Kalaburgi: ಯೂಟ್ಯೂಬ್ ನೋಡಿ ಯೋಗ ಕಲಿತಳು ಈ ಪುಟಾಣಿ!

ಕಲಬುರಗಿ: ಪದ್ಮಾಸನ, ತಾಡಾಸನ, ವೃಕ್ಷಾಸನ, ಭುಜಂಗಾಸನ ಹೀಗೆ ಯಾವುದೇ ಆಸನಗಳಿದ್ರೂ ಶಿಸ್ತುಬದ್ಧವಾಗಿ ಮಾಡಬಲ್ಲಳು ಈ ಪುಟ್ಟ ಬಾಲಕಿ. ಆದ್ರೆ, ಈಕೆಯ ಯೋಗ ಗುರು ಯಾರೂಂತ ಕೇಳಿದ್ರೆ ಮಾತ್ರ ನೋ ಆನ್ಸರ್. ಮತ್ತೂ ನೀವೇನಾದ್ರೂ ಕೇಳಿದ್ರೆ ಈ ಕ್ಯೂಟ್ ಕ್ಯೂಟ್ ಆಗಿರೋ ಪುಟಾಣಿ ಹೇಳೋ ಆನ್ಸರ್ ಯೂಟ್ಯೂಬ್. ಅರೆ, ಯೋಗ ಗುರುವಿಗೂ ಈ ಯೂಟ್ಯೂಬ್​ಗೂ ಏನ್ ಸಂಬಂಧ ಅಂತೀರಾ? ಅಲ್ಲೇ ಇದೆ ನೋಡಿ ಈ ತೊಗರಿ ನಾಡಿನ ಕುವರಿಯ ಸಾಧನೆಯ ಸೀಕ್ರೇಟ್.

ಕಲಬುರಗಿಯ ಈ ಕ್ಯೂಟ್ ಬಾಲಕಿ ಯೋಗ ಕಲಿತಿದ್ದೇ ಯೂಟ್ಯೂಬ್ ನೋಡಿ. ಒಂದನೇ ಕ್ಲಾಸ್ ಓದುತ್ತಿರೋ ಆರು ವರ್ಷದ ಈ ಬಾಲಕಿಯ ಹೆಸರು ಪ್ರಣೀತಾ. ಕಲಬುರಗಿಯ ನಿವಾಸಿ ನವೀನಕುಮಾರ ಹಾಗೂ ಸಂಗೀತ ದಂಪತಿಯ ಮುದ್ದಾದ ಮಗಳಿವಳು. ಹೆತ್ತವರ ಮೊಬೈಲ್​ನಲ್ಲಿ ಯೂಟ್ಯೂಬ್ ಓಪನ್ ಮಾಡಿ ಯೋಗ ನೋಡುತ್ತಿದ್ದ ಪ್ರಣೀತಾ, ತಾನು ಯೋಗಾಸನ ಕಲಿಯಲು ಆರಂಭಿಸಿದ್ದಾಳೆ. ಹೀಗೆ ಕಲಿಯುತ್ತಾ ಕಲಿಯುತ್ತಾ ಪ್ರಣೀತಾ ಯೂಟ್ಯೂಬ್​ನ್ನೇ ಗುರುವನ್ನಾಗಿಸಿ ಹತ್ತರಿಂದ ಹದಿನೈದು ವಿವಿಧ ಭಂಗಿಯ ಯೋಗಾಸನಗಳನ್ನು ಕಲಿತು ಸೈ ಎನಿಸಿಕೊಂಡಿದ್ದಾಳೆ.

ತಂದೆ, ತಾಯಿಯ ಪ್ರೋತ್ಸಾಹ

ಪುಟಾಣಿ ಪ್ರಣೀತಾ ಈಗಂತೂ ನೀರು ಕುಡಿದಷ್ಟೇ ಸಲೀಸಾಗಿ ಯೋಗವನ್ನು ಮಾಡುತ್ತಾಳೆ. ಪ್ರಣೀತಾಳ ಈ ಯೋಗ ಸಾಧನೆಗೆ ವಿವಿಧ ಸಂಘ ಸಂಸ್ಥೆಗಳು ಪುರಸ್ಕಾರ ನೀಡಿ ಪ್ರೋತ್ಸಾಹಿಸಿವೆ. ಯೋಗದಲ್ಲಿ ಸಾಧನೆ ಮಾಡಲು ಹೊರಟಿರುವ ಈ ಪುಟ್ಟ ಬಾಲಕಿಗೆ ಆಕೆಯ ತಂದೆ, ತಾಯಿ ಬೆನ್ನೆಲುಬಾಗಿ ನಿಂತಿದ್ದಾರೆ. ಕೇವಲ ಮೊಬೈಲ್ ವಿಡಿಯೋ ಮೂಲಕವೇ ಯೋಗಾಸನ ಕಲಿತು ನೋಡುಗರನ್ನು ಈ ಮಟ್ಟಿಗೆ ಬೆರಗಾಗುವಂತೆ ಮಾಡುವ ಪ್ರಣಿತಾಳ ಈ ಸಾಧನೆ ಪೋಷಕರ ಖುಷಿಯನ್ನೂ ಹೆಚ್ಚಿಸಿದೆ.

ಪುಟಾಣಿ ಸಾಧನೆಯ ಛಲ
ಮಕ್ಕಳಿಗೆ ಮೊಬೈಲ್ ನೀಡಬಾರದೆನ್ನುವ ಪೋಷಕರ ವಾದ ಸರಿಯೇ ಇರಬಹುದು. ಆದರೆ, ಪ್ರಣೀತಾಳಂತಹ ಬಾಲಕಿಯರಿಗೆ ಮಾತ್ರ ಮೊಬೈಲ್ ಅನ್ನೋದು ಕೇವಲ ಯೋಗ ಕಲಿಕೆಯ ಸಾಧನವಷ್ಟೇ. ಈ ಪುಟ್ಟ ಬಾಲಕಿಯ ಸಾಧನೆಯು ಮುಂದೆ ಇಡೀ ಜಗತ್ತು ಗುರುತಿಸುವಂತಾಗಲಿ ಅನ್ನೋದೇ ನಮ್ಮ ಹಾರೈಕೆ.

ವರದಿ: ಶ್ರೀಕಾಂತ್ ಬಿರಾಳ, ನ್ಯೂಸ್18 ಕನ್ನಡ ಕಲಬುರಗಿ