Career Options: ಡಾಕ್ಟರ್, ಇಂಜಿನಿಯರಿಂಗ್ ಬಿಟ್ಟು PU ಬಳಿಕ ಯಾವ ಡಿಗ್ರಿ ಮಾಡೋದು ಬೆಸ್ಟ್?

ಮಾರ್ಚ್​ ತಿಂಗಳ ಕೊನೆಗೆ ದ್ವಿತೀಯ ಪಿಯು ಪರೀಕ್ಷೆಗಳು (Second PUC Exam) ಮುಕ್ತಾಯವಾಗಲಿವೆ. ನಂತರ ವಿದ್ಯಾರ್ಥಿಗಳು-ಪೋಷಕರನ್ನು ಕಾಡುವ ಪ್ರಶ್ನೆಯೇ ಮುಂದೇನು ಅಂತ. ಪರೀಕ್ಷೆಯ ನಂತರ ಸರಿಯಾದ ವೃತ್ತಿ (Career) ಆಯ್ಕೆಯನ್ನು ಆರಿಸುವುದು ಸುಲಭವಲ್ಲ. ಅನೇಕ ವಿದ್ಯಾರ್ಥಿಗಳು ಸಮಾಜ, ಪೋಷಕರು ಅಥವಾ ಸ್ನೇಹಿತರ ಒತ್ತಡದಲ್ಲಿ ತಮ್ಮ ಆಸಕ್ತಿಗೆ ವಿರುದ್ಧವಾದ ಕೋರ್ಸ್‌ಗೆ (Degree Courses) ಅಡ್ಮಿಷನ್​ ಮಾಡಿಸುತ್ತಾರೆ. ಆದರೆ ನಂತರ ಅವರಿಗೆ ಅದನ್ನು ಅಧ್ಯಯನ ಮಾಡಬೇಕು ಅನಿಸುವುದಿಲ್ಲ. ಪದವಿ ಓದನ್ನು ಅರ್ಧಕ್ಕೇ ಬಿಡುತ್ತಾರೆ, ಒಂದೆರೆಡು ವರ್ಷಗಳ ಬಳಿಕ ಬೇರೆ ಕೋರ್ಸ್​ ಮಾಡಲು ಮುಂದಾಗುತ್ತಾರೆ. ಹಾಗಾಗಿ ಆಸಕ್ತಿಗೆ ಅನುಗುಣವಾಗಿ ವಿದ್ಯಾರ್ಥಿಗಳು ಡಿಗ್ರಿ ಆಯ್ಕೆ ಮಾಡುವುದು ಮುಖ್ಯ.

ಈಗ MBBS ಕೋರ್ಸ್, B.Tech, B.Com ನಂತಹ ಸಾಂಪ್ರದಾಯಿಕ ಕೋರ್ಸ್‌ಗಳ ಹೊರತಾಗಿ ಅನೇಕ ವೃತ್ತಿ ಆಯ್ಕೆಗಳಿವೆ. ಸೆಕೆಂಡ್​ ಪಿಯು ಬಳಿಕ ಅನೇಕ ಆಫ್‌ಬೀಟ್ ವೃತ್ತಿಗಳನ್ನು ಆಯ್ಕೆ ಮಾಡಬಹುದು. ನಿಮ್ಮ ಸ್ಟ್ರೀಮ್ (ವಿಜ್ಞಾನ. ಕಾಮರ್ಸ್​, ಕಲಾ ವಿಭಾಗ) ಮತ್ತು ಆಸಕ್ತಿಗೆ ಅನುಗುಣವಾಗಿ ನೀವು ಅವುಗಳನ್ನು ಅಧ್ಯಯನ ಮಾಡಬಹುದು. ಯಾವುದೇ ಕೋರ್ಸ್‌ಗೆ ಪ್ರವೇಶ ಪಡೆಯುವ ಮೊದಲು, ಅದರ ಪಠ್ಯಕ್ರಮ, ಅಧ್ಯಯನ ಸಾಮಗ್ರಿ ಮತ್ತು ಉದ್ಯೋಗ ಆಯ್ಕೆಯ ಬಗ್ಗೆ ಮಾಹಿತಿಯನ್ನು ಸಂಗ್ರಹಿಸಬೇಕು. ಆಗ ಮಾತ್ರ ಸೂಕ್ತವಾದದ್ದನ್ನು ಆಯ್ಕೆ ಮಾಡಲು ಸಾಧ್ಯ.

ಬಿ-ಫಾರ್ಮಾದಲ್ಲಿ ಉತ್ತಮ ಅವಕಾಶವಿದೆ

ರಸಾಯನಶಾಸ್ತ್ರ ಮತ್ತು ಜೀವಶಾಸ್ತ್ರದೊಂದಿಗೆ ಸೆಕೆಂಡ್​ ಪಿಯು ಮಾಡಿರುವ ವಿದ್ಯಾರ್ಥಿಗಳಿಗೆ 4 ವರ್ಷಗಳ BPharm ಕೋರ್ಸ್ ಒಳ್ಳೆಯ ಆಯ್ಕೆಯಾಗಿದೆ. ಭಾರತವು ಔಷಧ ತಯಾರಿಕೆಯಲ್ಲಿ ಮುಂಚೂಣಿಯಲ್ಲಿರುವ ದೇಶಗಳಲ್ಲಿ ಒಂದಾಗಿದೆ. ಮುಂಬರುವ ವರ್ಷಗಳಲ್ಲಿ ಈ ಕೋರ್ಸ್ ಮಾಡುವ ಯುವಜನತೆಗೆ ಬೇಡಿಕೆ ಹೆಚ್ಚಲಿದೆ. ವಿದ್ಯಾರ್ಥಿಗಳು ಬಯಸಿದರೆ, ವೈದ್ಯಕೀಯ ಕ್ಷೇತ್ರದಲ್ಲಿ ಸ್ನಾತಕೋತ್ತರ ಮತ್ತು ಪಿಎಚ್‌ಡಿ ಮಾಡುವ ಮೂಲಕ ಸಂಶೋಧನೆಯನ್ನೂ ಮಾಡಬಹುದು. ಗೌರವ ಮತ್ತು ಆದಾಯದ ದೃಷ್ಟಿಯಿಂದ ಈ ಕ್ಷೇತ್ರ ಉತ್ತಮವಾಗಿದೆ.

ಕಂಪ್ಯೂಟರ್ ಬಗ್ಗೆ ಆಸಕ್ತಿ ಇರುವವರಿಗೆ ಬಿಸಿಎ

ಬಿ.ಟೆಕ್‌ಗೆ ಪ್ರವೇಶ ಪಡೆಯಲು ಸಾಧ್ಯವಾಗದ ಹಾಗೂ ಕಂಪ್ಯೂಟರ್ ಎಂಜಿನಿಯರಿಂಗ್‌ನಲ್ಲಿ ಆಸಕ್ತಿ ಹೊಂದಿರುವ ವಿದ್ಯಾರ್ಥಿಗಳು ಬಿಸಿಎ ಮಾಡುವ ಮೂಲಕ ತಮ್ಮ ಕನಸನ್ನು ನನಸಾಗಿಸಿಕೊಳ್ಳಬಹುದು. ಕೆಲವು ಸಂಸ್ಥೆಗಳು BCAಗೆ ಗಣಿತವನ್ನು ಅತ್ಯಗತ್ಯವೆಂದು ಪರಿಗಣಿಸುತ್ತವೆ. ಆದ್ದರಿಂದ ಅರ್ಜಿ ಸಲ್ಲಿಸುವ ಮೊದಲು ಆ ನಿಯಮದ ಬಗ್ಗೆ ಪರಿಶೀಲಿಸಿ. ವಾಣಿಜ್ಯ ಮತ್ತು ಕಲಾ ವಿಭಾಗದವರೂ ಇದರಲ್ಲಿ ಪ್ರವೇಶ ಪಡೆಯಬಹುದು. ಅನೇಕ ಸಂಸ್ಥೆಗಳು BCA+MCA ಇಂಟಿಗ್ರೇಟೆಡ್ ಕೋರ್ಸ್ ಅನ್ನು ಸಹ ನೀಡುತ್ತಿವೆ.

ಇದನ್ನೂ ಓದಿ: Second PUC Exam ಮುಗಿಯುತ್ತಿದ್ದಂತೆ ಈ ಪಾರ್ಟ್ ಟೈಂ ಜಾಬ್​ಗಳಿಂದ ಕೈ ತುಂಬಾ ಸಂಪಾದಿಸಿ

ಇಂಜಿನಿಯರ್ ಆಗಲು ಬಿಟೆಕ್ ಅನಿವಾರ್ಯವಲ್ಲ

ಕಷ್ಟಪಟ್ಟು ಕೆಲಸ ಮಾಡಿದರೂ ಐಐಟಿ, ಎನ್‌ಐಟಿಯಲ್ಲಿ ಪ್ರವೇಶ ಪಡೆಯಲು ಸಾಧ್ಯವಾಗದಿದ್ದರೆ ಚಿಂತಿಸಬೇಡಿ. ನೀವು ಸರ್ಕಾರಿ ಪಾಲಿಟೆಕ್ನಿಕ್ ಕಾಲೇಜಿನಲ್ಲಿ 3 ವರ್ಷಗಳ ಡಿಪ್ಲೊಮಾ ಕೋರ್ಸ್ ಮಾಡಬಹುದು. ಸರ್ಕಾರಿ ಇಲಾಖೆಗಳಲ್ಲಿ ಜೂನಿಯರ್ ಇಂಜಿನಿಯರ್ ಹುದ್ದೆಗಳಿಗೆ ಡಿಪ್ಲೊಮಾ ಮಾಡಿದವರಿಗೆ ಹೆಚ್ಚಿನ ಬೇಡಿಕೆ ಇದೆ. ಪಾಲಿಟೆಕ್ನಿಕ್‌ಗಳಲ್ಲಿ ಫಾರ್ಮಸಿ, ಸಾರ್ವಜನಿಕ ಸಂಪರ್ಕ, ಜಾಹೀರಾತು, ಫ್ಯಾಷನ್ ಡಿಸೈನಿಂಗ್, ಹೋಟೆಲ್ ಮ್ಯಾನೇಜ್‌ಮೆಂಟ್‌ನಂತಹ ಕೋರ್ಸ್‌ಗಳನ್ನು ಸಹ ಕಲಿಸಲಾಗುತ್ತದೆ.

ಎಂಬಿಬಿಎಸ್ ಕೂಡ ಒಂದು ಆಯ್ಕೆಯಾಗಿದೆ

ದೇಶಾದ್ಯಂತ ಸರ್ಕಾರಿ ಮತ್ತು ಖಾಸಗಿ ವೈದ್ಯಕೀಯ ಕಾಲೇಜುಗಳಲ್ಲಿ ಎಂಬಿಬಿಎಸ್ ಕೋರ್ಸ್‌ಗೆ ಸುಮಾರು 1 ಲಕ್ಷ ಸೀಟುಗಳು ಮತ್ತು ಆಯುಷ್‌ಗೆ 55 ಸಾವಿರ ಸೀಟುಗಳಿವೆ. ಈ ಸ್ಥಾನಗಳಿಗೆ ಸುಮಾರು 15 ಲಕ್ಷ ಅಭ್ಯರ್ಥಿಗಳಿದ್ದಾರೆ. NEET ಪರೀಕ್ಷೆ ಮೂಲಕ BVSC ನಲ್ಲಿ ಪ್ರವೇಶವೂ ಲಭ್ಯವಿದೆ. ಇದು ಪಶುವೈದ್ಯಕೀಯ ಔಷಧಕ್ಕೆ ಸಂಬಂಧಿಸಿದ ಕೋರ್ಸ್ ಆಗಿದೆ. ಇದಲ್ಲದೇ ಬಿ.ಎಸ್ಸಿ-ನರ್ಸಿಂಗ್ ಮತ್ತು ಪ್ಯಾರಾ ಮೆಡಿಕಲ್ ಕೋರ್ಸ್ ಗಳನ್ನೂ ಮಾಡಬಹುದು.