Eat Healthy: ನಿಮ್ಮ ಕಣ್ಣಿನ ಆರೋಗ್ಯ ಕಾಪಾಡಲು ಇವುಗಳನ್ನು ತಿನ್ನಿ

ಅತಿ ಚಿಕ್ಕ ವಯಸ್ಸಿಗೆ ಕಣ್ಣಿಗೆ ಕನ್ನಡಕಗಳು ಬರುತ್ತಿವೆ. ದೃಷ್ಟಿ ದೋಷದ ಸಮಸ್ಯೆಗಳು ಸಹಜ ಎನ್ನುವಂತಾಗಿದೆ. ಒಣ ಕಣ್ಣು ಸಮಸ್ಯೆ (Problem) , ಕಣ್ಣಿನ ದೌರ್ಬಲ್ಯ, ಕಣ್ಣಿನಲ್ಲಿ ನೀರು ಸೋರುವುದು, ಆಗಾಗ ಕೆಂಪಾಗುವುದು ಇದೆಲ್ಲವೂ ಕೂಡ ಸರ್ವೇ ಸಾಮಾನ್ಯವಾಗಿದೆ. ಕಣ್ಣಿಗೆ ಅವಶ್ಯಕವಾದ ವಿರಾಮ ದೊರಕುತ್ತಲೇ ಇಲ್ಲ. ಸದಾ ಕಂಪ್ಯೂಟರ್ , ಮೊಬೈಲ್ (Mobile) , ಟಿವಿ ನೋಡುವ ಕಾರಣ ಕಣ್ಣಿನ ಮೇಲೆ ಒತ್ತಡ ಹೆಚ್ಚಾಗುತ್ತದೆ. ಈ ನಿಟ್ಟಿನಲ್ಲಿ ಕಣ್ಣಿನ ಆರೋಗ್ಯದ (Health) ಬಗ್ಗೆ ಕಾಳಜಿ ವಹಿಸದಿದ್ದರೇ ಮುಂದಿನ ದಿನಗಳಲ್ಲಿ ದೊಡ್ಡ ಪರಿಣಾಮ ಎದುರಿಸಬೇಕಾಗುತ್ತದೆ.

ಆದ್ದರಿಂದ ನಿಮ್ಮ ಜೀವನ ಶೈಲಿಯ ಜೊತೆಗೆ ಸರಿಯಾದ ಆಹಾರ ಪದ್ಧತಿಯನ್ನು ಅಳವಡಿಸಿಕೊಳ್ಳುವುದು ಬಹಳ ಮುಖ್ಯವಾಗುತ್ತದೆ. ಈ ಹಿನ್ನೆಲೆಯಲ್ಲಿ ಈ 5 ಆಹಾರಗಳನ್ನು ಸೇವಿಸಿದ್ರೆ ನಿಮ್ಮ ಕಣ್ಣಿನ ಆರೋಗ್ಯ ಸದಾ ಚೆನ್ನಾಗಿರುತ್ತದೆ.

1. ಮೀನು

ಮೀನಿನಂತಹ ಕಣ್ಣು ಎನ್ನುವ ಹೋಲಿಕೆ ಇದೆ. ಅದರ ಜೊತೆಗೆ ಮೀನು ಕಣ್ಣಿನ ಆರೋಗ್ಯಕ್ಕೆ ಸಹಕಾರಿ ಎನ್ನುವ ಮಾತು ಕೂಡ ಇದೆ. ಮೀನಿನಲ್ಲೇ ಹೆಚ್ಚು ಪೋಷಕಾಂಶವುಳ್ಳ ಸಾಲ್ಮನ್​ ಫಿಶ್​ ಹೆಚ್ಚು ಪ್ರಯೋಜನಕಾರಿಯಾಗಿದೆ.

ಮೀನಿನಲ್ಲಿರುವ ಒಮೆಗಾ-3 ಫ್ಯಾಟಿ ಆಸಿಡ್​ ಕಣ್ಣಿಗೆ ರಕ್ಷಾ ಕವಚವಾಗಿದೆ. ಒಣ ಕಣ್ಣಿನ ಸಮಸ್ಯೆ ನಿವಾರಣೆ, ರೆಟಿನಾ ಆರೋಗ್ಯಕ್ಕೆ ಮೀನನ್ನು ನಿಮ್ಮ ಆಹಾರದಲ್ಲಿ ಅಳವಡಿಸಿಕೊಳ್ಳುವುದು ಪ್ರಯೋಜನಕಾರಿಯಾಗಿದೆ.

ಇದನ್ನೂ ಓದಿ: Skin Care: ತ್ವಚೆ ಮೃದುವಾಗಿರಬೇಕಂದ್ರೆ ಬಾಡಿ ಲೋಷನ್ ಯಾವಾಗ ಹಚ್ಚಿಕೊಳ್ಳಬೇಕು?

2. ಮೊಟ್ಟೆ

ಪ್ರೊಟೀನ್​ಪೂರ್ಣ ಮೊಟ್ಟೆ ಕಣ್ಣಿನ ಆರೋಗ್ಯ ನಿರ್ವಹಣೆಯಲ್ಲಿ ಮುಖ್ಯ ಪಾತ್ರ ವಹಿಸುತ್ತದೆ. ಇದರಲ್ಲಿರುವ ವಿಟಮಿನ್ ಎ, ಸತು ಕಣ್ಣಿನ ಶಕ್ತಿಯನ್ನು ವೃದ್ಧಿಸುತ್ತದೆ.

ಕಾರ್ನಿಯವನ್ನು ರಕ್ಷಿಸಲು ವಿಟಮಿನ್ ಎ ಅಂಶ ಪ್ರಯೋಜನಕಾರಿಯಾಗಿದೆ. ಲುಟೇನ್ ಮತ್ತು ಝಿಯಾಕ್ಸಾ​ಥಿನ್ ವಯಸ್ಸಾದಂತೆ ಕಾಡುವ ಕಣ್ಣಿನ ಪೊರೆ ಸಮಸ್ಯೆಯನ್ನು ನಿವಾರಿಸುತ್ತದೆ. ಜೊತೆಗೆ ಇರುಳುಗುರುಡು ಸಮಸ್ಯೆ ನಿವಾರಿಸುತ್ತದೆ.

3. ಬಾದಾಮಿ

ಬಾದಾಮಿಯೂ ಸೂಪರ್​ಫುಡ್​ಗಳಲ್ಲಿ ಒಂದಾಗಿದೆ. ಮಿದುಳಿನ ಆರೋಗ್ಯಕ್ಕಷ್ಟೇ ಅಲ್ಲದೇ ಕಣ್ಣಿನ ಆರೋಗ್ಯಕ್ಕೂ ಬಾದಾಮಿ ನೆರವಾಗುತ್ತದೆ. ಇದರಲ್ಲಿರುವ ವಿಟಮಿನ್​ ಎ ಅಂಶವು ಆರೋಗ್ಯಕರ ಟಿಶ್ಯೂಗಳ ನಿರ್ವಹಣೆಗೆ ಪ್ರಯೋಜನಕಾರಿಯಾಗಿದೆ. ಪ್ರತಿನಿತ್ಯ ನಿಯಮಿತ ಪ್ರಮಾಣದಲ್ಲಿ ಬಾದಾಮಿ ಸೇವನೆಯೂ ಕ್ಯಾಟರಾಕ್ಟ್​ನಂತಹ ವಯೋ ಸಂಬಂಧಿತ ಕಾಯಿಲೆಗಳಿಂದ ದೂರವಿಡುತ್ತದೆ.

4. ಕ್ಯಾರೆಟ್

ಬೀಟಾ ಕ್ಯಾರೋಟಿನ್, ವಿಟಮಿನ್ ಎ ನಿಂದ ಸಮೃದ್ಧವಾಗಿರುವ ಕ್ಯಾರೆಟ್​ ಸೇವನೆಯೂ ಕಣ್ಣಿನ ಆರೋಗ್ಯ ರಕ್ಷಣೆಯಲ್ಲಿ ಅಗ್ರ ಸ್ಥಾನದಲ್ಲಿದೆ. ಇದರಲ್ಲಿರುವ ರೊಡಾಪ್ಸಿನ್ ಎನ್ನುವ ಪ್ರೊಟೀನ್ ರೆಟಿನಾ ಕಾರ್ಯಕ್ಷಮತೆ ಹೆಚ್ಚಿಸುತ್ತದೆ. ಕಣ್ಣಿಗೆ ಸಂಬಂಧಿತ ಸೋಂಕು ಮತ್ತು ಅಲರ್ಜಿಯಿಂದ ಕಣ್ಣನ್ನು ರಕ್ಷಿಸುತ್ತದೆ.

5. ಕೇಲ್​​

ತೀರಾ ಇತ್ತೀಚೆಗೆ ನಮ್ಮ ಆಹಾರ ಪದ್ಧತಿಯೊಳಗೆ ಪರಿಚಯವಾಗುತ್ತಿರುವ ಕೇಲ್​​ ಅತಿ ಹೆಚ್ಚು ರೋಗ ನಿರೋಧಕ ಶಕ್ತಿಯನ್ನು ಹೊಂದಿದೆ. ಬೀಟಾ -ಕ್ಯಾರೋಟಿನ್, ಖನಿಜ, ವಿಟಮಿನ್​ಗಳ ಆಗರವಾಗಿರುವ ಕೇಲ್​ ಸೇವನೆಯೂ ಕಣ್ಣಿಗೆ ಔಷಧಿಯಾಗಿ ಕೆಲಸ ನಿರ್ವಹಿಸುತ್ತದೆ.

ಲುಟೇನ್ ಮತ್ತು ಝಿಯಾಕ್ಸಾಥಿನ್​ಗಳನ್ನು ದೇಹವು ಉತ್ಪಾದಿಸದ ಕಾರಣ ನಾವು ಆಹಾರದ ಮೂಲಕ ಅದನ್ನು ಸರಿದೂಗಿಸಿಕೊಳ್ಳಬೇಕು. ಈ ನಿಟ್ಟಿನಲ್ಲಿ ಕೇಲ್ ಪ್ರಯೋಜನಕಾರಿ. ನಿಯಮಿತವಾಗಿ ಕೇಲ್​ ಸೇವನೆ ಮಾಡುವುದರಿಂದ ವಯಸ್ಸಾದಂತೆ ಕಾಡುವ ಕಣ್ಣಿನ ಪೊರೆಯ ರೋಗ ಹತ್ತಿರ ಸುಳಿಯುವುದಿಲ್ಲ.

ಇದಿಷ್ಟೇ ಅಲ್ಲದೇ ನುಗ್ಗೆಸೊಪ್ಪು, ಬೀಟ್​ರೂಟ್​ಗಳು, ಕಿತ್ತಳೆ ಹಣ್ಣನ್ನು ನಿಮ್ಮ ಆಹಾರದಲ್ಲಿ ಸೇರಿಸಿಕೊಳ್ಳಿ. ಈ ಎಲ್ಲವೂ ಕಣ್ಣಿನ ಆರೋಗ್ಯ ಸುಧಾರಿಸುತ್ತವೆ. ಅಷ್ಟೇ ಅಲ್ಲದೇ ದೀರ್ಘಕಾಲದವರೆಗೆ ಕಣ್ಣಿನ ಆರೋಗ್ಯಕ್ಕೆ ಧಕ್ಕೆಯಾಗದಂತೆ ಕಾಪಾಡುತ್ತವೆ.

ಒಂದು ವೇಳೆ ನಿಮಗೆ ಮೊದಲಿನಿಂದಲೂ ಕಣ್ಣಿನ ಸಮಸ್ಯೆ ಇದ್ದರೆ, ಶುಗರ್​ನಿಂದ ಕಣ್ಣಿನ ಸಮಸ್ಯೆಯಾಗಿದ್ದರೆ ನೀವು ಈ ಆಹಾರಗಳನ್ನು ಸೇವಿಸುವ ಮುನ್ನ ನಿಮ್ಮ ವೈದ್ಯರ ಸಲಹೆ ಪಡೆಯಿರಿ ಆ ಮೂಲಕ ಆಹಾರ ಮತ್ತು ಆರೋಗ್ಯದಲ್ಲಿ ಸಮತೋಲಮ ಸಾಧಿಸಿ.