Alaska Glacier: ಅಲಾಸ್ಕಾ ಹಿಮನದಿಯಲ್ಲಿ ಹೆಲಿಕಾಪ್ಟರ್ ಪತನ; ಜೆಕ್ ಗಣರಾಜ್ಯದ ಬಿಲಿಯನೇರ್ ಸೇರಿ ಐವರು ಸಾವು

ನವದೆಹಲಿ (ಮಾ. 29): ಅಲಾಸ್ಕಾದ ಅಂಕಾರೇಜ್ ಬಳಿ ಹಿಮನದಿಯಲ್ಲಿ ಹೆಲಿಕಾಪ್ಟರ್ ಪತನವಾಗಿದೆ. ಪ್ರವಾಸಿಗರನ್ನು ಕೊಂಡೊಯ್ಯುತ್ತಿದ್ದ ಹೆಲಿಕಾಪ್ಟರ್ ನೆಲಕ್ಕುರುಳಿದ್ದು, ಈ ದುರಂತದಲ್ಲಿ ಜೆಕ್ ಗಣರಾಜ್ಯದ ಅತಿ ಶ್ರೀಮಂತ ವ್ಯಕ್ತಿ ಸೇರಿದಂತೆ ಐವರು ಸಾವನ್ನಪ್ಪಿದ್ದಾರೆ. ಇಬ್ಬರು ಮಾರ್ಗದರ್ಶಕರು, ಮೂವರು ಪ್ರವಾಸಿಗರು ಸಾವನ್ನಪ್ಪಿದ್ದು, ಓರ್ವ ಗಂಭೀರವಾಗಿ ಗಾಯಗೊಂಡಿದ್ದಾರೆ.

ಇಲ್ಲಿನ ಅಂಕಾರೇಜ್ ಬಳಿಯ ಉತ್ತರ ಚುಗಾಚ್ ಪರ್ವತಗಳು ಬಹಳ ಪ್ರಮುಖ ಪ್ರವಾಸಿ ತಾಣವಾಗಿದೆ. ಈ ಪರ್ವತಗಳನ್ನು ನೋಡಲು ಮಾರ್ಚ್​ನಿಂದ ಮೇ ತಿಂಗಳವರೆಗೆ ಪ್ರವಾಸಿಗರು ಬರುತ್ತಾರೆ. ಈ ಜಾಗವನ್ನು ಹೆಲಿಕಾಪ್ಟರ್​ನಲ್ಲಿ ಪ್ರವಾಸಿಗರಿಗೆ ತೋರಿಸುತ್ತಾ, ಮಾರ್ಗದರ್ಶನ ನೀಡುತ್ತಿದ್ದ ವೇಳೆ ಹೆಲಿಕಾಪ್ಟರ್ ಹಿಮನದಿಗೆ ಬಿದ್ದಿದೆ.

ಈ ದುರಂತದಲ್ಲಿ ಸಾವನ್ನಪ್ಪಿದವರಲ್ಲಿ ಜೆಕ್ ಗಣರಾಜ್ಯದ ಅತಿ ಶ್ರೀಮಂತ ವ್ಯಕ್ತಿ 56 ವರ್ಷದ ಪೀಟರ್ ಕೆಲ್​ನೆರ್ ಕೂಡ ಒಬ್ಬರು. 13 ಬಿಲಿಯನ್ ಡಾಲರ್ ಸಂಪತ್ತನ್ನು ಹೊಂದಿರುವ ಕೆಲ್​ನರ್ ಜೆಕ್ ರಿಪಬ್ಲಿಕ್​ನ ಅತಿ ಶ್ರೀಮಂತ ವ್ಯಕ್ತಿ. ವಿಶ್ವಾದ್ಯಂತ ಇನ್ಷುರೆನ್ಸ್​ ಪಿಪಿಎಫ್​ ಗ್ರೂಪ್, ಟೆಲಿಕಮ್ಯುನಿಕೇಷನ್, ಇಂಜಿನಿಯರಿಂಗ್ ಕಂಪನಿಗಳನ್ನು ನಡೆಸುತ್ತಿರುವ ಕೆಲ್​ನೆರ್ ಈ ದುರಂತದಲ್ಲಿ ಸಾವನ್ನಪ್ಪಿದ್ದಾರೆ.

ಹಿಮನದಿಯಲ್ಲಿ ಹೆಲಿಕಾಪ್ಟರ್ ಪತನವಾಗಿ ಐವರು ಸಾವನ್ನಪ್ಪಿದ್ದರಿಂದ ಈ ಸ್ಥಳದಲ್ಲಿ ವಿಮಾನ ಹಾರಾಟವನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಲಾಗಿದೆ. ಈ ಅಪಘಾತಕ್ಕೆ ಕಾರಣವೇನೆಂಬ ಬಗ್ಗೆ ತನಿಖೆ ನಡೆಸಲಾಗುತ್ತಿದೆ. ಗಾಯಗೊಂಡ ವ್ಯಕ್ತಿಯನ್ನು ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಅವರಿಗೆ ಚಿಕಿತ್ಸೆ ನೀಡಲಾಗುತ್ತಿದೆ.

ಖಾಸಗಿ ಹೆಲಿಕಾಪ್ಟರ್​ನಿಂದ ಅಲಾಸ್ಕಾದ ಸೌಂದರ್ಯವನ್ನು ಕಣ್ತುಂಬಿಕೊಳ್ಳಲು ಹೋದವರು ಪ್ರಾಣ ಕಳೆದುಕೊಂಡಿದ್ದಾರೆ. ಅಂದಹಾಗೆ, ಹೆಲಿಕಾಪ್ಟರ್​ ಪತನವಾಗಿ ಸಾವನ್ನಪ್ಪಿದ ಐವರಲ್ಲಿ ಒಬ್ಬರು ಕೊಲಾರೊಡೊದವರು, ಇಬ್ಬರು ಜೆಕ್ ರಿಪಬ್ಲಿಕ್​ನವರು, ಇಬ್ಬರು ಅಲಸ್ಕಾದವರಾಗಿದ್ದಾರೆ.