Health Tips: ಹಸಿರು, ಕಪ್ಪು ಮತ್ತು ಕೆಂಪು ದ್ರಾಕ್ಷಿ; ಇವುಗಳ ಪೈಕಿ ಆರೋಗ್ಯಕ್ಕೆ ಉತ್ತಮ ಯಾವುದು?

ದ್ರಾಕ್ಷಿ ಹಣ್ಣು, ಗಾತ್ರದಲ್ಲಿ ಸಣ್ಣದಿದ್ದರೂ ಹಲವು ಆರೋಗ್ಯ ಪ್ರಯೋಜನಗಳಿವೆ. ಕೆಲ ಹಣ್ಣಿನ ಜಾತಿಗಳಲ್ಲಿ ವಿಧವಿಧವಾದ ಹಣ್ಣುಗಳು ಬರುತ್ತವೆ. ಅದರಲ್ಲಿ ಒಂದು ಈ ದ್ರಾಕ್ಷಿ. ದ್ರಾಕ್ಷಿ ಎಂದರೆ ಹಸಿರು, ಕಪ್ಪು, ಕೆಂಪು ದ್ರಾಕ್ಷಿ ಅಂತಾ ಬೇರೆ ಬೇರೆ ವಿಧಗಳು ನಮ್ಮ ಕಣ್ಮುಂದೆ ಬರುತ್ತದೆ. ಈ ಎಲ್ಲಾ ದ್ರಾಕ್ಷಿಗಳು ಆರೋಗ್ಯಕರವಾದರೂ, ಪೌಷ್ಠಿಕಾಂಶದ ವಿಚಾರದಲ್ಲಿ ಸ್ವಲ್ಪ ಭಿನ್ನವಾಗಿವೆ ಎನ್ನಬಹುದು. ಹಾಗಾದರೆ ನಮ್ಮ ಆರೋಗ್ಯಕ್ಕೆ ಈ ಹಣ್ಣುಗಳಲ್ಲಿ ಯಾವುದು ಬೆಸ್ಟ್‌ ಅಂತಾ ನಿಮಗೆ ಗೊತ್ತಾ? ಗೊತ್ತಿಲ್ವಾ, ಹಾಗಾದರೆ ಇನ್ಮುಂದೆ ಅಂಗಡಿಗೆ ಹೋದಾಗ ಯಾವ ದ್ರಾಕ್ಷಿಗೆ ಒತ್ತು ನೀಡಬೇಕು ಅಂತಾ ಇಲ್ಲಿ ಓದಿ ತಿಳಿಯಿರಿ.

ವಿವಿಧ ರೀತಿಯ ದ್ರಾಕ್ಷಿಗಳ ಆರೋಗ್ಯ ಪ್ರಯೋಜನಗಳು
1. ಹಸಿರು ದ್ರಾಕ್ಷಿಗಳು
ಮೊದಲಿಗೆ ಹಸಿರು ದ್ರಾಕ್ಷಿಯನ್ನು ಬಿಳಿ ಅಥವಾ ಹಳದಿ ದ್ರಾಕ್ಷಿ ಎಂದೂ ಕರೆಯುತ್ತಾರೆ, ಇದು ಸಾಮಾನ್ಯವಾಗಿ ಎಲ್ಲರೂ ಖರೀದಿಸುವ ಮತ್ತ ಸೇವಿಸುವ ದ್ರಾಕ್ಷಿ ವಿಧವಾಗಿದೆ. ಈ ದ್ರಾಕ್ಷಿಗಳು ಸಿಹಿ ರುಚಿ ಹೊಂದಿರುತ್ತವೆ. ಸಲಾಡ್‌ಗಳು, ಸ್ಮೂಥಿಗಳು ಸೇರಿ ವಿವಿಧ ಪಾಕವಿಧಾನಗಳಲ್ಲಿ ಬಳಸಲಾಗುತ್ತದೆ.

ಹಸಿರು ದ್ರಾಕ್ಷಿ

ಏನೆಲ್ಲಾ ಪೋಷಕಾಂಶ ಹೊಂದಿದೆ?
ಸಂಶೋಧನೆಯ ಪ್ರಕಾರ, ಒಂದು ಕಪ್ ಹಸಿರು ದ್ರಾಕ್ಷಿಯು ಸರಿಸುಮಾರು 104 ಕ್ಯಾಲೋರಿಗಳು, 1.4 ಗ್ರಾಂ ಪ್ರೋಟೀನ್, 0.2 ಗ್ರಾಂ ಕೊಬ್ಬು ಮತ್ತು 27.3 ಗ್ರಾಂ ಕಾರ್ಬೋಹೈಡ್ರೇಟ್‌ಗಳನ್ನು ಹೊಂದಿರುತ್ತದೆ. ಹಸಿರು ದ್ರಾಕ್ಷಿಯು ವಿಟಮಿನ್ ಸಿ, ವಿಟಮಿನ್ ಕೆ ಮತ್ತು ಪೊಟ್ಯಾಸಿಯಮ್‌ನ ಉತ್ತಮ ಮೂಲವಾಗಿದೆ ಎಂದು ಪೌಷ್ಟಿಕತಜ್ಞರು ಹೇಳುತ್ತಾರೆ. ವಿಟಮಿನ್ ಸಿ ಬಗ್ಗೆ ಎಲ್ಲರಿಗೂ ಗೊತ್ತೇ ಇದೆ. ಇದು ಒಂದು ಉತ್ಕರ್ಷಣ ನಿರೋಧಕವಾಗಿದ್ದು ಅದು ಪ್ರತಿರಕ್ಷಣಾ ಕಾರ್ಯ ಮತ್ತು ಚರ್ಮದ ಆರೋಗ್ಯವನ್ನು ಬೆಂಬಲಿಸುತ್ತದೆ, ಹಾಗೆಯೇ ವಿಟಮಿನ್ ಕೆ ರಕ್ತ ಹೆಪ್ಪುಗಟ್ಟುವಿಕೆ ಮತ್ತು ಮೂಳೆಯ ಆರೋಗ್ಯದಲ್ಲಿ ನಿರ್ಣಾಯಕ ಪಾತ್ರವನ್ನು ವಹಿಸುತ್ತದೆ. ರಕ್ತದೊತ್ತಡವನ್ನು ನಿಯಂತ್ರಿಸಲು ಮತ್ತು ಹೃದಯದ ಆರೋಗ್ಯವನ್ನು ಬೆಂಬಲಿಸಲು ದ್ರಾಕ್ಷಿಯಲ್ಲಿರುವ ಪೊಟ್ಯಾಸಿಯಮ್ ಮುಖ್ಯವಾಗಿದೆ.

2. ಕಪ್ಪು ದ್ರಾಕ್ಷಿಗಳು
ಕಪ್ಪು ದ್ರಾಕ್ಷಿಯನ್ನು ನೇರಳೆ ದ್ರಾಕ್ಷಿ ಎಂದೂ ಕರೆಯುತ್ತಾರೆ, ಈ ದ್ರಾಕ್ಷಿ ಸಿಹಿ ಮತ್ತು ರಸಭರಿತವಾಗಿರುತ್ತದೆ. ಹೆಚ್ಚಿನ ಟ್ಯಾನಿನ್ ಅಂಶದಿಂದಾಗಿ ಅವುಗಳನ್ನು ಹೆಚ್ಚಾಗಿ ಕೆಂಪು ವೈನ್ ಉತ್ಪಾದನೆಯಲ್ಲಿ ಬಳಸಲಾಗುತ್ತದೆ, ಇದು ವೈನ್‌ಗೆ ವಿಶಿಷ್ಟ ಪರಿಮಳವನ್ನು ನೀಡುತ್ತದೆ.

ಕಪ್ಪು ದ್ರಾಕ್ಷಿ

ಪೋಷಕಾಂಶಗಳು
ಒಂದು ಕಪ್ ಕಪ್ಪು ದ್ರಾಕ್ಷಿಯು ಸರಿಸುಮಾರು 104 ಕ್ಯಾಲೋರಿಗಳು, 1.1 ಗ್ರಾಂ ಪ್ರೋಟೀನ್, 0.2 ಗ್ರಾಂ ಕೊಬ್ಬು ಮತ್ತು 27.3 ಗ್ರಾಂ ಕಾರ್ಬೋಹೈಡ್ರೇಟ್‌ಗಳನ್ನು ಹೊಂದಿರುತ್ತದೆ. ಹಸಿರು ದ್ರಾಕ್ಷಿಯಂತೆಯೇ ವಿಟಮಿನ್ ಸಿ ಮತ್ತು ವಿಟಮಿನ್ ಕೆ ಯ ಉತ್ತಮ ಮೂಲವಾಗಿರುವುದರಿಂದ ಕಪ್ಪು ದ್ರಾಕ್ಷಿಗಳು ಆರೋಗ್ಯಕರವಾಗಿವೆ. ಕಪ್ಪು ದ್ರಾಕ್ಷಿ ವಿಶೇಷವಾಗಿ ರೆಸ್ವೆರಾಟ್ರೊಲ್ ಅನ್ನು ಒಳಗೊಂಡಿರುತ್ತವೆ, ಇದು ವಿವಿಧ ಆರೋಗ್ಯ ಪ್ರಯೋಜನಗಳಿಗೆ ಸಂಬಂಧಿಸಿರುವ ಪ್ರಬಲವಾದ ಉತ್ಕರ್ಷಣ ನಿರೋಧಕವಾಗಿದೆ. ಹೃದಯದ ಆರೋಗ್ಯ ಮತ್ತು ಕೆಲವು ರೀತಿಯ ಕ್ಯಾನ್ಸರ್ ವಿರುದ್ಧ ಈ ಪೋಷಕಾಂಶ ರಕ್ಷಣೆ ನೀಡುತ್ತದೆ. ಹಸಿರು ದ್ರಾಕ್ಷಿಯಲ್ಲಿರದ ಈ ಪೋಷಕಾಂಶ ಕಪ್ಪು ದ್ರಾಕ್ಷಿಯಲ್ಲಿದೆ.

3. ಕೆಂಪು ದ್ರಾಕ್ಷಿಗಳು
ಕೆಂಪು ದ್ರಾಕ್ಷಿಯನ್ನು ಕಡುಗೆಂಪು ಅಥವಾ ಬರ್ಗಂಡಿ ದ್ರಾಕ್ಷಿ ಎಂದೂ ಕರೆಯುತ್ತಾರೆ, ಇದು ಸಿಹಿಯ ಹಣ್ಣಾಗಿದ್ದು, ಇದನ್ನು ಸಾಮಾನ್ಯವಾಗಿ ಹಣ್ಣಿನ ಸಲಾಡ್‌ಗಳು, ಜಾಮ್‌ಗಳು ಮತ್ತು ಜೆಲ್ಲಿಗಳಲ್ಲಿ ಬಳಸಲಾಗುತ್ತದೆ. ಕಪ್ಪು ದ್ರಾಕ್ಷಿಯಂತೆಯೇ ಕೆಂಪು ವೈನ್ ಉತ್ಪಾದನೆಯಲ್ಲಿಯೂ ಅವುಗಳನ್ನು ಬಳಸಲಾಗುತ್ತದೆ.

ಕೆಂಪು ದ್ರಾಕ್ಷಿ

ಪೋಷಕಾಂಶ
ಒಂದು ಕಪ್ ಕೆಂಪು ದ್ರಾಕ್ಷಿಯು ಸರಿಸುಮಾರು 104 ಕ್ಯಾಲೋರಿಗಳು, 1.1 ಗ್ರಾಂ ಪ್ರೋಟೀನ್, 0.2 ಗ್ರಾಂ ಕೊಬ್ಬು ಮತ್ತು 27.3 ಗ್ರಾಂ ಕಾರ್ಬೋಹೈಡ್ರೇಟ್‌ಗಳನ್ನು ಹೊಂದಿರುತ್ತದೆ. ಕಪ್ಪು ದ್ರಾಕ್ಷಿಯಂತೆಯೇ ಕೆಂಪು ದ್ರಾಕ್ಷಿಯು ವಿಟಮಿನ್ ಸಿ, ವಿಟಮಿನ್ ಕೆ ಮತ್ತು ರೆಸ್ವೆರಾಟ್ರೊಲ್‌ನ ಉತ್ತಮ ಮೂಲವಾಗಿದೆ. ಕಪ್ಪು ಮತ್ತು ಹಸಿರು ದ್ರಾಕ್ಷಿಯ ಎರಡರ ಪೋಷಕಾಂಶಗಳನ್ನು ಈ ಕೆಂಪು ದ್ರಾಕ್ಷಿ ಹೊಂದಿದೆ.

ಯಾವ ಬಣ್ಣದ ದ್ರಾಕ್ಷಿಗಳು ಆರೋಗ್ಯಕರ?
ಮೇಲೆ ನೋಡಿದಂತೆ ಹೆಚ್ಚು-ಕಮ್ಮಿ ಎಲ್ಲಾ ಮೂರು ವಿಧದ ದ್ರಾಕ್ಷಿಗಳು ಒಂದೇ ರೀತಿಯ ಪೌಷ್ಟಿಕಾಂಶದ ಪ್ರಯೋಜನಗಳನ್ನು ನೀಡುತ್ತವೆ. ಹಸಿರು ದ್ರಾಕ್ಷಿಯಲ್ಲಿಲ್ಲದ ರೆಸ್ವೆರಾಟ್ರೋಲ್ ಕಪ್ಪು ದ್ರಾಕ್ಷಿಗಳು ಮತ್ತು ಕೆಂಪು ದ್ರಾಕ್ಷಿಯಲ್ಲಿದೆ. ಇನ್ನೂ ಕಪ್ಪು ಮತ್ತು ಕೆಂಪು ದ್ರಾಕ್ಷಿಗಳೆರಡೂ ಫೀನಾಲಿಕ್ ಆಸಿಡ್, ಫ್ಲೇವನಾಯ್ಡ್ ಮತ್ತು ರೆಸ್ವೆರಾಟ್ರೊಲ್ ಎಂದು ಕರೆಯಲ್ಪಡುವ ಮೂರು ವಿಧದ ಪಾಲಿಫಿನಾಲ್ಗಳನ್ನು ಹೊಂದಿದೆ. ಕಡಿಮೆ ಉರಿಯೂತ, ಹೃದಯದ ಆರೋಗ್ಯ ಮತ್ತು ಕೆಲವು ವಿಧದ ಕ್ಯಾನ್ಸರ್ ವಿರುದ್ಧ ರಕ್ಷಣೆ ಸೇರಿದಂತೆ ವಿವಿಧ ಆರೋಗ್ಯ ಪ್ರಯೋಜನಗಳಿಗೆ ರೆಸ್ವೆರಾಟ್ರೊಲ್ ಸಂಬಂಧಿಸಿದೆ. ಆದ್ದರಿಂದ, ಕಪ್ಪು ದ್ರಾಕ್ಷಿಗಳು ಮತ್ತು ಕೆಂಪು ದ್ರಾಕ್ಷಿಗಳು ಹಸಿರು ದ್ರಾಕ್ಷಿಗಳಿಗಿಂತ ಸ್ವಲ್ಪ ಹೆಚ್ಚು ಆರೋಗ್ಯಕರವಾಗಿದೆ.

ಆದಾಗ್ಯೂ, ಈ ಪ್ರಭೇದಗಳ ನಡುವಿನ ಪೌಷ್ಟಿಕಾಂಶದ ಅಂಶದಲ್ಲಿನ ದೊಟ್ಟ ಮಟ್ಟದ ವ್ಯತ್ಯಾಸಗಳಿಲ್ಲ. ಹೀಗಾಗಿ ಎಲ್ಲಾ ದ್ರಾಕ್ಷಿಯೂ ಆರೋಗ್ಯಕರವಾಗಿವೆ. ಎಲ್ಲ ವಿಧದ ದ್ರಾಕ್ಷಿಯನ್ನು ನಿಮ್ಮ ಆಹಾರದಲ್ಲಿ ಸಮತೋಲನದಿಂದ ಸೇರಿಸಬಹುದು.