RCB vs Mumbai| ವಿರಾಟ್ ಕೊಹ್ಲಿ- ರೋಹಿತ್ ಶರ್ಮಾ ಗೆಲುವಿಗಾಗಿ ಕಾದಾಟ; ಯಾರ ಪಾಲಾಗಲಿದೆ ವಿಜಯ?

ಸತತ ಸೋಲಿನಿಂದ ಕಂಗೆಟ್ಟಿರುವ ವಿರಾಟ್ ಕೊಹ್ಲಿ (Virat Kohli) ನೇತೃತ್ವದ ರಾಯಲ್ ಚಾಲೆಂಜರ್ಸ್​ (RCB) ಮತ್ತು ರೋಹಿತ್ ಶರ್ಮಾ (Rohit Sharma) ನೇತೃತ್ವದ ಮುಂಬೈ ಇಂಡಿಯನ್ಸ್​ (MI) ತಂಡ ಐಪಿಎಲ್​ 39ನೇ (IPL 39th Match) ಪಂದ್ಯದಲ್ಲಿ ಗೆಲುವಿಗಾಗಿ ಕಾದಾಟ ನಡೆಸಲಿದೆ. ಈ ಪಂದ್ಯದಲ್ಲಿ ಗೆಲ್ಲಲೇಬೇಕಾದ ಒತ್ತಡದಲ್ಲಿ ಎರಡೂ ತಂಡಗಳು ಇವೆ. 8 ಅಂಕಗಳೊಂದಿಗೆ 6 ಸ್ಥಾನದಲ್ಲಿರುವ ಮುಂಬೈ ಇಂಡಿಯನ್ಸ್​ ಈ ಪಂದ್ಯವನ್ನು ಸೋತರೆ ಪ್ಲೇ ಆಫ್ ತಲುವುದು ಕಷ್ಟವಾಗಲಿದೆ. ಇನ್ನೂ 10 ಅಂಕಗಳೊಂದಿಗೆ 3 ನೇ ಸ್ಥಾನದಲ್ಲಿರುವ ಆರ್​ಸಿಬಿ ಸೋಲನುಭವಿಸಿದರೆ, ಮತ್ತೆರಡು ಸ್ಥಾನ ಕುಸಿಯುವ ಸಾಧ್ಯತೆ ಇದೆ. ಹೀಗಾಗಿ ಈ ಎರಡೂ ತಂಡಗಳ ಪಾಲಿಗೆ ಇಂದಿನ ಪಂದ್ಯ ಮಾಡು ಇಲ್ಲವೇ ಮಡಿ ಪಂದ್ಯವಾಗಿದ್ದು, ಮತ್ತಷ್ಟು ರೋಚಕತೆ ಹೆಚ್ಚಾಗಿದೆ. ಆರ್​ಸಿಬಿ ಬ್ಯಾಟಿಂಗ್ ಬಲಿಷ್ಟವಾಗಿದೆ. ಆದರೆ, ಯಾರೂ ನಿರೀಕ್ಷಿತ ಪ್ರದರ್ಶನ ನೀಡುತ್ತಿಲ್ಲ. ಇನ್ನೂ ಮುಂಬೈ ತಂಡದಲ್ಲಿ ಬ್ಯಾಟಿಂಗ್ ಮತ್ತು ಬೌಲಿಂಗ್ ಎರಡೂ ಬಲಿಷ್ಠವಾಗಿದ್ದು, ಸಣ್ಣ ಪುಟ್ಟ ತಪ್ಪುಗಳು ಸೋಲಿಗೆ ಕಾರಣವಾಗುತ್ತಿವೆ. ಹೀಗಾಗಿ ಈ ಎರಡು ತಂಡಗಳ ಪೈಕಿ ಇಂದು ವಿಜಯಲಕ್ಷ್ಮಿ ಯಾರ ಪಾಲಾಗಲಿದ್ದಾಳೆ? ಎಂಬುದು ಕುತೂಹಲಕ್ಕೆ ಕಾರಣವಾಗಿದೆ.

ಆರ್​ಸಿಬಿಯಿಂದ ಮತ್ತೆ ಮತ್ತೆ ಅದೇ ತಪ್ಪು;

ಮೇಲ್ನೋಟಕ್ಕೆ ಆರ್​ಸಿಬಿ ಅತ್ಯಂತ ಬಲಿಷ್ಠವಾದ ತಂಡ ಎಂಬುದರಲ್ಲಿ ಎರಡು ಮಾತಿಲ್ಲ. ಆದರೆ, ಮತ್ತೆ ಮತ್ತೆ ಮಾಡಿದ ತಪ್ಪುಗಳನ್ನೇ ಮಾಡುತ್ತಿರುವುದು ತಂಡಕ್ಕೆ ದುಬಾರಿಯಾಗಿ ಪರಿಣಮಿಸುತ್ತಿದೆ. ಅಸಲಿಗೆ ಪವರ್​ ಪ್ಲೇ ಓವರ್​ಗಳಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ತಂಡವೇ ಐಪಿಎಲ್ ಟೂರ್ನಿಯ ಪಂದ್ಯದಲ್ಲಿ ಗೆದ್ದಿರುವುದು ಹೆಚ್ಚು. ಆದರೆ, ಇತರೆ ತಂಡಗಳಿಗೆ ಹೋಲಿಕೆ ಮಾಡಿದರೆ ಪವರ್​ ಪ್ಲೇ ಓವರ್​ಗಳಲ್ಲಿ ಆರ್​ಸಿಬಿ ರನ್​ ರೇಟ್ ತೃಪ್ತಿಕರವಾಗಿಲ್ಲ. ಈ ಸಂಬಂಧ ಆರ್​ಸಿಬಿ ಮೇಲೆ ಸಾಕಷ್ಟು ಆರೋಪಗಳು ಇವೆ.

ಆದರೆ, ಕಳೆದ ಪಂದ್ಯದಲ್ಲಿ ನಾಯಕ ವಿರಾಟ್ ಕೊಹ್ಲಿ ಮತ್ತು ದೇವದತ್​ ಪಡಿಕ್ಕಲ್ ತಂಡಕ್ಕೆ ಭರ್ಜರಿ ಆರಂಭ ನೀಡಿದ್ದರು. ಪವರ್ ಪ್ಲೇ 6 ಓವರ್​ಗಳಲ್ಲಿ 54 ರನ್ ಭಾರಿಸಿದ್ದರು. ಮೊದಲ 10 ಓವರ್​ಗಳಿಗೆ 90 ರನ್ ಕಲೆಹಾಕಿದ್ದರು. ಈ ಸಂದರ್ಭದಲ್ಲಿ ತಂಡದ ಮೊತ್ತ 200ರ ಗಡಿದಾಟಲಿದೆ ಎಂದು ಅಂದಾಜಿಸಲಾಗಿತ್ತು. ಆದರೆ, ಆರ್​ಸಿಬಿ ತಂಡದ ಮಧ್ಯಮ ಮತ್ತು ಕೆಳ ಕ್ರಮಾಂಕ ಮತ್ತೆ ವಿಫಲವಾಯಿತು.

ಸ್ಪೋಟಕ ಆಟಗಾರರಾದ ಮ್ಯಾಕ್ಸ್​ವೆಲ್, ಟಿಮ್ ಡೇವಿಡ್ ಮತ್ತು ಎ.ಬಿ. ಡಿವಿಲಿಯರ್ಸ್​ ಸಹ ವಿಫಲವಾದದ್ದು ತಂಡಕ್ಕೆ ದೊಡ್ಡ ಹಿನ್ನಡೆಯಾಗಿ ಪರಿಣಮಿಸಿತ್ತು. ಇನ್ನೂ ಬೌಲಿಂಗ್ ವಿಭಾಗದ ಯಜುವೇಂದ್ರ ಚಾಹೆಲ್ ಹೊರತುಪಡಿಸಿ ಉಳಿದ ಯಾವ ಬೌಲರ್​ಗಳೂ ಸಹ ಪರಿಣಾಮಕಾರಿ ಆಗದೆ ಇರುವುದು ಗೆಲುವಿನ ಸಾಧ್ಯತೆಯನ್ನು ಮತ್ತಷ್ಟು ಕಠಿಣಗೊಳಿಸಿದೆ. ಹೀಗಾಗಿ ಇಂದಿನ ಪಂದ್ಯದಲ್ಲಾದರೂ ಆರ್​ಸಿಬಿ ಈ ಸಮಸ್ಯೆಗೆ ಇತಿಶ್ರೀ ಹಾಡಲಿದೆಯೇ? ಎಂಬುದನ್ನು ಕಾದುನೋಡಬೇಕಿದೆ.

ಇದನ್ನೂ ಓದಿ: SRH vs PBKS- ಹೋಲ್ಡರ್ ವೀರೋಚಿತ ಹೋರಾಟ ವ್ಯರ್ಥ; ಪಂಜಾಬ್ ಕಿಂಗ್ಸ್​ಗೆ ರೋಚಕ ಜಯ

ನಿರ್ಣಾಯಕ ಪಂದ್ಯದಲ್ಲಿ ಮುಂಬೈ:

ಮುಂಬೈ ಪಾಲಿಗೆ ಇದು ನಿರ್ಣಾಯಕ ಪಂದ್ಯ. ಕಳೆದ ಪಂದ್ಯದಲ್ಲಿ ನಾಯಕ ರೋಹಿತ್ ಶರ್ಮಾ ಮತ್ತು ಕ್ವಿಂಟನ್ ಡಿಕಾಕ್ ಉತ್ತಮ ಆರಂಭ ನೀಡಿದ್ದರೂ ಸಹ ಮುಂಬೈ ತಂಡ ಕೆಕೆಆರ್​ ಸ್ಪಿನ್ ಮೋಡಿಗೆ ಮಣಿದಿತ್ತು. ಇಶಾನ್ ಕಿಶನ್, ಸೂರ್ಯಕುಮಾರ್ ಯಾದವ್ ಕಳಪೆ ಫಾರ್ಮ್ ತಂಡಕ್ಕೆ ದುಬಾರಿಯಾಗಿತ್ತು. ಆದರೆ, ಇಂದಿನ ಪಂದ್ಯದಲ್ಲಿ ಈ ಆಟಗಾರರು ಫಾರ್ಮ್​ಗೆ ಮರಳಿದರೆ ಮುಂಬೈ ಬ್ಯಾಟಿಂಗ್ ಮತ್ತಷ್ಟು ಬಲಿಷ್ಠವಾಗಲಿದೆ. ಇನ್ನೂ ಕೆಳಕ್ರಮಾಂಕದಲ್ಲಿ ಕಿರೋನ್ ಪೊಲಾರ್ಡ್ ತಂಡದ ಬಹುದೊಡ್ಡ ನಂಬಿಕೆ. ಜಸ್ಪ್ರೀತ್ ಬುಮ್ರಾ, ಟ್ರೆಂಟ್ ಬೌಲ್ಟ್​, ರಾಹುಲ್ ಚಾಹರ್ ಅತ್ಯತ್ತಮವಾಗಿ ಬೌಲಿಂಗ್ ಮಾಡುತ್ತಿದ್ದು, ಆರ್​ಸಿಬಿ ಬ್ಯಾಟ್ಸ್​ಮನ್​ಗಳಿಗೆ ಇಂದು ಸವಾಲಾಗಲಿದ್ದಾರೆ ಎನ್ನಲಾಗುತ್ತಿದೆ. ​ಹೀಗಾಗಿ ಇಂದಿನ ಪಂದ್ಯ ಹೈವೋಲ್ಟೇಜ್ ಪಡೆದುಕೊಂಡಿದೆ.