ರಾಜಸ್ಥಾನದಲ್ಲಿ ಕೇವಲ ಕುರ್ಚಿಗಾಗಿ ಕಾದಾಟ ನಡೆಸುತ್ತಿರುವ ಕಾಂಗ್ರೆಸ್​: ಜನ ಆಶೀರ್ವಾದ ಯಾತ್ರೆಯಲ್ಲಿ ಬಿಜೆಪಿ ವ್ಯಂಗ್ಯ

ಕೇಂದ್ರ ಕಾರ್ಮಿಕ ಸಚಿವ ಭೂಪೇಂದ್ರ ಯಾದವ್ ಅವರು ಗುರುವಾರ ರಾಜಸ್ಥಾನದಲ್ಲಿ ತನ್ನ ಜನ ಆಶೀರ್ವಾದ ಯಾತ್ರೆಯನ್ನು ಅಲ್ವಾರ್ ಜಿಲ್ಲೆಯಿಂದ ಆರಂಭಿಸಿದರು ಮತ್ತು ಆಡಳಿತಾರೂ ಕಾಂಗ್ರೆಸ್ ಸರ್ಕಾರವನ್ನು ಗುರಿಯಾಗಿಸಿಕೊಂಡು ವಾಗ್ದಾಳಿ ನಡೆಸಿದರು.

ಮುಖ್ಯಮಂತ್ರಿ ಅಶೋಕ್ ಗೆಹ್ಲೋಟ್ ಮತ್ತು ಹಿರಿಯ ನಾಯಕ ಸಚಿನ್ ಪೈಲಟ್ ನಡುವೆ "ಕುರ್ಚಿಗಾಗಿ ಹೋರಾಟ, ಕಿತ್ತಾಟ" ಎರಡೂ ನಡೆಯುತ್ತಿದೆ ಎಂದು ಹೇಳಿದರು. ಹೊಸದಾಗಿ ಸೇರ್ಪಡೆಗೊಂಡ ಕೇಂದ್ರ ಮಂತ್ರಿಗಳನ್ನು ಪರಿಚಯಿಸಿದ ನಂತರ, ಯಾದವ್ ಅವರು ಅಲ್ವಾರ್‌ನಲ್ಲಿ ಸಾರ್ವಜನಿಕ ಸಭೆಯನ್ನುದ್ದೇಶಿಸಿ ಮಾತನಾಡಿದರು ಮತ್ತು ಕೇಂದ್ರ ಸರ್ಕಾರದ ಸಾಧನೆಗಳನ್ನು ಎತ್ತಿ ತೋರಿಸಿದರು.

ಯಾತ್ರೆಯು ಭಿವಾಡಿಯ ಅಲ್ವಾರ್ ಬೈಪಾಸ್‌ನಿಂದ ಆರಂಭ ಮಾಡಲಾಯಿತು. ನೂತನ ಕೇಂದ್ರ ಸಚಿವರನ್ನು ಪಕ್ಷದ ನಾಯಕರು ಮತ್ತು ಕಾರ್ಯಕರ್ತರು ಬರಮಾಡಿಕೊಂಡರು. ನಂತರ ಯಾತ್ರೆಯು ಭಿವಾಡಿಯಲ್ಲಿರುವ ಬಿಜೆಪಿ ಕಚೇರಿಯ ಕಡೆಗೆ ತೆರಳಿತು. ಸಭೆಯನ್ನು ಉದ್ದೇಶಿಸಿ ಮಾತನಾಡಿದ ಯಾದವ್, ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಸರ್ಕಾರವು ಭಾರತವನ್ನು 'ಆತ್ಮನಿರ್ಭರ ಭಾರತ'ವಾಗಿ ಪರಿವರ್ತಿಸುತ್ತಿದೆ ಎಂದು ಹೇಳಿದರು.