IPL 2021: ಇಂಗ್ಲೆಂಡ್​ನಲ್ಲಿ ಐಪಿಎಲ್ ಆಯೋಜಿಸುವುದು ಕಾನೂನುಬಾಹಿರ..!

ಏಪ್ರಿಲ್ 9 ರಂದು ಶುರುವಾಗಿದ್ದ ಐಪಿಎಲ್​ಗೆ ಕೊರೋನಾ ಕಾರಣದಿಂದ ಮೇ 4 ರಂದು ತೆರೆ ಬಿದ್ದಿದೆ. ಇತ್ತ 29 ಪಂದ್ಯಗಳನ್ನು ಆಯೋಜಿಸಿರುವ ಬಿಸಿಸಿಐಗೆ ಉಳಿದ 31 ಪಂದ್ಯಗಳನ್ನು ಆಯೋಜಿಸುವುದು ಇದೀಗ ಸವಾಲಾಗಿ ಪರಿಣಮಿಸಿದೆ. ಏಕೆಂದರೆ ದೇಶದಲ್ಲಿನ ಕೊರೋನಾ ಪರಿಸ್ಥಿತಿಯಿಂದಾಗಿ ಸದ್ಯದಲ್ಲಂತು ಟೂರ್ನಿ ಆಯೋಜಿಸಲು ಸಾಧ್ಯವಿಲ್ಲ. ಹೀಗಾಗಿ ಟೂರ್ನಿ ಆಯೋಜನೆಗಾಗಿ ಇರುವ ಅನ್ಯ ಮಾರ್ಗಗಳನ್ನು ಬಿಸಿಸಿಐ ಎದುರು ನೋಡುತ್ತಿದೆ.

ಈ ಸುದ್ದಿ ಬೆನ್ನಲ್ಲೇ ಇಂಗ್ಲೆಂಡ್ ಮತ್ತು ವೇಲ್ಸ್​ ಕೌಂಟಿ ಕ್ರಿಕೆಟ್ ಕ್ಲಬ್​ಗಳು ಐಪಿಎಲ್ ಟೂರ್ನಿಯ ಆತಿಥ್ಯವಹಿಸಲು ಮುಂದೆ ಬಂದಿದೆ ಎಂದು ವರದಿಯಾಗಿತ್ತು. ಕೊರೋನಾ ಕಾರಣದಿಂದಾಗಿ ಅರ್ಧಕ್ಕೆ ನಿಂತಿರುವ ಐಪಿಎಲ್ ಟೂರ್ನಿಯನ್ನು ಇಂಗ್ಲೆಂಡ್‌ನಲ್ಲಿ ನಡೆಸಲಿ ಎಂದು ಎಂಸಿಸಿ, ಸರ್ರೆ, ವಾರ್ವಿಕ್‌ಷೈರ್ ಮತ್ತು ಲಂಕಾಷೈರ್ ಕೌಂಟಿಗಳು ಇಂಗ್ಲೆಂಡ್ ಕ್ರಿಕೆಟ್ ಬೋರ್ಡ್‌ಗೆ ಪತ್ರವನ್ನು ಬರೆದಿವೆ. ಈ ಪತ್ರದಲ್ಲಿ ಐಪಿಎಲ್ ಆಯೋಜನೆಗೆ ಬೇಕಾದ ಎಲ್ಲಾ ರೀತಿಯ ನೆರವು ನೀಡುವುದಾಗಿ ಈ ಕ್ಲಬ್​ಗಳು ತಿಳಿಸಿತ್ತು.

ಆದರೀಗ ಇಂಗ್ಲೆಂಡ್​ನ ಮತ್ತೊಂದು ಕೌಂಟಿ ಕ್ಲಬ್ ಈ ಬಗ್ಗೆ ಅಪಸ್ವರ ಎತ್ತಿದೆ. ಹ್ಯಾಂಪ್‌ಶೈರ್ ಕೌಂಟಿ ತಂಡವು 'ಇಂಗ್ಲೆಂಡ್‌ನಲ್ಲಿ ಐಪಿಎಲ್ ಟೂರ್ನಿ ಆಯೋಜಿಸುವುದು ಕಾನೂನುಬಾಹಿರ ಎಂದು ತಿಳಿಸಿದೆ. ಉಳಿದ ತಂಡಗಳು ಹೇಗೆ ಐಪಿಎಲ್ ನಡೆಸಬಹುದು ಎಂದು ತಿಳಿಸಿದೆಯೋ ಗೊತ್ತಿಲ್ಲ. ಆದರೆ ನಮ್ಮ ಒಪ್ಪಂದಗಳ ಪ್ರಕಾರ ವಿದೇಶಿ ಲೀಗ್​ನ್ನು ಆಯೋಜಿಸುವಂತಿಲ್ಲ. ಅದು ಅಕ್ರಮವಾಗುತ್ತದೆ ಎಂದು ಹ್ಯಾಂಪ್​ಶೈರ್ ಮುಖ್ಯಸ್ಥರು ತಿಳಿಸಿದ್ದಾರೆ. ಈ ಹೇಳಿಕೆಯೊಂದಿಗೆ ಇಂಗ್ಲೆಂಡ್​ನಲ್ಲಿ ಟೂರ್ನಿ ಮರು ಆಯೋಜನೆಗೊಳ್ಳಲಿದೆ ಎಂಬ ಐಪಿಎಲ್​ ಪ್ರೇಮಿಗಳಿಗೆ ನಿರಾಸೆಯುಂಟಾಗಿದೆ.

ಇಂಗ್ಲೆಂಡ್ ಹಾಗೂ ಕೌಂಟಿ ಕ್ಲಬ್​ಗಳ ಒಪ್ಪಂದಗಳ ಪ್ರಕಾರ ಯಾವುದೇ ಅನ್ಯ ಲೀಗ್​ಗಳನ್ನು ಆಯೋಜಿಸುವಂತಿಲ್ಲ ಎಂದು ತಿಳಿಸಲಾಗಿದೆ. ಇದೇ ಕಾರಣದಿಂದ ಈ ಬಾರಿ ಖುದ್ದು ಇಂಗ್ಲೆಂಡ್ ಹಂಡ್ರೆಡ್ ಹೆಸರಿನಲ್ಲಿ ಹೊಸ ಲೀಗ್​ನಲ್ಲಿ ಶುರು ಮಾಡಲಿದೆ. ಇದೇ ವೇಳೆ ಐಪಿಎಲ್​ ಅನ್ನು ಆಯೋಜಿಸುವುದು ಕಾನೂನುಬಾಹಿರವಾಗುತ್ತದೆ ಎಂಬುದು ಹ್ಯಾಂಪ್​ಶೈರ್ ವಾದ.

ಇದಾಗ್ಯೂ ಶ್ರೀಲಂಕಾದಲ್ಲಿ ಟೂರ್ನಿಯನ್ನು ಆಯೋಜಿಸುವಂತೆ ಈಗಾಗಲೇ ಶ್ರೀಲಂಕಾ ಕ್ರಿಕೆಟ್ ಬೋರ್ಡ್​ನಿಂದ ಬಿಸಿಸಿಐ ಆಫರ್ ಬಂದಿದೆ. ಅದಲ್ಲದೆ ಸೆಪ್ಟೆಂಬರ್-ಅಕ್ಟೋಬರ್ ನಡುವೆ ಭಾರತದಲ್ಲಿ ಅಥವಾ ಯುಎಇನಲ್ಲಿ ಉಳಿದ 31 ಪಂದ್ಯಗಳನ್ನು ಆಯೋಜಿಸುವ ಬಗ್ಗೆ ಕೂಡ ಬಿಸಿಸಿಐ ಚಿಂತನೆ ನಡೆಸಿದೆ. ಹೀಗಾಗಿ ಇಂಗ್ಲೆಂಡ್​ನಲ್ಲಿ ಅವಕಾಶ ಸಿಗದಿದ್ದರೂ, ಬಿಸಿಸಿಐ ಯುಎಇನಲ್ಲಿ ಟೂರ್ನಿ ಆಯೋಜಿಸುವುದಂತು ಖಚಿತ.