KKR - MI Playoff Chances: ಐಪಿಎಲ್​ ಪ್ಲೇಆಫ್​ಗೆ ಆಯ್ಕೆಯಾಗಲು ಕೆಕೆಆರ್​ - ಮುಂಬೈ ಇಂಡಿಯನ್ಸ್​ಗೆ ಕಡೆಯ ಅವಕಾಶ

IPL 2021 Playoffs Prediction: ಉಳಿದ ಒಂದು ಸ್ಥಾನಕ್ಕಾಗಿ ಕೋಲ್ಕತ್ತಾ ಮತ್ತು ಮುಂಬೈ ತಂಡಗಳು ಪೈಪೋಟಿಯಲ್ಲಿವೆ. ಎರಡೂ ತಂಡಗಳು ಒಂದು ಪಂದ್ಯವನ್ನು ಆಡಲಿದ್ದು, ಗೆಲುವು ಅನಿವಾರ್ಯ

ಸಾಂದರ್ಭಿಕ ಚಿತ್ರ

ಸಾಂದರ್ಭಿಕ ಚಿತ್ರ

  • Share this:
    IPL 2021ರ ಲೀಗ್​ ಪಂದ್ಯಗಳು ಇನ್ನೇನು ಅಂತ್ಯಗೊಳ್ಳಲಿದೆ. ಈ ಮೂಲಕ ಪ್ಲೇ ಆಫ್​ಗೆ ಅವಕಾಶ ಪಡೆಯುವ ನಾಲ್ಕು ತಂಡಗಳು ಮುಂದಿನ ಸುತ್ತಿಗೆ ಆಯ್ಕೆಯಾದರೆ, ಇನ್ನುಳಿದ ನಾಲ್ಕು ತಂಡಗಳು ವಾಪಸಾಗಬೇಕಿದೆ. ಈಗಾಗಲೇ ಡೆಲ್ಲಿ ಕ್ಯಾಪಿಟಲ್ಸ್ (Delhi Capitals)​, ಚೆನ್ನೈ ಸೂಪರ್​ ಕಿಂಗ್ಸ್ (Chennai Super Kings)​ ಮತ್ತು ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು (Royal Challengers Bangalore) ಪ್ಲೇ ಆಫ್​ಗೆ ಆಯ್ಕೆಯಾಗಿವೆ. ಉಳಿದ ಒಂದು ಸ್ಥಾನಕ್ಕಾಗಿ ಕೋಲ್ಕತ್ತಾ ಮತ್ತು ಮುಂಬೈ ತಂಡಗಳು ಪೈಪೋಟಿಯಲ್ಲಿವೆ. ಎರಡೂ ತಂಡಗಳು ಒಂದು ಪಂದ್ಯವನ್ನು ಆಡಲಿದ್ದು, ಗೆಲುವು ಅನಿವಾರ್ಯ. ಮತ್ತು ಉತ್ತಮ ರನ್​ರೇಟ್​ ಕೂಡ ಇಬ್ಬರಿಗೂ ಅಗತ್ಯವಿದೆ. ಸದ್ಯದ ಸ್ಥಿತಿಯಲ್ಲಿ ಮುಂಬೈಗಿಂತ ಕೋಲ್ಕತ್ತಾ ರನ್​ ರೇಟ್​ ಚೆನ್ನಾಗಿದೆ. ಇಬ್ಬರೂ ಉಳಿದ ಒಂದೊಂದು ಪಂದ್ಯದಲ್ಲಿ ಗೆಲುವು ಸಾಧಿಸಿದರೂ 14 ಪಾಯಿಂಟ್ಸ್​ ಆಗಲಿದೆ, ಅದರಲ್ಲಿ ಉತ್ತಮ ರನ್​ ರೇಟ್​ ಯಾರು ಹೊಂದಿರುತ್ತಾರೋ ಅವರೇ ಪ್ಲೇ ಆಫ್​ಗೆ ಹೋಗಲಿದ್ದಾರೆ.

    ಇದೇ ಗುರುವಾರ ಮತ್ತು ಶುಕ್ರವಾರ ಎರಡೂ ತಂಡಗಳು ಕಡೆಯ ಪಂದ್ಯ ಆಡಲಿದೆ. ಪಂಜಾಬ್​ ಕಿಂಗ್ಸ್​, ರಾಜಸ್ಥಾನ ರಾಯಲ್ಸ್​ ಮತ್ತು ಸನ್​ ರೈಸರ್ಸ್​ ಹೈದರಾಬಾದ್​ ಈಗಾಗಲೇ ಪ್ಲೇ ಆಫ್​ನಿಂದ ಹೊರಗುಳಿದಿದೆ. ಕೋಲ್ಕತ್ತಾ ಮತ್ತು ಮುಂಬೈ ಎರಡೂ ತಂಡಗಳು ಸೋತರೆ ಪಂಜಾಬ್​ಗೆ ಮತ್ತು ರಾಜಸ್ಥಾನಕ್ಕೆ ಕೊಂಚ ಅವಕಾಶವಿದೆ. ಆದರೆ ರನ್​ರೇಟ್​ ಸಮಸ್ಯೆ ಎರಡೂ ತಂಡಗಳನ್ನೂ ಮತ್ತೆ ಕಾಡಲಿದೆ. ಇದರ ಜೊತೆಗೆ ಎರಡೂ ತಂಡಗಳು ಉಳಿದೊಂದು ಪಂದ್ಯದಲ್ಲಿ ಗೆಲ್ಲಲೇಬೇಕು. ಗೆದ್ದರೂ ಪ್ಲೇ ಆಫ್​ ಮರೀಚಿಕೆಯೇ.

    ಕೆಕೆಆರ್​ ಗೆಲುವಿನ ಲೆಕ್ಕಾಚಾರ (Chances of Kolkata Knight Riders to playoffs):

    ಕೋಲ್ಕತ್ತಾ ನೈಟ್​ ರೈಡರ್ಸ್​ ಉಳಿದಿರುವ ಒಂದು ಪಂದ್ಯದಲ್ಲಿ ಗೆದ್ದರೆ ಸಾಕು, ಪ್ಲೇ ಆಫ್​ ಸ್ಥಾನ ಗಟ್ಟಿಯಾಗಲಿದೆ. ಯಾಕೆಂದರೆ ಕೆಕೆಆರ್​ ರನ್​ ರೇಟ್​ + ನಲ್ಲಿದ್ದು, ಮುಂಬೈ ರನ್​ ರೇಟ್​ ಇನ್ನೂ - ನಲ್ಲಿಯೇ ಇದೆ. ನಿನ್ನೆ ನಡೆದ ಪಂದ್ಯದಲ್ಲಿ ಕೇವಲ 8.3 ಓವರ್​ಗಳಲ್ಲಿ ಮುಂಬೈ ಟಾರ್ಗೆಟ್​ ಚೇಸ್​ ಮಾಡಿತ್ತು. ಆದರೆ ಕೇವಲ ಒಂದು ಮ್ಯಾಚ್​ನ ರನ್​ರೇಟ್​ ಸಾಕಾಗುವುದಿಲ್ಲ. ರೋಹಿತ್ ಶರ್ಮ ನೇತೃತ್ವದ ಬಳಗಕ್ಕೆ ಕೋಲ್ಕತ್ತಾ - ರಾಜಸ್ಥಾನದ ವಿರುದ್ಧ ಸೋತಲ್ಲಿ ಮಾತ್ರ ನಿರಾಳ. ಇಲ್ಲದಿದ್ದರೆ, ಗೆದ್ದರೂ ರನ್​ ರೇಟ್​ ಲೆಕ್ಕಾಚಾರ ಮುಗಿಯುವುದಿಲ್ಲ. ಇನ್ನೂ ಕೆಕೆಆರ್​ ಲೀಗ್​ನ ಕಡೆಯ ಪಂದ್ಯ ರಾಜಸ್ಥಾನ ರಾಯಲ್ಸ್​ ಜೊತೆ ಗುರುವಾರ ಆಡಲಿದೆ. ಗುರುವಾರದ ಪಂದ್ಯದಲ್ಲಿ ಕೋಲ್ಕತ್ತಾಗೆ ಸಂಜು ಸ್ಯಾಮ್ಸನ್​ ಪಡೆ ತೀವ್ರ ಪೈಪೋಟಿ ನೀಡುವುದನ್ನು ನಿರೀಕ್ಷಿಸಬಹುದು. ಮುಂಬೈ ವಿರುದ್ಧ ಹೀನಾಯ ಸೋಲು ಕಂಡರೂ, ಚೆನ್ನೈ ವಿರುದ್ಧದ ಪಂದ್ಯದಲ್ಲಿ ಅಮೋಘ ಪ್ರದರ್ಶನವನ್ನು ರಾಜಸ್ಥಾನ ತಂಡ ನೀಡಿತ್ತು. ಆರಂಭಿಕರಾದ ಎವಿನ್​ ಲೆವಿಸ್​ ಮತ್ತು ಯಶಸ್ವಿ ಜೇಸ್ವಾಲ್​ ಉತ್ತಮ ಆರಂಭ ಒದಗಿಸಿಕೊಟ್ಟಿದ್ದರು. ಮಧ್ಯಮ ಕ್ರಮಾಂಕದಲ್ಲಿ ನಾಯಕ ಸಂಜು ಸ್ಯಾಮ್ಸನ್​, ಶಿವಂ ದುಬೆ ಮತ್ತು ಫಿಲಿಪ್ಸ್​ ಉತ್ತಮ ಪ್ರದರ್ಶನ ನೀಡಿದ್ದರು. ರಾಜಸ್ಥಾನ ಇದೇ ರೀತಿಯ ಪ್ರದರ್ಶನ ನೀಡಿದಲ್ಲಿ, ಕೋಲ್ಕತ್ತಾಗೆ ಸುಲಭದ ಜಯ ಅಸಾಧ್ಯ. ಈ ಪಂದ್ಯದ ಮೇಲೆ ಐಪಿಎಲ್​ ಅಭಿಮಾನಿಗಳು ಎಷ್ಟು ಕುತೂಹಲದಿಂದ ನೋಡುತ್ತಿದ್ದಾರೋ ಅದಕ್ಕಿಂತ ಹೆಚ್ಚು ಮುಂಬೈ ತಂಡ ಕುತೂಹಲ ಹೊಂದಿದೆ. ಈ ಪಂದ್ಯದ ಫಲಿತಾಂಶದ ಮೇಲೆ ಮುಂಬೈ ಪ್ಲೇ ಆಫ್​ ಕನಸು ನಿರ್ಧರಿತವಾಗಿದೆ.

    ಇದನ್ನೂ ಓದಿ: MI vs RR- ರಾಯಲ್ಸ್ ವಿರುದ್ಧ ಮುಂಬೈಗೆ ಭರ್ಜರಿ ಜಯ; ಪ್ಲೇ ಆಫ್ ಕನಸು ಜೀವಂತ

    ಮುಂಬೈ ಇಂಡಿಯನ್ಸ್​ ಲೆಕ್ಕಾಚಾರ (Mumbai Indians last hope):

    ಐಪಿಎಲ್​ 2021ರ ಮೊದಲಾರ್ಧದಲ್ಲಿ ಉತ್ತಮ ಪ್ರದರ್ಶನ ನೀಡಿದ್ದ ಮುಂಬೈ ಇಂಡಿಯನ್ಸ್​, ದುಬೈನಲ್ಲಿ ಆರಂಭವಾದ ದ್ವಿತೀಯಾರ್ಧದಲ್ಲಿ ಐದು ಪಂದ್ಯಗಳಲ್ಲಿ ಕೇವಲ ಒಂದು ಪಂದ್ಯ ಗೆದ್ದಿತ್ತು. ಆದರೆ ನಿನ್ನೆ ನಡೆದ ಪಂದ್ಯದಲ್ಲಿ ಲಯ ಕಂಡುಕೊಂಡ ತಂಡ, 70 ಬಾಲ್​ಗಳು ಉಳಿದಿರುವಂತೆ ಟಾರ್ಗೆಟ್​ ಚೇಸ್​ ಮಾಡಿ ಯುಎಇ ಲೆಗ್​ನಲ್ಲಿ ಎರಡನೇ ಜಯ ದಾಖಲಿಸಿದೆ. ರಾಜಸ್ಥಾನ ವಿರುದ್ಧದ ಪಂದ್ಯದಲ್ಲಿ ಕೋಲ್ಕತ್ತಾ ಮುಗ್ಗರಿಸಿದರೆ ರೋಹಿತ್​ ತಂಡದ ಪ್ಲೇ ಆಫ್​ ಸ್ಥಾನ ಗಟ್ಟಿಯಾಗಲಿದೆ. ಉತ್ತಮ ಲಯಕ್ಕೆ ವಾಪಸಾಗಿರುವ ಹಿನ್ನೆಲೆಯಲ್ಲಿ ಮುಂದಿನ ಪಂದ್ಯವನ್ನೂ ಗೆಲ್ಲುವ ವಿಶ್ವಾಸದಲ್ಲಿ ಮುಂಬೈ ತಂಡವಿದೆ.

    ಇದನ್ನೂ ಓದಿ: IPL 2021 Playoffs- ಐಪಿಎಲ್ ಪ್ಲೇ ಆಫ್: ಯಾವ್ಯಾವ ತಂಡಗಳಿಗೆ ಎಷ್ಟು ಚಾನ್ಸ್? ಇಲ್ಲಿದೆ ಲೆಕ್ಕಾಚಾರ

    ಒಟ್ಟಿನಲ್ಲಿ ಕೆಕೆಆರ್​ ಮತ್ತು ಮುಂಬೈ ಇಬ್ಬರ ನಡುವೆ ಏರ್ಪಟ್ಟಿರುವ ಕಡೆಯ ಪ್ಲೇ ಆಫ್​ ಸ್ಥಾನದ ಪೈಪೋಟಿಯಲ್ಲಿ ಯಾರಿಗೆ ಜಯ ಸಿಗಲಿದೆ ಎಂಬುದನ್ನು ಪಂದ್ಯದ ಫಲಿತಾಂಶವೇ ಹೇಳಬೇಕು. ಒಂದು ವೇಳೆ ಮುಂಬೈ ಪ್ಲೇ ಆಫ್​ ತಲುಪಿದರೆ, ಮೂರನೇ ಬಾರಿ ಸತತ ಐಪಿಎಲ್​ ಟ್ರೋಫಿ ಗೆಲ್ಲುವ ಕನಸಿಗೆ ಮತ್ತೆ ಜೀವ ಬರಲಿದೆ.
    Published by:Sharath Sharma Kalagaru
    First published: