MCD Bypoll Results - ದೆಹಲಿ ಪಾಲಿಕೆ ಉಪಚುನಾವಣೆ: ಬಿಜೆಪಿಗೆ ಮುಖಭಂಗ; ಎಎಪಿಗೆ ಭರ್ಜರಿ ಜಯ

ನವದೆಹಲಿ(ಮಾ. 03): ಗುಜರಾತ್ ಸ್ಥಳೀಯ ಸಂಸ್ಥೆ ಚುನಾವಣೆಗಳಲ್ಲಿ ನಿನ್ನೆ ಅಮೋಘ ಗೆಲುವು ಸಾಧಿಸಿದ ಸಂಭ್ರಮದಲ್ಲಿದ್ದ ಭಾರತೀಯ ಜನತಾ ಪಕ್ಷಕ್ಕೆ ದೆಹಲಿಯಲ್ಲಿ ಸಣ್ಣ ಆಘಾತವಾಗಿದೆ. ರಾಜಧಾನಿ ನಗರ ಪಾಲಿಕೆಯ ಐದು ವಾರ್ಡ್​ಗಳಿಗೆ ನಡೆದ ಉಪಚುನಾವಣೆಯಲ್ಲಿ ಬಿಜೆಪಿ ಶೂನ್ಯ ಸಂಪಾದನೆ ಮಾಡಿದೆ. ಆಡಳಿತಾರೂಢ ಆಮ್ ಆದ್ಮಿ ಪಕ್ಷ ನಾಲ್ಕು ಸ್ಥಾನಗಳಲ್ಲಿ ಜಯಭೇರಿ ಭಾರಿಸಿದರೆ, ಇನ್ನೊಂದು ಸ್ಥಾನವು ಕಾಂಗ್ರೆಸ್ ಪಾಲಾಗಿದೆ. ಎಎಪಿ ಪಕ್ಷ ಕಲ್ಯಾಣಪುರಿ, ಶಾಲಿಮಾರ್ ಬಾಗ್, ರೋಹಿಣಿ-ಸಿ ಮತ್ತು ತ್ರಿಲೋಕಪುರಿ ವಾರ್ಡ್​ಗಳನ್ನ ಗೆದ್ದು ಬೀಗಿದೆ. ಕಾಂಗ್ರೆಸ್ ಪಕ್ಷ ಚೌಹಾನ್ ಬಂಗೇರ್ ವಾರ್ಡನ್ನ ಜಯಿಸಿದೆ.

ಫೆ. 28ರಂದು ಈ ಐದು ವಾರ್ಡ್​ಗಳಿಗೆ ನಡೆದ ಉಪಚುನಾವಣೆಯಲ್ಲಿ ಸರಾಸರಿಯಾಗಿ ಶೇ. 52ರಷ್ಟು ಮತದಾನವಾಗಿತ್ತು. ಈ ವಾರ್ಡ್​ಗಳಲ್ಲಿ ಈ ಮುಂಚೆ ನಾಲ್ಕು ಸ್ಥಾನಗಳು ಎಎಪಿ ಮತ್ತು ಒಂದು ಸ್ಥಾನ ಬಿಜೆಪಿ ಬಳಿ ಇತ್ತು. ಇದೀಗ ಬಿಜೆಪಿ ಶಾಲಿಮಾರ್ ಬಾಗ್ ಕ್ಷೇತ್ರವನ್ನು ಕಳೆದುಕೊಂಡಿದೆ. ಇದೀಗ ಇದು ಎಎಪಿ ಪಾಲಾಗಿದೆ. ಕಾಂಗ್ರೆಸ್ ಪಕ್ಷ ಚೌಹಾಣ್ ಬಾಂಗೇರ್ ಕ್ಷೇತ್ರವನ್ನು ಎಎಪಿಯಿಂದ ಕಸಿದುಕೊಂಡಿದೆ.

ಇದನ್ನೂ ಓದಿ: Manmohan Singh: ದೇಶದಲ್ಲಿ ನಿರುದ್ಯೋಗದ ಸಮಸ್ಯೆ ಹೆಚ್ಚಾಗಲು ನೋಟ್​ಬ್ಯಾನ್​ ನೀತಿಯೇ ಕಾರಣ; ಮನಮೋಹನ್​ ಸಿಂಗ್ ಆರೋಪ

ದೆಹಲಿ ಬಳಿ ಸತತವಾಗಿ ನಡೆಯುತ್ತಿರುವ ರೈತರ ಪ್ರತಿಭಟನೆಗಳು ಹಾಗೂ ಮುಂದಿನ ವರ್ಷ ಮಹಾನಗರ ಪಾಲಿಕೆ ಚುನಾವಣೆ ನಡೆಯಲಿರುವ ಹಿನ್ನೆಲೆಯಲ್ಲಿ ಈ ಉಪಚುನಾವಣೆ ಸಾಕಷ್ಟು ಗಮನ ಸೆಳೆದಿತ್ತು. ಮುಂಬರಲಿರುವ ಪಾಲಿಕೆ ಚುನಾವಣೆಗೆ ಇದು ದಿಗ್ಸೂಚಿ ಆಗಿದೆ ಎಂಬುದು ಆಮ್ ಆದ್ಮಿ ಪಕ್ಷದ ವಾದ. ಈ ಬಗ್ಗೆ ಪ್ರತಿಕ್ರಿಯಿಸಿರುವ ದೆಹಲಿ ಉಪಮುಖ್ಯಮಂತ್ರಿ ಮನೀಶ್ ಸಿಸೋಡಿಯಾ, ದೆಹಲಿ ಜನರು ತಮ್ಮ ಸರ್ಕಾರದ ಬಗ್ಗೆ ನಂಬಿಕೆ ವ್ಯಕ್ತಪಡಿಸಿದ್ದಾರೆ. ಬಿಜೆಪಿ ಬಗ್ಗೆ ಅವರು ವ್ಯಗ್ರಗೊಂಡಿರುವುದಕ್ಕೆ ಈ ಫಲಿತಾಂಶವೇ ಸಾಕ್ಷಿಯಾಗಿದೆ. 2022ರ ದೆಹಲಿ ಪಾಲಿಕೆ ಚುನಾವಣೆಯಲ್ಲಿ ಬಿಜೆಪಿಗೆ ಹೀನಾಯ ಸೋಲಾಗಲಿದೆ ಎಂದು ಭವಿಷ್ಯ ನುಡಿದಿದ್ದಾರೆ.

ದೆಹಲಿ ಪಾಲಿಕೆ ಉಪಚುನಾವಣೆಯ ಫಲಿತಾಂಶ ಇಂದು ಸಂಜೆ ಅಥವಾ ನಾಳೆ ಅಧಿಕೃತವಾಗಿ ಪ್ರಕಟವಾಗುವ ನಿರೀಕ್ಷೆ ಇದೆ.