Cyber Security ವೃತ್ತಿಪರರಿಗಿದೆ ಭವಿಷ್ಯದಲ್ಲಿ ಬೆಟ್ಟದಷ್ಟು ಅವಕಾಶ: ಇದೊಂದು ಸೇಫ್ ಉದ್ಯೋಗ ಅನ್ನೋದ್ರಲ್ಲಿ ಎರಡು ಮಾತಿಲ್ಲ

ಇಂದಿನ ತಂತ್ರಜ್ಞಾನದ (Technology) ಪ್ರಗತಿ ಎಲ್ಲರ ಬದುಕನ್ನೇ (Life) ಬದಲಿಸಿದೆ. ಒಂದು ಕಾಲದಲ್ಲಿ ಇವೆಲ್ಲ ಸಾಧ್ಯವೇ ಎನ್ನುವಂಥ ಕಲ್ಪನೆಗಳೆಲ್ಲ ಇಂದು ನಿಜವಾಗುತ್ತಿವೆ. ಡೆಲಿವರಿಗಾಗಿ ಡ್ರೋನ್‌ಗಳು, ಡ್ರೈವರ್‌ ಇಲ್ಲದ ಕಾರುಗಳು, AI-ಸಕ್ರಿಯಗೊಳಿಸಿದ ಶಸ್ತ್ರಾಸ್ತ್ರ ವ್ಯವಸ್ಥೆಗಳು, ಮೆಟಾವರ್ಸ್ ಇವುಗಳೆಲ್ಲವೂ ಇದಕ್ಕೆ ಉದಾಹರಣೆಗಳಾಗಿವೆ.

ಆದಾಗ್ಯೂ, ತಂತ್ರಜ್ಞಾನ ಎಷ್ಟೇ ಪ್ರಯೋಜನಕಾರಿಯಾಗಿದ್ದರೂ ಅದರಿಂದ ಕೆಲವಷ್ಟು ತೊಂದರೆಯೂ ಇದೆ ಅನ್ನೋದೂ ಅಷ್ಟೇ ಸತ್ಯ. ಇಂದು ಇಂಟರ್‌ನೆಟ್‌ ಇಲ್ಲದೇ ಬದುಕಲೇ ಸಾಧ್ಯವಿಲ್ಲ ಎಂಬಂತಾಗಿರುವುದರ ಜೊತೆಗೇ ಕೆಲವೊಮ್ಮೆ ಇದೇ ತಂತ್ರಜ್ಞಾನಗಳಿಂದ ಅನೇಕರ ಬದುಕು ಸಂಕಷ್ಟಕ್ಕೆ ಸಿಲುಕುತ್ತದೆ.

ಇಂದು ಸೈಬರ್‌ ಬೆದರಿಕೆಗಳೂ ಹೆಚ್ಚಾಗುತ್ತಿವೆ. ಈ ಬೆದರಿಕೆಗಳು ಅತ್ಯಾಧುನಿಕವಾಗಿರುತ್ತವೆ. ಆದರೆ ಹೆಚ್ಚು ಅಪಾಯಕಾರಿಯಾಗಿರುತ್ತವೆ. ಆದ್ದರಿಂದ ನಮ್ಮನ್ನು, ನಮ್ಮ ಸಂಸ್ಥೆಗಳನ್ನು ಹಾಗೆಯೇ ನಮ್ಮ ದೇಶವನ್ನು ಸುರಕ್ಷಿತವಾಗಿಡುವುದು ಮುಖ್ಯ. ಹಾಗಾಗಿ ಉದ್ಯಮ ಮತ್ತು ಸರ್ಕಾರಗಳಿಗೆ ಸೈಬರ್ ಸುರಕ್ಷತೆಗಾಗಿ ಸರಿಯಾದ ಪ್ರತಿಭೆ ಮತ್ತು ಕೌಶಲ್ಯವುಳ್ಳು ವೃತ್ತಿಪರರ ಅಗತ್ಯವಿರುತ್ತದೆ. ಇದು ಈ ಕ್ಷೇತ್ರದಲ್ಲಿ ಹಲವಾರು ವೃತ್ತಿ ಅವಕಾಶಗಳಿಗೆ ಕಾರಣವಾಗಿದೆ.

2025 ರ ವೇಳೆಗೆ 1.5 ಮಿಲಿಯನ್ ಹೊಸ ಉದ್ಯೋಗ !

ಅಂದಹಾಗೆ 850 ಮಿಲಿಯನ್ ಜನರು ಇಂಟರ್ನೆಟ್‌ಗೆ ಸಂಪರ್ಕ ಹೊಂದಿರುವ ಭಾರತವು ವಿಶ್ವದ ಅತಿದೊಡ್ಡ ಡಿಜಿಟಲ್ ಸಂಪರ್ಕಿತ ಪ್ರಜಾಪ್ರಭುತ್ವವಾಗಿದೆ. NASSCOM ನ ವರದಿಯ ಪ್ರಕಾರ, ಭಾರತೀಯ ಐಟಿ ಉದ್ಯಮವು 2025 ರ ವೇಳೆಗೆ ಸೈಬರ್ ಭದ್ರತೆಯಲ್ಲಿ 1.5 ಮಿಲಿಯನ್ ಹೊಸ ಉದ್ಯೋಗಗಳನ್ನು ಸೃಷ್ಟಿಸುವ ನಿರೀಕ್ಷೆಯಿದೆ.

ಡೇಟಾ, ನೆಟ್‌ವರ್ಕ್‌ಗಳು ಮತ್ತು ಸಿಸ್ಟಮ್‌ಗಳನ್ನು ಬೆದರಿಕೆಗಳಿಂದ ಸುರಕ್ಷಿತಗೊಳಿಸಬಲ್ಲ ವೃತ್ತಿಪರರಿಗೆ ಹೆಚ್ಚುತ್ತಿರುವ ಬೇಡಿಕೆ ಇದೆ. ಇದರಿಂದ ಸೈಬರ್‌ಸೆಕ್ಯುರಿಟಿಯು ಹೆಚ್ಚು ಬೇಡಿಕೆಯಿರುವ ವೃತ್ತಿ ಆಗಿ ಬೆಳೆಯುತ್ತಿದೆ.

ಸಾಂದರ್ಭಿಕ ಚಿತ್ರ

ಸೈಬರ್‌ ಸೆಕ್ಯುರಿಟಿ ಅನ್ನೋದು ವಿಶಾಲವಾದ ಕ್ಷೇತ್ರವಾಗಿರುವುದರಿಂದ ಹಲವಾರು ವೃತ್ತಿ ಅವಕಾಶಗಳನ್ನು ನೀಡುತ್ತದೆ. ವೈರಸ್‌ಗಳು, ಮಾಲ್‌ವೇರ್, ಹ್ಯಾಕಿಂಗ್ ಪ್ರಯತ್ನಗಳು ಮತ್ತು ಇತರ ಸೈಬರ್‌ಕ್ರೈಮ್‌ಗಳನ್ನು ಒಳಗೊಂಡಿರುವ ಸೈಬರ್ ಬೆದರಿಕೆಗಳನ್ನು ತಡೆಗಟ್ಟಲು, ಪತ್ತೆಹಚ್ಚಲು ಮತ್ತು ಪ್ರತಿಕ್ರಿಯಿಸಲು ಈ ಕ್ಷೇತ್ರದಲ್ಲಿನ ವೃತ್ತಿಪರರು ಕೆಲಸ ಮಾಡುತ್ತಾರೆ. ಆದಾಗ್ಯೂ, ಸೈಬರ್ ಭದ್ರತೆಯಲ್ಲಿ ಯಶಸ್ವಿ ವೃತ್ತಿಜೀವನವನ್ನು ನಿರ್ಮಿಸಲು ಕೆಲವು ಅಂಶಗಳು ಮಹತ್ವದ್ದಾಗಿರುತ್ತವೆ.

ಸೈಬರ್‌ ಸೆಕ್ಯುರಿಟಿ ಸಂಬಂಧಿತ ಪದವಿ ಅಥವಾ ಸರ್ಟಿಫಿಕೇಶನ್‌

ಈ ಕ್ಷೇತ್ರದಲ್ಲಿ ವೃತ್ತಿಜೀವನವನ್ನು ಪ್ರಾರಂಭಿಸಲು ಬಯಸುವವರಿಗೆ ಸೈಬರ್ ಸೆಕ್ಯುರಿಟಿಯಲ್ಲಿ ಪದವಿ ಅಥವಾ ಪ್ರಮಾಣೀಕರಣವು ಪ್ರಮುಖ ಹೆಜ್ಜೆಯಾಗಿದೆ. ಭಾರತದಲ್ಲಿನ ಅನೇಕ ವಿಶ್ವವಿದ್ಯಾನಿಲಯಗಳು ಪದವಿಪೂರ್ವ ಮತ್ತು ಪದವಿ ಹಂತಗಳಲ್ಲಿ ಸೈಬರ್‌ ಸೆಕ್ಯುರಿಟಿ ಕಾರ್ಯಕ್ರಮಗಳನ್ನು ನೀಡುತ್ತವೆ. ಈ ಕಾರ್ಯಕ್ರಮಗಳು ವಿದ್ಯಾರ್ಥಿಗಳಿಗೆ ಕಂಪ್ಯೂಟರ್ ವಿಜ್ಞಾನ, ನೆಟ್‌ವರ್ಕ್ ಭದ್ರತೆ, ಮಾಲ್‌ವೇರ್ ವಿಶ್ಲೇಷಣೆ, ಬೆದರಿಕೆ ಬೇಟೆ ಮತ್ತು ಡಿಜಿಟಲ್ ಫೋರೆನ್ಸಿಕ್ಸ್‌ನಲ್ಲಿ ಕ್ಷೇತ್ರಗಳಲ್ಲಿ ಬಲವಾದ ಅಡಿಪಾಯವನ್ನು ಒದಗಿಸುತ್ತವೆ.

ಔಪಚಾರಿಕ ಶಿಕ್ಷಣದ ಜೊತೆಗೆ, ಭಾರತದಲ್ಲಿನ ಅನೇಕ ಸೈಬರ್ ಸೆಕ್ಯುರಿಟಿ ವೃತ್ತಿಪರರು ಜಾಗತಿಕವಾಗಿ ಗುರುತಿಸಲ್ಪಟ್ಟ ಸಂಸ್ಥೆಗಳಿಂದ ಸರ್ಟಿಫಿಕೇಶನ್‌ ಸಹ ಪಡೆಯುತ್ತಾರೆ. ಇದರಿಂದ ಸೈಬರ್ ಭದ್ರತೆಯ ನಿರ್ದಿಷ್ಟ ಕ್ಷೇತ್ರಗಳಲ್ಲಿ ಉನ್ನತ ಮಟ್ಟದ ಜ್ಞಾನ ಮತ್ತು ಪರಿಣತಿ ಪಡೆಯಬಹುದಲ್ಲದೇ ವೃತ್ತಿಜೀವನದ ಅಭಿವೃದ್ಧಿಗೂ ಇದು ಪ್ರಯೋಜನಕಾರಿಯಾಗಬಹುದು.

ಈ ಕ್ಷೇತ್ರದಲ್ಲಿ ವಿಶೇಷತೆಯನ್ನು ಆರಿಸಿ ಸೈಬರ್‌ ಸೆಕ್ಯುರಿಟಿಯಲ್ಲಿ ಸ್ಪೆಷಲೈಸೇಶನ್‌ ಆಯ್ಕೆ ಮಾಡುವುದರಿಂದ ಒಂದು ವಿಷಯದಲ್ಲಿ ವಿಶೇಷ ಪರಿಣಿತಿ ಸಾಧಿಸಲು ಸಾಧ್ಯವಾಗುತ್ತದೆ. ಸೈಬರ್ ಭದ್ರತೆಯಲ್ಲಿನ ವಿಶೇಷತೆಗಳೆಂದರೆ ಅವು ನೆಟ್‌ವರ್ಕ್ ಭದ್ರತೆ, ಕ್ಲೌಡ್ ಸೆಕ್ಯುರಿಟಿ, ಮಾಲ್‌ವೇರ್ ವಿಶ್ಲೇಷಣೆ ಮತ್ತು ಬೆದರಿಕೆ ಬೇಟೆ ಮುಂತಾದವುಗಳಾಗಿರಬಹುದು.

ಇಲ್ಲಿ ಪ್ರತಿಯೊಂದಕ್ಕೂ ವಿಶಿಷ್ಟ ಕೌಶಲ್ಯ ಸೆಟ್ ಮತ್ತು ತಂತ್ರಜ್ಞಾನಗಳ ತಿಳುವಳಿಕೆ ಅಗತ್ಯವಿರುತ್ತದೆ. ನಿರ್ದಿಷ್ಟ ವಿಷಯದಲ್ಲಿ ಪರಿಣತಿ ಹೊಂದುವ ಮೂಲಕ, ಸೈಬರ್ ಸೆಕ್ಯುರಿಟಿ ವೃತ್ತಿಪರರು ಹೆಚ್ಚು ಬೇಡಿಕೆಯಿರುವ ತಜ್ಞರಾಗಬಹುದು. ಜೊತೆಗೆ ಹೆಚ್ಚಿನ ಸಂಬಳವನ್ನು ಪಡೆಯಬಹುದು.

ನಿರ್ದಿಷ್ಟ ವಿಷಯದಲ್ಲಿನ ಪರಿಣಿತಿಯು ಸ್ಪಷ್ಟವಾದ ವೃತ್ತಿ ಮಾರ್ಗವನ್ನು ಒದಗಿಸುತ್ತದೆ. ವ್ಯಕ್ತಿಗಳು ಅನೇಕ ಕ್ಷೇತ್ರಗಳಲ್ಲಿ ಪರಿಣಿತಿ ಪಡೆಯುವ ಬದಲು ಒಂದು ನಿರ್ದಿಷ್ಟ ವಿಷಯದಲ್ಲಿ ಕೌಶಲ್ಯ ಮತ್ತು ಜ್ಞಾನವನ್ನು ಪಡೆದರೆ ವೃತ್ತಿ ಜೀವನಕ್ಕೆ ಅನುಕೂಲ.

ಸೈಬರ್ ಭದ್ರತೆಯಲ್ಲಿ ಕೆಲವು ಪ್ರಮುಖ ಸ್ಪೆಶಲೈಸೇಶನ್‌ಗಳು

•ನೆಟ್‌ವರ್ಕ್ ಸೆಕ್ಯುರಿಟಿ: ಈ ಕ್ಷೇತ್ರದಲ್ಲಿನ ವೃತ್ತಿಪರರು ನೆಟ್‌ವರ್ಕ್‌ಗಳನ್ನು ಸುರಕ್ಷಿತಗೊಳಿಸುವುದರ ಮೇಲೆ ಗಮನಹರಿಸುತ್ತಾರೆ.

•ಪೆನೆಟ್ರೇಶನ್ ಟೆಸ್ಟಿಂಗ್: ಇದು ದಾಳಿಯನ್ನು ಅನುಕರಿಸುವ ಮೂಲಕ ಸಿಸ್ಟಮ್ ಅಥವಾ ನೆಟ್‌ವರ್ಕ್‌ನ ಸುರಕ್ಷತೆಯನ್ನು ನಿರ್ಣಯಿಸುವುದನ್ನು ಒಳಗೊಂಡಿರುತ್ತದೆ.

•ಡಿಜಿಟಲ್ ಫೋರೆನ್ಸಿಕ್ಸ್: ಇದು ಸೈಬರ್ ಕ್ರೈಮ್‌ಗಳನ್ನು ತನಿಖೆ ಮಾಡುವುದು ಮತ್ತು ಕಾನೂನು ಪ್ರಕ್ರಿಯೆಗಳಲ್ಲಿ ಬಳಸಬೇಕಾದ ಪುರಾವೆಗಳನ್ನು ಸಂಗ್ರಹಿಸುವುದನ್ನು ಒಳಗೊಂಡಿರುತ್ತದೆ.

•ಭದ್ರತಾ ವಿಶ್ಲೇಷಣೆ: ಸಂಭಾವ್ಯ ಬೆದರಿಕೆಗಳು ಮತ್ತು ದುರ್ಬಲತೆಗಳನ್ನು ಗುರುತಿಸಲು ಡೇಟಾ ಮತ್ತು ಮಾಹಿತಿ ವಿಶ್ಲೇಷಿಸುವುದನ್ನು ಭದ್ರತಾ ವಿಶ್ಲೇಷಣೆ ಒಳಗೊಂಡಿರುತ್ತದೆ.

•ಸೆಕ್ಯುರಿಟಿ ಆರ್ಕಿಟೆಕ್ಚರ್: ಇದು ನೆಟ್‌ವರ್ಕ್‌ಗಳು ಮತ್ತು ಸಿಸ್ಟಮ್‌ಗಳನ್ನು ಬೆದರಿಕೆಗಳಿಂದ ರಕ್ಷಿಸಲು ಭದ್ರತಾ ವ್ಯವಸ್ಥೆಗಳು ಮತ್ತು ಪ್ರೋಟೋಕಾಲ್‌ ವಿನ್ಯಾಸಗೊಳಿಸುವುದು ಹಾಗೂ ಕಾರ್ಯಗತಗೊಳಿಸುವುದನ್ನು ಒಳಗೊಂಡಿರುತ್ತದೆ.

•ಸೈಬರ್ ಥ್ರೆಟ್ ಇಂಟೆಲಿಜೆನ್ಸ್: ಇದು ಡಾರ್ಕ್ ವೆಬ್, ವಿರೋಧಿಗಳು ಮತ್ತು ಅವರ ತಂತ್ರಗಳು, ತಂತ್ರಗಳು ಮತ್ತು ಕಾರ್ಯವಿಧಾನಗಳನ್ನು (TTP) ತಿಳಿದುಕೊಳ್ಳುವುದನ್ನು ಒಳಗೊಂಡಿರುತ್ತದೆ. ಇದನ್ನು ಕಲಿಯುವವರು ಗುಪ್ತಚರ ನೇತೃತ್ವದ ಭದ್ರತಾ ಕಾರ್ಯಕ್ರಮಗಳಲ್ಲಿ ಕೆಲಸ ಮಾಡಬಹುದು.

•ಮಾಲ್‌ವೇರ್ ಮತ್ತು ರಿವರ್ಸ್ ಇಂಜಿನಿಯರಿಂಗ್: ಇದು ಕಂಪ್ಯೂಟರ್ ಸಿಸ್ಟಮ್‌ಗಳನ್ನು ಗುರಿಯಾಗಿಸುವ ಮತ್ತು ದುರುದ್ದೇಶಪೂರಿತ ಕಾರ್ಯಕ್ರಮಗಳನ್ನು ಪರೀಕ್ಷಿಸಲು ಪ್ರಾಯೋಗಿಕ ಕೌಶಲ್ಯಗಳನ್ನು ಕಲಿಯುವುದನ್ನು ಒಳಗೊಂಡಿರುತ್ತದೆ.

ಮೃದು ಕೌಶಲ್ಯಗಳ ಮಹತ್ವ

NASSCOM ಪ್ರಕಾರ, ಭಾರತದಲ್ಲಿ ಸೈಬರ್ ಸೆಕ್ಯುರಿಟಿ ಮಾರುಕಟ್ಟೆಯು 2030 ರ ವೇಳೆಗೆ $ 500 ಶತಕೋಟಿ ಮೌಲ್ಯವನ್ನು ಮುಟ್ಟುವ ನಿರೀಕ್ಷೆಯಿದೆ. ಹೀಗೆ ಬೆಳೆಯುತ್ತಿರುವ ಕ್ಷೇತ್ರದಲ್ಲಿ ಮುನ್ನುಗ್ಗಲು ಸಂವಹನ, ಟೀಮ್‌ವರ್ಕ್ ಮತ್ತು ಸಮಸ್ಯೆ-ಪರಿಹರಿಸುವಂತಹ ಮೃದು ಕೌಶಲ್ಯಗಳನ್ನು ಅಭಿವೃದ್ಧಿಪಡಿಸುವುದು ಅಷ್ಟೇ ನಿರ್ಣಾಯಕವಾಗಿದೆ.

ಸೈಬರ್ ಸೆಕ್ಯುರಿಟಿ ವೃತ್ತಿಯಲ್ಲಿ ತಾಂತ್ರಿಕ ಕೌಶಲ್ಯಗಳು ಅತ್ಯಗತ್ಯವಾಗಿದ್ದರೂ, ಮೃದು ಕೌಶಲ್ಯಗಳನ್ನು ಅಭಿವೃದ್ಧಿಪಡಿಸುವುದು ಅಷ್ಟೇ ಮುಖ್ಯ ಅನ್ನೋದನ್ನು ನೆನಪಿಡಿ.

ಸೈಬರ್‌ ಸೆಕ್ಯುರಿಟಿ ವೃತ್ತಿಪರರಿಗೆ ಸಹೋದ್ಯೋಗಿಗಳೊಂದಿಗೆ ಸಹಕರಿಸಲು, ಸಂಕೀರ್ಣ ಭದ್ರತಾ ಸಮಸ್ಯೆಗಳನ್ನು ಗುರುತಿಸಲು ಮತ್ತು ಪರಿಹರಿಸಲು ಈ ಸಾಫ್ಟ್‌ ಸ್ಕಿಲ್‌ಗಳು ಅತ್ಯಗತ್ಯ. ಈ ಮೃದು ಕೌಶಲ್ಯಗಳು ಸುಧಾರಿತ ನಾಯಕತ್ವ ಮತ್ತು ನಿರ್ವಹಣಾ ಸಾಮರ್ಥ್ಯಗಳಿಗೆ ಬೇಕಾಗುತ್ತವೆ. ಇದು ಉನ್ನತ ಮಟ್ಟದ ಸ್ಥಾನಗಳಿಗೆ ಪ್ರಗತಿ ಸಾಧಿಸಲು ಅವಶ್ಯಕವಾಗಿದೆ.

ಅಲ್ಲದೇ ಸಾಫ್ಟ್ ಸ್ಕಿಲ್‌ಗಳು ಸೈಬರ್ ಸೆಕ್ಯುರಿಟಿ ವೃತ್ತಿಪರರಿಗೆ ಸವಾಲಿನ ಸಂದರ್ಭಗಳನ್ನು ಪರಿಣಾಮಕಾರಿಯಾಗಿ ನ್ಯಾವಿಗೇಟ್ ಮಾಡಲು ಸಹಾಯ ಮಾಡುತ್ತದೆ. ಆದ್ದರಿಂದ ಸಾಫ್ಟ್ ಸ್ಕಿಲ್‌ಗಳನ್ನು ಅಭಿವೃದ್ಧಿಪಡಿಸುವುದು ಸೈಬರ್‌ ಸೆಕ್ಯುರಿಟಿ ವೃತ್ತಿಜೀವನದ ಯಶಸ್ಸಿಗೆ ನಿರ್ಣಾಯಕ ಎನ್ನಬಹುದು.

ಇಂಟರ್ನ್‌ಶಿಪ್‌ನಂತಹ ಪ್ರಾಯೋಗಿಕ ಅನುಭವ ಮಹತ್ವದ್ದು

ಸೈಬರ್ ಸೆಕ್ಯುರಿಟಿ ವೃತ್ತಿಜೀವನದಲ್ಲಿ ಯಶಸ್ಸಿಗೆ ಪ್ರಾಯೋಗಿಕ ಅನುಭವವನ್ನು ಪಡೆಯುವುದು ಮುಖ್ಯವಾಗಿದೆ. ಶೈಕ್ಷಣಿಕ ಜ್ಞಾನವು ಮುಖ್ಯವಾಗಿದ್ದರೂ, ಪ್ರಾಯೋಗಿಕ ಅನುಭವವೂ ಅಷ್ಟೇ ಮುಖ್ಯ. ಪ್ರಾಯೋಗಿಕ ಅನುಭವವನ್ನು ಇಂಟರ್ನ್‌ಶಿಪ್‌ಗಳು, ಪ್ರವೇಶ ಮಟ್ಟದ ಉದ್ಯೋಗಗಳು ಅಥವಾ ಸೈಬರ್‌ಸೆಕ್ಯುರಿಟಿ-ಸಂಬಂಧಿತ ಕ್ಷೇತ್ರಗಳಲ್ಲಿ ವಾಲಂಟಿಯರ್‌ ಆಗುವ ಮೂಲಕ ಪಡೆಯಬಹುದು.

ಪ್ರಾಯೋಗಿಕ ಅನುಭವ ಪಡೆಯುವುದರಿಂದ ಅನುಭವಿ ವೃತ್ತಿಪರರೊಂದಿಗೆ ಕೆಲಸ ಮಾಡಬಹುದು. ಆ ಮೂಲಕ ಕ್ಷೇತ್ರದ ಉದ್ಯಮದ ಬಗ್ಗೆ ಆಳವಾದ ತಿಳುವಳಿಕೆಯನ್ನು ಪಡೆಯಬಹುದು. ಜೊತೆಗೆ ಕೌಶಲ್ಯಗಳನ್ನು ಅಭಿವೃದ್ಧಿ ಪಡಿಸಿಕೊಳ್ಳಬಹುದು.

ಇಂಟರ್ನ್‌ಶಿಪ್‌ನಂಥ ಪ್ರಾಯೋಗಿಕ ಅನುಭವದಿಂದ ಸೈಬರ್ ಸೆಕ್ಯುರಿಟಿ ವೃತ್ತಿಪರರಿಗೆ ಆ ಕ್ಷೇತ್ರದಲ್ಲಿ ಹೆಚ್ಚಿನ ಸಂಪರ್ಕ ಸಾಧಿಸಲು ಸಾಧ್ಯವಾಗುತ್ತದೆ. ಉನ್ನತ ಸ್ಥಾನದಲ್ಲಿರುವವರು ಪರಿಚಯವಾಗುತ್ತಾರೆ. ಸಂಪರ್ಕ ಹೆಚ್ಚಾದಂತೆ ವೃತ್ತಿ ಜೀವನದಲ್ಲೂ ಅಭಿವೃದ್ಧಿಯಾಗಲು ಸಾಧ್ಯವಾಗುತ್ತದೆ. ಹೊಸ ಹೊಸ ಅವಕಾಶಗಳ ಬಗ್ಗೆ ತಿಳಿದುಕೊಳ್ಳಬಹುದು. ಆ ಕ್ಷೇತ್ರದಲ್ಲಿನ ಆಗು ಹೋಗುಗಳ ಬಗ್ಗೆ ಹೆಚ್ಚಿನ ಮಾಹಿತಿ ಸಿಗುತ್ತದೆ.

ಇದನ್ನೂ ಓದಿ: 2nd PUC ಪರೀಕ್ಷೆಯಲ್ಲಿ ಶೇ.50ಕ್ಕಿಂತ ಕಡಿಮೆ ಅಂಕಗಳು ಬಂದ್ರೆ ಈ ಕೋರ್ಸ್​ಗಳನ್ನು ಮಾಡುವುದು ಉತ್ತಮ

ಹೆಚ್ಚುವರಿಯಾಗಿ, ಪ್ರಾಯೋಗಿಕ ಅನುಭವವು ಸೈಬರ್ ಭದ್ರತೆಯ ವಿವಿಧ ಕ್ಷೇತ್ರಗಳ ಬಗ್ಗೆ ಮೌಲ್ಯಯುತವಾದ ಒಳನೋಟವನ್ನು ಒದಗಿಸುತ್ತದೆ. ವ್ಯಕ್ತಿಗಳು ತಮ್ಮ ಸಾಮರ್ಥ್ಯ ಮತ್ತು ಆಸಕ್ತಿಗಳನ್ನು ಗುರುತಿಸಲು ಮತ್ತು ವಿಶೇಷತೆಯನ್ನು ಆಯ್ಕೆ ಮಾಡಲು ಸಹಾಯ ಮಾಡುತ್ತದೆ. ಅನೇಕ ವೇಳೆ ಇಂಥ ಪ್ರಾಯೋಗಿಕ ಅನುಭವದಿಂದ ಅಭ್ಯರ್ಥಿಗಳ ಸಾಮರ್ಥ್ಯ ಹಾಗೂ ಕೌಶಲ್ಯಗಳು ಹೆಚ್ಚಾಗುತ್ತವೆ. ಉದ್ಯೋಗದಾತರಿಗೆ ಅಭ್ಯರ್ಥಿಯು ಹೆಚ್ಚು ಆಕರ್ಷಕವಾಗಿ ಕಂಡರೆ ಅವರು ಹೆಚ್ಚಿನ ಆದ್ಯತೆ ನೀಡಬಹುದು.

ಒಟ್ಟಾರೆಯಾಗಿ ಸೈಬರ್‌ ಸೆಕ್ಯುರಿಟಿಯಲ್ಲಿನ ವೃತ್ತಿಜೀವನವು ವೃತ್ತಿಪರರಿಗೆ ವೈವಿಧ್ಯಮಯ ಅವಕಾಶಗಳನ್ನು ನೀಡುತ್ತದೆ. ಶಿಕ್ಷಣ, ವಿಶೇಷತೆ, ಮೃದು ಕೌಶಲ್ಯಗಳು ಮತ್ತು ಪ್ರಾಯೋಗಿಕ ಅನುಭವಗಳೊಂದಿಗೆ ಅಭ್ಯರ್ಥಿಗಳು ಈ ಕ್ಷೇತ್ರದಲ್ಲಿ ಯಶಸ್ವಿ ಮತ್ತು ಲಾಭದಾಯಕ ವೃತ್ತಿಯನ್ನು ನಿರ್ಮಿಸಬಹುದು. ಭಾರತದಲ್ಲಿ ಮತ್ತು ಜಾಗತಿಕವಾಗಿ ಸೈಬರ್ ಸೆಕ್ಯುರಿಟಿ ವೃತ್ತಿಪರರ ಬೇಡಿಕೆಯು ಬೆಳೆಯುತ್ತಲೇ ಇರುವುದರಿಂದ, ಈ ಕ್ಷೇತ್ರದಲ್ಲಿ ವೃತ್ತಿಜೀವನವನ್ನು ಆರಂಭಿಸಲು ಇದು ಅತ್ಯುತ್ತಮ ಸಮಯವಾಗಿದೆ.