2017ರಿಂದ ಈವರೆಗಿನ ಎಲ್ಲ ದಾಖಲೆಗಳನ್ನು ವೆಬ್​ಸೈಟ್​ನಿಂದ ಡಿಲೀಟ್​ ಮಾಡಿದ ರಕ್ಷಣಾ ಇಲಾಖೆ

ನವದೆಹಲಿ (ಅಕ್ಟೋಬರ್ 8): ಲಡಾಖ್​ನಲ್ಲಿ ಚೀನಾ ನಡೆಸುತ್ತಿರುವ ಆಕ್ರಮಣ ವಿಚಾರ, 2017ರ ಡೋಕ್ಲಾಮ್​ ಬಿಕಟ್ಟಿನ ವರದಿ ಸೇರಿ 2017ರಿಂದ ಇಲ್ಲಿಯವರೆಗೆ ಇದ್ದ ಎಲ್ಲಾ ಮಾಸಿಕ ವರದಿಗಳನ್ನು ರಕ್ಷಣಾ ಇಲಾಖೆ ತನ್ನ ವೆಬ್​ಸೈಟ್​ನಿಂದ ತೆಗೆದು ಹಾಕಿದೆ. ಈ ಬಗ್ಗೆ ಇಂಡಿಯನ್ಸ್​ ಎಕ್ಸ್​ಪ್ರೆಸ್​ಗೆ ಪ್ರತಿಕ್ರಿಯೆ ನೀಡಿರುವ ರಕ್ಷಣಾ ಇಲಾಖೆ ಅಕ್ಟೋಬರ್​ ತಿಂಗಳಾಂತ್ಯದೊಳಗೆ ಈ ವರದಿಗಳು ಮತ್ತೆ ವೆಬ್​ಸೈಟ್​ಗೆ ಮರಳಲಿವೆ ಎಂದು ಹೇಳಿದೆ. ಈ ವರದಿಗಳನ್ನು ತೆಗೆದಿದ್ದೇಕೆ ಎನ್ನುವ ಪ್ರಶ್ನೆಗೂ ರಕ್ಷಣಾ ಇಲಾಖೆ ಪ್ರತಿಕ್ರಿಯಿಸಿದೆ. ಈಗ ತೆಗೆದು ಹಾಕಿರುವ ವರದಿಗಳನ್ನು ಹೆಚ್ಚು ಸಮಗ್ರವಾಗಿ ರೂಪಿಸಿ ಮತ್ತೆ ಪೋಸ್ಟ್ ಮಾಡಲಾಗುವುದು ಎಂದು ರಕ್ಷಣಾ ಇಲಾಖೆ ಹೇಳಿದೆ.
ಗಡಿ ಭಾಗದಲ್ಲಿ ಚೀನಾ-ಹಾಗೂ ಭಾರತದ ನಡುವೆ ಘರ್ಷಣೆ ಆರಂಭವಾಗಿತ್ತು. ಪೂರ್ವ ಲಡಾಖ್​​ನಲ್ಲಿ ಅತಿಕ್ರಮಣ ಮಾಡಿದ್ದ ಚೀನಾ ಸೇನೆಯನ್ನು ಆಗಸ್ಟ್​ 6ರಂದು ಓಡಿಸಿದ್ದು ಹೌದು ಎಂದು ರಕ್ಷಣಾ ಇಲಾಖೆಯಲ್ಲಿ ಹಾಕಲಾದ ದಾಖಲೆಗಳು ಹೇಳಿದ್ದವು.

ಈಗ ಈ ವರದಿಗಳನ್ನು ಮತ್ತೆ ಪೋಸ್ಟ್​ ಮಾಡುವುದಕ್ಕೂ ಮುನ್ನ ಈ ಮೊದಲಿದ್ದ ಹಿರಿಯ ಅಧಿಕಾರಿಗಳ ಬಳಿ ಮಾಹಿತಿ ಪರಿಶೀಲಿಸುವಂತೆ ಸೂಚನೆ ನೀಡಲಾಗಿದೆ. ಭಾರತ ಬಾಲ್ಕೋಟ್​ನಲ್ಲಿ ನಡೆಸಿದ ವಾಯು ದಾಳಿ, ಭಾರತ-ಪಾಕ್​ ಕಿತ್ತಾಟ, ಡೋಕ್ಲಾಮ್​ನಲ್ಲಿ ಸೇನೆಯನ್ನು ನಿಯೋಜನೆ ಮಾಡಿದ್ದು ಸೇರಿ ಸಾಕಷ್ಟು ವಿಚಾರಗಳು ಈ ವರದಿಗಳಲ್ಲಿ ಉಲ್ಲೇಖ ಆಗಿರಲಿಲ್ಲ ಎನ್ನಲಾಗಿದೆ.

ಭಾರತ ಮತ್ತು ಚೀನಾದ ಎಲ್​​ಎಸಿ ಗಡಿಯಾದ್ಯಂತ ಪೈಪೋಟಿಯ ಮೇಲೆ ಎರಡೂ ದೇಶಗಳ ಸೇನಾ ಪಡೆಗಳ ನಿಯೋಜನೆಯಾಗಿ ಏರ್ಪಡುತ್ತಿರುವ ಉದ್ವಿಗ್ನ ಪರಿಸ್ಥಿತಿಯನ್ನು ಶಮನ ಮಾಡುವ ಪ್ರಯತ್ನ ಮುಂದುವರಿದಿದೆ. ಪೂರ್ವ ಲಡಾಖ್ ಭಾಗದ ಎಲ್​ಎಸಿಯಲ್ಲಿ ಎರಡೂ ಕಡೆಯ ಮತ್ತಷ್ಟು ಸೇನಾಪಡೆಗಳ ನಿಯೋಜನೆ ಮಾಡದಿರಲು ನಿರ್ಧರಿಸಿದ್ದವು. ಎರಡೂ ಸೇನೆಗಳ ಹಿರಿಯ ಕಮಾಂಡರ್ ಮಟ್ಟದಲ್ಲಿ ಕಳೆದ ತಿಂಗಳು ನಡೆದ ಆರನೇ ಸುತ್ತಿನ ಮಾತುಕತೆಯಲ್ಲಿ ಈ ಬಗ್ಗೆ ನಿರ್ಧಾರ ಕೈಗೊಂಡಿರುವುದು ತಿಳಿದು ಬಂದಿತ್ತು. ಆದರೆ, ಎಲ್​ಎಸಿಯಿಂದ ಸೈನಿಕರನ್ನು ವಾಪಸ್ ಕರೆಸಿಕೊಳ್ಳುವುದಾಗಲೀ ಅಥವಾ ಏಪ್ರಿಲ್​ಗೆ ಮುಂಚೆ ಇದ್ದ ಎಲ್​ಎಸಿ ಸ್ಥಿತಿಗೆ ಮರಳುವುದಾಗಲೀ ಈ ಬಗ್ಗೆ ನಿರ್ಧಾರ ಆಗಿಲ್ಲ. ಈಗಿರುವ ಸೂಕ್ಷ್ಮ ಪರಿಸ್ಥಿತಿ ಹೀಗೇ ಮುಂದುವರಿಯಲಿದೆಯಾದರೂ ಇನ್ನಷ್ಟು ಸೇನಾ ನಿಯೋಜನೆ ತಪ್ಪಿಸುವುದರಿಂದ ಪರಿಸ್ಥಿತಿ ಉಲ್ಬಣಗೊಳ್ಳುವುದು ತಪ್ಪಿದಂತಾಗುತ್ತದೆ.