ಬಿಜೆಪಿಗೆ ಮತ್ತೊಂದು ಶಾಕ್​; ಕೃಷಿ ಕಾನೂನು ವಿರೋಧಿಸಿ ಎನ್​ಡಿಎ ಮೈತ್ರಿ ಕೂಟ ತೊರೆದ ಆರ್​ಎಲ್​ಪಿ

ನವದೆಹಲಿ (ಡಿ. 26): ರಾಜಸ್ಥಾನದಲ್ಲಿ ಬಿಜೆಪಿಯ ಮಿತ್ರ ಪಕ್ಷವಾಗಿರುವ ರಾಷ್ಟ್ರ ಲೋಕ್​ತಾಂತ್ರಿಕ್​ ಪಕ್ಷ ಎನ್​ಡಿಎ ಮೈತ್ರಿಯಿಂದ ಹೊರನಡೆದಿದೆ. ದೆಹಲಿಯಲ್ಲಿ ರೈತರು ನಡೆಸುತ್ತಿರುವ ಪ್ರತಿಭಟನೆ ಬೆಂಬಲಿಸಿ ಆರ್​ಎಲ್​ಪಿ ಈ ನಿರ್ಧಾರ ಕೈ ಗೊಂಡಿದೆ. ಈ ಮೂಲಕ ಎನ್​ಡಿಎ ಮೈತ್ರಿ ತೊರೆದ ಎರಡನೇ ಪಕ್ಷ ಆರ್​ಎಲ್​ಪಿ ಆಗಲಿದೆ. ಈ ಮೊದಲು ಕೇಂದ್ರ ಸರ್ಕಾರದ ಕೃಷಿ ನೀತಿ ವಿರೋಧಿಸಿ ಪಂಜಾಬಿನ ಅಕಾಲಿದಳ ಎನ್​ಡಿಎ ಸಖ್ಯ ತೊರೆದಿತ್ತು. ಈಗ ಆರ್​ಎಲ್​ಪಿ ಮೈತ್ರಿಯಿಂದ ಹೊರನಡೆಯುವ ಮೂಲಕ ಬಿಜೆಪಿ ಶಾಕ್​ ನೀಡಿದೆ. ರಾಜಸ್ಥಾನದ ಅಲ್ವಾರ ಶಹಜಹಾನ್ಪುರದಲ್ಲಿ ರೈತರ ಸಭೆಯನ್ನು ಉದ್ದೇಶಿಸಿ ಮಾತನಾಡಿದ ಅವರು ಈ ನಿರ್ಧಾರ ಪ್ರಕಟಿಸಿದ್ದಾರೆ. ಈ ಮೂಲಕ ಮತ್ತೊಂದು ಪಕ್ಷ ಕೃಷಿ ಮಸೂದೆ ಹಿಂಪಡೆಯುವಂತೆ ಕೇಂದ್ರದ ಮೇಲೆ ಒತ್ತಡ ಹಾಕಿದೆ.

ಈ ಕುರಿತು ಮಾತನಾಡಿದ ಆರ್​ಎಲ್​ಪಿ ನಾಯಕ, ನಾಗ್ಪುರ್​​ ಸಂಸದ ಹನುಮನ್​ ಬೆನಿವಾಲ್​, ನಾನು ಎನ್​ಡಿಎಗೆ ಫೆವಿಕಲ್​ನಂತೆ ಅಂಟಿಕೊಂಡಿಲ್ಲ. ನಾನು ಎನ್​ಡಿಎ ಮೈತ್ರಿಯಿಂದ ಹೊರಬರುತ್ತಿದ್ದೇನೆ. ಮೂರು ಕೃಷಿ ಕಾನೂನು ವಿರೋಧಿಸಿ ನಾನು ಬಿಜೆಪಿಯಿಂದ ಹೊರ ನಡೆಯುತ್ತಿದ್ದೇನೆ. ಇದು ರೈತವಿರೋಧಿ ಕಾನೂನಾಗಿದೆ. ನಾನು ಎನ್​ಡಿಎ ತೊರೆದಿದ್ದೇನೆ. ಆದರೆ, ಕಾಂಗ್ರೆಸ್​ ಜೊತೆ ಮೈತ್ರಿ ಮಾಡಿಕೊಳ್ಳುವುದಿಲ್ಲ ಎಂದರು. ಅಲ್ಲದೇ ಕೇಂದ್ರ ಈ ಕಾನೂನನ್ನು ಹಿಂಪಡೆಯದಿದ್ದರೆ ಲೋಕಸಭಾ ಸ್ಥಾನಕ್ಕೆ ರಾಜೀನಾಮೆ ನೀಡುವುದಾಗಿ ಕೂಡ ತಿಳಿಸಿದ್ದಾರೆ.

ಶನಿವಾರ ಜೈಪುರ ಬಳಿ ದೆಹಲಿ ಚಲೋ ಪ್ರತಿಭಟನಾ ಮುಂದಾದ ರೈತರ ಪ್ರತಿಭಟನಾ ಮೆರವಣಿಗೆಗೆ ಬೆನಿವಾಲ್​ ಕೂಡ ಜೊತೆಯಾದರು. ಈ ಹಿಂದೆ ಈ ಕುರಿತು ಕೇಂದ್ರ ಗೃಹ ಸಚಿವ ಅಮಿತ್​ ಶಾಗೆ ಪತ್ರ ಬರೆದಿದ್ದ ಅವರು, ಕೃಷಿ ಕಾನೂನು ಹಿಂಪಡೆಯದಿದ್ದರೆ ಬಿಜೆಪಿ ಜೊತೆಯಲ್ಲಿನ ಮೈತ್ರಿ ಕುರಿತು ಮರು ಚಿಂತಿಸಬೇಕಾಗುತ್ತದೆ ಎಂದಿದ್ದರು. ಅಲ್ಲದೇ ರೈತರನ್ನು ಬೆಂಬಲಿಸಿದ ಅವರು ಮೂರು ಸಂಸದೀಯ ಸಮಿತಿಗಳ ಸ್ಥಾನವನ್ನು ತ್ಯಜಿಸಿದ್ದರು. ಬೆನಿವಾಲ್​ ಕೈಗಾರಿಕಾ ಸಂಸದೀಯ ಸಮಿತಿ, ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ, ಹಾಗೂ ಅರ್ಜಿಗಳ ಸಂಸದೀಯ ಸಮಿತಿ ಸದಸ್ಯರಾಗಿದ್ದಾರೆ