'ಸಿಂಗಾಪೂರ್ ಏರ್​ಲೈನ್ಸ್'ಗೆ ಮೊದಲ ಸ್ಥಾನ: ಭಾರತದ ವೈಮಾನಿಕ ಕಂಪನಿಗಳ ಸ್ಥಾನ ಏನು ಗೊತ್ತಾ..?

-ನ್ಯೂಸ್ 18 ಕನ್ನಡ

ವಿಶ್ವದ ಅತ್ಯಂತ ಪವರ್​ಫುಲ್ ಪಾಸ್​ಪೋರ್ಟ್​ ಹೊಂದಿರುವ ಪಟ್ಟಿಯಲ್ಲಿ ಮೊದಲೆರೆಡು ಸ್ಥಾನ ಪಡೆದಿದ್ದ ಸಿಂಗಾಪೂರ್ ಮತ್ತು ಜಪಾನ್ ದೇಶಗಳು ಮತ್ತೊಮ್ಮೆ ವಿಶ್ವದ ಗಮನ ಸೆಳೆದಿದೆ. ಕಳೆದ ಬಾರಿ ಪಾಸ್​ಪೋರ್ಟ್​ ಆಗಿದ್ದರೆ ಈ ಬಾರಿ ಪ್ರಯಾಣ ವ್ಯವಸ್ಥೆಯಿಂದ ಎಂಬುದಷ್ಟೇ ವ್ಯತ್ಯಾಸ.

ಹೌದು, ಪ್ರಪಂಚದ ಟಾಪ್ 10 ವಿಮಾನಯಾನ ಸೇವೆ ನೀಡುವ ಏರ್​ಲೈನ್ಸ್​ ಕಂಪನಿಗಳ ಪಟ್ಟಿಯಲ್ಲಿ ಮೊದಲ ಮೂರು ಸ್ಥಾನಗಳನ್ನು ಏಷ್ಯಾದ ಮೂರು ವಿಮಾನಯಾನ ಕಂಪನಿಗಳು ಪಡೆದುಕೊಂಡಿದೆ. 'ಸ್ಕೈಟ್ರಾಕ್ಸ್​ ಎಡಿಟರ್ಸ್'​​ ನೀಡಿರುವ ರ‍್ಯಾಂಕಿಂಗ್‌ನಲ್ಲಿ 'ಸಿಂಗಾಪೂರ್ ಏರ್​ಲೈನ್ಸ್'​​ ಅಗ್ರಸ್ಥಾನಗಳಿಸಿದೆ. ದ್ವಿತೀಯ ಸ್ಥಾನದಲ್ಲಿ 'ಕತಾರ್ ಏರ್​​ವೇಸ್' ಮತ್ತು ತೃತೀಯ ರ‍್ಯಾಂಕ್​ ಅನ್ನು ಜಪಾನಿನ 'ಆಲ್​ ನಿಪ್ಪೊನ್ ಏರ್​ವೇಸ್'​ ಪಡೆದಿದೆ.

ಸಿಂಗಾಪೂರ್ ಏರ್​ಲೈನ್ಸ್​ ಸಂಸ್ಥೆಯು ಪ್ರಪಂಚದ ಆರು ಖಂಡಗಳಿಗೂ ವಿಮಾನಯಾನ ಸೇವೆ ನೀಡುತ್ತಿದೆ. ಅಲ್ಲದೆ ಈ ಸಂಸ್ಥೆಯ ಸೇವೆಯ ಬಗ್ಗೆ ಪ್ರಯಾಣಿಕರಲ್ಲಿ ಉತ್ತಮ ಅಭಿಪ್ರಾಯವಿದ್ದು, ವಿಮಾನಯಾನ ಸೇವೆಯಲ್ಲಿ ಸ್ಥಿರತೆ ಕಾಯ್ದುಕೊಳ್ಳುವಲ್ಲಿ ಈ ಕಂಪನಿ ಯಶಸ್ವಿಯಾಗಿದೆ ಎಂದು ಸ್ಕೈಟ್ರಾಕ್ಸ್​ ವಕ್ತಾರ ಎಡ್ವರ್ಡ್​ ತಿಳಿಸಿದ್ದಾರೆ.

ಕೆಲ ತಿಂಗಳ ಹಿಂದೆಯಷ್ಟೇ ಸಿಂಗಾಪೂರ್ ಏರ್​ಲೈನ್ಸ್​​ ಡಬಲ್ ಡೆಕ್ಕರ್ A380 ವಿಮಾನಯಾನವನ್ನು ಪ್ರಾರಂಭಿಸಿತ್ತು. ಇದರ ಒಳಾಂಗಣದ ಮೇಲ್ಭಾಗವನ್ನು ಆರು ಖಾಸಗಿ ಅಪಾರ್ಟ್​​ಮೆಂಟ್​ ರೀತಿಯಲ್ಲಿ ವಿನ್ಯಾಸಗೊಳಿಸಲಾಗಿದೆ. ಪ್ರತಿ ಕೋಣೆಯಲ್ಲೂ ಡಬಲ್ ಫ್ಲಾಟ್ ಬೆಡ್​ ಮತ್ತು ಲೆದರ್​ ಕುರ್ಚಿಗಳನ್ನು ಇರಿಸಲಾಗಿದ್ದು, ವ್ಯಾನಿಟಿ ಕೌಂಟರ್​ಗಳು ಮತ್ತು ಐಷಾರಾಮಿ ಹಾಸಿಗೆಯ ಸೌಲಭ್ಯವನ್ನು ಇದರಲ್ಲಿ ನೀಡಲಾಗಿದೆ. ಇಂತಹದೊಂದು ವಿಮಾನಯಾನ ಸೇವೆಯ ಮೂಲಕ ವಿಶ್ವದ ಗಮನ ಸೆಳೆದಿದ್ದ ಸಿಂಗಾಪೂರ್ ಏರ್​ಲೈನ್ಸ್​ ಈಗ ನಂಬರ್​ 1 ಗೌರವಕ್ಕೆ ಪಾತ್ರವಾಗಿದೆ.

www.worldairlinesurvey.com ನಡೆಸಿದ ಈ ಆನ್​ಲೈನ್​ ಸಮೀಕ್ಷೆಯಲ್ಲಿ 20.36 ಮಿಲಿಯನ್​ ಜನರು ಮತ ಚಲಾಯಿಸಿದ್ದಾರೆ. ವಿಶ್ವದ 335 ವಿಮಾನಯಾನ ಸಂಸ್ಥೆಗಳು ಈ ಸಮೀಕ್ಷೆಯಲ್ಲಿ ಭಾಗವಹಿಸಿದ್ದು, 100 ರಾಷ್ಟ್ರಗಳ ಪ್ರಯಾಣಿಕರು ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದಾರೆ. ಇಂಗ್ಲೀಷ್​, ಫ್ರೆಂಚ್, ಸ್ಪ್ಯಾನಿಷ್, ಚೀನಿ, ರಷ್ಯನ್ ಮತ್ತು ಜಪಾನೀಸ್​ ಭಾಷೆಯಲ್ಲಿ ನಡೆಸಲಾದ ಈ ಸಮೀಕ್ಷೆಯ ರ‍್ಯಾಂಕಿಂಗ್‌​ನ ಟಾಪ್​ 20 ಯಲ್ಲೂ ಭಾರತದ ಯಾವುದೇ ಏರ್​ಲೈನ್ಸ್​ ಸಂಸ್ಥೆ ಸ್ಥಾನಗಿಟ್ಟಿಸಿಕೊಂಡಿಲ್ಲ.

ಪ್ರಪಂಚದ ಟಾಪ್ ​10 ಏರ್​ಲೈನ್ಸ್​ ಸಂಸ್ಥೆಗಳ ಪಟ್ಟಿ

1. ಸಿಂಗಾಪೂರ್ ಏರ್​ಲೈನ್ಸ್​
2. ಕತಾರ್ ಏರ್​​ವೇಸ್​
3. ಆಲ್ ನಿಪ್ಪೊನ್ ಏರ್​​ವೇಸ್​
4. ಎಮಿರೇಟ್ಸ್​
5. ಈವ ಏರ್
6. ಕಾಥೆ ಫೆಸಿಪಿಕ್
7. ಲುಫ್ತಾನ್ಸಾ
8. ಹೈನಾನ್ ಏರ್​ಲೈನ್ಸ್​
9. ಗರುಡ ಇಂಡೋನೇಷ್ಯಾ
10. ಥಾಯ್ ಏರ್​ವೇಸ್​