ಅಮೆರಿಕ ಮೊದಲ ಮಹಿಳೆ ಮೆಲಾನಿಯ ಕೈ ಹಿಡಿದು ಪ್ರೀತಿಯ ಸಂಕೇತವಾದ ತಾಜ್​ಮಹಲ್​ ವೀಕ್ಷಿಸಿದ ಟ್ರಂಪ್​

ನವದೆಹಲಿ (ಫೆ.24): ಜಗತ್ತಿನ ಏಳು ಅದ್ಭುತಗಳಲ್ಲಿ ಉತ್ತರ ಪ್ರದೇಶದ ಆಗ್ರಾದಲ್ಲಿರುವ ತಾಜ್​ಮಹಲ್ ಕೂಡ ಒಂದು​. ಪ್ರೀತಿಯ ಸಂಕೇತವಾದ ಈ ತಾಜ್​ಮಹಲ್​ ಸೌಂದರ್ಯವನ್ನು ಇದೇ ಮೊದಲ ಬಾರಿ ಅಮೆರಿಕ ಅಧ್ಯಕ್ಷ ಡೋನಾಲ್ಡ್​ ಟ್ರಂಪ್​ ಕುಟುಂಬ ಸಮೇತರಾಗಿ ಕಣ್ತುಂಬಿಕೊಂಡರು.

ಅಮೆರಿಕ ಮೊದಲ ಮಹಿಳೆಯಾದ ಮೆಲಾನಿಯಾ ಟ್ರಂಪ್​ ಕೈ ಹಿಡಿದು ಅಮೆರಿಕ ಅಧ್ಯಕ್ಷ​ ಪ್ರೀತಿ ಸೌಧದ ವೀಕ್ಷಣೆ ಮಾಡಿದರು. ಬೆಳಗ್ಗೆ ಅಹ್ಮದಾಬಾದ್​ಗೆ ಬಂದ ನಂತರ 22 ಕಿಲೋಮೀಟರ್​ ಉದ್ದದ ಮೆರವಣಿಗೆಯಲ್ಲಿ ಗಾಂಧೀಜಿಯವರ ಸಬರಮತಿ ಆಶ್ರಮಕ್ಕೆ ತೆರಳಿದ ಟ್ರಂಪ್​ ನಂತರ ಮೊಂಟೆರಾ ಮೈದಾನಕ್ಕೆ ಪ್ರಧಾನಿ ಮೋದಿ ಜತೆ ತೆರಳಿದ ಅವರು ಲಕ್ಷಾಂತರ ಸಂಖ್ಯೆಯಲ್ಲಿ ನೆರೆದಿದ್ದ ಜನರನ್ನುದ್ದೇಶಿಸಿ ಮಾತನಾಡಿದ್ದರು.

ತಾಜ್​ ಮಹಲ್​ ಭೇಟಿಗೆ ಮಗಳು ಇವಾಂಕಾ ಟ್ರಂಪ್​ ಹಾಗೂ ಅಳಿಯ ಜಾರೆಡ್​ ಕುಶ್ನರ್​ ಕೂಡ ಸಾಥ್​ ನೀಡಿದರು.



ಈ ವೇಳೆ ತಾಜ್​ ಮಹಲ್​ ಕುರಿತಾಗಿ ಅಲ್ಲಿನ ವಿಸಿಟರ್​ ಬುಕ್​ನಲ್ಲಿ ಬರೆದ ಟ್ರಂಪ್​, 'ತಾಜ್​ ಮಹಲ್​ ವಿಸ್ಮಯ ಪ್ರೇರಣೆ ನೀಡುವಂತಹದ್ದು. ತಾಜ್​ ಮಹಲ್​ ಭಾರತದ ಸಾಂಸ್ಕೃತಿಕ ಶ್ರೀಮಂತತೆಯ ನಿದರ್ಶನ ಮತ್ತು ವೈವಿಧ್ಯತೆಯ ಮಾಸದ ಸೌಂದರ್ಯದ ಪ್ರತೀಕ' ಎಂದು ವಿಸಿಟರ್ಸ್​ ಪುಸ್ತಕದಲ್ಲಿ ಬರೆದಿದ್ದಾರೆ.



ಇದಾದ ಬಳಿಕ ಅವರು ತಾಜ್​ಮಹಲ್​ ಮ್ಯೂಸಿಯಂಗೂ ಭೇಟಿ ನೀಡಿ ಅಲ್ಲಿ ವೀಕ್ಷಣೆ ನಡೆಸಿದರು.ಇದನ್ನು ಓದಿ: Namaste Trump: 300 ವರ್ಷದಲ್ಲಿ ಇದೇ ಮೊದಲ ಬಾರಿ ಸ್ವಚ್ಛಗೊಂಡ ತಾಜ್​ಮಹಲ್​ ಸಮಾಧಿಗಳು

ಇದೇ ವೇಳೆ ತಮ್ಮ ಪತ್ನಿ ಮಲಾನಿಯಾ ಜೊತೆ ತಾಜ್​ಮಹಲ್​ ಮುಂದೆ ಟ್ರಂಪ್​ ಫೋಟೊಗೆ ಫೋಸ್​ ಕೂಡ ನೀಡಿದರು.