ಆನ್​ಲೈನ್​ ಗೇಮ್ ಆಡಿ 40,000 ಹಣ ಕಳೆದುಕೊಂಡ ಹುಡುಗ; ತಾಯಿ ಬೈದಿದ್ದಕ್ಕೆ ಆತ್ಮಹತ್ಯೆ ಮಾಡಿಕೊಂಡ..!

ಮಕ್ಕಳು ತಪ್ಪು ಮಾಡಿದಾಗ ತಂದೆ-ತಾಯಿ ಅವರಿಗೆ ಬೈಯ್ದು, ಹೊಡೆದು ಬುದ್ಧಿ ಹೇಳುವುದು ಸಹಜ. ಬೆಳೆಯುವ ವಯಸ್ಸಿನಲ್ಲಿ ಮಕ್ಕಳು ತಪ್ಪು ದಾರಿ ಹಿಡಿಯುವುದು ಸಹಜ. ಆಗ ಪೋಷಕರಾದವರು ತಮ್ಮ ಮಕ್ಕಳಿಗೆ ಬುದ್ಧಿ ಹೇಳಿ ಸರಿ ದಾರಿಗೆ ತರುವ ಪ್ರಯತ್ನ ಮಾಡುತ್ತಾರೆ. ಇತ್ತೀಚಿಗಂತೂ ಮೊಬೈಲ್​ ಬಂದ ಮೇಲೆ ಮಕ್ಕಳಂತೂ ಸದಾ ಅವುಗಳಲ್ಲೇ ಮುಳುಗಿದ್ದಾರೆ. ಆನ್​ಲೈನ್​ ಗೇಮ್​ಗಳಿಗೆ ಅಡಿಕ್ಟ್ ಆಗಿದ್ದಾರೆ. ತಂದೆ-ತಾಯಿ ಬುದ್ಧಿ ಹೇಳುವುದೇ ತಪ್ಪಾಗಿದೆ. ಮಧ್ಯಪ್ರದೇಶದಲ್ಲಿ ಇಂತಹದ್ದೇ ಒಂದು ಘಟನೆ ನಡೆದಿದೆ. ಆನ್​ಲೈನ್​ ಗೇಮ್​ನ ಗೀಳು ಹಚ್ಚಿಕೊಂಡಿದ್ದ ಹುಡುಗನೊಬ್ಬ ಆ ಆಟದಿಂದ ಸುಮಾರು 40 ಸಾವಿರ ಹಣವನ್ನು ಕಳೆದುಕೊಂಡಿದ್ದಾನೆ. ಆತನ ತಾಯಿ ಯಾಕಿಷ್ಟು ಹಣ ಪೋಲು ಮಾಡಿದೆ ಎಂದು ಕೇಳಿದ್ದಕ್ಕೆ ಹುಡುಗ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ.

ಅಂದರೆ ಇಲ್ಲಿ ಮಕ್ಕಳು ತಪ್ಪು ಮಾಡಿದಾಗ ತಂದೆ-ತಾಯಿ ಬೈಯ್ಯುವುದೇ ಅಪರಾಧವಾಗಿದೆ. ತನ್ನ ತಾಯಿ ಬೈಯ್ದಿದ್ದಕ್ಕೆ ಮನನೊಂದ ಹುಡುಗ ಸಾವಿನ ಮನೆ ಕದ ತಟ್ಟಿದ್ದಾನೆ. ಈ ಘಟನೆ ಮಧ್ಯ ಪ್ರದೇಶದ ಚತ್ರಾಪುರ್​ ಜಿಲ್ಲೆಯ ಶಾಂತಿನಗರದಲ್ಲಿ ನಡೆದಿದೆ.

ಇದನ್ನೂ ಓದಿ:Prepaid Recharge: 100 ರೂ. ಒಳಗಿನ ಪ್ರಿಪೇಯ್ಡ್ ರೀಚಾರ್ಜ್‌ನಲ್ಲಿ ಇನ್ಮುಂದೆ SMS ಆಫರ್ ಲಭ್ಯವಿಲ್ಲ..!

ಆತ್ಮಹತ್ಯೆ ಮಾಡಿಕೊಂಡ ಹುಡುಗ ಫ್ರೀ ಫೈಯರ್ ಎಂಬ ಬ್ಯಾಟಲ್ ರಾಯಲ್ ಗೇಮ್​ ನ್ನು ಸದಾ ಆಡುತ್ತಿದ್ದ. ಜೊತೆಗೆ 40 ಸಾವಿರ ರೂಪಾಯಿಯನ್ನು ಆ ಆಟದಿಂದ ಕಳೆದುಕೊಂಡಿದ್ದ. ಇದು ಆತನ ತಂದೆ-ತಾಯಿಗೆ ಕೋಪ ಬರಿಸಿತ್ತು. ಇಷ್ಟು ಹಣ ಏನು ಮಾಡಿದೆ ಎಂದು ಕೇಳಿದ್ದಕ್ಕೆ ಹುಡುಗ ಸಾವಿಗೆ ಶರಣಾಗಿದ್ದಾನೆ.

ಈ ಘಟನೆ ನಡೆದಾಗ, ಮನೆಯಲ್ಲಿ ಹುಡುಗ ಮತ್ತು ಆಕೆಯ ತಂಗಿ ಮಾತ್ರ ಇದ್ದರು. ಪೊಲೀಸರ ಪ್ರಕಾರ, ಹುಡುಗನ ತಾಯಿ ಕೆಲಸಕ್ಕೆ ಹೋಗಿದ್ದಾಗ, ಆಕೆಯ ಬ್ಯಾಂಕ್ ಖಾತೆಯಿಂದ 1,500 ರೂಪಾಯಿ ಕಡಿತವಾಗಿದೆ ಎಂಬ ಮೆಸೇಜ್ ಹೋಗಿದೆ. ಆಗ ಆಕೆ ತನ್ನ ಮಗನಿಗೆ ಕರೆ ಮಾಡಿ ಕಡಿತಗೊಂಡಿರುವ ಹಣದ ಬಗ್ಗೆ ವಿಚಾರಿಸಿದ್ದಾಳೆ. ಆನ್​ಲೈನ್​ ಗೇಮ್​​ ಆಡುವಾಗ ನೀನು ಹಣ ವೇಸ್ಟ್ ಮಾಡಿದ್ದೀಯಾ ಎಂದು ಬೈಯ್ದಿದ್ದಾಳೆ. ಇದರಿಂದ ಬೇಸರಗೊಂಡ ಆತ ರೂಮ್​ಗೆ ಹೋಗಿ ಸೀಲಿಂಗ್ ಫ್ಯಾನ್​ಗೆ ನೇಣು ಬಿಗಿದು ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ.

ಇದನ್ನೂ ಓದಿ:Explained: ಬ್ಯಾಡ್ಮಿಂಟನ್ ತಾರೆ ಪಿ.ವಿ. ಸಿಂಧು ಪುಲ್ಲೇಲ ಗೋಪಿಚಂದ್ ಬಿಟ್ಟು, ದಕ್ಷಿಣ ಕೊರಿಯಾದ ಕೋಚ್‌ ಬಳಿ ತರಬೇತಿ ಪಡೆಯುತ್ತಿರುವುದೇಕೆ..?

ಜೊತೆಗೆ ಸಾವಿಗೀಡಾದ ಯುವಕ ಡೆತ್​ನೋಟ್​ನ್ನು ಬರೆದಿಟ್ಟಿರುವುದು ಪೊಲೀಸ್ ತನಿಖೆ ವೇಳೆ ಬೆಳಕಿಗೆ ಬಂದಿದೆ. ಸುಮಾರು 40 ಸಾವಿರ ಹಣವನ್ನು ತನ್ನ ತಾಯಿಯ ಬ್ಯಾಂಕ್​ ಖಾತೆಯಿಂದ ವಿತ್​ಡ್ರಾ ಮಾಡಿಕೊಂಡು, ಫ್ರೀ ಫೈಯರ್ ಎಂಬ ಆನ್​ಲೈನ್​ ಗೇಮ್​​ ಆಡಿ, ಅಷ್ಟೂ ಹಣವನ್ನು ಕಳೆದುಕೊಂಡಿರುವುದಾಗಿ ಹುಡುಗ ಡೆತ್​ನೋಟ್​ ಬರೆದಿದ್ದಾನೆ.

ಮರಣೋತ್ತರ ಪರೀಕ್ಷೆ ಬಳಿಕ ಬಾಲಕನ ಶವವನ್ನು ಕುಟುಂಬಸ್ಥರಿಗೆ ಒಪ್ಪಿಸಲಾಗಿದೆ. ಪ್ರಕರಣ ಸಂಬಂಧ ಇನ್ನೂ ತನಿಖೆ ನಡೆಯುತ್ತಿದೆ. ಹುಡುಗ ತಾನಾಗಿಯೇ ಬ್ಯಾಂಕ್​ ಅಕೌಂಟ್​​ನಿಂದ ಹಣ ಡ್ರಾ ಮಾಡಿದ್ದಾನೋ ಅಥವಾ ಯಾರದ್ದೋ ಬೆದರಿಕೆಯಿಂದ ಈ ಕೆಲಸ ಮಾಡಿದ್ದಾನೋ ಎಂದು ತಿಳಿಯಲು ಪೊಲೀಸರು ತನಿಖೆ ಮುಂದುವರೆಸಿದ್ದಾರೆ.