ದೇಶದ ಕೊರೋನಾ ವೈರಸ್​ ಪ್ರಕರಣಗಳ ಅಸಲಿಯತ್ತು ಬಯಲು ಮಾಡಿದ ಪತ್ರಕರ್ತೆಯನ್ನು ಬಂಧಿಸಿದ ಚೀನಾ

ಬೀಜಿಂಗ್ (ನವೆಂಬರ್ 17)​: ಕೊರೋನಾ ವೈರಸ್​ ಉಗಮಸ್ಥಾನ ಚೀನಾ. ವುಹಾನ್​ನಲ್ಲಿ ಮೊದಲ ಬಾರಿಗೆ ಕಾಣಿಸಿಕೊಂಡಿದ್ದ ವೈರಸ್​ ನಂತರ ಅಲ್ಲಿ ಏಕಾಏಕಿ ನಿಯಂತ್ರಣಕ್ಕೆ ಬಂದಿತ್ತು. ಈ ವಿಚಾರ ಸಾಕಷ್ಟು ಅನುಮಾನಗಳಿಗೂ ಎಡೆಮಾಡಿಕೊಟ್ಟಿತ್ತು. ಈ ಬಗ್ಗೆ ವರದಿ ಮಾಡಿದ ನಾಗರಿಕ ಪತ್ರಕರ್ತೆಯನ್ನು ಚೀನಾ ಸರ್ಕಾರ ಬಂಧಿಸಿ, ಜೈಲಿನಲ್ಲಿಟ್ಟಿದೆ.

ಚೀನಾದಲ್ಲಿ ವರದಿ ಆಗುತ್ತಿರುವ ಕೊರೋನಾ ಪ್ರಕರಣಗಳ ಬಗ್ಗೆ ಅಲ್ಲಿನ ಸರ್ಕಾರ ಅಂಕಿ ಅಂಶಗಳನ್ನು ನೀಡುತ್ತಿದೆ. ಆದರೆ, ಇದು ಸರಿಯಿಲ್ಲ. ಚೀನಾದಲ್ಲಿ ಕೊರೋನಾ ಪ್ರಕರಣಗಳ ಸಂಖ್ಯೆ ಹೆಚ್ಚಿದೆ ಎಂದು ಜಾಂಗ್​ ಜಾನ್​ ಹೆಸರಿನ ಪತ್ರಕರ್ತೆ ವರದಿ ಮಾಡಿದ್ದರು. ಅಲ್ಲದೆ, ಚೀನಾದ ಅನೇಕ ಕಡೆಗಳಲ್ಲಿ ಸಣ್ಣ ಉದ್ಯಮಗಳು ನೆಲ ಕಚ್ಚುತ್ತಿವೆ. ನಿರುದ್ಯೋಗ ಪ್ರಕರಣಗಳು ಕೂಡ ಹೆಚ್ಚುತ್ತಿದೆ ಎಂದು ಅವರು ಹೇಳಿದ್ದರು.

ಜಾಂಗ್ ಅವರ ಈ ವರದಿ ಬೆನ್ನಲ್ಲೇ ಚೀನಾ ಸರ್ಕಾರ ಅವರನ್ನು ಬಂಧಿಸಿ ಜೈಲಿನಲ್ಲಿರಿಸಿದೆ. ಸುಳ್ಳು ಮಾಹಿತಿ ಹಂಚಿಕೊಂಡ ಆರೋಪವನ್ನು ಅವರ ಮೇಲೆ ಹೊರಿಸಲಾಗಿದೆ. ಬರಹಗಳ ಮೂಲಕ, ವಿಡಿಯೋ ಹಾಗೂ ವಿ ಚ್ಯಾಟ್ ಸೇರಿ ಇತರ ಇಂಟರ್​​ನೆಟ್​ ಮಾಧ್ಯಮಗಳು ಬಳಕೆ ಮಾಡಿಕೊಂಡು ಅವರು ಸುಳ್ಳು ಮಾಹಿತಿಯನ್ನು ಹಂಚಿದ್ದಾರೆ ಎನ್ನುವ ಆರೋಪ ಜಾಂಗ್​ ಮೇಲಿದೆ.

ಈ ರೀತಿ ದೇಶದ ಆಂತರಿಕ ಮಾಹಿತಿ ಬಗ್ಗೆ ವರದಿ ಮಾಡಿದ ಸಾಕಷ್ಟು ಜನರನ್ನು ಈಗಾಗಲೇ ಚೀನಾ ಸರ್ಕಾರ ಬಂಧಿಸಿದೆ. ಕೆಲವರನ್ನು ಬಿಡುಗಡೆ ಮಾಡಿದರೆ, ಇನ್ನೂ ಕೆಲವರನ್ನು ಹಾಗೆಯೇ ಜೈಲಿನಲ್ಲಿ ಇಡಲಾಗಿದೆ.