‘ನನ್ನ ಹೆಂಡ್ತಿ ಬಿಡ್ತಿಲ್ಲ’- ಆರ್​ಸಿಬಿ ಜೆರ್ಸಿ ತೊಟ್ಟು ಬಂದ ಸಿಎಸ್​ಕೆ ಫ್ಯಾನ್; ವೈರಲ್ ಆಯ್ತು ಆತನ ಪ್ಲೆಕಾರ್ಡ್

ಬೆಂಗಳೂರು, ಸೆ. 27: ಐಪಿಎಲ್​ನಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ಮತ್ತು ಮುಂಬೈ ಇಂಡಿಯನ್ಸ್ ಕಟ್ಟರ್ ಎದುರಾಳಿಗಳು. ಅದು ಬಿಟ್ಟರೆ ಆರ್​ಸಿಬಿ ಮತ್ತು ಸಿಎಸ್​ಕೆ ನಡುವಿನ ಪೈಪೋಟಿ ಗಮನ ಸೆಳೆಯುವಂಥದ್ದು. ಇವೆರೆಡು ತಂಡಗಳ ಫ್ಯಾನ್ಸ್ ಕ್ರೇಜ್ ಅಂಥದ್ದು. ಚೆನ್ನೈ ಮತ್ತು ಬೆಂಗಳೂರು ತಂಡಗಳ ನಾಯಕರಾದ ಧೋನಿ ಮತ್ತು ಕೊಹ್ಲಿಯ ಜನಪ್ರಿಯತೆ ಪ್ರಾದೇಶಿಕತೆಗೆ ಸೀಮಿತವಾದುದಲ್ಲ. ಉತ್ತರ ಭಾರತೀಯರನ್ನ ಒಪ್ಪಿಕೊಳ್ಳದ ತಮಿಳುನಾಡು ಜನರು ಎಂಎಸ್ ಧೋನಿಯನ್ನ ಆರಾಧಿಸುತ್ತಾರೆ. ಅಷ್ಟರಮಟ್ಟಿಗೆ ಧೋನಿ ಎಂದರೆ ಸಿಎಸ್​ಕೆ ಫ್ಯಾನ್ಸ್​ಗೆ ಪ್ರೀತಿ. ಆರ್​ಸಿಬಿ ಅಭಿಮಾನಿಗಳೂ ಅಷ್ಟೇ ತೀವ್ರತೆ ಇರುವ ಮಂದಿ. ಬೆಂಗಳೂರು ಮತ್ತು ಚೆನ್ನೈ ಪಂದ್ಯ ನಡೆದರೆ ಇಪಿಎಲ್​ನಲ್ಲಿ ಮ್ಯಾಂಚೆಸ್ಟರ್ ಸಿಟಿ, ಮ್ಯಾಂಚೆಸ್ಟರ್ ಯುನೈಟೆಡ್ ತಂಡಗಳ ನಡುವಿನ ಪಂದ್ಯ ನಡೆದಂತೆ ಭಾಸವಾಗುತ್ತದೆ.

ಮುಂಬೈ ಇಂಡಿಯನ್ಸ್ ವಿರುದ್ಧ ಗೆಲ್ಲುವ ಮುಂಚೆ ಆರ್​ಸಿಬಿ ತಂಡ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ ಆಡಿ ಸೋತಿತ್ತು. ಈ ಪಂದ್ಯದ ವೇಳೆ ಒಬ್ಬ ಸಿಎಸ್​ಕೆ ಅಭಿಮಾನಿ ಹಿಡಿದುಕೊಂಡಿದ್ದ ಪ್ಲೆಕಾರ್ಡ್ ಇದೀಗ ವೈರಲ್ ಆಗುತ್ತಿದೆ. ಆತ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಜೆರ್ಸಿ ತೊಟ್ಟು ಬಂದಿದ್ದ ಸಿಎಸ್​ಕೆ ಫ್ಯಾನ್. ಆತ ಬರೆದಿದ್ದ ಪ್ಲೆಕಾರ್ಡ್ ಮಜವಾಗಿದೆ. “ನನ್ನ ಸಿಎಸ್​​ಕೆ ಜೆರ್ಸಿ ತೊಡಲು ನನ್ನ ಹೆಂಡತಿ ಅನುಮತಿ ಕೊಡಲಿಲ್ಲ” ಎಂದು ಆತ ತನ್ನ ಪ್ಲೆಕಾರ್ಡ್​ನಲ್ಲಿ ಬರೆದುಕೊಂಡಿದ್ದ. ಆರ್​ಸಿಬಿ ಜೆರ್ಸಿ ತೊಟ್ಟ ಇತರ ಸಂಗಡಿಗರ ಜೊತೆ ಆತ ಮುಗುಳ್ನಗುತ್ತಾ ಪ್ಲೆಕಾರ್ಡ್ ಇಟ್ಟುಕೊಂಡಿದ್ದ ಆ ಫೋಟೋವನ್ನು ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಅಧಿಕೃತ ಟ್ವಿಟ್ಟರ್ ಖಾತೆಯಿಂದ ಪೋಸ್ಟ್ ಮಾಡಲಾಗಿದೆ. ಲವ್ ಈಸ್ ಕಲರ್ ಬ್ಲೈಂಡ್ ಎಂದು ಕ್ಯಾಪ್ಷನ್ ಕೊಟ್ಟು ಫೋಟೋ ಸಮೇತ ಮಾಡಿದ್ದ ಆ ಟ್ವೀಟ್ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ. 17 ಸಾವಿರಕ್ಕೂ ಹೆಚ್ಚು ಮಂದಿ ಆ ಪೋಸ್ಟ್​ಗೆ ಲೈಕ್ ಮಾಡಿದ್ಧಾರೆ. ಸುಮಾರು ಎರಡು ಸಾವಿರದಷ್ಟು ಜನರು ರೀಟ್ವೀಟ್ ಮಾಡಿದ್ದಾರೆ.

Love is colour blind ❤️💛#RCBvCSK #WhistlePodu #Yellove 🦁 pic.twitter.com/C7oMPEJjfI

— Chennai Super Kings - Mask P😷du Whistle P🥳du! (@ChennaiIPL) September 25, 2021

ಕೆಲವರ ಕಾಮೆಂಟ್ ಕೂಡ ಮಜವಾಗಿದೆ. ಆ ಫೋಟೋದಲ್ಲಿ ಪ್ಲೆಕಾರ್ಡ್ ಹಿಡಿದ ಸಿಎಸ್​ಕೆ ಫ್ಯಾನ್ ಜೊತೆ ಕೆಲ ಹುಡುಗಿಯರೂ ಪೋಸ್ ಕೊಟ್ಟಿದ್ದಾರೆ. ಅದಕ್ಕೆ ಒಬ್ಬ, “ಆರ್​ಸಿಬಿ ಫ್ಯಾನ್ ಗರ್ಲ್, ಸಿಎಸ್​ಕೆ ಫ್ಯಾನ್ ಬಾಯ್ = ಭಲೇ ಜೋಡಿ” ಎಂದು ಪ್ರತಿಕ್ರಿಯಿಸಿದ್ಧಾನೆ. ಸಿಎಸ್​ಕೆ ಹುಡುಗನಿಗೆ ಆರ್​ಸಿಬಿ ಹುಡುಗಿ ಬಿದ್ದರೆ ಆರ್​ಸಿಬಿ ಹುಡುಗರು ಎಲ್ಲಿಗೆ ಹೋಗಬೇಕು ಎಂದು ಮತ್ತೊಬ್ಬ ಕಾಮೆಂಟ್ ಮಾಡಿದ್ದಾನೆ. ಹೀಗೆ ಒಂದಷ್ಟು ರಸವತ್ತಾದ ಕಾಮೆಂಟ್​ಗಳಿಗೂ ಈ ಪೋಸ್ಟ್ ಕಾರಣವಾಗಿದೆ.

ಇದನ್ನೂ ಓದಿ: IPL 2021- ಎಬಿಡಿ ಔಟ್ ಆಗೋದನ್ನ ನೋಡಿ ಕೈಪೆಟ್ಟು ಮಾಡಿಕೊಂಡ ಮಗ; ಇಲ್ಲಿದೆ ವಿಡಿಯೋ

ಕಳೆದ ಸೀಸನ್​ನಲ್ಲಿ ಬಹಳ ನೀರಸ ಪ್ರದರ್ಶನ ನೀಡಿದ್ದ ಚೆನ್ನೈ ಸೂಪರ್ ಕಿಂಗ್ಸ್ ಈ ವರ್ಷ ಅಮೋಘ ಆಟದ ಮೂಲಕ ಮಾಮೂಲಿಯ ಲಯಕ್ಕೆ ಬಂದಿದೆ. ಮೂರು ಬಾರಿ ಐಪಿಎಲ್ ಚಾಂಪಿಯನ್ ಆಗಿರುವ ಸಿಎಸ್​ಕೆ ಸದ್ಯ ಪಾಯಿಂಟ್ ಟೇಬಲ್​ನಲ್ಲಿ ಟಾಪ್-2 ಲಿಸ್ಟ್​ನಲ್ಲಿ ಸತತವಾಗಿ ಕಾಣಿಸಿಕೊಳ್ಳುತ್ತಿದೆ. ಎಲ್ಲಾ ವಿಭಾಗದಲ್ಲೂ ಪ್ರಬಲವಾಗಿ ತೋರುತ್ತಿದೆ. ಋತುರಾಜ್ ಗಾಯಕ್ವಡ್, ಫ್ಯಾಫ್ ಡುಪ್ಲೆಸಿಸ್ ಅವರು ಸ್ಥಿರ ಪ್ರದರ್ಶನ ನೀಡುತ್ತಿದ್ಧಾರೆ. ಮೊಯೀನ್ ಅಲಿ, ರವೀಂದ್ರ ಜಡೇಜಾ, ದೀಪಕ್ ಚಹರ್ ಮೊದಲಾದವರೂ ಕೂಡ ತಂಡದ ಗೆಲುವಿನಲ್ಲಿ ಪಾತ್ರ ವಹಿಸುತ್ತಿದ್ದಾರೆ.
RESULT DATA:
ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಸತತ ಎರಡು ಸೋಲಿನ ಬಳಿಕ ಮುಂಬೈ ವಿರುದ್ಧ ಗೆದ್ದು ಮತ್ತೆ ಲಯಕ್ಕೆ ಬಂದಿದೆ. ವಿರಾಟ್ ಕೊಹ್ಲಿ, ಗ್ಲೆನ್ ಮ್ಯಾಕ್ಸ್​ವೆಲ್ ಅವರು ಫಾರ್ಮ್​ನಲ್ಲಿದ್ದಾರೆ. ಎಬಿ ಡೀವಿಲಿಯರ್ಸ್ ಬೇಗ ಔಟಾದರೂ ತಮ್ಮ ಬ್ಯಾಟಿಂಗ್ ಅಗಾಧತೆಯನ್ನ ತೋರಿಸಿದ್ಧಾರೆ. ಬೌಲಿಂಗ್​ನಲ್ಲಿ ಹರ್ಷಲ್ ಪಟೇಲ್, ಯುಜವೇಂದ್ರ ಚಹಲ್ ಮತ್ತು ಮೊಹಮ್ಮದ್ ಸಿರಾಜ್ ಮಾರಕ ಕಾಂಬಿನೇಶನ್ ಎನಿಸಿದ್ಧಾರೆ. ಮುಂಬೈ ವಿರುದ್ಧ ಆಡಿದ ರೀತಿಯಲ್ಲೇ ಆರ್​ಸಿಬಿ ಆಟ ಮುಂದುವರಿಸಿದರೆ ಚೊಚ್ಚಲ ಐಪಿಎಲ್ ಪ್ರಶಸ್ತಿಗೆ ಮುತ್ತಿಕ್ಕುವ ಸಾಧ್ಯತೆ ತಳ್ಳಿಹಾಕಲು ಸಾಧ್ಯವಿಲ್ಲ.