Winter Terror Chill for Kashmiri Hindus| 2021ರ ನಯಾ ಕಾಶ್ಮೀರಿ ಹಿಂದೂಗಳಿಗೆ ಮತ್ತೆ 1990ರ ಚಳಿಗಾಲದ ಭಯ..!

3 ದಿನಗಳಿಗಿಂತ ಕಡಿಮೆ ಅವಧಿಯಲ್ಲಿ, ಕಾಶ್ಮೀರ ಕಣಿವೆಯಲ್ಲಿ ಅಲ್ಪ ಸಂಖ್ಯಾತ ಹಿಂದೂಗಳೂ ಸೇರಿದಂತೆ 5 ನಾಗರಿಕರನ್ನು ಉಗ್ರರು ಹೊಡೆದುರುಳಿಸಿದ್ದಾರೆ.

ಕಾಶ್ಮೀರಿ ಹಿಂದೂಗಳ ಹತ್ಯೆಯನ್ನು ಖಂಡಿಸಿರುವ ಪೋಸ್ಟರ್​.

ಕಾಶ್ಮೀರಿ ಹಿಂದೂಗಳ ಹತ್ಯೆಯನ್ನು ಖಂಡಿಸಿರುವ ಪೋಸ್ಟರ್​.

  • Share this:
    ಜಮ್ಮು ಕಾಶ್ಮೀರದಲ್ಲಿ (Jammu Kashmir) ಇತ್ತೀಚೆಗೆ ಮತ್ತೆ ಕೆಲ ಹಿಂದೂಗಳ ಹತ್ಯೆಯಾಗಿದೆ. ಈ ಹಿನ್ನೆಲೆ ಕಾಶ್ಮೀರಿ ಪಂಡಿತರಿಗೆ ತಮ್ಮದೇ ಪ್ರದೇಶದಲ್ಲಿ ವಾಸಿಸಲು ಭಯವಾಗುತ್ತಿದೆ. 1990ರಲ್ಲಿ ಸಂಭವಿಸಿದಂತೆ ಮತ್ತೆ ಕಾಶ್ಮೀರಿ ಪಂಡಿತರು ಕಣಿವೆ ನಾಡನ್ನು ತೊರೆಯಬೇಕಾಗುತ್ತದಾ, ಈ ಹತ್ಯೆಗಳ ಸರಣಿ ಇನ್ನೂ ಹೆಚ್ಚಾಗುತ್ತದಾ ಎಂಬ ಭೀತಿ ಕಾಡುತ್ತಿದೆ. ಈ ಹಿನ್ನೆಲೆ ಈ ಲೇಖನದಲ್ಲಿಸಂಘರ್ಷ, ವಿದೇಶಿ ನೀತಿ ಮತ್ತು ಆಂತರಿಕ ಭದ್ರತೆ ಒಳಗೊಳ್ಳುವಲ್ಲಿ ಒಂದು ದಶಕಕ್ಕೂ ಹೆಚ್ಚು ಅನುಭವ ಹೊಂದಿರುವ ಸಂಪಾದಕ ಆದಿತ್ಯ ರಾಜ್‌ ಕೌಲ್ 1990ರಲ್ಲಿ ಕಾಶ್ಮೀರಿ ಪಂಡಿತರ (Kashmiri Pandith) ಪರಿಸ್ಥಿತಿಯನ್ನು ವಿವರಿಸಿದ್ದಾರೆ ಹಾಗೂ ತಮ್ಮ ಅನುಭವವನ್ನು ಹಂಚಿಕೊಂಡಿದ್ದಾರೆ.

    ಆಗ ನನಗೆ ಒಂಬತ್ತು ತಿಂಗಳು ವಯಸ್ಸಾಗಿತ್ತು. ಅಂದು ಜನವರಿ 19, 1990. ಆ ವೇಳೆ ಟ್ವಿಟ್ಟರ್‌ ಇರಲಿಲ್ಲ. ಒಂದು 24/7 ಖಾಸಗಿ ಉಪಗ್ರಹ ಸುದ್ದಿ ಕೇಂದ್ರವೂ ಇರಲಿಲ್ಲ.. ಸುದ್ದಿಗಳು ಹೆಚ್ಚಾಗಿ ದಿನಗಳ ನಂತರ ತಲುಪುತ್ತಿದ್ದವು. ಆ ರಾತ್ರಿ ಕಾಶ್ಮೀರದ ಮಸೀದಿಗಳು ತಮ್ಮ ಧ್ವನಿವರ್ಧಕಗಳ ಮೂಲಕ ಕಾಶ್ಮೀರಿ ಪಂಡಿತರನ್ನು ಕಣಿವೆ ರಾಜ್ಯ ಕಾಶ್ಮೀರವನ್ನು ಖಾಲಿ ಮಾಡುವಂತೆ ಮತ್ತು ತಮ್ಮ ಮಹಿಳೆಯರನ್ನು ಬಿಟ್ಟು ಹೋಗುವಂತೆ ಘೋಷಣೆಗಳನ್ನು ಕೂಗಿದರು. ಪಾಕಿಸ್ತಾನದ ಬೆಂಬಲವಿರುವ ಇಸ್ಲಾಮಿಸ್ಟರು ಕಾಶ್ಮೀರದ ಬೀದಿಗಳಲ್ಲಿ ಆಜಾದಿ ಘೋಷಣೆಗಳನ್ನು ಕೂಗಿದ್ದು, ವ್ಯವಸ್ಥೆ ಕುಸಿದಿತ್ತು.

    ಈ ಗೊಂದಲದಿಂದ ಪ್ರಮುಖ ಕಾಶ್ಮೀರಿ ಪಂಡಿತರ ಹತ್ಯೆಗೆ ಕಾರಣವಾಯಿತು. ಟೀಕಾ ಲಾಲ್‌ ಟ್ಯಾಪ್ಲೂರಂತಹ ರಾಜಕೀಯ ಮುಖಂಡರಿಂದ ನೀಲಕಂಠ ಗಂಜೂವರೆಗೆ, ದೂರದರ್ಶನದ ಲಸ್ಸಾ ಕೌಲ್‌ನಿಂದ ವಿದ್ವಾಂಸ ಬರಹಗಾರ ಸರ್ವಾನಂದ್ ಕೌಲ್ ಪ್ರೇಮಿಯವರೆಗೆ - ಹೀಗೆ ಹಲವರ ಹತ್ಯೆಯಾಯಿತು.

    ಜಮ್ಮು ಕಾಶ್ಮೀರ ಲಿಬರೇಶನ್ ಫ್ರಂಟ್ (JKLF) ಬಹುಸಂಖ್ಯಾತ ಪಂಡಿತರನ್ನು ಕೊಲ್ಲುವ ಹೊಣೆಗಾರಿಕೆಯನ್ನು ಪ್ರಮುಖವಾಗಿ ಹೊತ್ತುಕೊಂಡಿತು. ಯಾಸಿನ್ ಮಲಿಕ್ ಮತ್ತು ಬಿಟ್ಟಾ ಕರಾಟೆ ಎಂಬ ಭಯೋತ್ಪಾದಕರು ಕಾಶ್ಮೀರಿ ಪಂಡಿತರ ನಿರ್ಗಮನದ ಮುಖ್ಯ ಖಳನಾಯಕರಂತೆ ಕಾಣುತ್ತಾರೆ.

    ಜೆಕೆಎಲ್‌ಎಫ್ ನಾಲ್ವರು ನಿರಾಯುಧ ಭಾರತೀಯ ವಾಯುಪಡೆ ಸಿಬ್ಬಂದಿ ಕೊಲ್ಲುವ ಧೈರ್ಯ ಮಾಡಿತು ಮತ್ತು ಅಂದಿನ ಗೃಹ ಸಚಿವ ಮುಫ್ತಿ ಮೊಹಮ್ಮದ್ ಸಯೀದ್ ಮಗಳನ್ನು ಅಪಹರಿಸಿತ್ತು.

    ಆದರೂಇಲ್ಲಿಯವರೆಗೆ ಯಾವುದೇ ಜೆಕೆಎಲ್‌ಎಫ್ ಭಯೋತ್ಪಾದಕನಿಗೆ ತನ್ನ ಭಯೋತ್ಪಾದನೆಯ ಕೃತ್ಯಗಳಿಗೆ ಶಿಕ್ಷೆಯಾಗಿಲ್ಲ. ಅದರ ಬದಲಾಗಿ ಮಾಜಿ ಪ್ರಧಾನಿಗಳಾದ ಅಟಲ್ ಬಿಹಾರಿ ವಾಜಪೇಯಿ ಮತ್ತು ಮನಮೋಹನ್ ಸಿಂಗ್, ಭಯೋತ್ಪಾದಕ ಯಾಸಿನ್ ಮಲಿಕ್‌ರನ್ನು ವಿವಿಧ ಸಂದರ್ಭಗಳಲ್ಲಿ ಆಹ್ವಾನಿಸಿದರು ಮತ್ತು ಆತಿಥ್ಯ ನೀಡಿದ್ದರು.

    1990ರಿಂದ 4 ಲಕ್ಷಕ್ಕೂ ಹೆಚ್ಚು ಕಾಶ್ಮೀರಿ ಹಿಂದೂಗಳನ್ನು ಅಂದಿನ ಕಣಿವೆ ರಾಜ್ಯದಿಂದ ಒತ್ತಾಯಪೂರ್ವಕವಾಗಿ ಓಡಿಸಲಾಯಿತು. ನನ್ನನ್ನು ನನ್ನ ತಾಯಿ ಮತ್ತು ಅಜ್ಜಿಯರು ಜನವರಿ 20, 1990ರ ಬೆಳಗ್ಗೆ ಜಮ್ಮುವಿಗೆ ಕ್ಯಾಬ್‌ನಲ್ಲಿ ಕರೆದೊಯ್ದರು. ಶ್ರೀನಗರದ ರೈನಾವರಿಯಲ್ಲಿರುವ ನಮ್ಮ ಪೂರ್ವಜನರ ಮನೆಯನ್ನು ಅಂದು ತೊರೆದವರು ಮತ್ತೆ ಹಿಂತಿರುಗಲೇ ಇಲ್ಲ.

    ಮೂರು ದಶಕಗಳ ನಂತರ ಇಂದು, ಕಾಶ್ಮೀರ ಕಣಿವೆಯಾದ್ಯಂತ ಮತ್ತೊಮ್ಮೆ ವಿಲಕ್ಷಣ ಶಾಂತ ವಾತಾವರಣವಿದೆ. ಕಾಶ್ಮೀರದಲ್ಲಿ ಈಗ ಶರತ್ಕಾಲವಿದ್ದು, ಚಿನಾರ್‌ ಬೀದಿಗಳಲ್ಲಿ ಜನರ ಚಲನೆಯೇ ಇಲ್ಲದಂತಾಗಿಬಿಡುತ್ತದೆ.

    ವಿಶೇಷವಾಗಿ ಶ್ರೀನಗರವು ಶೋಕದಲ್ಲಿದ್ದಂತೆ ಮೌನವಾಗಿದೆ. ಸಾಮಾನ್ಯ ಸಮಯಕ್ಕಿಂತ ಮುಂಚೆಯೇ ಮಾರುಕಟ್ಟೆಗಳು ಮುಚ್ಚಲ್ಪಡುತ್ತಿದೆ. ಅಜ್ಞಾತರ ಬಗ್ಗೆ ಭಯದ ಭಾವನೆ ಮೂಡುತ್ತಿದೆ. ಲಾಲ್‌ಚೌಕ್ ಮತ್ತು ಪಕ್ಕದ ಐಷಾರಾಮಿ ಮಾರುಕಟ್ಟೆಗಳು ಕತ್ತಲಾಗುವ ಮೊದಲೇ ಬಂದ್‌ ಆಗುತ್ತಿವೆ.

    ಕಾಶ್ಮೀರದಲ್ಲಿಅಲ್ಪಸಂಖ್ಯಾತ ಸಮುದಾಯವಾಗಿರುವ ಹಿಂದೂಗಳು ಹಾಗೂ ಇತರೆ ಜನಾಂಗದ ಸಿಹಿ ಅಂಗಡಿ ಮಾಲೀಕರು ಮತ್ತು ಹಣ್ಣು ಮಾರಾಟಗಾರರು ಮುಂಜಾಗ್ರತಾ ಕ್ರಮವಾಗಿ ಬೇಗನೆ ಮನೆಗೆ ಮರಳುವಂತೆ ಕೋರಲಾಗಿದೆ.

    3 ದಿನಗಳಿಗಿಂತ ಕಡಿಮೆ ಅವಧಿಯಲ್ಲಿ, ಕಾಶ್ಮೀರ ಕಣಿವೆಯಲ್ಲಿ 5 ನಾಗರಿಕರನ್ನು ಹೊಡೆದುರುಳಿಸಲಾಗಿದ್ದು, ಇದರಲ್ಲಿ ಹೆಚ್ಚಿನವರು ಅಲ್ಪಸಂಖ್ಯಾತ ಸಮುದಾಯಗಳವರು (ಹಿಂದೂಗಳು ಸೇರಿ).

    ಶ್ರೀನಗರದಲ್ಲಿ ಆಶ್ರಯ ಪಡೆದಿರುವ ಇಸ್ಲಾಮಿಕ್ ಭಯೋತ್ಪಾದಕರು ಸಂದೇಶವನ್ನು ಸಾರಲು ಸಾಪ್ಟ್‌ ಟಾರ್ಗೆಟ್‌ಗಳನ್ನು ಕೊಲ್ಲುತ್ತಿದ್ದಾರೆ. ಕಾಶ್ಮೀರದಲ್ಲಿ ಭಾರತ ಮತ್ತು ಅದರ ಅಲ್ಪಸಂಖ್ಯಾತರನ್ನು ಅಸ್ಥಿರಗೊಳಿಸುವುದು ಸಂದೇಶವಾಗಿದೆ. ಭಾರತೀಯ ಪ್ರಜಾಪ್ರಭುತ್ವವನ್ನು ಪ್ರತಿನಿಧಿಸುವ ಮತ್ತು ಕಾಶ್ಮೀರದಲ್ಲಿ ಹೆಮ್ಮೆಯಿಂದ ತ್ರಿವರ್ಣ ಧ್ವಜವನ್ನು ಬಿತ್ತರಿಸುವವರೇ ಇವರ ಗುರಿಯಾಗಿದ್ದಾರೆ.

    ಬಲಿಪಶುಗಳು ಇವರೇ..!

    68 ವರ್ಷದ ಮಖಾನ್ ಲಾಲ್ ಬಿಂದ್ರೂ ಭಯೋತ್ಪಾದನೆ ಉತ್ತುಂಗದಲ್ಲಿದ್ದಾಗಲೂ ಕಣಿವೆಯನ್ನು ಬಿಡಲಿಲ್ಲ. ಇವರು ಶ್ರೀನಗರ ಎಸ್‌ಎಸ್‌ಪಿ ಕಚೇರಿಯಿಂದ 500 ಮೀಟರ್‌ಗಳಷ್ಟು ದೂರದಲ್ಲಿರುವ ಇಕ್ಬಾಲ್ ಪಾರ್ಕ್‌ನಲ್ಲಿರುವ ಅವರ ಮೆಡಿಕಲ್‌ ಶಾಪ್‌ನಲ್ಲಿ ಹತ್ಯೆಗೀಡಾದರು. ಸ್ಥಳೀಯರಿಂದ ಗೌರವಿಸಲ್ಪಟ್ಟ ಬಿಂದ್ರೂ ಯಾವಾಗಲೂ ಅಗತ್ಯವಿರುವವರಿಗೆ ಔಷಧಿಗಳನ್ನು ಒದಗಿಸಲು ಸಹಾಯ ಮಾಡುತ್ತಿದ್ದರು. ನರಳುತ್ತಿದ್ದ ಕಾಶ್ಮೀರಿ ಮುಸ್ಲಿಂ ಜನಸಂಖ್ಯೆಗೂ ಸಹಾಯ ಮಾಡಿದ ಇವರ ಅಪರಾಧವೇನು..?

    ಇದೇ ರೀತಿ, ಶ್ರೀನಗರದ ಲಾಲ್ ಬಜಾರ್ ಪ್ರದೇಶದಲ್ಲಿ ಬಿಹಾರಿ ಗೋಲ್‌ಗೊಪ್ಪ ಬೀದಿ ವ್ಯಾಪಾರಿ ಬೀರೇಂದ್ರ ಪಾಸ್ವಾನ್‌ರನ್ನೂ ಭಯೋತ್ಪಾದಕರು ಹಿಂದಿನಿಂದ ಗುಂಡಿನ ದಾಳಿ ನಡೆಸಿದ್ದಾರೆ. ಅದು ಅವರ ನವರಾತ್ರಿ ಉಪವಾಸದ ಮೊದಲ ದಿನ. ಬೆಳಗ್ಗೆ ಅವರು ಬಿಹಾರದ ಭಾಗಲ್ಪುರದಲ್ಲಿರುವ ತಮ್ಮ ಪತ್ನಿಯೊಂದಿಗೆ ದೂರವಾಣಿಯಲ್ಲಿ ಮಾತನಾಡಿ, ಮನೆಗೆ ಭೇಟಿ ನೀಡುವ ಬಗ್ಗೆ ಹೇಳಿದ್ದರು. ಹಾಗೂ, ತನ್ನ ಐದು ವರ್ಷದ ಮಗಳನ್ನು ಭೇಟಿಯಾಗಲು ಕಾಯುತ್ತಿರುವ ಬಗ್ಗೆಯೂ ತಿಳಿಸಿದ್ದರು. ಆದರೆ, ಅದೇ ದಿನ ಸಂಜೆ ತನ್ನ ಗಾಡಿಯನ್ನು ಚಲಿಸುತ್ತಿದ್ದ ವೇಳೆ ಅವರ ಹಿಂದಿನಿಂದ ಭಯೋತ್ಪಾದಕ ಕೊಲೆ ಮಾಡಿದರು. ಐಸಿಸ್ ಒಂದು ದಿನದ ನಂತರ ಈ ಹತ್ಯೆಯ 18 ಸೆಕೆಂಡುಗಳ ವಿಡಿಯೋ ಕ್ಲಿಪ್ಪಿಂಗ್ ಬಿಡುಗಡೆ ಮಾಡಿತ್ತು.

    ಇನ್ನು, ಶ್ರೀನಗರದ ಈದ್ಗಾ ಪ್ರದೇಶದ ಸರ್ಕಾರಿ ಶಾಲೆಯಲ್ಲಿ ಸುಪಿಂದರ್ ಕೌರ್ ಮತ್ತು ದೀಪಕ್ ಚಾಂದ್ ಕ್ರಮವಾಗಿ ಪ್ರಾಂಶುಪಾಲರು ಮತ್ತು ಶಿಕ್ಷಕರಾಗಿದ್ದರು. ಗುರುವಾರ ಬೆಳಗ್ಗೆ ಅವರು ಇತರ ಶಿಕ್ಷಕರಂತೆ ಶಾಲೆಯಲ್ಲಿದ್ದರು. ಅಲ್ಲದೆ, ಸಾಮಾನ್ಯವೆಂಬಂತೆ ಭಯೋತ್ಪಾದಕರು ಶಾಲೆಯ ಆವರಣದೊಳಗೆ ನುಗ್ಗಿ ಶಿಕ್ಷಕರನ್ನು ಮೆರವಣಿಗೆ ಮಾಡಿದರು.

    ನಂತರ ಶಿಕ್ಷಕರಿಗೆ ತಮ್ಮ ಗುರುತಿನ ಚೀಟಿ ಮತ್ತು ಮೊಬೈಲ್ ಫೋನ್‌ಗಳನ್ನು ತೋರಿಸಲು ಕೇಳಲಾಯಿತು. ಸಂಕ್ಷಿಪ್ತ ವಿಚಾರಣೆಯ ನಂತರ, ಎಲ್ಲಾ ಮುಸ್ಲಿಂ ಶಿಕ್ಷಕರನ್ನು ಅಲ್ಲಿಂದ ತೆರಳಲು ಅನುಮತಿಸಲಾಯಿತು.

    ಆದರೆ, ದೀಪಕ್‌ ಚಾಂದ್‌ರನ್ನು ಹೊರಗೆ ಕರೆದೊಯ್ಯಲಾಯಿತು. ಭಯೋತ್ಪಾದಕರು ದೀಪಕ್‌ಗೆ ಬುಲೆಟ್‌ಗಳಿಂದ ದಾಳಿ ಮಾಡಲು ರೈಫಲ್‌ಗಳನ್ನು ಲೋಡ್‌ ಮಾಡುತ್ತಿದ್ದಂತೆ, ಚಾಂದ್‌ರನ್ನು ರಕ್ಷಿಸಲು ಸುಪಿಂದರ್‌ ಧಾವಿಸಿದರು. ಆದರೆ, ಭಯೋತ್ಪಾದಕರು ಇಬ್ಬರಿಗೂ ಗುಂಡುಗಳನ್ನು ಹಾರಿಸಿ ಪರಾರಿಯಾಗಿದ್ದಾರೆ.

    .ಸುಪಿಂದರ್ ಕೌರ್ ಒಬ್ಬರು ಮಾನವತಾವಾದಿ. ಅನಾಥ ಕಾಶ್ಮೀರಿ ಮುಸ್ಲಿಂ ಹುಡುಗಿಯೊಬ್ಬಳು ಶಿಕ್ಷಣ ಪಡೆಯಲು ಮತ್ತು ಆಕೆಯ ವೆಚ್ಚಗಳನ್ನು ಭರಿಸಲು ಸಹಾಯ ಮಾಡುತ್ತಿದ್ದರು. ಕೌರ್ ಪ್ರಾಂಶುಪಾಲರಾಗಿದ್ದ ಶಾಲೆಯ ಕಾಶ್ಮೀರಿ ಮುಸ್ಲಿಂ ಭದ್ರತಾ ಸಿಬ್ಬಂದಿಯ ವೈದ್ಯಕೀಯ ವೆಚ್ಚಗಳಿಗೆ ಸಹಾಯ ಮಾಡುತ್ತಿದ್ದರು. ಆದರೆ, ಆಕೆಯ ಶಾಲಾ ಕಟ್ಟಡದ ಹೊರಗೆ ಆಕೆಯನ್ನು ನಿರ್ದಯವಾಗಿ ಕೊಲ್ಲಲಾಗಿದ್ದು, ಆಕೆ ಮಾಡಿದ

    ಅಪರಾಧವೇನು..?

    2021ರಲ್ಲಿ ಮತ್ತೆ ಹಿಂದೂಗಳು ಕಾಶ್ಮೀರದಿಂದ ನಿರ್ಗಮಿಸುತ್ತಿರುವ ಸುದ್ದಿ ಕೇಳಿದಾಗ ಇಂದು ನನ್ನ ಹೃದಯ ಒಡೆಯುತ್ತಿದೆ. ಇತ್ತೀಚಿನ ಕ್ರೂರ ಹತ್ಯೆಗಳ ನಂತರ ಹಲವಾರು ಹಿಂದೂ ಕುಟುಂಬಗಳು ಶ್ರೀನಗರ ಮತ್ತು ಅನಂತನಾಗ್ ಜಿಲ್ಲೆಗಳನ್ನು ಭಯದಿಂದ ತೊರೆದಿದ್ದಾರೆ. ಇನ್ನು ಕೆಲವರು ಅಳುತ್ತಲೇ ತಮ್ಮ ಲಗೇಜ್‌ಗಳನ್ನು ಪ್ಯಾಕ್‌ ಮಾಡುತ್ತಿದ್ದಾರೆ. ಇದರಿಂದ ನಾನು ನಿಶ್ಚೇಷ್ಟಿತನಾಗಿದ್ದೇನೆ.

    ಕಾಶ್ಮೀರಿ ಪಂಡಿತರಿಂದ ಮತ್ತೆ ಮಹಾ ವಲಸೆ..!

    ಜಮ್ಮುವಿನಲ್ಲಿ ನಿಯೋಜಿಸಲಾಗಿರುವ ಕಾಶ್ಮೀರಿ ಪಂಡಿತ್ ಸಮುದಾಯದ ಯುವ ಜಮ್ಮು ಮತ್ತು ಕಾಶ್ಮೀರ ಪೊಲೀಸ್‌ ಅಧಿಕಾರಿ, ಇದೀಗ ಉತ್ತರ ಕಾಶ್ಮೀರದ ಬಾರಾಮುಲ್ಲಾದಲ್ಲಿರುವ ತಮ್ಮ ಪೂರ್ವಿಕರ ಮನೆಯಲ್ಲಿರುವ ತನ್ನ ಕುಟುಂಬ ಸದಸ್ಯರು ಜಮ್ಮುವಿಗೆ ಹೊರಡುತ್ತಿದ್ದಾರೆ ಎಂದು ನನಗೆ ಹೇಳಿದ್ದಾರೆ. ಗಾಯಕನಾಗಲು ಬಯಸಿದ್ದ ಈತನನ್ನು ಪೊಲೀಸನಾಗುವಂತೆ ಮಾಡಿದೆ.

    ಪ್ರಸಿದ್ಧ ಕಾಶ್ಮೀರಿ ಪಂಡಿತ್ ವ್ಯಾಪಾರ ಕುಟುಂಬವೊಂದು ಗುರುವಾರ ಶ್ರೀನಗರವನ್ನು ತೊರೆದಿದೆ. ಅವರು ಕಳೆದ 32 ವರ್ಷಗಳಿಂದ ಅಲ್ಲೇ ಇದ್ದರು. ಅವರ ಮೊಮ್ಮಗ ವಿದೇಶದಿಂದ ನನಗೆ ಕರೆ ಮಾಡಿ, ಕಾಶ್ಮೀರ ಬಿಡಲು ಇಷ್ಟವಿಲ್ಲದ ನನ್ನ ತಾತನೊಂದಿಗೆ ನಾನು ಮಾತನಾಡಬಹುದೇ ಎಂದು ವಿನಂತಿಸಿಕೊಂಡ. ಈ ವೇಳೆಗೆ ಅಜ್ಜನೂ ಕಾಶ್ಮಿರ ಬಿಟ್ಟು ಹೋಗಿರಬಹುದು.

    ಕಾಶ್ಮೀರದ ಬುದ್ಗಾಮ್‌ನ ಶೇಖ್‌ಪೋರಾದಿಂದ, ವೃದ್ಧ ಮಹಿಳೆಯೊಬ್ಬರು ತನ್ನ ಬ್ಯಾಗ್‌ಗಳನ್ನು ಪ್ಯಾಕ್ ಮಾಡಿದ್ದಾಗಿ ಹೇಳಿ ನಾಳೆ ಬೆಳಗಾಗುವ ಮುನ್ನ ಅಲ್ಲಿಂದ ನಿರ್ಗಮಿಸುವುದಾಗಿಯೂ ಆಡಿಯೋ ಕಳಿಸಿದ್ದಾರೆ. ಅಲ್ಲದೆ, 15 ಕುಟುಂಬಗಳು ಈಗಾಗಲೇ ಈ ಪ್ರದೇಶವನ್ನು ತೊರೆದಿವೆ ಎಂದು ಅವರು ಹೇಳುತ್ತಾರೆ. ವೆಸ್ಸು ಮತ್ತು ಗಂದೇರ್‌ಬಾಲ್‌ನಿಂದ ಅನೇಕರು ಹೊರಡುತ್ತಿದ್ದಾರೆ ಎಂದೂ ತಿಳಿದುಬಂದಿದೆ.

    ಮಧ್ಯ ಮತ್ತು ದಕ್ಷಿಣ ಕಾಶ್ಮೀರದ ಅನೇಕ ಕಾಶ್ಮೀರಿ ಪಂಡಿತ ಸರ್ಕಾರಿ ನೌಕರರು ತಕ್ಷಣ ಪೊಲೀಸ್ ರಕ್ಷಣೆಯನ್ನು ಕೋರಿದ್ದಾರೆಂದೂ ತಿಳಿದುಬಂದಿದೆ.

    ಸೆಪ್ಟೆಂಬರ್ 21 ರಂದು, ಜಮ್ಮು ಮತ್ತು ಕಾಶ್ಮೀರ ಭದ್ರತಾ ಪಡೆಗಳಿಗೆ ಶ್ರೀನಗರದಲ್ಲಿ ಕಾಶ್ಮೀರಿ ಹಿಂದೂಗಳ ಮೇಲೆ ಸಂಭವನೀಯ ದಾಳಿಯ ಬಗ್ಗೆ ಗುಪ್ತಚರ ಮಾಹಿತಿ ಸಿಕ್ಕಿತು ಎಂದು ನನಗೆ ಹೇಳಲಾಯಿತು. ಈ ಮೊದಲು ಜುಲೈನಲ್ಲಿ ಲಾಲ್‌ಚೌಕ್ ಬಳಿ ಹಿಂದೂ ಸ್ವೀಟ್ ಶಾಪ್ ಮಾಲೀಕರ ಮೇಲೆ ದಾಳಿ ನಡೆಸುವ ಸಾಧ್ಯತೆಯ ಬಗ್ಗೆ ಮಾಹಿತಿ ಇತ್ತು. ಈ ಹಿಂದೆ, ಡಾಲ್ ಗೇಟ್ ಪ್ರದೇಶದಲ್ಲಿ ಹಿಂದೂ ಮೆಡಿಕಲ್‌ ಶಾಪ್ ಮಾಲೀಕನ ಮೇಲೂ ಬೆದರಿಕೆ ಇತ್ತು.

    ಜುಲೈನಲ್ಲಿ, ನಾನು ಶ್ರೀನಗರ ಮತ್ತು ಪಕ್ಕದ ಜಿಲ್ಲೆಗಳ ಕಾಶ್ಮೀರಿ ಹಿಂದೂ ಕುಟುಂಬಗಳೊಂದಿಗೆ 26 ದಿನಗಳನ್ನು ಕಳೆದಿದ್ದೇನೆ. ಅನೇಕರು ಬೆದರಿಕೆ, ದೇವಾಲಯದ ಭೂಮಿ ಕಬಳಿಸುವುದು ಮತ್ತು ಹಿಂದೂಗಳನ್ನು ಗುರಿಯಾಗಿಸಿಕೊಂಡು ದಾಳಿಗಳ ಬಗ್ಗೆ ಮಾತನಾಡಿದರು. ಕೇವಲ ಹಿಂದೂ ಸಮುದಾಯ ಮಾತ್ರವಲ್ಲದೇ ಶ್ರೀನಗರದ ದೇವಾಲಯದ ಅರ್ಚಕರು ಸಹ ನಿಯಮಿತವಾಗಿ ಬೆದರಿಕೆಗಳನ್ನು ಎದುರಿಸುತ್ತಿದ್ದು, ತಮ್ಮ ಜೀವಕ್ಕೆ ಭಯಪಡುತ್ತಾರೆ.

    ಜಮ್ಮು ಮತ್ತು ಕಾಶ್ಮೀರ ಪೊಲೀಸರು ಮುಂಜಾಗ್ರತಾ ಕ್ರಮವಾಗಿ ಶ್ರೀನಗರದ ಕೆಲವು ಹಿಂದೂ ಪ್ರದೇಶಗಳು/ಉದ್ಯಮಿಗಳಿಗೆ ಸುರಕ್ಷತೆಯ ಭರವಸೆ ನೀಡಿದರು. ಕಣಿವೆಯಾದ್ಯಂತ ಹಿಂದೂ ಪ್ರದೇಶಗಳಿಗೆ ಭದ್ರತೆಯನ್ನು ನಿಯೋಜಿಸುವುದು ಮುಖ್ಯವಾಗಿದೆ. ಆಮೂಲಾಗ್ರ ಪ್ರತ್ಯೇಕತಾವಾದಿಗಳ ಭದ್ರತೆಗಾಗಿ ಹಲವು ವರ್ಷಗಳಿಂದ ಹಣ ವ್ಯರ್ಥ ಮಾಡಬಹುದಾದರೆ, ದೇಶಭಕ್ತ ಹಿಂದೂಗಳು ಮತ್ತು ಸಿಖ್ಖರಿಗೆ ಏಕೆ ಭದ್ರತೆ ನೀಡಬಾರದು..?

    ಮೌನವು ಭಯಾನಕವಾಗಿದೆ;

    ಕಳೆದ ಮೂರು ದಶಕಗಳಿಂದ ಕಣಿವೆಯಲ್ಲೇ ಉಳಿಯಲು ಆಯ್ಕೆ ಮಾಡಿಕೊಂಡ ಪಂಡಿತರ ಒಂದು ಸಂಘಟನೆಯಾದ ಕಾಶ್ಮೀರಿ ಪಂಡಿತ್ ಸಂಘರ್ಷ ಸಮಿತಿಯು ಲೆಫ್ಟಿನೆಂಟ್ ಗವರ್ನರ್ ಮನೋಜ್ ಸಿನ್ಹಾಗೆ ಬರೆದ ಪತ್ರದಲ್ಲಿ, "ಕಳೆದ ಹತ್ತು ದಿನಗಳಿಂದಲೂ ಉದ್ಯಮಿಗಳು ಮತ್ತು ಪ್ರಮುಖರ ಒಳಹರಿವಿನ ಪ್ರಕಾರ ವಲಸಿಗರಲ್ಲದ ಕಾಶ್ಮೀರಿ ಪಂಡಿತರ /ಕಾಶ್ಮೀರ ಕಣಿವೆಯಲ್ಲಿ ವಾಸಿಸುವ ಹಿಂದೂಗಳನ್ನು ಕಾಶ್ಮೀರ ಕಣಿವೆಯಿಂದ ನಾಶ ಮಾಡಲಾಗುತ್ತದೆ ಎಂಬ ಮಾಹಿತಿ ಇದೆ. ಸಂಬಂಧಿತ ಏಜೆನ್ಸಿಗಳು ತೀವ್ರ ನಿದ್ರಾವಸ್ಥೆಯಲ್ಲಿವೆ ಮತ್ತು ಈ ಕಾರಣದಿಂದಾಗಿ ಪ್ರಮುಖ ಉದ್ಯಮಿಯೊಬ್ಬರ ಹತ್ಯೆಯೂ ಆಗಿದೆ’’ ಎಂದು ಆತಂಕ ಹಾಗೂ ಕೋಪ ವ್ಯಕ್ತಪಡಿಸಿದ್ದರು.

    "ನಿಮ್ಮ ಕಚೇರಿ ಮತ್ತು ಕಾಶ್ಮೀರ ಕಣಿವೆಯಲ್ಲಿ ಕೆಲಸ ಮಾಡುತ್ತಿರುವ ಭದ್ರತಾ ಸಂಸ್ಥೆಗಳು ತೋರಿಸಿದ ಕಠಿಣ ವಿಧಾನವು ಪ್ರಸ್ತುತ ಸರ್ಕಾರದ ಉದ್ದೇಶಗಳ ಬಗ್ಗೆ ಕಾಶ್ಮೀರ ಕಣಿವೆಯಲ್ಲಿ ವಾಸಿಸುತ್ತಿರುವ ವಲಸಿಗರಲ್ಲದ ಕಾಶ್ಮೀರಿ ಪಂಡಿತರು/ಹಿಂದೂಗಳ ಭದ್ರತೆಯ ಬಗ್ಗೆ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ" ಎಂದೂ ಬರೆದಿದ್ದಾರೆ.

    "ಒಂದು ಕಡೆ ಈ ಸಮಸ್ಯೆಗಳನ್ನು ಚರ್ಚಿಸಲು ಅಪಾಯಿಟ್ಮೆಂಟ್‌ ಕೇಳಿದರೆ ನಮ್ಮ ವಿನಂತಿಗಳನ್ನು ಡಸ್ಟ್‌ಬಿನ್‌ನಲ್ಲಿ ಹಾಕಲಾಗಿದೆ. ಮತ್ತೊಂದೆಡೆ, ನಿಮ್ಮ ಶ್ರೇಷ್ಠರ ಕಚೇರಿ ಮತ್ತು ಭದ್ರತಾ ಏಜೆನ್ಸಿಗಳು ಕಾಶ್ಮೀರ ಕಣಿವೆಯಲ್ಲಿ ವಾಸಿಸುವ ಅಲ್ಪಸಂಖ್ಯಾತರ ಜೀವ ಮತ್ತು ಆಸ್ತಿಯನ್ನು ರಕ್ಷಿಸುವಲ್ಲಿ ವಿಫಲವಾಗಿವೆ. ಇದರಿಂದ ವ್ಯವಸ್ತೆ ಕುಸಿದಿರುವುದು ಹಾಗೂ ಆಡಳಿತದ ಭಾಗದಲ್ಲಿ ಸಮನ್ವಯ ಇಲ್ಲದಿರುವುದನ್ನು ಸ್ಪಷ್ಟಪಡಿಸುತ್ತದೆ’’ ಎಂದು ಆ ಪತ್ರವು ಹೇಳುತ್ತದೆ.

    ಕಾಶ್ಮೀರಿ ಪಂಡಿತರ ಕ್ರೂರ ನಿರ್ಗಮನ ಮತ್ತು ಜನಾಂಗೀಯ ಶುದ್ಧೀಕರಣದ 32 ವರ್ಷಗಳ ನಂತರವೂ, ಸರ್ಕಾರವು ಅವರ ಭದ್ರತೆಯನ್ನು ಖಚಿತಪಡಿಸುವಲ್ಲಿ ವಿಫಲವಾಗಿದೆ. ಲೆಫ್ಟಿನೆಂಟ್ ಗವರ್ನರ್ ಮನೋಜ್ ಸಿನ್ಹಾ ಕಣಿವೆಯಲ್ಲಿ ಉಳಿದಿರುವ ಹಿಂದೂಗಳು ಮತ್ತು ಸಿಖ್ಖರು ಸುರಕ್ಷಿತವಾಗಿರದಿದ್ದಾಗ ಪಂಡಿತರ ಪುನರ್ವಸತಿಯನ್ನು ಹೇಗೆ ಖಚಿತಪಡಿಸುತ್ತಾರೆ..?

    ಭಯೋತ್ಪಾದಕ ಹತ್ಯೆಗಳ ಬಗ್ಗೆ ಕಾಶ್ಮೀರಿ ಸಮಾಜದ ಮೌನವು ಭಯಾನಕವಾಗಿದೆ. "ನಮ್ಮ ಚಂದ್ರನ ರಕ್ತ ಹೆಪ್ಪುಗಟ್ಟಿದೆ" ಎಂಬ ಲೇಖಕರಾದ ಕಾಶ್ಮೀರಿ ಪಂಡಿತರಾದ ರಾಹುಲ್ ಪಂಡಿತ, "ಸಾಮೂಹಿಕ ಮೌನವು ಗೊಂದಲಮಯವಾಗಿದೆ. ಆದರೆ ಆಶ್ಚರ್ಯಕರವಲ್ಲ. ನೀವು ನವದೆಹಲಿಯ ಪಂಡರಾ ರಸ್ತೆ ಸೇರಿದಂತೆ ಭಾರತದಲ್ಲಿ ಎಲ್ಲಿಯಾದರೂ ಗೋಲ್‌ಗೊಪ್ಪ ಹೊಂದಬಹುದು, ಆದರೆ ಬಿಹಾರಿ ಕಾಶ್ಮೀರದಲ್ಲಿ ಗೋಲ್‌ಗೊಪ್ಪಗಳನ್ನು ಮಾರಾಟ ಮಾಡಲು ಬಂದರೆ ಅವನು ಹೊರಗಿನವನಾಗುತ್ತಾನೆ.

    ಕಾಶ್ಮೀರಿ ಸಮಾಜದ ಕಪಟತನವು ಗೋಚರಿಸುತ್ತದೆ. ಏಕೆಂದರೆ ಇಸ್ಲಾಮಿಸ್ಟ್ ಭಯೋತ್ಪಾದಕರೆಂದು ಕರೆಯಲು ವಿಫಲವಾಗಿದೆ. ಬಲಿಪಶುಗಳು ಕೇವಲ ಕಾಶ್ಮೀರಿ ಹಿಂದೂಗಳು ಮತ್ತು ಸಿಖ್ಖರು ಮಾತ್ರವಲ್ಲದೆ ತಮ್ಮನ್ನು ಭಾರತೀಯರೆಂದು ಕರೆದುಕೊಳ್ಳುವ ಸಾಮಾನ್ಯ ಕಾಶ್ಮೀರಿ ಮುಸ್ಲಿಮರು ಕೂಡ. ಸಾಮಾನ್ಯವಾಗಿ ಈ ಬೂಟಾಟಿಕೆಯನ್ನು ಕಾಶ್ಮೀರಿಯತ್ ಎಂಬ ಪದದಿಂದ ಮುಚ್ಚಲಾಗುತ್ತದೆ.

    ಕಾಶ್ಮೀರಿಯತ್ ಮೂಲತಃ ತಪ್ಪು ಹೆಸರು. ಕಾಶ್ಮೀರವು ಕಾಶ್ಮೀರ ಕಣಿವೆಯಲ್ಲಿ ಕಾಶ್ಮೀರಿ ಹಿಂದೂಗಳು ಮತ್ತು ಸಿಖ್ಖರ ವಿರುದ್ಧ ಇಸ್ಲಾಮಿಸ್ಟ್ ಆಮೂಲಾಗ್ರ ಸಿದ್ಧಾಂತ ಮತ್ತು ಭಯೋತ್ಪಾದನೆ ಮರೆಮಾಚಲು ಸುಳ್ಳು ಭಾವನೆ ತೋರಿಸಲು ಬಳಸಿದ ಪದವಾಗಿದೆ.

    ಮಾಧ್ಯಮಗಳಲ್ಲಿ ಪ್ರಚಾರಕ್ಕಾಗಿ ಹಿಂದೂಗಳು ಮತ್ತು ಸಿಖ್ಖರ ಅಂತ್ಯಕ್ರಿಯೆಯ ಸಮಯದಲ್ಲಿ ಮಾತ್ರ ಕಾಶ್ಮೀರಿಯತ್ ಗೋಚರಿಸುತ್ತದೆ. ಕಳೆದ ಮೂರು ದಶಕಗಳಲ್ಲಿ ಮುಸ್ಲಿಮರಲ್ಲದವರು ಇಂದು ಗುರಿಯಾಗಿದ್ದಾರೆ. ನಾಡಿಮಾರ್ಗ್‌ನಿಂದ ವಂಡಹಾಮಕ್ಕೆ ಮತ್ತು ಗೂಲ್‌ನಿಂದ ಚತ್ತಿಸಿಂಗ್‌ಪೋರಾಕ್ಕೆ. ಎಲ್ಲ ಕಡೆ ಮುಗ್ಧ ಕಾಶ್ಮೀರಿ ಹಿಂದೂಗಳು ಮತ್ತು ಸಿಖ್ಖರ ರಕ್ತವನ್ನು ಹೆಪ್ಪುಗಟ್ಟಿದ ಕಣಿವೆಯ ಬೀದಿಗಳಲ್ಲಿ ತೊಳೆಯಲಾಗಿದೆ.

    ಇದನ್ನೂ ಓದಿ: Terror Attack: ಮತ್ತೆ ಕಾಶ್ಮೀರದಲ್ಲಿ ಭಯೋತ್ಪಾದಕರಿಂದ ದಾಳಿ; 5 ಯೋಧರು ಹುತಾತ್ಮ, ಇಬ್ಬರು ಉಗ್ರರ ಹತ್ಯೆ

    ಕಾಶ್ಮೀರಿ ಪಂಡಿತರು ಇಂದು ನಿಮಗೆ ಹೇಳಲು ಬಯಸುವುದು, ನಾಳೆ ಅವರನ್ನು ತಮ್ಮ ಕುಟುಂಬದೊಂದಿಗೆ ಕೊಲ್ಲಬಹುದು. ನಯಾ ಕಾಶ್ಮೀರದಲ್ಲಿ 2021ರ ಶರತ್ಕಾಲವು ಹಿಂದೂಗಳು ಮತ್ತು ಸಿಖ್ಖರಿಗೆ 1990ರ ಚಳಿಗಾಲದ ಶೀತವನ್ನು ತಂದಿದೆ. ದಯವಿಟ್ಟು ಪ್ರಧಾನ ಮಂತ್ರಿಯವರೇ, ನಿಮ್ಮ ಮೇಲ್ವಿಚಾರಣೆಯಲ್ಲಿ ಮತ್ತೊಂದು ವಲಸೆ ಹೋಗಲು ಬಿಡಬೇಡಿ.

    (ಸಂಘರ್ಷ, ವಿದೇಶಿ ನೀತಿ ಮತ್ತು ಆಂತರಿಕ ಭದ್ರತೆಯನ್ನು ಒಳಗೊಂಡು ಒಂದು ದಶಕಕ್ಕೂ ಹೆಚ್ಚು ಅನುಭವ ಹೊಂದಿರುವ ಸಂಪಾದಕ ಆದಿತ್ಯ ರಾಜ್ ಕೌಲ್ ಇದರ ಮೂಲ ಲೇಖಕ)
    First published: