Sonu Sood- ಬೋಗಸ್ ಕಂಪನಿ, ಬೋಗಸ್ ಸಾಲ, ಕೋಟಿಕೋಟಿ ತೆರಿಗೆ ವಂಚನೆ: ಸೋನು ಸೂದ್ ಕರ್ಮಕಾಂಡ ಬಯಲು

IT dept allegation- ಸೋನು ಸೂದ್ ಅವರು ಬೋಗಸ್ ಸಂಸ್ಥೆಗಳ ಮೂಲಕ ಬೋಗಸ್ ಸಾಲಗಳನ್ನ ಸೃಷ್ಟಿಸಿ ಅಕ್ರಮ ಹಣ ಮರೆಮಾಚಲಾಗಿದೆ. ಸಾಲದ ಹೆಸರಿನಲ್ಲಿ ಈ ಅಕ್ರಮ ಹಣವನ್ನು ವಿವಿಧ ಆಸ್ತಿಗಳ ಖರೀದಿ ಮತ್ತು ಹೂಡಿಕೆಗೆ ಬಳಸಲಾಗಿದೆ ಎಂದು ಐಟಿ ಇಲಾಖೆ ಆರೋಪಿಸಿದೆ.

ಸೋನು ಸೂದ್

ಸೋನು ಸೂದ್

  • News18
  • Last Updated :
  • Share this:
ಮುಂಬೈ, ಸೆ. 18: ಬಾಲಿವುಡ್ ನಟ ಸೋನು ಸೂದ್ ಅವರು ಸುಮಾರು 20 ಕೋಟಿ ರೂಗೂ ಅಧಿಕ ಮೊತ್ತದಷ್ಟು ತೆರಿಗೆ ವಂಚನೆ ಮಾಡಿರುವುದು ಪತ್ತೆಯಾಗಿದೆ ಎಂದು ಆದಾಯ ತೆರಿಗೆ ಇಲಾಖೆ ಮಾಹಿತಿ ನೀಡಿದೆ. ಐಟಿ ಅಧಿಕಾರಿಗಳು ಸತತ ಮೂರನೇ ದಿನವೂ ನಟ ಸೋನು ಸೂದ್ ಅವರಿಗೆ ಸೇರಿದ ವಿವಿಧ ಸ್ಥಳಗಳಲ್ಲಿ ಸರ್ವೇಕ್ಷಣೆ ನಡೆಸಿದರು. ಮುಂಬೈ, ಲಕ್ನೋ, ಕಾನ್​ಪುರ್, ಜೈಪುರ್, ದೆಹಲಿ ಮತ್ತು ಗುರುಗ್ರಾಮ್​ನಲ್ಲಿನ 28 ಸ್ಥಳಗಳಲ್ಲಿ ಐಟಿ ಅಧಿಕಾರಿಗಳ ತಂಡಗಳು ಶೋಧ ನಡೆಸಿ ವಿವಿಧ ದಾಖಲೆಗಳನ್ನ ಪರಿಶೀಲಿಸಿ ವಶಕ್ಕೆ ತೆಗೆದುಕೊಂಡಿದ್ದಾರೆ. ಲಕ್ನೋ ಮೂಲದ ಉದ್ಯಮ ಸಮೂಹಕ್ಕೆ ಸೇರಿದ ಆಸ್ತಿಗಳನ್ನೂ ಐಟಿ ಇಲಾಖೆ ಪರಿಶೀಲಿಸಿದೆ. ಈ ವೇಳೆ, ಸೋನು ಸೂದ್ ಮತ್ತವರ ಸಹವರ್ತಿಗಳು ತೆರಿಗೆ ವಂಚನೆ ನಡೆಸಿರುವುದು ಗೊತ್ತಾಗಿದೆ ಎಂದು ಐಟಿ ಅಧಿಕಾರಿಗಳು ಹೇಳಿದ್ದಾರೆ.

ಸೋನು ಸೂದ್ ಅವರು ತಮ್ಮ ಅಕ್ರಮ ಆದಾಯವನ್ನು ಬೋಗಸ್ ಸಂಸ್ಥೆಗಳ ಹೆಸರಲ್ಲಿ ಬೋಗಸ್ ಸಾಲಗಳ ಮೂಲಕ ಲೆಕ್ಕ ತೋರಿಸಿದ್ದಾರೆ. ಈವರೆಗೆ ನಡೆಸಲಾದ ಪರಿಶೋಧನೆಯಿಂದ ಇಂಥ 20 ಬೋಗಸ್ ಸಂಸ್ಥೆಗಳನ್ನ ಇದಕ್ಕಾಗಿ ಬಳಸಿಕೊಳ್ಳಲಾಗಿರುವುದು ತಿಳಿದುಬಂದಿದೆ. ನಗದು ಹಣ ನೀಡಿ ಚೆಕ್​ಗಳನ್ನ ಪಡೆದು ಅದನ್ನ ವೈಟ್ ಮನಿ ಮಾಡಿಕೊಳ್ಳಲಾಗಿದೆ. ತೆರಿಗೆ ತಪ್ಪಿಸುವ ಉದ್ದೇಶದಿಂದ ಪ್ರೊಫೆಷನಲ್ ರಿಸಿಪ್ಟ್​ಗಳನ್ನ ಅಕೌಂಟ್ ಬುಕ್​ಗಳಲ್ಲಿ ಸಾಲಗಳಾಗಿ ತೋರಿಸಲಾಗಿದೆ. ವಿವಿಧ ಆಸ್ತಿಗಳನ್ನ ಖರೀದಿಸಲು ಮತ್ತು ಹೂಡಿಕೆಗಳನ್ನ ಮಾಡಲು ಬೋಗಸ್ ಸಾಲಗಳನ್ನ ಬಳಕೆ ಮಾಡಲಾಗಿದೆ. ಇದೂವರೆಗೆ ತೆರಿಗೆ ವಂಚನೆ ಆಗಿರುವ ಮೊತ್ತ 20 ಕೋಟಿಯಷ್ಟಿದೆ ಎಂದು ತೆರಿಗೆ ಇಲಾಖೆ ಅಧಿಕಾರಿಗಳು ವಿವರ ನೀಡಿದ್ದಾರೆ.

2020, ಜುಲೈ 21ರಂದು ಸೋನು ಸೂದ್ ಅವರು ಚಾರಿಟಿ ಫೌಂಡೇಶನ್ ಸ್ಥಾಪಿಸಿದ್ದರು. 2021 ಏಪ್ರಿಲ್ ಒಂದರಿಂದ ಇಲ್ಲಿಯವರೆಗೆ ಅದಕ್ಕೆ ಬಂದ ದೇಣಿಗೆ 18.94 ಕೋಟಿ ರೂ. ಅದರಲ್ಲಿ 1.9 ಕೋಟಿ ರೂ ಹಣವನ್ನು ವಿವಿಧ ಪರಿಹಾರ ಕಾರ್ಯಗಳಿಗೆ ಬಳಸಲಾಗಿದೆ. ಉಳಿದ ಸುಮಾರು 17 ಕೋಟಿ ರೂ ಹಣ ಬಳಕೆಯಾಗದೇ ಇನ್ನೂ ಬ್ಯಾಂಕ್ ಖಾತೆಯಲ್ಲೇ ಇದೆ. ವಿದೇಶಿ ಕೊಡುಗೆ ನಿಯಂತ್ರಣ ಕಾಯ್ದೆ (FCRA- Foreign Contribution Regulation Act) ನಿಯಮಾವಳಿಗಳನ್ನ ಉಲ್ಲಂಘಿಸಿ ವಿದೇಶಿಗರಿಂದ 2.1 ಕೋಟಿ ರೂ ದೇಣಿಗೆ ಚಾರಿಟಿ ಫೌಂಡೇಶನ್​ಗೆ ಬಂದಿದೆ ಎಂದು ಐಟಿ ಇಲಾಖೆ ತಿಳಿಸಿದೆ.

ಇದನ್ನೂ ಓದಿ: Captain Amarinder Singh: 'ನಾನು ಅವಮಾನಿತನಾಗಿದ್ದೇನೆ ...' ಸಿಎಂ ಸ್ಥಾನದಿಂದ ಕೆಳಗಿಳಿದ ಬಳಿಕ ಕ್ಯಾ. ಅಮರೀಂದರ್ ಸಿಂಗ್ ನೋವಿನ ನುಡಿ!

ಇನ್ನು, ಲಕ್ನೋ ಮೂಲದ ಇನ್ಫ್ರಾಸ್ಟ್ರಕ್ಚರ್ ಗ್ರೂಪ್ ಕಂಪನಿಯೊಂದರಲ್ಲಿ ಸೋನು ಸೂದ್ ಜಂಟಿ ಪಾಲುದಾರರಾಗಿದ್ಧಾರೆ. ಈ ಕಂಪನಿ ಮೂಲಕ ರಿಯಲ್ ಎಸ್ಟೇಟ್ ಪ್ರಾಜೆಕ್ಟ್​ಗಳ ವ್ಯವಹಾರದಲ್ಲಿ ಸಾಕಷ್ಟು ಹಣವನ್ನು ಹೂಡಿಕೆ ಮಾಡಿದ್ದಾರೆ. ಈ ಕಾರ್ಯದಲ್ಲೂ ಸಾಕಷ್ಟು ಅಕ್ರಮ ಎಸಗಿರುವುದು ಕಂಡುಬಂದಿದೆ. ಈ ಕಂಪನಿಯು ಉಪಗುತ್ತಿಗೆ ಹೆಸರಿನಲ್ಲಿ ಬೋಗಸ್ ಬಿಲ್​ಗಳನ್ನ ಸೃಷ್ಟಿಸಿ ಹಣವನ್ನ ಮರೆ ಮಾಚುತ್ತಿತ್ತು. ಈ ರೀತಿ ಬೋಗಸ್ ಗುತ್ತಿಗೆಯಿಂದ ಲೆಕ್ಕ ತೋರಿಸಲಾದ ಹಣದ ಮೊತ್ತ 65 ಕೋಟಿ ರೂ ಇದೆ. ದಾಖಲೆ ಇಲ್ಲದ ನಗದು ವೆಚ್ಚ ಇತ್ಯಾದಿ ಎಲ್ಲವೂ ಪತ್ತೆಯಾಗಿದೆ. ಜೈಪುರದ ಮತ್ತೊಂದು ಕಂಪನಿ ಜೊತೆ ಸೇರಿ ವೃತ್ತೀಯ ವಹಿವಾಟು (Circular Transaction) ವಂಚನೆ ಮಾಡಿದೆ. ಈ ಅಕ್ರಮ ವ್ಯವಹಾರ 175 ಕೋಟಿ ರೂನಷ್ಟಿರುವುದು ತಿಳಿದುಬಂದಿದೆ. ಇದರ ಆಳ ಅಗಲ ಪತ್ತೆ ಮಾಡುವ ಪ್ರಯತ್ನ ನಡೆದಿದೆ ಎಂದು ಐಟಿ ಅಧಿಕಾರಿಗಳು ಹೇಳಿದ್ದಾರೆ.

ವೃತ್ತೀಯ ವಹಿವಾಟು ಎಂದರೆ ಒಂದೇ ಮಾಲೀಕರಿಗೆ ಸೇರಿದ ಅಥವಾ ಬೇರೆ ಬೇರೆ ಕಂಪನಿಗಳು ಒಳ ಒಪ್ಪಂದ ಮಾಡಿಕೊಂಡು ಒಂದೇ ಉತ್ಪನ್ನವನ್ನು ಪರಸ್ಪರ ಹಲವು ಬಾರಿ ವಹಿವಾಟು ಮಾಡಿ ಸುಳ್ಳು ಲೆಕ್ಕ ತೋರಿಸಲಾಗುತ್ತದೆ.
Published by:Vijayasarthy SN
First published: