Amul: ವಿಶ್ವದ ಹಾಲು ಸಂಸ್ಕರಣಾ ಘಟಕಗಳ ಪಟ್ಟಿಯಲ್ಲಿ 8ನೇ ಸ್ಥಾನಕ್ಕೇರಿದ ಅಮುಲ್

ನವದೆಹಲಿ (ಡಿ. 30): ಭಾರತದ ಪ್ರಮುಖ ಮತ್ತು ಬೃಹತ್ ಹಾಲು ಸಂಸ್ಕರಣಾ ಘಟಕವಾದ ಅಮುಲ್ ಇಡೀ ವಿಶ್ವದ 8ನೇ ಅತಿದೊಡ್ಡ ಹಾಲು ಸಂಸ್ಕರಣಾ ಘಟಕವೆಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. IFCN (ಇಂಟರ್​ನ್ಯಾಷನಲ್ ಫಾರ್ಮ್ ಕಂಪೇರಿಷನ್ ನೆಟ್​ವರ್ಕ್) ವಿಶ್ವದ ಅಗ್ರ ಹಾಲು ಸಂಸ್ಕರಣಾ ಕೇಂದ್ರಗಳ ಪಟ್ಟಿಯನ್ನು ಬಿಡುಗಡೆ ಮಾಡಿದ್ದು, ಅದರಲ್ಲಿ Amul 8ನೇ ಸ್ಥಾನ ಪಡೆದಿದೆ.

ಕಳೆದ ವರ್ಷ 9ನೇ ಸ್ಥಾನದಲ್ಲಿದ್ದ ಅಮುಲ್ ಈ ವರ್ಷ 1 ಸ್ಥಾನ ಮೇಲೇರಿದೆ. 2018ರಲ್ಲಿ ವಿಶ್ವದ ಹಾಲು ಸಂಸ್ಕರಣಾ ಕೇಂದ್ರಗಳ ಪಟ್ಟಿಯಲ್ಲಿ ಅಮುಲ್ 9ನೇ ಸ್ಥಾನದಲ್ಲಿತ್ತು. ಕಳೆದ 8 ವರ್ಷಗಳಲ್ಲಿ 10 ಸ್ಥಾನ ಮೇಲೇರಿರುವ ಅಮುಲ್ 8ನೇ ರ್ಯಾಂಕಿಂಗ್​ನಲ್ಲಿದೆ. 2012ರಲ್ಲಿ ಅಮುಲ್ 18ನೇ ಸ್ಥಾನದಲ್ಲಿತ್ತು. ಕಳೆದ 8 ವರ್ಷಗಳಲ್ಲಿ 10 ಸ್ಥಾನ ಮೇಲಕ್ಕೇರುವ ಮೂಲಕ ಅಮುಲ್ ಭಾರತಕ್ಕೆ ಹೆಮ್ಮೆ ತಂದುಕೊಟ್ಟಿದೆ.

ಇದನ್ನೂ ಓದಿ: Bangalore Coronavirus: ಕೊರೋನಾ ಭೀತಿ; ಬೆಂಗಳೂರಿನ ಬೊಮ್ಮನಹಳ್ಳಿಯ ಅಪಾರ್ಟ್​ಮೆಂಟ್ ಕಾಂಪ್ಲೆಕ್ಸ್​​ ಸೀಲ್​ಡೌನ್

ಅಮುಲ್ ಜೊತೆಗೆ ವಿಶ್ವದ ಇತರೆ ಪ್ರಮುಖ ಹಾಲು ಸಂಸ್ಕರಣಾ ಘಟಕಗಳಾದ ನ್ಯೂಜಿಲೆಂಡ್​ನ ಫಾಂಟೆರಾ, ಸ್ವಿಜರ್ಲೆಂಡ್​ನ ನೆಸ್ಟಲ್ ಡೈರಿ, ಕೆನಡಾದ ಸಪುಟೋ, ಅಮೆರಿಕದ ಡೈರಿ ಫಾರ್ಮರ್ಸ್ ಆಫ್ ಅಮೆರಿಕ, ಫ್ರಾನ್ಸ್​ನ ಗ್ರೂಪ್ ಲಾಕ್ಟಾಲಿಸ್, ನೆದರ್ಲೆಂಡ್​ನ ಫ್ರೀಸ್​ಲ್ಯಾಂಡ್ ಕ್ಯಾಂಪಿನಾ, ಡೆನ್ಮಾರ್ಕ್​ನ ಅರ್ಲ ಫುಡ್ಸ್​ ವಿಶ್ವದ ಟಾಪ್ 10 ಪಟ್ಟಿಯಲ್ಲಿ ಸ್ಥಾನ ಪಡೆದಿವೆ.

ಭಾರತದ ಪ್ರಮುಖ ಡೈರಿ ಸಹಕಾರ ಸಂಸ್ಥೆಯಾಗಿರುವ ಅಮುಲ್ 2.8 ದಶಲಕ್ಷ ಹಾಲು ಉತ್ಪಾದಕ ಸದಸ್ಯರನ್ನು ಹೊಂದಿದೆ. ಅಮುಲ್ ಪ್ರತಿದಿನ ಸರಾಸರಿ 10.16 ದಶಲಕ್ಷ ಲೀಟರ್ ಹಾಲನ್ನು ಸಂಗ್ರಹಿಸುತ್ತದೆ. ಭಾರತ ಮಾತ್ರವಲ್ಲದೆ ಮಾರಿಷಸ್, ಯುಎಇ, ಅಮೆರಿಕ, ಬಾಂಗ್ಲಾದೇಶ, ಆಸ್ಟ್ರೇಲಿಯಾ, ಚೀನಾ, ಸಿಂಗಾಪುರ್, ಹಾಂಕಾಂಗ್​ನಲ್ಲಿಯೂ ಅಮುಲ್ ಮಾರುಕಟ್ಟೆ ಸೃಷ್ಟಿಸಿಕೊಂಡಿದೆ.