Breakfast Recipe: ಇಡ್ಲಿ ತಿಂದು ಬೋರ್ ಆಗ್ತಿದ್ಯಾ? ಹಾಗಾದ್ರೆ ಒಮ್ಮೆ ಟ್ರೈ ಮಾಡಿ ಡಿಫರೆಂಟ್​ ಲಾವಾ ಇಡ್ಲಿ!

ಸಾಮಾನ್ಯವಾಗಿ ಇಡ್ಲಿ ಎಂದರೆ ಎಲ್ಲರಿಗೂ ಇಷ್ಟವಾಗುತ್ತದೆ. ಬೆಳಗಿನ ತಿಂಡಿಗೆ ಇಡ್ಲಿ ಮತ್ತು ಸಾಂಬಾರ್ ಬೆಸ್ಟ್​ ಕಾಂಬಿನೇಷನ್. ಇಡ್ಲಿಯಲ್ಲಿ ತಟ್ಟೆ ಇಡ್ಲಿ, ರವೆ ಇಡ್ಲಿ, ಮಲ್ಲಿಗೆ ಇಡ್ಲಿ, ಓಟ್ಸ್​ ಇಡ್ಲಿ, ಪಡ್ಡು ಹೀಗೆ ವಿಧವಿಧವಾದ ಇಡ್ಲಿಗಳಿದೆ. ಆದರೆ ಪ್ರತಿ ಬಾರಿ ಇದೇ ರೀತಿಯ ಇಡ್ಲಿ ತಿಂದು ನಿಮಗೆ ಬೋರ್ ಆಗಿದ್ದರೆ ಒಮ್ಮೆ ನೂತನವಾದ ಲಾವಾ ಇಡ್ಲಿ ಟ್ರೈ ಮಾಡಿ. ಸಾಮಾನ್ಯವಾಗಿ ಲಾವಾ ಕೇಕ್​ ಅನ್ನು ನೀವು ಕೇಳಿರುತ್ತೀರಾ, ಆದರೆ ಲಾವಾ ಇಡ್ಲಿ ಯಾವುದು ಎಂದು ನೀವು ಅಂದುಕೊಳ್ಳಬಹುದು. ಆದರೆ ಈ ಲಾವಾ ಇಡ್ಲಿ, ನಿಮಗೆ ಹೊಸ ಟೆಸ್ಟ್​ ನೀಡುವುದರ ಜೊತೆಗೆ ಮನೆಯಲ್ಲಿರುವ ಪದಾರ್ಥಗಳನ್ನೇ ಬಳಸಿ ಬಹಳ ಸುಲಭವಾಗಿ ಮಾಡಿ ಸವಿಯಬಹುದು. ಇದು ಮಕ್ಕಳಿಗಂತೂ ಸಖತ್ ಇಷ್ಟವಾಗುತ್ತದೆ. ಏಕೆಂದರೆ ಈ ಇಡ್ಲಿಯಲ್ಲಿ ಪಾನಿಪುರಿಯಲ್ಲಿ ಬಳಸುವ ಪುರಿಯನ್ನು ಬಳಸಲಾಗುತ್ತದೆ. ಅಷ್ಟಕ್ಕೂ ಲಾವಾ ಇಡ್ಲಿ ಮಾಡುದು ಹೇಗೆ ಅಂತೀರಾ? ಹಾಗಾದ್ರೆ ಈ ಸ್ಟೋರಿ ಓದಿ.

ಪಾನಿಪುರಿ

ಮೊದಲಿಗೆ ಇಡ್ಲಿ ಹಿಟ್ಟು, ಸಾಂಬಾರ್​ ತಯಾರಿಸಿಕೊಳ್ಳಬೇಕು. ನಂತರ ಲಾವಾ ಇಡ್ಲಿಯನ್ನು ಮಾಡಬಹುದಾಗಿದೆ. ಹಾಗಾಗಿ ಇಡ್ಲಿ ಹಿಟ್ಟು ಮಾಡಲು ಬೇಕಾಗುವ ಸಾಮಾಗ್ರಿಗಳು 2 ಕಪ್ ಇಡ್ಲಿ ಅಕ್ಕಿ, 1 ಕಪ್ ಉದ್ದಿನ ಬೇಳೆ, 1/4 ಕಪ್ ಅವಲಕ್ಕಿ, ತುಪ್ಪ/ಎಣ್ಣೆ.

ಇಡ್ಲಿ ಹಿಟ್ಟು ತಯಾರಿಸಿಕೊಳ್ಳುವುದೇಗೆ?                

• ಮೊದಲು ದೊಡ್ಡ ಬಟ್ಟಲಿನಲ್ಲಿ ಎರಡು ಕಪ್ ಇಡ್ಲಿ ಅಕ್ಕಿ ಅಥವಾ ರವೆ ಐದು ತಾಸು ನೆನೆಸಿಡಿ. ಇನ್ನೊಂದು ಬಟ್ಟಲಿನಲ್ಲಿ ಒಂದು ಕಪ್ ಉದ್ದಿನ ಬೇಳೆ ಮೂರು ತಾಸು ನೆನೆಸಿಡಿ. ಉದ್ದಿನ ಬೇಳೆಯಿಂದ ನೀರನ್ನು ಫಿಲ್ಟರ್ ಮಾಡಿ, ಎಷ್ಟು ಬೇಕೋ ಅಷ್ಟು ನೀರು ಸೇರಿಸಿ ನಯವಾದ ಪೇಸ್ಟ್‌ ರುಬ್ಬಿರಿ. ಇದನ್ನು ದೊಡ್ಡ ಬಟ್ಟಲಿಗೆ ವರ್ಗಾಯಿಸಿ.


• ಬ್ಲೆಂಡರ್‌ ನಲ್ಲಿ ನೆನೆಸಿದ ಅಕ್ಕಿಗೆ ಮುಕ್ಕಾಲು ಕಪ್ ತೊಳೆದ ತೆಳುವಾದ ಅವಲಕ್ಕಿ ಸೇರಿಸಿ ಸ್ವಲ್ಪ ಒರಟಾದ ಪೇಸ್ಟ್‌ ತಯಾರಿಸಿ. ಅಕ್ಕಿ ಹಿಟ್ಟನ್ನು ಉದ್ದಿನಬೇಳೆ ಜೊತೆ ಮಿಕ್ಸ್ ಮಾಡಿ. ಚೆನ್ನಾಗಿ ಬೆರೆಸಿ. ಹತ್ತು ತಾಸು ಬೆಚ್ಚಗಿನ ಸ್ಥಳದಲ್ಲಿ ಮುಚ್ಚಿಡಿ. ಹಿಟ್ಟು ಹುದುಗಿ ಹದಕ್ಕೆ ಬಂದ ನಂತರ ಚೆನ್ನಾಗಿ ಮಿಕ್ಸ್ ಮಾಡಿ. ಹಿಟ್ಟಿಗೆ ಒಂದೂವರೆ ಟೀಸ್ಪೂನ್ ಉಪ್ಪು ಸೇರಿಸಿ, ಮಿಶ್ರಣ ಮಾಡಿಟ್ಟುಕೊಳ್ಳಿ.

ಲಾವಾ ಇಡ್ಲಿ

ಸಾಂಬಾರ್ ಮಾಡಲು ಬೇಕಾಗುವ ಸಾಮಾಗ್ರಿಗಳು

4 ಹಸಿರು ಮೆಣಸಿನಕಾಯಿ, 3 ಟೊಮ್ಯಾಟೋ, 1 ಸ್ಪೂನ್ ಸಾಸಿವೆ, ಸ್ವಲ್ಪ ಕೊತ್ತಂಬರಿ, 2 ಒಣ ಮೆಣಸಿನಕಾಯಿ, ಸ್ವಲ್ಪ ಕರಿಬೇವು, 1 ಸ್ಪೂನ್ ಜಿರಿಗೆ, 1/2 ಸ್ಪೂನ್  ಮೆಂತ್ಯ, 2 ಈರುಳ್ಳಿ, ಸ್ವಲ್ಪ ಹುಣಸೆ ಹಣ್ಣು, ಸ್ವಲ್ಪ ಅರಿಶಿಣ ಪುಡಿ, 1 ಚಮಚ ಮೆಣಸಿನ ಪುಡಿ, 1 ಸ್ಪೂನ್ ಎಣ್ಣೆ, 1 ಸ್ಪೂನ್ ಸಾಂಬಾರ್ ಪುಡಿ, 1 ಸ್ಪೂನ್ ತೊಗರಿ ಬೇಳೆ

ಸಾಂಬಾರ್ ಮಾಡುವ ವಿಧಾನ

• ಮೊದಲು ಕುಕ್ಕರ್​ಗೆ ಅಡುಗೆ ಎಣ್ಣೆ, ಸಾಸಿವೆ, ಜೀರಿಗೆ, ಮೆಂತ್ಯ, ಈರುಳ್ಳಿ, ಹಸಿರು ಮೆಣಸಿನಕಾಯಿ, ಕತ್ತರಿಸಿದ ಟೊಮೆಟೋ ಮತ್ತು ಕರಿಬೇವಿನ ಎಲೆಗಳನ್ನು ಸೇರಿಸಿ ಬೇಯಿಸಲು ಬಿಡಿ.


• ಟೊಮೆಟೋ ಮೃದುವಾದ ನಂತರ, ನೀವು ಇಷ್ಟಪಡುವಂತಹ ತರಕಾರಿಗಳನ್ನು ಸೇರಿಸಿ. ತರಕಾರಿಗಳು ಅರ್ಧ ಬೆಂದ ನಂತರ ಮೆಣಸಿನ ಪುಡಿ, ಅರಿಶಿಣ ಪುಡಿ, ಸಾಂಬಾರ್ ಪುಡಿ ಬೆರೆಸಿ ಮಿಕ್ಸ್​​ ಮಾಡಿ ಸ್ವಲ್ಪ ಸಮಯ ಬೇಯಲು ಬಿಡಿ.


• ನಂತರ ತೊಗರಿ ಬೇಳೆ ಸೇರಿಸಿ. ನೀರು, ಹುಣಸೆ ಹಣ್ಣಿನ ಹುಳಿ ಸೇರಿಸಿ 4 ವಿಜಲ್ ಕೂಗಿಸಿ. ಕುಕ್ಕರ್​ ತಣ್ಣಗಾದ ನಂತರ ಬೆಳೆಯನ್ನು ತರಕಾರಿಗಳಿಗೆ ಹಾಕಿ ಸ್ವಲ್ಪ ಸ್ಮಾಷ್ ಮಾಡಿ.


• ಕೊತ್ತಂಬರಿ ಸೊಪ್ಪು, ಅಡುಗೆ ಎಣ್ಣೆ, ಸಾಸಿವೆ, ಕರಿಬೇವು, ಒಣ ಮೆಣಸಿನ ಕಾಯಿಯ ಒಗ್ಗರಣೆ ಹಾಕಿದರೆ ಸಾಂಬಾರ್ ಸಿದ್ಧವಾಗುತ್ತದೆ.


• ಈಗ ತಟ್ಟೆ ಇಡ್ಲಿ ಸೆಟ್ ತೆಗೆದುಕೊಂಡು ತಟ್ಟೆಗೆ ಎಣ್ಣೆ ಹಚ್ಚಿರಿ. ಇಡ್ಲಿ ಪ್ಲೇಟ್‌ ಗೆ ಹಿಟ್ಟನ್ನು ಸುರಿಯಿರಿ. ನಂತರ ಇಡ್ಲಿ ತಟ್ಟೆಯನ್ನು ಸ್ಟ್ಯಾಂಡ್‌ ಗೆ ಜೋಡಿಸಿ.

ಲಾವಾ ಇಡ್ಲಿ

ಲಾವಾ ಇಡ್ಲಿ ಮಾಡುವ ವಿಧಾನ

ಮೊದಲಿಗೆ ಲಾವ್​ ಕೇಕ್ ಮಾಡುವ ಪುಟ್ಟ ಕಪ್​ಗೆ ಎಣ್ಣೆ ಸವರಿ, ಸ್ವಲ್ಪ ಇಡ್ಲಿ ಹಿಟ್ಟನ್ನು ಹಾಕಿ, ಪಾನಿಪುರಿಗೆ ಬಳಸುವ ಪುರಿಯನ್ನು ಮಧ್ಯದಲ್ಲಿ ಹೋಲ್ ಮಾಡಿ. ನಂತರ ಅದರೊಳಗೆ ತಯಾರಿಸಿಟ್ಟುಕೊಂಡಿರುವ ಸಾಂಬಾರ್ ಹಾಕಿ, ಪುರಿಯಿಂದ ಮುಚ್ಚಬೇಕು. ಕೊನೆಗೆ ಇಡ್ಲಿ ಹಿಟ್ಟನ್ನು ಪುರಿಯ ಮೇಲೆ ಹಾಕಿ. ಇಡ್ಲಿ ಹಬೆ ಮಾಡುವ ಪಾತ್ರೆಯಲ್ಲಿಟ್ಟು ಮಧ್ಯಮ ಉರಿಯಲ್ಲಿ ಇಪ್ಪತ್ತು ನಿಮಿಷ ಬೇಯಿಸಿ. ಚೆನ್ನಾಗಿ ಇಡ್ಲಿ ಬೆಂದ ನಂತರ ತೆಗೆದರೆ ಲಾವಾ ಇಡ್ಲಿ ಸವಿಯಲು ಸಿದ್ಧ.