ಅತಿಯಾದ ಏಲಕ್ಕಿ ಸೇವನೆ ಆರೋಗ್ಯಕ್ಕೆ ತಂದೀತು ಆಪತ್ತು

ನ್ಯೂಸ್ 18 ಕನ್ನಡ

ಏಲಕ್ಕಿ ಭಾರತ ದೇಶದಲ್ಲಿ ಬೆಳೆಯುವ ಒಂದು ಸಸ್ಯ. ಮಲೆನಾಡು ಪ್ರದೇಶಗಳಲ್ಲಿ ಹೆಚ್ಚಾಗಿ ಕಾಣಸಿಗುವ ಏಲಕ್ಕಿಯನ್ನು, ಸಿಹಿ ತಿಂಡಿಗಳ ತಯಾರಿಕೆಯಲ್ಲಿ ಪರಿಮಳಕ್ಕಾಗಿ ಉಪಯೋಗಿಸುತ್ತಾರೆ. ಇದರಲ್ಲಿ ಅನೇಕ ಔಷಧಿ ಗುಣಗಳಿದ್ದು, ಕಾಫಿ ತೋಟದಲ್ಲಿ ಉಪ ಬೆಳೆಯಾಗಿ ಬೆಳೆಯುತ್ತಾರೆ. ವಾಣಿಜ್ಯ ಬೆಳೆಯಾಗಿ ಪ್ರಸಿದ್ಧಿ ಪಡೆದಿರುವ ಇದು ಮಸಾಲೆ ರಾಜ ಎಂದೇ ಖ್ಯಾತಿ ಪಡೆದಿದೆ.

ಏಲಕ್ಕಿಯಿಂದ ರೋಗನಿರೋಧಕ ಶಕ್ತಿ, ಜೀರ್ಣ ಶಕ್ತಿ ವೃದ್ಧಿಸುವ ಜತೆಗೆ ಆರೋಗ್ಯಕ್ಕೆ ಉತ್ತಮ ಎಂದು ಸಾಕಷ್ಟು ಉಪಯೋಗಗಳಿವೆ. ಆದರೆ ಏಲಕ್ಕಿಯಿಂದಲೂ ಅನೇಕ ಅಡ್ಡಪರಿಣಾಮ ಇದೆ ಎಂದರೆ ನೀವು ನಂಬಲೇಬೇಕು. ಕೆಲವರಿಗೆ ಏಲಕ್ಕಿ ಜಗಿಯುವ ಹವ್ಯಾಸವಿರುತ್ತದೆ. ಆದರೆ ಲೆಕ್ಕಕ್ಕಿಂತ ಅಧಿಕ ಏಲಕ್ಕಿ ಸೇವಿಸಿದರೆ ಅನೇಕ ದುಷ್ಟಪರಿಣಾಮ ಎದುರಿಸಬೇಕಾದೀತು.

ಅಲರ್ಜಿ ಸಮಸ್ಯೆ: ಏಲಕ್ಕಿಯನ್ನು ದೀರ್ಘ ಸಮಯದಿಂದ ಅಥವಾ ಅಧಿಕವಾಗಿ ಉಪಯೋಗಿಸಿದರೆ ಚರ್ಮದ ಅಲರ್ಜಿ ಸಮಸ್ಯೆ ಕಾಡುತ್ತದೆ. ಜತೆಗೆ ಎದೆ ನೋವು, ಗಂಟಲು ಸಮಸ್ಯೆ ಬರಬಹುದು. ಆರಾಮದಾಯಕವಾಗಿ ಇರಲಾರದು. ಉಸಿರಾಟದ ತೊಂದರೆ ಹೆಚ್ಚಾಗುತ್ತದೆ.

ಪಿತ್ತಕೋಶದ ತೊಂದರೆ: ಮಿತಿಗಿಂತ ಅಧಿಕ ಏಲಕ್ಕಿ ಸೇವನೆ ಪಿತ್ತಕೋಶದಲ್ಲಿ ಕಲ್ಲಿನ ಸಮಸ್ಯೆಗೆ ಕಾರಣವಾಗುತ್ತದೆ. ಇತ್ತೀಚೆಗೆ ನಡೆಸಿದ ಅಧ್ಯಯನದಿಂದ ಈ ಮಾಹಿತಿ ತಿಳಿದುಬಂದಿದೆ. ಜೀರ್ಣಕ್ರಿಯೆ ಸರಿಯಾದ ರೀತಿಯಲ್ಲಿ ಆಗದೆ ಇದ್ದರೆ ಪಿತ್ತಕೋಶದಲ್ಲಿ ಕಲ್ಲುಗಳು ಬೆಳೆಯಲಾರಂಭಿಸುತ್ತವೆ. ನೀವು ಈಗಾಗಲೇ ಪಿತ್ತಕೋಶದ ತೊಂದರೆಯಿಂದ ಬಳಲುತ್ತಿದ್ದಲ್ಲಿ, ಏಲಕ್ಕಿ ಸೇವನೆ ತಕ್ಷಣ ನಿಲ್ಲಿಸಿ.

ಈ ಔಷಧಿ ಸೇವಿಸುವವರು ಏಲಕ್ಕಿಯಿಂದ ದೂರವಿರಿ: ನೀವು ಯಾವುದಾದರು ಔಷಧಿ ಸೇವಿಸುತ್ತಿದ್ದಲ್ಲಿ, ಏಲಕ್ಕಿ ಬಳಕೆಯಿಂದ ಆದಷ್ಟು ದೂರವಿರಿ. ಈ ಸಂದರ್ಭ ಏಲಕ್ಕಿ ಸೇವಿಸಿದರೆ ಗಂಭೀರವಾದ ಆರೋಗ್ಯ ಸಮಸ್ಯೆ ಎದುರಿಸಬೇಕಾಗುತ್ತದೆ. ಏನಾದರೂ ಇದನ್ನು ಕಡೆಗಣಿಸಿದರೆ, ನೀವು ಸೇವಿಸುವ ಔಷಧಿಯಿಂದಲೇ ತೊಂದರೆಗೆ ಒಳಗಾಗುವಿರಿ. ಈ ಕೆಳಗಿನ ಔಷಧಿಗಳನ್ನು ಸೇವಿಸುತ್ತಿದ್ದಲ್ಲಿ ಏಲಕ್ಕಿಯಿಂದ ದೂರವಿರುವುದು ಒಳಿತು.

ಹೆಚ್​ಐವಿ,  ಪಿತ್ತಕೋಶದ ಸಮಸ್ಯೆ, ಖಿನ್ನತೆ, ಪದೇ ಪದೇ ಮಲ-ಮೂತ್ರ ಹೋಗುವ ಸಮಸ್ಯೆ ಹಾಗೂ ರಕ್ತ ಹೆಪ್ಪುಗಟ್ಟುವ ಸಮಸ್ಯೆಗೆ ಔಷಧಿ ತೆಗೆದುಕೊಳ್ಳುತ್ತಿರುವವರು ಏಲಕ್ಕಿಯನ್ನು ಸೇವಿಸಬಾರದು.

ಏಲಕ್ಕಿಯಿಂದ ಉಂಟಾಗುವ ಅಡ್ಡಪರಿಣಾಮವನ್ನು ತಡೆಗಟ್ಟುವುದು ಹೇಗೆ?

* ಯಾವುದೇ ಸಂದರ್ಭದಲ್ಲಾದರು ಏಲಕ್ಕಿಯನ್ನು ಅಧಿಕ ಪ್ರಮಾಣದಲ್ಲಿ ಬಳಸಬೇಡಿ

* ಮಿತಿಯಾಗಿ ಸೇವಿಸಿದರೆ ಆರೋಗ್ಯದಿಂದ ಇರಬಹುದು

* ನೀವು ಯಾವುದೇ ಸಮಸ್ಯೆಯಿಂದ ಬಳಲುತ್ತಿದ್ದಲ್ಲಿ, ಏಲಕ್ಕಿ ಸೇವನೆ ಒಳ್ಳೆಯದೇ ಎಂದು ವೈದ್ಯರ ಸಲಹೆ ಪಡೆಯಿರಿ.

ಅತಿಯಾದರೆ ಅಮೃತವೂ ವಿಷ ಎಂಬಂತೆ, ನಿಯಮಿತವಾದ ಏಲಕ್ಕಿ ಸೇವನೆ ಆರೋಗ್ಯಕ್ಕೆ ಒಳ್ಳೆಯದೆ.