Germany Recession: ಶ್ರೀಲಂಕಾ ಆಯ್ತು, ಬ್ರಿಟನ್ ಆಯ್ತು ಈಗ ಜರ್ಮನಿಗೆ ಆರ್ಥಿಕ ಭೀತಿ! ಡಾಲರ್ ಎದುರು ಕುಸಿದ ಯೂರೋ!

ಯುರೋಪ್‌ನ (Europe) ಅತಿದೊಡ್ಡ ಆರ್ಥಿಕತೆಯಾಗಿರುವ ಜರ್ಮನಿಯು ಅಧಿಕೃತವಾಗಿ ಆರ್ಥಿಕ ಹಿಂಜರಿತಕ್ಕೆ ಕಾಲಿಟ್ಟಿದೆ. ಯುರೋಪ್​ನಲ್ಲಿ ಆರ್ಥಿಕ ಕುಸಿತ ಹೆಚ್ಚಾಗುತ್ತಿರುವ ಬೆನ್ನಲ್ಲೇ ಗುರುವಾರ ಡಾಲರ್ ಎದುರು ಯೂರೋ​​ ಎರಡು ತಿಂಗಳ ಗರಿಷ್ಠ ಮಟ್ಟಕ್ಕೆ ಕುಸಿದಿದೆ. ರೇಟಿಂಗ್ ಏಜೆನ್ಸಿ ಫಿಚ್ ಅಮೆರಿಕದ "AAA" ಸಾಲದ ರೇಟಿಂಗ್‌ಗಳನ್ನು (Rating) ಋಣಾತ್ಮಕ ವೀಕ್ಷಣೆಯಲ್ಲಿ ಇರಿಸಿದೆ. ಇದಾದ ಬೆನ್ನಲ್ಲೇ ಹೂಡಿಕೆದಾರರಲ್ಲಿ ಕಳವಳ ಹೆಚ್ಚಾಗಿದ್ದು, ಸುರಕ್ಷಿತ ಹೂಡಿಕೆ ಮಾರ್ಗಗಳ ಅನ್ವೇಷಣೆಯಲ್ಲಿ ತೊಡಗಿದ್ದಾರೆ. ಪರಿಣಾಮ ಹೆಚ್ಚೆಚ್ಚು ಡಾಲರ್‌ (Dollor) ಖರೀದಿಗೆ ಮುಗಿಬಿದ್ದಿದ್ದಾರೆ.

ಇದರ ಕುರಿತು ಡ್ಯಾನ್ಸ್‌ಕೆ ಬ್ಯಾಂಕ್‌ನ ಹಿರಿಯ ವಿಶ್ಲೇಷಕ ಹೇಳಿರುವುದೇನು?

“ಇದು ಈ ವಾರ ಅಪಾಯವನ್ನುಂಟುಮಾಡಿದೆ ಮತ್ತು ಇದರಿಂದ ಡಾಲರ್‌ನ ಮೌಲ್ಯ ಹೆಚ್ಚಾಗಿ ಅದು ಸಾಕಷ್ಟು ಪ್ರಯೋಜನವನ್ನು ಪಡೆಯುತ್ತಿದೆ” ಎಂದು ಎಂದು ಡ್ಯಾನ್ಸ್‌ಕೆ ಬ್ಯಾಂಕ್‌ನ ಹಿರಿಯ ವಿಶ್ಲೇಷಕ ಸ್ಟೀಫನ್ ಮೆಲ್ಲಿನ್ ಹೇಳಿದರು.

ಆದರೆ ಇದೇ ವೇಳೆ ಅಮೆರಿಕ ಡಾಲರ್ ಎರಡು ತಿಂಗಳ ಗರಿಷ್ಠ ಮಟ್ಟವನ್ನು ತಲುಪಿದೆ. ಅಮೆರಿಕ ಸಾಲ ಪಾವತಿಯಲ್ಲಿ ವಿಫಲವಾಗಲಿದೆ ಎಂಬ ಆತಂಕಗಳು ಹೆಚ್ಚಾಗಿದ್ದು, ಸುರಕ್ಷಿತ ತಾಣಗಳತ್ತ ಹೂಡಿಕೆದಾರರು ಚಿತ್ತ ನೆಟ್ಟಿದ್ದರಿಂದ ಈ ಏರಿಕೆ ದಾಖಲಾಗಿದೆ.

ಸಾಂಕೇತಿಕ ಚಿತ್ರ

ಜರ್ಮನಿಯ ಆರ್ಥಿಕತೆಯು 2022ರ ನಾಲ್ಕನೇ ತ್ರೈಮಾಸಿಕದಲ್ಲಿಯೂ (ಡಿಸೆಂಬರ್‌) ನಕಾರಾತ್ಮಕ ಬೆಳವಣಿಗೆ ದಾಖಲಿಸಿತ್ತು. ಇದೀಗ ಮತ್ತೆ ಮಾರ್ಚ್‌ನಲ್ಲೂ ಕುಸಿತ ಕಂಡು ಆರ್ಥಿಕ ಹಿಂಜರಿತಕ್ಕೆ ಕಾಲಿಟ್ಟಿದೆ.

"ನಾವು ಈ ವಾರ ಕೆಲವು ಬೇರೆ ಬೇರೆ ಕ್ರಾಸ್-ಅಟ್ಲಾಂಟಿಕ್ ಮ್ಯಾಕ್ರೋ ಡೇಟಾವನ್ನು ನೋಡಿದ್ದೇವೆ. ಇದರಲ್ಲಿ ಕೇವಲ ಜರ್ಮನಿ ಯುರೋ ಅಲ್ಲದೇ, ಇನ್ನು ಹಲವಾರು ದೇಶದ ಕರೆನ್ಸಿಗಳು ಆರ್ಥಿಕತೆಯ ಹಿಂಜರಿತಕ್ಕೆ ಒಳಗಾಗಿವೆ” ಎಂದು ಡಾನ್ಸ್ಕೆ ಬ್ಯಾಂಕ್‌ನ ಹಿರಿಯ ವಿಶ್ಲೇಷಕ ಮೆಲಿನ್ ಹೇಳಿದ್ದಾರೆ.

ಆರು ಪ್ರಮುಖ ಕರೆನ್ಸಿಗಳ ವಿರುದ್ಧ ಡಾಲರ್‌ನ ಮೌಲ್ಯವನ್ನು ಅಳೆಯುವ ಯುಎಸ್‌ ಡಾಲರ್‌ ಇಂಡೆಕ್ಸ್‌ ಶೇ. 0.3ರಷ್ಟು ಏರಿಕೆ ಕಂಡಿದ್ದು 104.16ಕ್ಕೆ ಏರಿಕೆಯಾಗಿದೆ. ಇದು ಮಾರ್ಚ್‌ 17ರ ನಂತರದ ಗರಿಷ್ಠ ಮಟ್ಟವಾಗಿದೆ.

ಯೂರೋ ಸುಮಾರು ಶೇ. 0.2ರಷ್ಟು ಕುಸಿತ ಕಂಡಿದ್ದು ಡಾಲರ್‌ ವಿರುದ್ಧದ ಮೌಲ್ಯ 1.0715 ಡಾಲರ್‌ಗೆ ಇಳಿದಿದೆ. ಈ ಮೂಲಕ ಎರಡು ತಿಂಗಳ ಕನಿಷ್ಠ ಮಟ್ಟಕ್ಕೆ ಕುಸಿದಿದೆ. ಏಪ್ರಿಲ್ 3ರಂದು ಡಾಲರ್‌ ವಿರುದ್ಧ 1.2332ಕ್ಕೆ ಕುಸಿತ ಕಂಡಿದ್ದ ಬ್ರಿಟನ್‌ನ ಪೌಂಡ್‌ ಸ್ಪರ್ಲಿಂಗ್‌ ಶೇ. 0.1ರಷ್ಟು ಏರಿಕೆ ಕಂಡಿದೆ.

ಜಪಾನ್‌ನ ಯೆನ್‌ ವಿರುದ್ಧ ಡಾಲರ್‌ ಭಾರೀ ಪ್ರಭಲವಾಗಿದ್ದು 139.705ಕ್ಕೆ ಏರಿಕೆ ಕಂಡಿದೆ. ಇದು ನವೆಂಬರ್‌ 30ರ ನಂತರದ ಗರಿಷ್ಠ ಮಟ್ಟವಾಗಿದೆ. ಆದರೂ ಕೊನೆಯ ವಹಿವಾಟಿನಲ್ಲಿ ಶೇ. 0.1ರಷ್ಟು ಕುಸಿತ ಕಂಡು 139.345ಕ್ಕೆ ಇಳಿಕೆಯಾಗಿದೆ.

"ಈ ವರ್ಷ ಫೆಡ್‌ನಿಂದ ದರ ಕಡಿತದಲ್ಲಿ ಮಾರುಕಟ್ಟೆಯು ಅತ್ಯಂತ ಆಕ್ರಮಣಕಾರಿ ಬೆಲೆಯನ್ನು ಹೊಂದಿದೆ. ಕಳೆದ ಎರಡು ವಾರಗಳ ಅವಧಿಯಲ್ಲಿ ಅದು ಬಹಳಷ್ಟು ಬದಲಾಗಿದೆ. ಅದು ಡಾಲರ್‌ ಪರ ಇದೆ” ಎಂದು ಡಾನ್ಸ್ಕೆ ಬ್ಯಾಂಕ್‌ನ ಹಿರಿಯ ವಿಶ್ಲೇಷಕ ಮೆಲಿನ್ ಹೇಳಿದರು.

ಅಮೆರಿಕದ ಟ್ರೆಷರಿಯು ಎಲ್ಲಾ ಬಿಲ್‌ಗಳನ್ನು ಪಾವತಿಸಲು ಸಾಧ್ಯವಿಲ್ಲ ಎಂದು ಎಚ್ಚರಿಕೆ ನೀಡಿದ್ದು ಸಾಲದ ಸೀಲಿಂಗ್ ಮಾತುಕತೆಗಳ ನಿರ್ಣಯಕ್ಕೆ ಕೇವಲ ಒಂದು ವಾರವಷ್ಟೇ ಬಾಕಿ ಉಳಿದಿದೆ. ಈ ನಡುವೆ ಸುರಕ್ಷಿತ ಹೂಡಿಕೆ ತಾಣಗಳ ಬೇಡಿಕೆಯಿಂದಾಗಿ ಡಾಲರ್‌ ಬೇಡಿಕೆ ಪಡೆದುಕೊಂಡಿದೆ. ಚೀನೀ ಯುವಾನ್ ಕರೆನ್ಸಿಯು ಪ್ರತಿ ಡಾಲರ್‌ಗೆ 7.0903 ಕ್ಕೆ ಕುಸಿತ ಕಾಣುವುದರ ಮೂಲಕ ಆರು ತಿಂಗಳಲ್ಲಿ ಗರಿಷ್ಠ ಕುಸಿತವನ್ನು ಕಂಡಿದೆ.

ಚೀನಾ ಯುವಾನ್‌ ಕರೆನ್ಸಿ ಬಗ್ಗೆ Mizuho ಬ್ಯಾಂಕ್‌ನ ಮುಖ್ಯ ಏಷ್ಯನ್ FX ತಂತ್ರಜ್ಞ, ಹೇಳಿರುವುದೇನು?

"PBoC (ಪೀಪಲ್ಸ್ ಬ್ಯಾಂಕ್ ಆಫ್ ಚೀನಾ) (ಯುವಾನ್ ಕರೆನ್ಸಿಯನ್ನು ಡಾಲರ್‌ ಎದುರು ಸ್ವಲ್ಪ ಮಟ್ಟಿಗೆ ಆದರೂ ಸುಧಾರಿಸುವ ಉದ್ದೇಶವನ್ನು ಹೊಂದಿದೆ” ಎಂದು Mizuho ಬ್ಯಾಂಕ್‌ನ ಮುಖ್ಯ ಏಷ್ಯನ್ FX ತಂತ್ರಜ್ಞ, ಕೆನ್ ಚೆಯುಂಗ್ ಅವರು ತಮ್ಮ‌ ಕ್ಲೈಂಟ್‌ನ ಟಿಪ್ಪಣಿಯಲ್ಲಿ ಬರೆದಿದ್ದಾರೆ.

“ದೇಶದ ಆರ್ಥಿಕ ದತ್ತಾಂಶವು ಸುಧಾರಣೆ ಕಾಣುವವರೆಗೂ, PBoC ನೀತಿ ಕ್ರಮವನ್ನು ತೆಗೆದುಕೊಳ್ಳುವವರೆಗೆ ಯುವಾನ್ ಕರೆನ್ಸಿಯು ಡಾಲರ್‌ ಎದುರು ಕುಸಿತ ಕಾಣುತ್ತಲೇ ಇರುತ್ತದೆ” ಎಂದು ಕೆನ್‌ ಚೆಯುಂಗ್‌ ನಿರೀಕ್ಷಿಸಿದ್ದಾರೆ.