Union Budget 2021: ಕೋವಿಡ್​ ಪರೀಕ್ಷೆಯಿಂದ ಶಿಫ್ಟ್​ ವ್ಯವಸ್ಥೆವರೆಗೂ; ಹಲವು ಮಾರ್ಪಾಡನ್ನು ಹೊಂದಿರಲಿದೆ ಈ ಬಾರಿ ಅಧಿವೇಶನ

ನವದೆಹಲಿ (ಜ. 20):  ಕೊರೋನಾ ವೈರಸ್​ ಸೋಂಕಿನಿಂದಾಗಿ ಮುನ್ನೆಚ್ಚರಿಕಾ ಕ್ರಮಗಳೊಂದಿಗೆ ಈ ಬಾರಿ ಬಜೆಟ್​ ಅಧಿವೇಶನ ನಡೆಸಲು ಸಕಲ ಸಿದ್ಧತೆ ನಡೆಸಲಾಗಿದೆ. ಜ. 29ರಿಂದ ಅಧಿವೇಶನ ಆರಂಭವಾಗಲಿದ್ದು, ಫೆ. 1ರಂದು ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್​ ಬಜೆಟ್​ ಮಂಡಿಸಲಿದ್ದಾರೆ. ಕೋವಿಡ್​ ಹಿನ್ನಲೆಯಲ್ಲಿ ಚಳಿಗಾಲದ ಅಧಿವೇಶನ ನಡೆಸದ ಸರ್ಕಾರ ಮೂರು ತಿಂಗಳ ವಿರಾಮದ ಬಳಿಕ ಬಜೆಟ್​ ಅಧಿವೇಶನ ನಡೆಸಲು ಸಜ್ಜಾಗಿದೆ. ಈ ಬಾರಿ ಬಜೆಟ್​ ಅಧಿವೇಶನದಲ್ಲಿ ಹಲವು ಮಾರ್ಪಾಡುಗಳನ್ನು ಮಾಡಲಾಗಿದೆ. ಸಂಸತ್​ ಸದಸ್ಯರಿಗೆ ಕೋವಿಡ್​ ಪರೀಕ್ಷೆ ಕಡ್ಡಾಯವಾಗಿದ್ದು, ಸಾಮಾಜಿಕ ಅಂತರ ಕಾಪಾಡುವುದು ಅತ್ಯವಶ್ಯಕವಾಗಿದೆ. ಈ ಹಿನ್ನಲೆ ಬಜೆಟ್​ ಅಧಿವೇಶನಕ್ಕೆ ಮುಂಚಿತವಾಗಿಯೇ ಲೋಕಸಭಾ ಸ್ಪೀಕರ್​ ಓಂ ಬಿರ್ಲಾ ಕೆಲವು ಪ್ರಮುಖ ಘೋಷಣೆಗಳನ್ನು ವಿವರಿಸಿದ್ದಾರೆ.

• ಜನವರಿ 29ರಿಂದ ಆರಂಭಗೊಳ್ಳಲಿರುವ ಬಜೆಟ್​ ಎರಡು ಭಾಗಗಳಲ್ಲಿ ನಡೆಯಲಿದೆ.


• ಮೊದಲ ಹಂತದ ಅಧಿವೇಶನ ಜ. 29ರಿಂದ ಆರಂಭವಾಗಿ ಫೆ. 15ಕ್ಕೆ ಮುಗಿಯಲಿದೆ. ಎರಡನೇ ಹಂತದ ಅಧಿವೇಶನ ಮಾರ್ಚ್​ 8ರಂದು ಪ್ರಾರಂಭಗೊಂಡು ಎಪ್ರಿಲ್​ 8ಕ್ಕೆ ಮುಕ್ತಾಯಗೊಳ್ಳಲಿದೆ.


• ಕೋವಿಡ್​ ಹಿನ್ನಲೆ ಈ ಬಾರಿ ಎರಡು ಶಿಫ್ಟ್​ನಲ್ಲಿ ಅಧಿವೇಶನ ನಡೆಯಲಿದೆ. ಬೆಳಗ್ಗೆ ರಾಜ್ಯಸಭಾ ಅಧಿವೇಶನ ನಡೆದರೆ, ಲೋಕಸಭಾ ಅಧಿವೇಶನ ಸಂಜೆ ನಡೆಯಲಿದೆ.


• ರಾಜ್ಯಸಭಾ ಅಧಿವೇಶನ ಬೆಳಗ್ಗೆ 9 ರಿಂದ ಮಧ್ಯಾಹ್ನ 2 ಗಂಟೆವರೆಗೆ ನಡೆದರೆ. ಲೋಕಸಭಾ ಅಧಿವೇಶನ ಸಂಜೆ ನಾಲ್ಕು ಗಂಟೆಯಿಂದ 8 ಗಂಟೆವರೆಗೆ ನಡೆಯಲಿದೆ.


• ಬಜೆಟ್​ ಅಧಿವೇಶನದಲ್ಲಿ ಒಂದು ಗಂಟೆ ಪ್ರಶ್ನೆ ಅವಧಿಯನ್ನು ನಿಗದಿಸಲಾಗಿದೆ.
  ಅಧಿವೇಶನದಲ್ಲಿ ಪ್ರಶ್ನಾವಳಿ ಅವಧಿ, ಶೂನ್ಯಾವಧಿಯನ್ನು ನಿಯಮ 377ರ ಅಡಿಯಲ್ಲಿ ಚರ್ಚೆ ಸೇರಿದಂತೆ ಎಲ್ಲವನ್ನು ನಡೆಸಲಾಗುವುದು.


• ಅಧಿವೇಶನ ಆರಂಭಕ್ಕೂ ಮುನ್ನ ಸಂಸದರಿಗೆ ಆರ್​ಟಿ-ಪಿಸಿಆರ್​ ಪರೀಕ್ಷೆ ಕಡ್ಡಾಯವಾಗಿದೆ.


• ಸಂಸತ್​ ಭವನದಲ್ಲಿ ಕೂಡ ಆರ್​ಟಿ-ಪಿಸಿಆರ್​ ಪರೀಕ್ಷೆ ನಡೆಸಲು ವ್ಯವಸ್ಥೆ ಮಾಡಲಾಗಿದೆ.
  ಸಂಸದರಿಗೆ ಸಬ್ಸಿಡಿಯಲ್ಲಿ ನೀಡಲಾಗುತ್ತಿರುವ ಕ್ಯಾಟೀನ್​ ಆಹಾರವನ್ನು ನಿಲ್ಲಿಸಲಾಗಿದೆ. ಇದರಿಂದ 8 ಕೋಟಿ ಉಳಿತಾಯವಾಗಲಿದೆ.


• ಈ ಮುಂಚೆ ಉತ್ತರ ರೈಲ್ವೆ ಸಂಸತ್​ ಕ್ಯಾಂಟೀನ್​ ಸೇವೆ ನಿರ್ವಹಿಸುತ್ತಿತ್ತು. ಇನ್ಮುಂದೆ ಭಾರತ ಪ್ರವಾಸೋದ್ಯಮ ಅಭಿವೃದ್ಧಿ ನಿಗಮ ಕ್ಯಾಟೀನ್​ ಜವಾಬ್ದಾರಿವಹಿಸಿಕೊಳ್ಳಲಿದೆ.