Foreign Study: ಈ ದೇಶಕ್ಕೆ ಹೋದ್ರೆ ಕಡಿಮೆ ಹಣದಲ್ಲೂ ನೀವು ಹೈಯರ್​ ಸ್ಟಡಿ ಮಾಡ್ಬಹುದು

ಭಾರತದ ಹಲವು ವಿದ್ಯಾರ್ಥಿಗಳು ಉನ್ನತ ಶಿಕ್ಷಣಕ್ಕಾಗಿ ವಿದೇಶಗಳಿಗೆ ಹೋಗುತ್ತಾರೆ. ಅಮೆರಿಕಾ, ಕೆನಡಾ, ಇಟಲಿ, ರಷ್ಯಾ ಹೀಗೆ ವಿದೇಶಗಳಿಗೆ ಹೋಗುವವರ ಸಂಖ್ಯೆ ಹೆಚ್ಚಾಗಿದೆ. ಅದರಲ್ಲೂ ಯುರೋಪಿಯನ್‌ ದೇಶಗಳಿಗೆ ಹೋಗುವವರ ಸಂಖ್ಯೆ ಹೆಚ್ಚಾಗಿದೆ.ಕಳೆದ ಆರು ವರ್ಷಗಳಲ್ಲಿ 30 ಲಕ್ಷಕ್ಕೂ ಹೆಚ್ಚು ಭಾರತೀಯ ವಿದ್ಯಾರ್ಥಿಗಳು ಉನ್ನತ ವ್ಯಾಸಂಗಕ್ಕಾಗಿ ವಿದೇಶಕ್ಕೆ ತೆರಳಿದ್ದಾರೆ ಎಂದು ದಾಖಲೆಗಳು ಹೇಳಿವೆ. ಸಂಸತ್ತಿನಲ್ಲಿ ಶಿಕ್ಷಣ ಸಚಿವಾಲಯ ಸಲ್ಲಿಸಿದ ಮಾಹಿತಿಯ ಪ್ರಕಾರ, 2022 ರಲ್ಲಿ 750,365 ವಿದ್ಯಾರ್ಥಿಗಳು, 2021 ರಲ್ಲಿ 444,553 ವಿದ್ಯಾರ್ಥಿಗಳು ಉನ್ನತ ಶಿಕ್ಷಣಕ್ಕಾಗಿ ವಿದೇಶಕ್ಕೆ ತೆರಳಿದ್ದಾರೆ.

2021ಕ್ಕೆ ಹೋಲಿಸಿದರೆ ಉನ್ನತ ಶಿಕ್ಷಣಕ್ಕಾಗಿ ವಿದೇಶಕ್ಕೆ ತೆರಳುವವರ ಸಂಖ್ಯೆ ಕಳೆದ ವರ್ಷಕ್ಕೆ ಹೋಲಿಸಿದರೆ ಬರೋಬ್ಬರಿ 68% ಹೆಚ್ಚಾಗಿದೆ ಎಂದು ಮೂಲಗಳು ತಿಳಿಸಿವೆ. ಹಾಗಿದ್ದರೆ, ಉನ್ನತ ಶಿಕ್ಷಣಕ್ಕಾಗಿ ಯುರೋಪ್‌ಗೆ ಹೋಗಲು ಯೋಜಿಸುತ್ತಿದ್ದರೆ ನಾವಿಲ್ಲಿ, ಬೋಧನಾ ಶುಲ್ಕ ಮತ್ತು ಕೈಗೆಟುಕುವ ದರದಲ್ಲಿ ವಿದ್ಯಾಭ್ಯಾಸ ನೀಡುವ ಯುರೋಪಿಯನ್ ದೇಶಗಳ ಬಗ್ಗೆ ಮಾಹಿತಿ ಹೊತ್ತು ತಂದಿದ್ದೇವೆ.

ಭಾರತೀಯ ವಿದ್ಯಾರ್ಥಿಗಳಿಗೆ ಉಚಿತ, ರಿಯಾಯಿತಿ ಶಿಕ್ಷಣ ನೀಡುವ ಯುರೋಪಿಯನ್ ದೇಶಗಳು

ಜರ್ಮನಿ
ಯೂರೋಪಿಯನ್ ರಾಷ್ಟ್ರಗಳಲ್ಲಿ, ಜರ್ಮನಿಯು ಅತ್ಯಂತ ಜನಪ್ರಿಯ ದೇಶವಾಗಿದ್ದು, ಹಲವು ವಿದ್ಯಾರ್ಥಿಗಳು ಶಿಕ್ಷಣಕ್ಕಾಗಿ ಇಲ್ಲಿಗೆ ತೆರಳುತ್ತಾರೆ. ಭಾರತ ಸರ್ಕಾರವು ಬಿಡುಗಡೆ ಮಾಡಿದ ಮಾಹಿತಿಯ ಪ್ರಕಾರ, 2022ರಲ್ಲಿ ಜರ್ಮನಿಗೆ ಒಟ್ಟು 34,864 ಭಾರತೀಯ ವಿದ್ಯಾರ್ಥಿಗಳು ತೆರಳಿದ್ದಾರೆ.

ಜರ್ಮನಿಯು 2014ರಿಂದ ಬೋಧನಾ ಶುಲ್ಕದ ಪರಿಕಲ್ಪನೆಯನ್ನು ರದ್ದುಗೊಳಿಸಿದೆ. ಆದ್ದರಿಂದ ದೇಶೀಯ ಮತ್ತು ಅಂತರರಾಷ್ಟ್ರೀಯ ವಿದ್ಯಾರ್ಥಿಗಳಿಗೆ ಪದವಿಗಳು ಉಚಿತವಾಗಿದೆ. ಹೀಗಾಗಿ ಉಚಿತವಾಗಿ ವಿದೇಶದಲ್ಲಿ ಶಿಕ್ಷಣ ಪಡೆಯಲು ಬಯಸುವವರು ಜರ್ಮನಿಗೆ ತೆರಳಬಹುದು.

ಇದನ್ನೂ ಓದಿ: Exam Tips: ಪೋಷಕರೇ ಕಾಳಜಿವಹಿಸಿ; ಪರೀಕ್ಷಾ ಸಮಯದಲ್ಲಿ ಮಕ್ಕಳ ಊಟ-ತಿಂಡಿ ಈ ರೀತಿ ಇರಲಿ

ಜರ್ಮನಿಯಲ್ಲಿ ಭಾರತೀಯ ವಿದ್ಯಾರ್ಥಿಗಳ ಜೀವನ ವೆಚ್ಚಕ್ಕೆ ಸರಿಸುಮಾರು €934 (ರೂ. 80,000 ಅಂದಾಜು) ಖರ್ಚಾಗಬಹುದು. ಜರ್ಮನಿಯ ಅಂತರರಾಷ್ಟ್ರೀಯ ವಿದ್ಯಾರ್ಥಿಗಳು ತಮ್ಮ ಅಧ್ಯಯನದ ಸಮಯದಲ್ಲಿ 120 ದಿನಗಳವರೆಗೆ ಪೂರ್ಣ ಸಮಯ ಅಥವಾ 240 ಅರ್ಧ ದಿನಗಳವರೆಗೆ ಅರೆಕಾಲಿಕ ಕೆಲಸ ಮಾಡಬಹುದು.

ಪದವಿಯ ನಂತರ, ಅವರು ತಮ್ಮ ಉನ್ನತ ಪದವಿಯೊಂದಿಗೆ ಅದೇ ಕ್ಷೇತ್ರದಲ್ಲಿ ಉದ್ಯೋಗವನ್ನು ಹುಡುಕಲು 18 ತಿಂಗಳ ಕಾಲ ದೇಶದಲ್ಲಿ ಉಳಿಯಲು ಅರ್ಜಿ ಸಲ್ಲಿಸಬಹುದು.

ರಷ್ಯಾ
ಸರ್ಕಾರದ ಅಂಕಿ-ಅಂಶಗಳ ಪ್ರಕಾರ, ಕಳೆದ ವರ್ಷ 18,039 ಭಾರತೀಯ ವಿದ್ಯಾರ್ಥಿಗಳು ರಷ್ಯಾಕ್ಕೆ ಶಿಕ್ಷಣದ ಸಲುವಾಗಿ ತೆರಳಿದ್ದಾರೆ. ಭಾರತೀಯ ವೈದ್ಯಕೀಯ ವಿದ್ಯಾರ್ಥಿಗಳಿಗೆ ರಷ್ಯಾ ಜನಪ್ರಿಯ ಆಯ್ಕೆಯ ದೇಶವಾಗಿದೆ.

ರಷ್ಯಾ ಸಂಪೂರ್ಣವಾಗಿ ಉಚಿತ ಶಿಕ್ಷಣವನ್ನು ನೀಡದಿದ್ದರೂ, ರಿಯಾಯಿತಿ ದರದಲ್ಲಿ ಶಿಕ್ಷಣವನ್ನು ಒದಗಿಸುತ್ತದೆ. ರಷ್ಯಾ ವಿದ್ಯಾರ್ಥಿಗಳಿಗೆ € 2,000 - € 5,000 ರಿಯಾಯಿತಿ ಬೆಲೆಯಲ್ಲಿ ಶಿಕ್ಷಣವನ್ನು ಒದಗಿಸುತ್ತದೆ. ಇದು ಎಲ್ಲಾ ಅಂತಾರಾಷ್ಟ್ರೀಯ ವಿದ್ಯಾರ್ಥಿಗಳ ಶಿಕ್ಷಣಕ್ಕೆ ಸಹಕಾರಿಯಾಗಿದೆ.

ರಷ್ಯಾದಲ್ಲಿ ಹಲವು ಉನ್ನತ ವಿಶ್ವವಿದ್ಯಾಲಯಗಳಿದ್ದು, ಅವುಗಳಲ್ಲಿ ಮಾಸ್ಕೋ ಸ್ಟೇಟ್ ಯೂನಿವರ್ಸಿಟಿ, ಟಾಮ್ಸ್ಕ್ ಸ್ಟೇಟ್ ಯೂನಿವರ್ಸಿಟಿ ಮತ್ತು ಸೇಂಟ್ ಪೀಟರ್ಸ್ಬರ್ಗ್ ಸ್ಟೇಟ್ ಯೂನಿವರ್ಸಿಟಿ ಪ್ರಮುಖವಾಗಿವೆ.

ಭಾರತೀಯ ವಿದ್ಯಾರ್ಥಿಗಳು ತಮ್ಮ ಅಧ್ಯಯನದ ಸಮಯದಲ್ಲಿ ವಾರಕ್ಕೆ 20 ಗಂಟೆಗಳವರೆಗೆ ಕೆಲಸ ಮಾಡಬಹುದು ಮತ್ತು ತಮ್ಮ ಪದವಿ ಮುಗಿದ ನಂತರ ಉದ್ಯೋಗವನ್ನು ಹುಡುಕಲು 180 ದಿನಗಳವರೆಗೆ ದೇಶದಲ್ಲಿ ಉಳಿಯಬಹುದು.

ಫ್ರಾನ್ಸ್
ಭಾರತದ ಸುಮಾರು 10,003 ವಿದ್ಯಾರ್ಥಿಗಳು ಕಳೆದ ವರ್ಷಕ್ಕೆ ಉನ್ನತ ಶಿಕ್ಷಣ ಪಡೆಯುವ ಸಲುವಾಗಿ ಫ್ರಾನ್ಸ್ ಅನ್ನು ಅಧ್ಯಯನ ದೇಶವನ್ನಾಗಿ ಆಯ್ಕೆ ಮಾಡಿಕೊಂಡಿದ್ದಾರೆ.

ದೇಶವು ಸುಮಾರು € 2,770 (ಸುಮಾರು 2.5 ಲಕ್ಷ)ಕ್ಕೆ ಸ್ನಾತಕೋತ್ತರ ಪದವಿಯನ್ನು ಮತ್ತು ಸುಮಾರು € 3,770 (ಸುಮಾರು 3.5 ಲಕ್ಷ) ಗೆ ಸ್ನಾತಕೋತ್ತರ ಪದವಿಯನ್ನು ವಿದ್ಯಾರ್ಥಿಗಳಿಗೆ ಕೈಗೆಟಕುವ ದರದಲ್ಲಿ ನೀಡುತ್ತದೆ.

ದೇಶವು ಹಲವಾರು ಪಠ್ಯೇತರ ಚಟುವಟಿಕೆಗಳನ್ನು ಮತ್ತು ಪ್ರವರ್ಧಮಾನಕ್ಕೆ ಬರುತ್ತಿರುವ ವಿದ್ಯಾರ್ಥಿ-ಸಂಸ್ಕೃತಿಯ ಜೀವನವನ್ನು ಒದಗಿಸುವುದರಿಂದ, ಅಂತರರಾಷ್ಟ್ರೀಯ ವಿದ್ಯಾರ್ಥಿಯು ಜೀವನ ವೆಚ್ಚದಲ್ಲಿ ತಿಂಗಳಿಗೆ ಸುಮಾರು € 600- € 800 ಖರ್ಚು ಮಾಡಬಹುದು.

ಹೆಚ್ಚುವರಿಯಾಗಿ ಹಣವನ್ನು ಗಳಿಸಲು, ಅಂತರರಾಷ್ಟ್ರೀಯ ವಿದ್ಯಾರ್ಥಿಗಳು ತಮ್ಮ ಅಧ್ಯಯನದ ಸಮಯದಲ್ಲಿ ವರ್ಷಕ್ಕೆ 964 ಗಂಟೆಗಳವರೆಗೆ ಪಾರ್ಟ್‌ ಟೈಂ ಕೆಲಸ ಮಾಡಬಹುದು ಮತ್ತು ಉದ್ಯೋಗವನ್ನು ಹುಡುಕಲು ಪದವಿಯ ನಂತರ ಒಂದು ವರ್ಷದವರೆಗೆ ದೇಶದಲ್ಲಿ ಇರುವ ಅವಕಾಶ ಪಡೆಯಬಹುದು.

ಇಟಲಿ
ಪ್ರವಾಸಿ ಸ್ಥಳವಾಗಿ ಮತ್ತು ವಿಭಿನ್ನ ಆಹಾರಕ್ಕಾಗಿ ಹೆಸರುವಾಸಿಯಾಗಿರುವ ಇಟಲಿ ವಿದ್ಯಾಭ್ಯಾಸದ ಕೇಂದ್ರವಾಗಿಯೂ ಜನಪ್ರಿಯವಾಗಿದೆ. ಕಳೆದ ವರ್ಷ ಸುಮಾರು 5,897 ಭಾರತೀಯ ವಿದ್ಯಾರ್ಥಿಗಳು ಉನ್ನತ ಶಿಕ್ಷಣಕ್ಕಾಗಿ ಇಟಲಿಗೆ ತೆರಳಿದ್ದಾರೆ. ಯುರೋಪಿಯನ್‌ ದೇಶ ಇಟಲಿ ಬೇರೆ ದೇಶದ ನಿವಾಸಿಗಳಿಗೆ € 500 ರಿಂದ € 5,000 ವರೆಗೆ ಬೋಧನಾ ಶುಲ್ಕವನ್ನು ವಿಧಿಸುತ್ತದೆ.

ಜೀವನ ವೆಚ್ಚವು ಸಹ ಕೈಗೆಟುಕುವ ದರದಲ್ಲಿದ್ದು (ತಿಂಗಳಿಗೆ € 700 - ರೂ 60,000) ವಿದ್ಯಾರ್ಥಿಗಳು ತಮ್ಮ ಬಾಡಿಗೆ ಮತ್ತು ಇತರ ವೆಚ್ಚಗಳನ್ನು ಗಳಿಸಲು ತಮ್ಮ ಅಧ್ಯಯನದ ಸಮಯದಲ್ಲಿ ವಾರಕ್ಕೆ 20 ಗಂಟೆಗಳ ಕಾಲ ಕೆಲಸ ಮಾಡಬಹುದು.

ಆದರೆ ಇಟಲಿಯಲ್ಲಿ ವಿದ್ಯಾಭ್ಯಾಸದ ನಂತರ ಉಳಿಯಲು ಎಲ್ಲರಿಗೂ ಅವಕಾಶ ಇರುವುದಿಲ್ಲ. ಇಟಲಿಯಲ್ಲಿ ಉಳಿಯಲು ಮತ್ತು ಕೆಲಸಕ್ಕಾಗಿ ಹುಡುಕುವ ಅವಕಾಶವು ಇಟಲಿಯಲ್ಲಿ ಪಿಎಚ್‌ಡಿ ಅಥವಾ ಹಂತ 2 ಮಾಸ್ಟರ್ಸ್ ಪ್ರೋಗ್ರಾಂ ಅನ್ನು ಪೂರ್ಣಗೊಳಿಸಿದವರಿಗೆ ಮಾತ್ರ ಲಭ್ಯವಿದೆ.

ಪೋಲೆಂಡ್
ರಷ್ಯಾ ಮತ್ತು ಉಕ್ರೇನ್ ನಂತರ, ಪೋಲೆಂಡ್ ಭಾರತೀಯ ವೈದ್ಯಕೀಯ ಆಕಾಂಕ್ಷಿಗಳಲ್ಲಿ ಅತ್ಯಂತ ಜನಪ್ರಿಯ ಯುರೋಪಿಯನ್ ರಾಷ್ಟ್ರಗಳಲ್ಲಿ ಒಂದಾಗಿದೆ. 2022ರಲ್ಲಿ ಸುಮಾರು 5,000 ವಿದ್ಯಾರ್ಥಿಗಳು ಅಧ್ಯಯನಕ್ಕಾಗಿ ಭಾರತದಿಂದ ಪೋಲೆಂಡ್‌ಗೆ ತೆರಳಿದ್ದಾರೆ. ಪೋಲೆಂಡ್‌ ದೇಶವು ಉಚಿತ ಶಿಕ್ಷಣವನ್ನು ನೀಡದಿದ್ದರೂ, ಇದು €2,000 - € 6,000 (ರೂ. 1.76- 5.30 ಲಕ್ಷ) ಕೈಗೆಟುಕುವ ದರದಲ್ಲಿ ಕೋರ್ಸ್‌ಗಳನ್ನು ವಿದ್ಯಾರ್ಥಿಗಳಿಗೆ ನೀಡುತ್ತದೆ.

ಇದರ ಜೊತೆಗೆ, ಅಂತರರಾಷ್ಟ್ರೀಯ ವಿದ್ಯಾರ್ಥಿಗಳು ತಮ್ಮ ಅಧ್ಯಯನದ ಸಮಯದಲ್ಲಿ ವಾರಕ್ಕೆ 20 ಗಂಟೆಗಳು ಮತ್ತು ರಜಾದಿನಗಳಲ್ಲಿ ವಾರಕ್ಕೆ 40 ಗಂಟೆಗಳ ಕಾಲ ಕೆಲಸ ಮಾಡಬಹುದು. ಅಧ್ಯಯನದ ನಂತರ ಇಲ್ಲೇ ಕೆಲಸ ಹುಡುಕಲು ವಿದ್ಯಾರ್ಥಿಗಳು 9 ತಿಂಗಳವರೆಗೆ ದೇಶದಲ್ಲಿ ಉಳಿಯುವ ಕಾಲವಕಾಶ ಪಡೆಯುತ್ತಾರೆ.

ಜೆಕ್ ರಿಪಬ್ಲಿಕ್
ಇತಿಹಾಸ ಮತ್ತು ವಾಸ್ತುಶಿಲ್ಪಕ್ಕೆ ಹೆಸರುವಾಸಿಯಾಗಿರುವ ಜೆಕ್‌ ರಿಪಬ್ಲಿಕ್‌ ಬೋಧನಾ-ಮುಕ್ತ ಶಿಕ್ಷಣವನ್ನು ವಿದ್ಯಾರ್ಥಿಗಳಿಗೆ ಒದಗಿಸುತ್ತದೆ.
ಅಧ್ಯಯನದ ಸಮಯದಲ್ಲಿ ಕೆಲಸ ಮಾಡಲು ವಿದ್ಯಾರ್ಥಿಗಳು ಶಿಕ್ಷಣ ಸಚಿವಾಲಯದಿಂದ ಮಾನ್ಯತೆ ಪಡೆದ ಪದವಿ ಕಾರ್ಯಕ್ರಮಕ್ಕೆ ದಾಖಲಾಗಬೇಕು.

ವಿದ್ಯಾರ್ಥಿಗಳು ಕ್ಯಾಲೆಂಡರ್ ವರ್ಷದಲ್ಲಿ 30 ದಿನಗಳವರೆಗೆ ಕೆಲಸ ಮಾಡಬಹುದು ಮತ್ತು ಉದ್ಯೋಗವನ್ನು ಹುಡುಕಲು 9 ತಿಂಗಳ ನಂತರದ ಅಧ್ಯಯನದ ನಿವಾಸ ಪರವಾನಗಿಗಾಗಿ ಅರ್ಜಿ ಸಲ್ಲಿಸಬಹುದು. 2022ರಲ್ಲಿ ಸುಮಾರು 1500 ವಿದ್ಯಾರ್ಥಿಗಳು ಜೆಕ್ ಗಣರಾಜ್ಯಕ್ಕೆ ಭಾರತದಿಂದ ಅಧ್ಯಯನಕ್ಕಾಗಿ ತೆರಳಿದ್ದಾರೆ.

ಫಿನ್‌ಲ್ಯಾಂಡ್‌
ಭಾರತ ಸರ್ಕಾರ ಬಿಡುಗಡೆ ಮಾಡಿರುವ ವರದಿಗಳ ಪ್ರಕಾರ ಸುಮಾರು 519 ಭಾರತೀಯ ವಿದ್ಯಾರ್ಥಿಗಳು ಕಳೆದ ವರ್ಷ ಉನ್ನತ ಶಿಕ್ಷಣವನ್ನು ಪಡೆಯುವ ಸಲುವಾಗಿ ತೆರೆಳಿದ್ದಾರೆ. ಫಿನ್‌ಲ್ಯಾಂಡ್ ಒಂದು ಕೈಗೆಟುಕುವ ಅಧ್ಯಯನ ತಾಣವಾಗಿದ್ದು, ಇದು ಫಿನ್ನಿಷ್ ಅಥವಾ ಸ್ವೀಡಿಷ್ ಬರುವ ವಿದ್ಯಾರ್ಥಿಗಳ ಪದವಿಗಳಿಗೆ ಉಚಿತ ಶಿಕ್ಷಣವನ್ನು ಒದಗಿಸುತ್ತದೆ.

ಆದಾಗ್ಯೂ, EU ಅಲ್ಲದ ಮತ್ತು ಇಂಗ್ಲಿಷ್ ಕಲಿಸುವ ಪದವಿಗಳಿಗೆ ಬೋಧನಾ ಶುಲ್ಕವು € 4,000 (ಅಂದಾಜು Rs 3.5 ಲಕ್ಷ) ಮತ್ತು € 18,000 ( Rs 15 ಲಕ್ಷ ಅಂದಾಜು) ನಡುವೆ ಇರುತ್ತದೆ. ಫಿನ್‌ಲ್ಯಾಂಡ್‌ನಲ್ಲಿ ಜೀವನ ವೆಚ್ಚಕ್ಕೆ €700 - €1,300 ರಷ್ಟು ತಗುಲಬಹುದು. ಇನ್ನೂ ಅಂತರರಾಷ್ಟ್ರೀಯ ವಿದ್ಯಾರ್ಥಿಗಳು ತಮ್ಮ ಅಧ್ಯಯನದ ಸಮಯದಲ್ಲಿ ವಾರಕ್ಕೆ 30 ಗಂಟೆಗಳವರೆಗೆ ಕೆಲಸ ಮಾಡಬಹುದು. ಪದವಿಯ ನಂತರ, ವಿದ್ಯಾರ್ಥಿಗಳಿಗೆ ಎರಡು ವರ್ಷಗಳ ನಂತರದ ಅಧ್ಯಯನದ ಕೆಲಸದ ವೀಸಾವನ್ನು ನೀಡಲಾಗುತ್ತದೆ.

ಐಸ್ಲ್ಯಾಂಡ್
2022 ರಲ್ಲಿ 16 ಭಾರತೀಯ ವಿದ್ಯಾರ್ಥಿಗಳನ್ನು ಹೊಂದಿದ್ದ ಯುರೋಪಿಯನ್ ದೇಶವು ತನ್ನ ರಮಣೀಯ ಸೌಂದರ್ಯ ಮತ್ತು ಉಚಿತ ಮತ್ತು ಕನಿಷ್ಠ ಶಿಕ್ಷಣದ ವೆಚ್ಚಕ್ಕೆ ಹೆಸರುವಾಸಿಯಾಗಿದೆ. ಹೆಚ್ಚಿನ ಎಲ್ಲಾ ಉನ್ನತ ಶಿಕ್ಷಣ ಕೋರ್ಸ್‌ಗಳನ್ನು ವಿಶ್ವವಿದ್ಯಾಲಯಗಳಲ್ಲಿ ಇಂಗ್ಲಿಷ್‌ನಲ್ಲಿ ಕಲಿಸಲಾಗುತ್ತದೆ.

ಐಸ್‌ಲ್ಯಾಂಡ್‌ನಲ್ಲಿರುವ ಅಂತರರಾಷ್ಟ್ರೀಯ ವಿದ್ಯಾರ್ಥಿಗಳು ಶೈಕ್ಷಣಿಕ ವರ್ಷದಲ್ಲಿ ವಾರಕ್ಕೆ 15 ಗಂಟೆಗಳವರೆಗೆ ಕೆಲಸ ಮಾಡಬಹುದು. ಪದವಿಯ ನಂತರ, ಅಂತರರಾಷ್ಟ್ರೀಯ ವಿದ್ಯಾರ್ಥಿಗಳು ಉದ್ಯೋಗವನ್ನು ಹುಡುಕಲು ಆರು ತಿಂಗಳ ಕೆಲಸದ ವೀಸಾಕ್ಕೆ ಅರ್ಜಿ ಸಲ್ಲಿಸಬಹುದು. ಈ ಮೇಲಿನ ಎಲ್ಲಾ ದೇಶಗಳಲ್ಲಿ ಶಿಕ್ಷಣ ಕೈಗೆಟಕುವ ದರದಲ್ಲಿದ್ದು, ಜೀವನ ಶೈಲಿಯ ವೆಚ್ಚವು ಅವರ ಜೀವನ ಶೈಲಿಯ ಖರ್ಚುವೆಚ್ಚಗಳ ಮೇಲೆ ನಿರ್ಧಾರವಾಗುತ್ತದೆ.