IPL 2021: CSK ಬ್ಯಾಟಿಂಗ್ ಕೋಚ್ ಮೈಕಲ್ ಹಸ್ಸಿಗೆ ಕೊರೋನಾ..!

ಕೊರೋನಾ ಕಾರಣದಿಂದ ಇಂಡಿಯನ್ ಪ್ರೀಮಿಯರ್ ಲೀಗ್ ಸೀಸನ್ 14 ಮುಂದೂಡಲಾಗಿದೆ. ಇದಾಗ್ಯೂ ಐಪಿಎಲ್​ನಲ್ಲಿ ಭಾಗವಹಿಸಿದ ಆಟಗಾರರಲ್ಲಿ ಕೊರೋನಾಂತಕ ದೂರವಾಗಿಲ್ಲ. ಏಕೆಂದರೆ ಇದೀಗ ಚೆನ್ನೈ ಸೂಪರ್ ಕಿಂಗ್ಸ್​ ತಂಡದ ಬ್ಯಾಟಿಂಗ್ ಕೋಚ್ ಮೈಕಲ್ ಹಸ್ಸಿ ಅವರ ಕೋವಿಡ್-19 ಟೆಸ್ಟ್ ವರದಿಯು ಪಾಸಿಟಿವ್ ಬಂದಿದೆ. ಇದರಿಂದ ಹಸ್ಸಿ ಜೊತೆ ಸಂಪರ್ಕದಲ್ಲಿ ಇತರೆ ಆಟಗಾರರಲ್ಲೂ ಮತ್ತೆ ಆತಂಕ ಎದುರಾಗಿದೆ.

ಕೆಕೆಆರ್ ಆಟಗಾರರಾದ ವರುಣ್ ಚಕ್ರವರ್ತಿ ಹಾಗೂ ಸಂದೀಪ್ ವಾರಿಯರ್ ಅವರಲ್ಲಿ ಕೊರೋನಾ ಸೋಂಕು ಕಂಡು ಬಂದ ಬೆನ್ನಲ್ಲೇ, ಸಿಎಸ್​ಕೆ ತಂಡದ ಆಟಗಾರರು ಕೂಡ ಕೊರೋನಾ ಟೆಸ್ಟ್​ಗೆ ಒಳಗಾಗಿದ್ದರು. ಈ ವೇಳೆ ಸಿಎಸ್​ಕೆ ಸಿಇಇ ಕಾಶಿ ವಿಶ್ವನಾಥ್, ಬೌಲಿಂಗ್ ಕೋಚ್ ಲಕ್ಷ್ಮೀಪತಿ ಬಾಲಾಜಿ ಹಾಗೂ ತಂಡದ ಬಸ್​ ಕ್ಲೀನರ್​ನಲ್ಲಿ ಕೊರೋನಾ ಸೋಂಕಿನ ಲಕ್ಷಣಗಳು ಕಂಡು ಬಂದಿದ್ದವು. ಇದಾಗ್ಯೂ ಸೋಮವಾರ ನಡೆಸಲಾದ ಮತ್ತೊಂದು ಟೆಸ್ಟ್​ನಲ್ಲಿ ಕಾಶಿ ವಿಶ್ವನಾಥ್ ಅವರ ವರದಿಯು ನೆಗೆಟಿವ್ ಬಂದಿತ್ತು. ಆದರೆ ತಂಡದ ಬ್ಯಾಟಿಂಗ್ ಕೋಚ್ ಆಗಿದ್ದ ಮೈಕಲ್ ಹಸ್ಸಿ ಅವರ ವರದಿಯು ಪಾಸಿಟಿವ್ ಬಂದಿದೆ.

ಸದ್ಯ ತಂಡದ ಐಸೊಲೇಷನ್​ನಲ್ಲಿರುವ ಮೈಕಲ್ ಹಸ್ಸಿ, ಮತ್ತೊಂದು ಟೆಸ್ಟ್ ಮಾಡಿಸಲಿದ್ದಾರೆ. ಒಂದು ವೇಳೆ ಮತ್ತೊಮ್ಮೆ ಪಾಸಿಟಿವ್ ರಿಪೋರ್ಟ್ ಬಂದರೆ ಅವರು ಭಾರತದಲ್ಲೇ ಉಳಿಯಲಿದ್ದಾರೆ. ಏಕೆಂದರೆ ಮೇ.15 ರ ತನಕ ಭಾರತದಿಂದ ಆಸ್ಟ್ರೇಲಿಯಾಗೆ ಯಾವುದೇ ವಿಮಾನ ವ್ಯವಸ್ಥೆಯಿಲ್ಲ. ಹೀಗಾಗಿ ಆಸ್ಟ್ರೇಲಿಯಾ ಆಟಗಾರರು ಮಾಲ್ಡೀವ್ಸ್​ಗೆ ತೆರಳಿ ಮೇ.15 ರವರೆಗೆ ಸಮಯ ಕಳೆಯಲು ನಿರ್ಧರಿಸಿದ್ದಾರೆ. ಅಲ್ಲದೆ ಅಲ್ಲಿಂದ ಆಸ್ಟ್ರೇಲಿಯಾಗೆ ತೆರಳುವ ಪ್ಲ್ಯಾನ್ ಮಾಡಿಕೊಂಡಿದ್ದಾರೆ. ಇದೀಗ ಹಸ್ಸಿ ಅವರಲ್ಲಿ ಕೊರೋನಾ ಪಾಸಿಟಿವ್ ಕಂಡು ಬಂದ ಹಿನ್ನೆಲೆಯಲ್ಲಿ ಸಿಎಸ್​ಕೆ ಬ್ಯಾಟಿಂಗ್ ಕೋಚ್ ಮಾಲ್ಡೀವ್ಸ್ ತೆರಳುವ ಯೋಜನೆಯಿಂದ ಹಿಂದೆ ಸರಿಯಲಿದ್ದಾರೆ.