Kalaburagi: ರಾತ್ರಿ ಪ್ರಯಾಣಿಕರಿಗೆ ಉಚಿತ ಊಟ! ಕಲಬುರಗಿಯಲ್ಲೊಂದು ಮಾದರಿ ಹೋಟೆಲ್

ಹೋಟೆಲ್​ಗಳಲ್ಲಿ ಆಹಾರ ಇಡೋ ಫ್ರಿಡ್ಜ್ ನೋಡಿದ್ದೀವಿ. ಆದ್ರೆ ಇಲ್ಲಿ ಮಾತ್ರ ರಸ್ತೆ ಪಕ್ಕದಲ್ಲೇ ಇದೆ ಫ್ರಿಡ್ಜ್. ಹೌದು, ಕಣ್ರೀ ಹೀಗೂ ಜನಸೇವೆ ಮಾಡಲು ಸಾಧ್ಯ ಅನ್ನೋದನ್ನ ಈ ಹೋಟೆಲ್ ಮಾಲೀಕರೊಬ್ಬರು ತೋರಿಸಿಕೊಟ್ಟಿದ್ದಾರೆ. ಹೀಗೆ ಹೊರಗಡೆ ಇಡಲಾದ ಐಷಾರಾಮಿ ಫ್ರಿಡ್ಜ್ (Fridge) ಬಡಬಗ್ಗರು, ನಿರ್ಗತಿಕರಿಗಾಗಿಯೇ ಇಟ್ಟಿರೋದು. ಹಸಿದ ಹೊಟ್ಟೆಯನ್ನ ತಣ್ಣಗೆ ಮಾಡೋದು ಈ ಫ್ರಿಡ್ಜ್ ಇರಿಸಿರುವ ಉದ್ದೇಶ.  ರಾತ್ರಿ ವೇಳೆ ಹೋಟೆಲ್​ಗಳು ಬಂದ್ ಆಗಿರೋದ್ರಿಂದ ಅದೆಷ್ಟೋ ಜನರು ಹೋಟೆಲ್​ಗಾಗಿ ತಡಕಾಡಬೇಕಾಗುತ್ತೆ. ಅಂತಹವರಿಗೆ ಸಹಾಯವಾಗಲೆಂದು ಕಲಬುರಗಿಯ (Kalaburagi News) ಕಮಲ್ ಹೊಟೇಲ್ (Kamal Hotel) ಈ ಪ್ರಯೋಗಕ್ಕೆ ಕೈಹಾಕಿದೆ.

ಸಾಮಾನ್ಯವಾಗಿ ಈ ಫ್ರಿಡ್ಜ್ ದಿನದಲ್ಲಿ ಉಳಿದ ಆಹಾರ ಪದಾರ್ಥಗಳನ್ನ ಇಡಲಾಗುತ್ತೆ. ಯಾರಾದರೂ ನಿರ್ಗತಿಕರು ಅಥವಾ ಪರವೂರಿನಿಂದ ಹಸಿದು ಬಂದವರಿಗಾಗಿ ಈ ಫ್ರಿಡ್ಜ್ ಸದಾ ಮುಕ್ತವಾಗಿರುತ್ತೆ.

ಉಳಿದ ಆಹಾರ ವೇಸ್ಟ್ ಮಾಡ್ಬೇಡಿ
ಕಲಬುರಗಿ ನಗರದ ಕೇಂದ್ರ ಬಸ್ ನಿಲ್ದಾಣದ ಎದುರುಗಡೆಯೇ ಇದೆ ಈ ಕಮಲ್ ಹೋಟೆಲ್. ರಾತ್ರಿ ವೇಳೆ ಹೋಟೆಲ್​ನಲ್ಲಿ ಉಳಿದ ಆಹಾರವನ್ನು ಕಸದ ತೊಟ್ಟಿಗೆ ಬಿಸಾಡೋ ಬದಲು ಫ್ರಿಡ್ಜ್​ನಲ್ಲಿ ಇಟ್ರೆ ಸಹಾಯವಾಗುತ್ತೆ ಅನ್ನೋ ಯೋಚನೆಯಿಂದ ಈ ಮಾನವೀಯ ಕಾರ್ಯಕ್ಕೆ ಮುಂದಾದ್ರು ಹೋಟೆಲ್ ಮಾಲೀಕ ಸತ್ಯನಾಥ್.

ಇದನ್ನೂ ಓದಿ: Kalaburagi: ಇದು ಹಿಂದೂ-ಮುಸ್ಲಿಂ ಧರ್ಮೀಯರನ್ನು ಒಗ್ಗೂಡಿಸೋ ಕಲಬುರಗಿಯ ಭಾವೈಕ್ಯತೆಯ ತಾಣ!

ಪ್ರತಿದಿನ 40 ರಿಂದ 50 ಪ್ಲೇಟ್ ಆಹಾರ
90 ಸಾವಿರ ಖರ್ಚು ಮಾಡಿ ಹೊಸ ಫ್ರಿಡ್ಜ್ ಖರೀದಿಸಿ ರಾತ್ರಿ ವೇಳೆ ಹೋಟೆಲ್​ನಲ್ಲಿ ಉಳಿದ ರೈಸ್ ಹಾಗೂ ಉಳಿದ ಹಿಟ್ಟಿನಿಂದ ಪೂರಿ ಮಾಡಿ ಇಡೋಕೆ ಶುರುಮಾಡಿದ್ರು. ಈಗ ಒಂದು ದಿನಕ್ಕೆ 40 ರಿಂದ 50 ಪ್ಲೇಟ್ ಆಹಾರವನ್ನು ಈ ರೀತಿ ಕಮಲ್ ಹೋಟೆಲ್ ರಸ್ತೆಬದಿ ಫ್ರಿಡ್ಜ್​ನಲ್ಲಿ ಇಡಲಾಗುತ್ತೆ.

ಇದನ್ನೂ ಓದಿ: Kalaburagi: ಇದೇ ನೋಡಿ ಕಲಬುರಗಿಯ ಮೊದಲ ಶಾಲೆ!

ಒಟ್ಟಿನಲ್ಲಿ ಹೊಟೇಲ್​ನಲ್ಲಿ ಉಳಿದ ಆಹಾರ ಪದಾರ್ಥವನ್ನು ತಿಪ್ಪೆ ತೊಟ್ಟಿಗೆ ಬಿಸಾಡದೇ ಬಡಬಗ್ಗರ, ಹಸಿದವರ ಹಸಿವು ನೀಗಿಸುವ ಕಾರ್ಯಕ್ಕೆ ಬಳಸುತ್ತಿರೋ ಸತ್ಯನಾಥ್ ಅವರ ಮಾನವೀಯ ಸೇವೆಗೆ ಸೆಲ್ಯೂಟ್ ಹೇಳಲೇಬೇಕು.

ವರದಿ: ಶ್ರೀಕಾಂತ್ ಬಿರಾಳ ನ್ಯೂಸ್18 ಕನ್ನಡ, ಕಲಬುರಗಿ