KKR vs SRH- ಕಳೆದ ವರ್ಷದ ಸೋಲಿನ ಅನುಭವ ಕೆಕೆಆರ್​ಗೆ ಕಾಡುತ್ತಾ? ಸನ್​ರೈಸರ್ಸ್​ದು ವಿಭಿನ್ನ ಸ್ಥಿತಿ

ದುಬೈ, ಅ. 03: ಪ್ಲೇ ಆಫ್​ಗೆ ಯಾವೆಲ್ಲಾ ತಂಡಗಳು ಪ್ರವೇಶ ಪಡೆಯುತ್ತವೆ ಎಂಬುದು ನಿರ್ಧಾರವಾಗಲು ಈಗ ಪ್ರತಿಯೊಂದೂ ಪಂದ್ಯವೂ ಮಹತ್ವದ್ದಾಗಿವೆ. ಚೆನ್ನೈ ಸೂಪರ್ ಕಿಂಗ್ಸ್ ಮತ್ತು ಡೆಲ್ಲಿ ಕ್ಯಾಪಿಟಲ್ಸ್ ತಂಡಗಳು ಈಗಾಗಲೇ ಪ್ಲೇ ಆಫ್ ಪ್ರವೇಶ ಖಚಿತಪಡಿಸಿಕೊಂಡಿವೆ. ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಪ್ಲೇ ಆಫ್ ಪ್ರವೇಶದ ತುದಿಯಲ್ಲಿದೆ. ಇನ್ನೊಂದು ಹೆಜ್ಜೆ ಯಶಸ್ವಿಯಾಗಿ ಇಟ್ಟರೆ ಪ್ಲೇ ಆಫ್ ಬಾಗಿಲು ತೆರೆದಂತೆ. ಈಗ ಉಳಿದಿರುವುದು ರಾಜಸ್ಥಾನ್ ರಾಯಲ್ಸ್, ಕೋಲ್ಕತಾ ನೈಟ್ ರೈಡರ್ಸ್, ಮುಂಬೈ ಇಂಡಿಯನ್ಸ್ ಮತ್ತು ಪಂಜಾಬ್ ಕಿಂಗ್ಸ್ ತಂಡಗಳು. ಈ ನಾಲ್ಕು ತಂಡಗಳು ಸಮಾನ ಸ್ಥಿತಿಯಲ್ಲಿವೆ. ಪ್ಲೇ ಆಫ್​ನ ಎರಡು ಸ್ಥಾನಕ್ಕೆ ಈ ನಾಲ್ಕು ತಂಡಗಳು ಹಾಗೂ ಆರ್​ಸಿಬಿ ಮಧ್ಯೆ ಪೈಪೋಟಿ ಇದೆ. ಇವತ್ತು ಆರ್​ಸಿಬಿ ಗೆದ್ದರೆ ಅದು ಪ್ಲೇ ಆಫ್ ಪ್ರವೇಶಿಸುತ್ತದೆ. ಆಗ ಒಂದು ಸ್ಥಾನಕ್ಕೆ ಈ ನಾಲ್ಕು ತಂಡಗಳು ಪೈಪೋಟಿ ನಡೆಸಬೇಕಾಗುತ್ತದೆ. ಈ ಹಿನ್ನೆಲೆಯಲ್ಲಿ ಇವತ್ತು ಸನ್​ರೈಸರ್ಸ್ ಹೈದರಾಬಾದ್ ಮತ್ತು ಕೋಲ್ಕತಾ ನೈಟ್ ರೈಡರ್ಸ್ ನಡುವಿನ ಪಂದ್ಯ ಕುತೂಹಲ ಮೂಡಿಸಿದೆ.

ಹತ್ತು ಅಂಕಗಳನ್ನ ಹೊಂದಿರುವ ನಾಲ್ಕು ತಂಡಗಳ ಪೈಕಿ ಕೋಲ್ಕತಾ ನೈಟ್ ರೈಡರ್ಸ್ ಉತ್ತಮ ಸ್ಥಿತಿಯಲ್ಲಿದೆ. ಒಳ್ಳೆಯ ನೆಟ್ ರನ್ ರೇಟ್ ಇದೆ. ಮೂರು ತಂಡಗಳದ್ದು ಮೈನಸ್ ಇದ್ದರೆ ಕೆಕೆಆರ್​ದು ಪ್ಲಸ್ ನೆಟ್ ರನ್ ರೇಟ್ ಇದೆ. ಮುಂಬೈ ಇಂಡಿಯನ್ಸ್ ತಂಡ ತನ್ನ ಹಿಂದಿನ ಪಂದ್ಯವನ್ನ ಸೋತಿದ್ದು ಕೆಕೆಆರ್​ಗೆ ಭಾರೀ ಅನುಕೂಲ ಮಾಡಿಕೊಟ್ಟಿದೆ. ಇವತ್ತು ಸನ್​ರೈಸರ್ಸ್ ಹೈದರಾಬಾದ್ ವಿರುದ್ಧ ಕೆಕೆಆರ್ ಗೆದ್ದರೆ ಪ್ಲೇ ಆಫ್ ಪ್ರವೇಶದ ಸಾಧ್ಯತೆ ಗಟ್ಟಿಗೊಳ್ಳುತ್ತದೆ. ಎರಡೂ ಪಂದ್ಯಗಳನ್ನ ಗೆದ್ದರೆ ಪ್ಲೇ ಆಫ್ ಪ್ರವೇಶ ಬಹುತೇಕ ಖಚಿತವಾಗುತ್ತದೆ.

ಇನ್ನೊಂದೆಡೆ ಸನ್​ರೈಸರ್ಸ್ ಹೈದರಾಬಾದ್ ತಂಡ ಕೇವಲ 4 ಅಂಕಗಳೊಂದಿಗೆ ಪ್ಲೇ ಆಫ್ ರೇಸ್​ನಿಂದ ಬಹಳ ಹಿಂದೆಯೇ ಹೊರಬಿದ್ದಿದೆ. ಅದೇನಿದ್ದರೂ ಜೇಂಟ್ ಕಿಲ್ಲರ್ ಪಾತ್ರ ಮಾತ್ರ ಬಾಕಿ ಇದೆ. ಕುತೂಹಲ ಎಂದರೆ, ಕಳೆದ ಸೀಸನ್​ನಲ್ಲಿ ಕೊನೆಯ ಲೀಗ್ ಪಂದ್ಯ ಕೆಕೆಆರ್ ಮತ್ತು ಎಸ್​ಆರ್​ಎಚ್ ಮಧ್ಯೆ ಇತ್ತು. ಆ ಪಂದ್ಯದಲ್ಲಿ ಕೋಲ್ಕತಾ ನೈಟ್ ರೈಡರ್ಸ್ ವಿರುದ್ಧ ಹೈದರಾಬಾದ್ ಗೆದ್ದು ಪ್ಲೇ ಆಫ್​ಗೆ ಲಗ್ಗೆ ಹಾಕಿತ್ತು. ಪ್ಲೇ ಆಫ್ ಕನಸಿನಲ್ಲಿದ್ದ ಕೆಕೆಆರ್​ಗೆ ಆ ಸೋಲು ಆಘಾತ ಕೊಟ್ಟಿತ್ತು. ಈಗ ಕೆಕೆಆರ್​ಗೆ ಅದೇ ಫಲಿತಾಂಶ ರಿಪೀಟ್ ಆಗುತ್ತಾ? ಆದರೆ, ಸನ್​ರೈಸರ್ಸ್ ವಿರುದ್ಧ ಆಡಿದ ಕಳೆದ ಐದು ಪಂದ್ಯಗಳಲ್ಲಿ ಕೆಕೆಆರ್ ನಾಲ್ಕರಲ್ಲಿ ಗೆಲುವಿನ ನಗೆ ಬೀರಿದೆ. ಮೇಲಾಗಿ, ಕಳೆದ ಸೀಸನ್​ನಲ್ಲಿದ್ದಂತೆ ಸನ್​ರೈಸರ್ಸ್ ಈ ಬಾರಿ ಬಲಿಷ್ಠವೆನಿಸಿಲ್ಲ. ಹೀಗಾಗಿ, ಕೋಲ್ಕತಾ ತಂಡ ಇವತ್ತಿನ ಪಂದ್ಯದಲ್ಲಿ ಗೆಲ್ಲಲು ಫೇವರಿಟ್ ಎನಿಸಿದೆ.

ಇದನ್ನೂ ಓದಿ: MI vs DC- ಮುಂಬೈ ಇಂಡಿಯನ್ಸ್​ಗೆ ಮತ್ತೆ ಸೋಲಿನ ಆಘಾತ; ಡೆಲ್ಲಿಗೆ ಅಮೋಘ ಜಯ

ಕೋಲ್ಕತಾ ತಂಡದಲ್ಲಿ ವೆಂಕಟೇಶ್ ಅಯ್ಯರ್ ಅವರು ಸೂಪರ್ ಸ್ಟಾರ್ ಆಗಿ ಹೊರಹೊಮ್ಮುತ್ತಿದ್ಧಾರೆ. ಈ ಪಂದ್ಯದಲ್ಲಿ ಶಾಕಿಬ್ ಅಲ್ ಹಸನ್ ಅವರನ್ನ ಆಡಿಸುವ ನಿರೀಕ್ಷೆ ಇದೆ. ಕರ್ನಾಟಕದ ವೇಗಿ ಪ್ರಸಿದ್ಧ್ ಕೃಷ್ಣ ಅವರಿಗೆ ಇವತ್ತು ಆಡಲು ಅವಕಾಶ ಸಿಗುತ್ತದಾ ನೋಡಬೇಕು.

ಇನ್ನು, ಸನ್​ರೈಸರ್ಸ್ ಹೈದರಾಬಾದ್​ನ ವೃದ್ಧಿಮಾನ್ ಸಾಹ ಅವರು ಕೆಕೆಆರ್ ವಿರುದ್ಧ ಒಳ್ಳೆಯ ಟ್ರ್ಯಾಕ್ ರೆಕಾರ್ಡ್ ಇದೆ. ಅದು ಬಿಟ್ಟರೆ ಹೈದರಾಬಾದ್ ತಂಡಕ್ಕೆ ಹೇಳಿಕೊಳ್ಳುವ ಟ್ರಂಪ್ ಕಾರ್ಡ್ ಉಳಿದಿಲ್ಲ.

ತಂಡಗಳು:

ಕೋಲ್ಕತಾ ನೈಟ್ ರೈಡರ್ಸ್ ಸಂಭಾವ್ಯ ತಂಡ: ಶುಭ್ಮನ್ ಗಿಲ್, ವೆಂಕಟೇಶ್ ಅಯ್ಯರ್, ರಾಹುಲ್ ತ್ರಿಪಾಠಿ, ನಿತೀಶ್ ರಾಣ, ಇಯಾನ್ ಮಾರ್ಗನ್, ದಿನೇಶ್ ಕಾರ್ತಿಕ್, ಟಿಮ್ ಸೇಫರ್ಟ್/ಶಾಕಿಬ್ ಅಲ್ ಹಸನ್, ಸುನೀಲ್ ನರೈನ್, ಟಿಮ್ ಸೌಥಿ, ಪ್ರಸಿದ್ಧ್ ಕೃಷ್ಣ/ಸಂದೀಪ್ ವಾರಿಯರ್, ವರುಣ್ ಚಕ್ರವರ್ತಿ.

ಸನ್​ರೈಸರ್ಸ್ ಹೈದರಾಬಾದ್ ಸಂಭಾವ್ಯ ತಂಡ: ಜೇಸನ್ ರಾಯ್, ವೃದ್ಧಿಮಾನ್ ಸಾಹ, ಕೇನ್ ವಿಲಿಯಮ್ಸನ್, ಪ್ರಿಯಮ್ ಗರ್ಗ್, ಅಭಿಷೇಕ್ ಶರ್ಮಾ, ಜೇಸನ್ ಹೋಲ್ಡರ್, ಅಬ್ದುಲ್ ಸಮದ್, ರಷೀದ್ ಖಾನ್, ಭುವನೇಶ್ವರ್ ಕುಮಾರ್, ಸಿದ್ಧಾರ್ಥ್ ಕೌಲ್, ಸಂದೀಪ್ ಶರ್ಮಾ.