಳಿದರು?

ಸದ್ಯ ಆರೋಪಿತ ಹುಡುಗಿ ಪೊಲೀಸರ ವಶದಲ್ಲಿದ್ದು, ಐಪಿಸಿ ಸೆಕ್ಷನ್ 302ರ ಅಡಿಯಲ್ಲಿ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.