ಒಂದು ಹೊತ್ತು ಊಟಕ್ಕೂ ಪರಿತಪಿಸುತ್ತಿದ್ದ ಉತ್ತರ ಪ್ರದೇಶ ಬಾಲಕಿ ಖಾತೆಗೆ ಬಿತ್ತು 10 ಕೋಟಿ ರೂಪಾಯಿ!

ಲಖನೌ (ಸೆಪ್ಟೆಂಬರ್ 24): ಒಮ್ಮೊಮ್ಮೆ ನಮ್​ ಬ್ಯಾಂಕ್ ಖಾತೆಗೆ ಸಾವಿರಾರು ರೂಪಾಯಿ ಮಿಸ್​ ಆಗಿ ಬಂದು ಬೀಳುತ್ತದೆ. ಆಗ ಖುಷಿಯ ಜೊತೆಗೆ ಈ ಹಣವನ್ನು ಯಾರು ಹಾಕಿದರಪ್ಪ ಎನ್ನುವ ಪ್ರಶ್ನೆ ಕೂಡ ಕಾಡುತ್ತದೆ. ಅದೇ ರೀತಿ ಒಂದು ಹೊತ್ತು ಊಟಕ್ಕೂ ಪರಿತಪಿಸುತ್ತಿದ್ದ  ಉತ್ತರ ಪ್ರದೇಶ ಬಾಲಕಿ ಖಾತೆಗೆ ಒಂದಲ್ಲ, ಎರಡಲ್ಲ ಬರೋಬ್ಬರಿ 10 ಕೋಟಿ ರೂಪಾಯಿ ಬಂದು ಬಿದ್ದಿದೆ. ಬ್ಯಾಂಕ್​ಗೆ ಜಮೆ ಆದ ಹಣವನ್ನು ನೋಡಿ ಬಾಲಕಿ ಅಕ್ಷರಶಃ ಶಾಕ್​ಗೆ ಒಳಗಾಗಿದ್ದಾಳೆ. ಈ ವಿಚಾರಕ್ಕೆ ಸಂಬಂಧಿಸಿ ಬಾಲಕಿ ದೂರನ್ನು ಕೂಡ ದಾಖಲು ಮಾಡಿದ್ದಾಳೆ. ಉತ್ತರ ಪ್ರದೇಶದ ಬಲ್ಲಿಯಾದಲ್ಲಿ ಈ ಘಟನೆ ನಡೆದಿದೆ. 16 ವರ್ಷದ ಬಾಲಕಿ ಖಾತೆಗೆ ಹಣ ಜಮೆ ಆದ ಬಗ್ಗೆ ಮೆಸೇಜ್​ ಒಂದು ಬಂದಿತ್ತು. ಇದನ್ನು ನೋಡಿದ ಬಾಲಕಿ ಹೌಹಾರಿದ್ದಳು. ಏಕೆಂದರೆ, ಅಲ್ಲಿ ಜಮೆ ಆಗಿದ್ದ ಹಣ ಬರೋಬ್ಬರಿ 10 ಕೋಟಿ ರೂಪಾಯಿ ಆಗಿತ್ತು. ಅನುಮಾನಗೊಂಡು ಬ್ಯಾಂಕ್​ನಲ್ಲಿ ಪರಿಶೀಲನೆ ಮಾಡಿದಗ ಈ ವಿಚಾರ ನಿಜ ಎಂಬುದು ಗೊತ್ತಾಗಿತ್ತು.

ನಂತರ ಪೊಲೀಸ್​ ಠಾಣೆಗೆ ತೆರಳಿ ಬಾಲಕಿ ದೂರು ನೀಡಿದ್ದಾಳೆ. ನಿಲೇಶ್​ ಕುಮಾರ್ ಎಂಬಾತನ ವಿರುದ್ಧ ಹಣ ಜಮೆ ಮಾಡಿರುವ ಆರೋಪವನ್ನು ಬಾಲಕಿ ಮಾಡಿದ್ದಾಳೆ. ಎರಡು ವರ್ಷಗಳ ಹಿಂದೆ ನೀಲೇಶ್​ ಬಾಲಕಿಯ ಆಧಾರ್​ ಕಾರ್ಡ್​ ಕ್ಸೆರಾಕ್ಸ್​ ಪಡೆದು ಹೋಗಿದ್ದ. ಅಲ್ಲದೆ, ಪ್ರಧಾನ ಮಂತ್ರಿ ಆವಾಸ್​ ಯೋಜನೆ ಅಡಿಯಲ್ಲಿ ಹಣ ಸಿಗಲಿದೆ ಎಂದು ಆತ ಹೇಳಿದ್ದ. ಹೀಗಾಗಿ, ಆಕೆ ಆಧಾರ್​ ಕಾರ್ಡ್​ ಕ್ಸೆರಾಕ್ಸ್ ನೀಡಿದ್ದಳು. ಅಲ್ಲದೆ, ಬ್ಯಾಂಕ್​ ಅಕೌಂಟ್ ಕೂಡ ಮಾಡಿಕೊಂಡಿದ್ದಳು.

ಇದನ್ನೂ ಓದಿ: ದೆಹಲಿಯಲ್ಲಿ ಇಂದು ಸಂಜೆ ಸುರೇಶ್ ಅಂಗಡಿ ಅಂತ್ಯಕ್ರಿಯೆ

ನೀಲೇಶ್​ ಹೇಳಿದ ಆಧಾರದ ಮೇಲೆ ನಾನು ಬ್ಯಾಂಕ್​ ಖಾತೆ ಮಾಡಿದ್ದೆ. ಈ ಹಣಕ್ಕೂ ನನಗೂ ಯಾವುದೇ ಸಂಬಂಧವಿಲ್ಲ ಎಂದು ಬಾಲಕಿ ಹೇಳಿದ್ದಾಳೆ. ಆದರೆ, ಬ್ಯಾಂಕ್​ನವರು ಹೇಳುವುದೇ ಬೇರೆ. ಈ ಬಾಲಕಿ ಖಾತೆಗೆ ಚಿಕ್ಕ ಮೊತ್ತದ ಹಣ ಸಾಕಷ್ಟು ಬಾರಿ ಡಿಪೋಸಿಟ್​ ಆಗಿದ್ದು, ಆಕೆ ಪ್ರತಿ ತಿಂಗಳು 10-20 ಸಾವಿರ ರೂಪಾಯಿ ಹಣ ವಿತ್​ ಡ್ರಾ ಮಾಡುತ್ತಾಳೆ ಎಂದಿದ್ದಾರೆ. ಸದ್ಯ, ಈ ಪ್ರಕರಣ ಸಾಕಷ್ಟು ಕುತೂಹಲ ಮೂಡಿಸಿದ್ದು, ಪೊಲೀಸರು ತನಿಖೆ ಆರಂಭಿಸಿದ್ದಾರೆ.