HOME » NEWS » Ipl » TURNING POINTS IN DELHI CAPITALS AND RCB IPL ENCOUNTER AT AHMEDABAD SNVS

ಸ್ಯಾಂಡ್ ಸ್ಟಾರ್ಮ್ - ಡೆಲ್ಲಿ ವಿರುದ್ಧ ಆರ್​ಸಿಬಿ ಗೆಲ್ಲಲು ಕಾರಣವಾದ ಪ್ರಮುಖ ಅಂಶಗಳು

ಎಬಿ ಡೀವಿಲಿಯರ್ಸ್ ಮತ್ತು ಶೆಮ್ರಾನ್ ಹೆಟ್​ಮಯರ್ ಅವರಿಂದ ಸ್ಫೋಟಕ ಬ್ಯಾಟಿಂಗ್ ಪ್ರದರ್ಶನ ಕಂಡ ಆರ್​ಸಿಬಿ ಮತ್ತು ಡೆಲ್ಲಿ ಕ್ಯಾಪಿಟಲ್ಸ್ ಪಂದ್ಯದಲ್ಲಿ ತಿರುವುಗಳನ್ನ ಕೊಟ್ಟ ಕೆಲ ಅಂಶಗಳನ್ನ ಅವಲೋಕಿಸುವುದಾದರೆ…

Vijayasarthy SN | cricketnext
Updated:April 28, 2021, 11:40 AM IST
ಸ್ಯಾಂಡ್ ಸ್ಟಾರ್ಮ್ - ಡೆಲ್ಲಿ ವಿರುದ್ಧ ಆರ್​ಸಿಬಿ ಗೆಲ್ಲಲು ಕಾರಣವಾದ ಪ್ರಮುಖ ಅಂಶಗಳು
ಪಂದ್ಯದ ಬಳಿಕ ಡೆಲ್ಲಿ ಕ್ಯಾಪಿಟಲ್ಸ್​ನ ಹೆಟ್ಮಯರ್ ಅವರನ್ನ ಸಮಾಧಾನಿಸುತ್ತಿರುವ ಕೊಹ್ಲಿ ಮತ್ತು ಮ್ಯಾಕ್ಸ್​ವೆಲ್
  • Cricketnext
  • Last Updated: April 28, 2021, 11:40 AM IST
  • Share this:
ಅಹ್ಮದಾಬಾದ್: ಐಪಿಎಲ್ ಟೂರ್ನಿಯ ಆರನೇ ಸುತ್ತಿನಲ್ಲಿ ನಿನ್ನೆ ಬೆಂಗಳೂರು ರಾಯಲ್ ಚಾಲೆಂಜರ್ಸ್ ತಂಡ ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ರೋಚಕ ಗೆಲುವು ಸಾಧಿಸಿತು. ಹಲವು ಏರಿಳಿತಗಳನ್ನ ಕಂಡ ಈ ಪಂದ್ಯದಲ್ಲಿ ಬೆಂಗಳೂರು ಕೇವಲ ಒಂದು ರನ್ನಿಂದ ಗೆದ್ದು ಬೀಗಿತು. ಐಪಿಎಲ್ ಅಂಕಪಟ್ಟಿಯಲ್ಲಿ ಐದು ಗೆಲುವುಗಳೊಂದಿಗೆ ಮತ್ತೊಮ್ಮೆ ಅಗ್ರಸ್ಥಾನಕ್ಕೆ ಏರಿತು. ರೋಚಕ ತಿರುವುಗಳಿದ್ದ ಈ ಪಂದ್ಯದಲ್ಲಿ ಬೆಂಗಳೂರು ತಂಡದ 171 ರನ್​ಗೆ ಪ್ರತಿಯಾಗಿ ಡೆಲ್ಲಿ ಕ್ಯಾಪಿಟಲ್ಸ್ 170 ರನ್ ಗಳಿಸಿ ವೀರೋಚಿತ ಸೋಲನುಭವಿಸಿತು. ಆಟಕ್ಕೆ ಕುದುರಿಕೊಂಡ ಇಬ್ಬರು ಬ್ಯಾಟುಗಾರರು ಕ್ರೀಸಲ್ಲಿದ್ದರೂ ಡೆಲ್ಲಿ ಕ್ಯಾಪಿಟಲ್ಸ್ ತಂಡಕ್ಕೆ ಗೆಲುವಿನ ದಡ ಮುಟ್ಟಲು ಸಾಧ್ಯವಾಗಲಿಲ್ಲ. ಆರ್​ಸಿಬಿ ತಂಡ ಟಾಸ್ ಸೋತಾಗಲೇ ಪಂದ್ಯವೂ ಕೈತಪ್ಪಬಹುದು ಎಂಬ ನಿರೀಕ್ಷೆ ಇತ್ತು. ಯಾಕೆಂದರೆ, ಅಹ್ಮದಾಬಾದ್​ನಲ್ಲಿ ತೇವಾಂಶ ಹೆಚ್ಚಿರುವುದರಿಂದ ಎರಡನೇ ಅವಧಿಯಲ್ಲಿ ಬೌಲಿಂಗ್ ಮಾಡಲು ಕಷ್ಟಕರವಾಗಿರುತ್ತದೆ. ಹೀಗಾಗಿ, ಆರ್​ಸಿಬಿ ಬೌಲರ್​ಗಳಿಗೆ ಪಂದ್ಯದ ಮೇಲೆ ಹಿಡಿತ ಸಾಧಿಸಲು ಸಾಧ್ಯವಾಗದೇ ಹೋಗಬಹುದು ಎಂಬ ಎಣಿಕೆ ಇತ್ತು. ಆದರೆ, ಅಂತಿಮವಾಗಿ ಬೆಂಗಳೂರಿಗರು ಗೆಲುವಿನ ನಗೆ ಬೀರಿದರು.

ಆರ್​ಸಿಬಿ ಮತ್ತು ಡೆಲ್ಲಿ ಕ್ಯಾಪಿಟಲ್ಸ್ ಪಂದ್ಯದ ಪ್ರಮುಖ ಅಂಶಗಳು ಇವು:

1) ಎಬಿಡಿ ಇನ್ನಿಂಗ್ಸ್: ಆರ್​ಸಿಬಿ ಇನ್ನಿಂಗ್ಸ್ ವೇಳೆ 60 ರನ್ ಆಗುವಷ್ಟರಲ್ಲಿ ವಿರಾಟ್ ಕೊಹ್ಲಿ, ದೇವದತ್ ಪಡಿಕ್ಕಲ್ ಮತ್ತು ಗ್ಲೆನ್ ಮ್ಯಾಕ್ಸ್​ವೆಲ್ ಪೆವಿಲಿಯನ್​ಗೆ ಮರಳಿದರು. ಸ್ಕೋರು 139 ರನ್ ಆಗಿದ್ದಾಗ ರಜತ್ ಪಾಟೀದಾರ್ ಮತ್ತು ವಾಷಿಂಗ್ಟನ್ ಸುಂದರ್ ಕೂಡ ಔಟಾಗಿದ್ದರು. ಅಗ ಉಳಿದದ್ದು 2 ಓವರ್. ಆರ್​ಸಿಬಿ ಸ್ಕೋರು 160 ರನ್​ಗೆ ಸೀಮಿತವಾಗಬಹುದು ಎಂಬ ನಿರೀಕ್ಷೆ ಇತ್ತು. ಆದರೆ, ಮಾರ್ಕಸ್ ಸ್ಟೋಯ್ನಿಸ್ ಅವರು ಮಾಡಿದ ಕೊನೆಯ ಓವರ್ ಆರ್​ಸಿಬಿ ಪಾಲಿಗೆ ಗೇಮ್ ಚೇಂಜರ್ ಆಯಿತು. ಆ ಒಮದೇ ಓವರ್​ನಲ್ಲಿ ಡೀವಿಲಿಯರ್ಸ್ 3 ಸಿಕ್ಸರ್ ಸಿಡಿಸಿ 23 ರನ್ ದರೋಡೆ ಮಾಡಿದರು. ಇದು ಆರ್​ಸಿಬಿ ಹೋರಾಟಕ್ಕೆ ಹೊಸ ಬಲ ನೀಡಿತು.

2) ಮರಳು ಗಾಳಿ: ಅಹ್ಮದಾಬಾದ್​ನಲ್ಲಿ ತೇವಾಂಶ ಇದ್ದರಿಂದ ಆರ್​ಸಿಬಿ ಬೌಲರ್​ಗಳಿಗೆ ನಿಖರವಾಗಿ ಚೆಂಡೆಸೆಯುವುದು ಕಷ್ಟದ ಸ್ಥಿತಿ ಇತ್ತು. ಆದರೆ, ಎರಡನೇ ಅವಧಿ ಪ್ರಾರಂಭಕ್ಕೂ ಮುನ್ನ ಸ್ಯಾಂಡ್ ಸ್ಟಾರ್ಮ್ (ಮರಳು ಬಿರುಗಾಳಿ) ಆಯಿತು. ಇದು ವಾತಾವರಣದ ತೇವಾಂಶ ನೀಗಿಸಿತ್ತು. ಇದರಿಂದ ಆರ್​ಸಿಬಿ ಬೌಲರ್​ಗಳು ತಮ್ಮ ಬೌಲಿಂಗ್ ಮೇಲೆ ಹೆಚ್ಚು ಹಿಡಿತ ಹೊಂದಲು ಸಾಧ್ಯವಾಯಿತು. ವಿರಾಟ್ ಕೊಹ್ಲಿ ಕೂಡ ಈ ಮರಳು ಬಿರುಗಾಳಿಯ ಅಂಶವನ್ನು ಪ್ರಸ್ತಾಪಿಸಿದ್ದಾರೆ.

3) ಹೆಟ್​ಮಯರ್ ಕ್ಯಾಚ್ ಬಿಟ್ಟ ಪಡಿಕ್ಕಲ್: ಶೆಮ್ರಾನ್ ಹೆಟ್​ಮಯರ್ ಆಗಮದವರೆಗೂ ಪಂದ್ಯ ಆರ್​ಸಿಬಿ ಹಿಡಿತದಲ್ಲೇ ಇತ್ತು. ಹೆಟ್​ಮಯರ್ ಬಂದ ಕೆಲ ಹೊತ್ತಿನಲ್ಲೇ ಪಡಿಕ್ಕಲ್​ಗೆ ಕ್ಯಾಚಿತ್ತಿದ್ದರು. ಆದರೆ, ಕರ್ನಾಟಕದ ಆಟಗಾರ ಆ ಕ್ಯಾಚ್ ಡ್ರಾಪ್ ಮಾಡಿದ್ದರು. ಅದು ಮುಂದೆ ತೀರಾ ದುಬಾರಿಯಾಗಿ ಪರಿಣಮಿಸುವ ಸಾಧ್ಯತೆ ಇತ್ತು. ಹೆಟ್​ಮಯರ್ 25 ಬಾಲ್​ನಲ್ಲಿ ಅಜೇಯ 53 ರನ್ ಗಳಿಸಿ, ಡೆಲ್ಲಿ ತಂಡವನ್ನು ಗೆಲುವಿನ ದಡದ ಸಮೀಪ ಕೊಂಡೊಯ್ದಿದ್ದರು.

4) ಹೆಟ್​ಮಯರ್-ಪಂತ್ ಜೊತೆಯಾಟ: ಡೆಲ್ಲಿ ಕ್ಯಾಪಿಟಲ್ಸ್ ತಂಡ 172 ರನ್ ಗುರಿ ಬೆನ್ನತ್ತುವ ಹಾದಿಯಲ್ಲಿ 13ನೇ ಓವರ್​ನಲ್ಲಿ 92 ರನ್​ಗೆ 4 ವಿಕೆಟ್ ಕಳೆದುಕೊಂಡು ಕಷ್ಟಕರ ಸ್ಥಿತಿಯಲ್ಲಿತ್ತು. ನಾಯಕ ರಿಷಭ್ ಪಂತ್ ಮತ್ತು ಶಿಮ್ರಾನ್ ಹೆಟ್​ಮಯರ್ ಜೊತೆಯಾಟವು ಡೆಲ್ಲಿ ತಂಡದ ಗೆಲುವಿನ ನಿರೀಕ್ಷೆ ಹುಟ್ಟಿಸಿತ್ತು. ಹೆಟ್​ಮಯರ್ ಅವರಂತೂ ಗೇಮ್ ಚೇಂಜರ್ ಎನಿಸಿದ್ದರು. ಎಬಿ ಡೀವಿಲಿಯರ್ಸ್ ಆಟಕ್ಕೆ ಸಮನಾದ ಪ್ರದರ್ಶನ ನೀಡಿದರು. ಒಂದು ಹಂತದಲ್ಲಿ ಡೆಲ್ಲಿ ತಂಡ ಪಂದ್ಯ ಗೆಲ್ಲಲು 3 ಓವರ್​ನಲ್ಲಿ 46 ರನ್ ಗಳಿಸುವ ಅಗತ್ಯ ಇತ್ತು. ಮೂರು ಓವರ್​ನಲ್ಲಿ ಕೇವಲ 11 ರನ್ನಿತ್ತಿದ್ದ ಕೈಲೆ ಜೇಮಿಸನ್ ಅವರು 18ನೇ ಓವರ್ ಬೌಲ್ ಮಾಡಿದಾಗ ಯಾರೂ ಎಣಿಸಿದ ರೀತಿ ಪಂದ್ಯಕ್ಕೆ ತಿರುವು ಸಿಕ್ಕಿತು. ಹೆಟ್​ಮಯರ್ ಸ್ಫೋಟಕ ಆಟದಿಂದಾಗಿ ಆ ಒಂದೇ ಓವರ್​ನಲ್ಲಿ 21 ರನ್ ಹರಿದುಬಂತು. ಇದರಿಂದ ಡೆಲ್ಲಿ ಗೆಲುವಿನ ಸಾಧ್ಯತೆ ದಟ್ಟವಾಯಿತು.

5) ಪಂತ್ ಪರದಾಟ: ಒಂದೆಡೆ ಶಿಮ್ರಾನ್ ಹೆಟ್​ಮಯರ್ ಗೇಮ್ ಚೇಂಜರ್ ಆಗುವಂಥ ಆಟ ಆಡಿದರೆ, ಮತ್ತೊಂದೆಡೆ ನಾಯಕ ರಿಷಭ್ ಪಂತ್ ರನ್ ಗಳಿಸಲು ತುಸು ಪರದಾಡಿದರು. ಹೀಗಿದ್ದರೂ ಕೊನೆಯ ಓವರ್​ನಲ್ಲಿ ಅವರು ಸಿಂಗಲ್ಸ್ ತೆಗೆದುಕೊಂಡು ಹೆಟ್​ಮಯರ್ ಅವರಿಗೆ ಸ್ಟ್ರೈಕ್ ಕೊಟ್ಟಿದ್ದರೆ ಡೆಲ್ಲಿ ಗೆಲುವಿನ ಸಾಧ್ಯತೆ ಹೆಚ್ಚಿರುತ್ತಿತ್ತು. ಆದರೂ ಪಂತ್ ಅವರು ತಮ್ಮ ಕೈಲಾದ ಮಟ್ಟಿಗೆ ಪ್ರಯತ್ನವಂತೂ ಮಾಡಿದರು. ಗೆಲ್ಲಲು 2 ಬಾಲ್​ನಲ್ಲಿ 10 ರನ್ ಇದ್ದಾಗ ಅವರಿಂದ ಎರಡು ಬೌಂಡರಿ ಬಂದವು. ಸಿಕ್ಸರ್ ಹೊಡೆಯಲು ಸಾಧ್ಯವಾಗಲಿಲ್ಲ.6) ಹರ್ಷಲ್ ಪಟೇಲ್: ಹಿಂದಿನ ಪಂದ್ಯದಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ವಿರುದ್ಧ ಒಂದೇ ಓವರ್​ನಲ್ಲಿ 37 ರನ್ ಚಚ್ಚಿಸಿಕೊಂಡಿದ್ದ ಹರ್ಷಲ್ ಪಟೇಲ್ ನಿನ್ನೆಯ ಪಂದ್ಯದಲ್ಲಿ ಒಂದಿಷ್ಟೂ ಎದೆಗುಂದದೆ ಬೌಲಿಂಗ್ ಮಾಡಿ 2 ವಿಕೆಟ್ ಕೂಡ ಪಡೆದರು. ಅಲ್ಲದೇ, 19ನೇ ಓವರ್​ನಲ್ಲಿ ಕೇವಲ 11 ರನ್ ನೀಡಿದ್ದು ಗಮನಾರ್ಹ. ಆಗ ಹೆಟ್​ಮಯರ್ ಬಹಳ ಡೇಂಜರಸ್ ಆಗಿ ಬ್ಯಾಟ್ ಮಾಡುತ್ತಿದ್ದರು. ಆದರೂ ಹೆಚ್ಚು ರನ್ ಹರಿದುಹೋಗದಂತೆ ಹರ್ಷಲ್ ಪಟೇಲ್ ನೋಡಿಕೊಂಡಿದ್ದು ವಿಶೇಷ.
Published by: Vijayasarthy SN
First published: April 28, 2021, 11:40 AM IST
ಮತ್ತಷ್ಟು ಓದಿರಿ
ಮುಂದಿನ ಸುದ್ದಿ

Top Stories