Viral Video: ರಜೆ ಕೊಡಲಿಲ್ಲ ಎಂದು ಆಕ್ಸಿಜನ್ ಸಿಲಿಂಡರ್ ಧರಿಸಿಯೇ ಕೆಲಸಕ್ಕೆ ಬಂದ PNB ಮ್ಯಾನೇಜರ್

ಕೊರೋನಾ ಸೋಂಕು ತಗುಲಿದ್ದ ಬ್ಯಾಂಕ್​ ಉದ್ಯೋಗಿಗೆ ರಜೆ ನೀಡದ ಕಾರಣ, ಆತ ಆಕ್ಸಿಜನ್​ ಸಿಲಿಂಡರ್​​​​​ ಜೊತೆಗೆ ಬ್ಯಾಂಕಿಗೆ ಆಗಮಿಸಿರುವ ಘಟನೆ ಜಾರ್ಖಂಡ್​​ನಲ್ಲಿ ನಡೆದಿದೆ. ಅರವಿಂದ್ ಕುಮಾರ್ ಬೊಕಾರೊದಲ್ಲಿನ ಪಂಜಾಬ್​ ನ್ಯಾಷನಲ್​ ಬ್ಯಾಂಕ್(Punjab National Bank-PNB)​​ನಲ್ಲಿ ಮ್ಯಾನೇಜರ್​ ಆಗಿ ಕಾರ್ಯನಿರ್ವಹಿಸುತ್ತಿದ್ದರು. ಇವರಿಗೆ ಕೊರೋನಾ ಸೋಂಕು ದೃಢಪಟ್ಟಿದ್ದರಿಂದ ಚಿಕಿತ್ಸೆ ಪಡೆದು ಚೇತರಿಸಿಕೊಳ್ಳಲು ರಜೆ ಕೇಳಿದ್ದರು. ಆದರೆ ಅರವಿಂದ್ ಕುಮಾರ್​ ಮೇಲಾಧಿಕಾರಿಗಳು ರಜೆ ನೀಡದೆ ನಿರಾಕರಿಸಿದ್ದಾರೆ ಎಂಬ ಆರೋಪ ಕೇಳಿ ಬಂದಿದೆ. ಹೀಗಾಗಿ ಬೇರೆ ದಾರಿ ಕಾಣದ ಅರವಿಂದ್ ಆಕ್ಸಿಜನ್​​ ಸಿಲಿಂಡರ್​ನ ಸಹಾಯದಿಂದ ಉಸಿರಾಡುತ್ತಾ ಬ್ಯಾಂಕ್​ಗೆ ಆಗಮಿಸಿದ್ದಾರೆ. ಈ ವಿಡಿಯೋ ಈಗ ಸಾಮಾಜಿಕ ಜಾಲತಾಣದಲ್ಲಿ ಬಹಳ ವೈರಲ್ ಆಗುತ್ತಿದೆ.

ಇವರು ಕೊರೋನಾ ಸೋಂಕಿನಿಂದ ಗುಣಮುಖರಾಗಿ ಶ್ವಾಸಕೋಶ ಸೋಂಕಿನಿಂದ ಬಳಲುತ್ತಿದ್ದರು ಎಂದು ತಿಳಿದು ಬಂದಿದೆ. ಅರವಿಂದ್ ಕುಟುಂಬಸ್ಥರು ಬ್ಯಾಂಕ್​​ ನಡೆಗೆ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ರಜೆ ನೀಡಿಲ್ಲವಾದ್ದರಿಂದ ಕೆಲಸಕ್ಕೆ ರಾಜೀನಾಮೆ ಕೊಡಿ ಎಂದು ನಾವು ಹೇಳಿದ್ದೆವು. ಆದರೆ ಬ್ಯಾಂಕ್​ನವರು ಸಂಬಳ ಕಡಿತಗೊಳಿಸುವುದಾಗಿ ಬೆದರಿಕೆ ಹಾಕಿದರು ಎಂದು ಆರೋಪಿಸಿದ್ದಾರೆ.

ಆದರೆ ಅರವಿಂದ್ ಆರೋಪವನ್ನು ಪಿಎನ್​ಬಿ(PNB) ಬ್ಯಾಂಕ್​ನ ಮುಖ್ಯಸ್ಥರು ತಳ್ಳಿಹಾಕಿದ್ದಾರೆ. ನಾವು ಅವರಿಗೆ ರಜೆ ಕೊಡುವುದನ್ನು ನಿರಾಕರಿಸಿಲ್ಲ. ಬ್ಯಾಂಕ್​ ಹೆಸರಿಗೆ ಮಸಿ ಬಳಿಯಲು ಅರವಿಂದ್ ಈ ರೀತಿ ನಾಟಕ ಮಾಡುತ್ತಿದ್ದಾರೆ. ಅರವಿಂದ್ ತನ್ನ ಎನ್​ಪಿಎ ಲೋನ್​ ಅಕೌಂಟ್ಸ್​​ ಬಗ್ಗೆ ತನಿಖೆ ಎದುರಿಸುತ್ತಿದ್ದಾರೆ. ಹೀಗಾಗಿ ಈ ತನಿಖೆಯಿಂದ ತಪ್ಪಿಸಿಕೊಳ್ಳಲು, ಬ್ಯಾಂಕಿಗೆ ಕೆಟ್ಟ ಹೆಸರು ತರಲು ಈ ರೀತಿಯ ಕೆಲಸ ಮಾಡುತ್ತಿದ್ದಾರೆ ಎಂದು ಹೇಳಿದೆ.

ಇದನ್ನೂ ಓದಿ: Bangalore Gangrape: ಸಂತ್ರಸ್ತೆಯ ಮತ್ತೊಂದು ವಿಡಿಯೋ ವೈರಲ್; ಮಾಹಿತಿ ಕಲೆ ಹಾಕುತ್ತಿರುವ ಪೊಲೀಸ್ ಆಯುಕ್ತ ಕಮಲ್ ಪಂತ್

ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿರುವ ಈ ಘಟನೆ ಕುರಿತಾದ ವಿಡಿಯೋದಲ್ಲಿ, ಅರವಿಂದ್ ಕುಮಾರ್​ ಆಕ್ಸಿಜನ್​ ಸಿಲಿಂಡರ್​ ಜೊತೆಗೆ ತನ್ನ ಹೆಂಡತಿ ಮತ್ತು ಮಗನ ಬೆಂಬಲದೊಂದಿಗೆ ಬಹಳ ಆಯಾಸದಿಂದ ಬ್ಯಾಂಕಿಗೆ ಬರುವ ದೃಶ್ಯ ಸೆರೆಯಾಗಿದೆ.

ಈ ಘಟನೆ ಪಿಎನ್​ಬಿಯ ಸೆಕ್ಟರ್​ 4ನೇ ಶಾಖೆಯಲ್ಲಿ ಮಂಗಳವಾರ ನಡೆದಿದೆ. ಕುಮಾರ್​ನ ಕುಟುಂಬಸ್ಥರು ಘಟನೆಯ ಕುರಿತಾದ ದೃಶ್ಯವನ್ನು ಚಿತ್ರೀಕರಣ ಮಾಡಿ, ಸೋಷಿಯಲ್ ಮೀಡಿಯಾಗೆ ಹರಿಯಬಿಟ್ಟಿದ್ದಾರೆ. ಕುಮಾರ್ ತನ್ನ ಮೇಲಾಧಿಕಾರಿಯ ಕ್ಯಾಬಿನ್​ಗೆ ಹೋಗುವ ಹಾಗೂ ಅಲ್ಲಿ ಅವರ ಜೊತೆ ವಾದ ಮಾಡುವ ದೃಶ್ಯವೂ ವಿಡಿಯೋದಲ್ಲಿದೆ ಎಂದು ಪಿಎನ್​ಬಿ ಆರೋಪಿಸಿದೆ.

ಸೋಂಕು ಶ್ವಾಸಕೋಶಕ್ಕೆ ತಗುಲಿರುವುದರಿಂದ ನಾನು ಸಂಪೂರ್ಣವಾಗಿ ಚೇತರಿಸಿಕೊಳ್ಳಲು 3 ತಿಂಗಳ ಕಾಲಾವಕಾಶ ಬೇಕೆಂದು ವೈದ್ಯರು ಹೇಳಿದ್ದಾರೆ. ಆದರೆ ಇವರು ನನಗೆ ರಜೆ ಕೊಡುತ್ತಿಲ್ಲ. ಇದು ಕಿರುಕುಳವಲ್ಲದೇ ಮತ್ತೇನು? ಎಂದು ಕುಮಾರ್ ಪ್ರಶ್ನಿಸಿದ್ದಾರೆ.

ಈ ಘಟನೆ ನಡೆದ ಬಳಿಕ ಕುಮಾರ್​ನನ್ನು ಮನೆಗೆ ಕಳುಹಿಸಲಾಗಿದೆ. ಇದು ಕುಮಾರ್​ ನಡೆಸಿರುವ ಕುತಂತ್ರವಾಗಿದೆ ಎಂದು ಪಿಎನ್​ಬಿ ಆರೋಪಿಸಿದೆ.