RCB vs DC: ಆತ ನಮ್ಮ ಆಸ್ತಿ: ರೋಚಕ ಗೆಲುವಿನ ಬಳಿಕ ವಿರಾಟ್ ಕೊಹ್ಲಿ ಹೇಳಿದ್ದೇನು?

ಅಹಮದಾಬಾದ್​ನಲ್ಲಿ ನಡೆದ ಐಪಿಎಲ್​ನ 22ನೇ ಪಂದ್ಯದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್​ ವಿರುದ್ದ ರಾಯಲ್ ಚಾಲೆಂಜರ್ಸ್​ ಬೆಂಗಳೂರು ತಂಡ 1 ರನ್​​ನಿಂದ ರೋಚಕ ಜಯ ಸಾಧಿಸಿದೆ. ಈ ಭರ್ಜರಿ ಗೆಲುವಿನೊಂದಿಗೆ ಆರ್​ಸಿಬಿ ಮತ್ತೆ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರಿದೆ. ಅಂತಿಮ ಎಸೆತದವರೆಗೂ ಕುತೂಹಲ ಕೆರಳಿಸಿದ್ದ ಈ ಪಂದ್ಯದಲ್ಲಿ ರೋಚಕ ಜಯ ಸಾಧಿಸಿದ ಬಳಿಕ ಮಾತನಾಡಿದ ವಿರಾಟ್ ಕೊಹ್ಲಿ, ಒಂದು ಹಂತದಲ್ಲಿ ನಾನು ಪಂದ್ಯ ಕೈ ತಪ್ಪಿ ಹೋಯ್ತು ಎಂದೇ ಭಾವಿಸಿದ್ದೆ. ಆದರೆ ಕೊನೆಯ ಓವರ್​ನ್ನು ಸಿರಾಜ್ ನೀಡಿದಾಗ ಎಲ್ಲೋ ಒಂದು ಕಡೆ ಗೆಲ್ಲುತ್ತೇವೆ ಎಂಬ ನಂಬಿಕೆಯಿತ್ತು. ಕೊನೆಯಲ್ಲಿ ಎರಡು ಬೌಂಡರಿ ನೀಡಿದರೂ ಅಂತಿಮವಾಗಿ ರೋಚಕ ಗೆಲುವು ದಾಖಲಿಸುವಲ್ಲಿ ಯಶಸ್ವಿಯಾದೆವು ಎಂದು ಕೊಹ್ಲಿ ತಿಳಿಸಿದ್ದಾರೆ.

ಕಳೆದ ಪಂದ್ಯದಲ್ಲಿ ಸೋತಿದ್ದರೂ ಈ ಪಂದ್ಯದಲ್ಲಿ ನಾವು ಉತ್ತಮ ಪ್ರದರ್ಶನವನ್ನೇ ನೀಡಿದ್ದೆವು. ಕೇವಲ 30 ರನ್​ಗೆ 2 ವಿಕೆಟ್ ಕಳೆದುಕೊಂಡು ಸಂಕಷ್ಟದಲ್ಲಿದ್ದಾಗ ಮ್ಯಾಕ್ಸ್​ವೆಲ್, ರಜತ್ ಪಾಟಿದಾರ್ ಹಾಗೂ ಎಬಿ ಡಿವಿಲಿಯರ್ಸ್ ಅತ್ಯುತ್ತಮ ಬ್ಯಾಟಿಂಗ್ ಪ್ರದರ್ಶಿಸಿದರು. ಬಳಿಕ ಬೌಲರುಗಳೂ ಕೂಡ ಚೆನ್ನಾಗಿ ಬೌಲಿಂಗ್ ಮಾಡಿದ್ದರು. ಅಂತಿಮ 4 ಓವರ್​ನಲ್ಲಿ ಹೆಟ್ಮೆಯರ್ ಅಬ್ಬರಿಸಿದರೂ, ಕೊನೆಯ ಓವರ್​ ಮೂಲಕ ನಾವು ಗೆಲ್ಲುವಲ್ಲಿ ಯಶಸ್ವಿಯಾದೆವು ಎಂದು ಕೊಹ್ಲಿ ತಿಳಿಸಿದ್ದಾರೆ.

ನಾವು 160-165 ರನ್ ಸುಲಭ ಗುರಿಯಾಗುತ್ತೆ ಅಂದುಕೊಂಡಿದ್ದೆವು. ಹೀಗಾಗಿ ಅದಕ್ಕಿಂತ 10 ರನ್ ಜಾಸ್ತಿ ಬರಬೇಕು ಎಂದು ಬಯಸಿದ್ದೆವು. ಅದರಂತೆ 171 ರನ್​ಗಳು ಮೂಡಿಬಂದವು. ಟಾಸ್ ಸೋತರೂ ಸೆಕೆಂಡ್ ಇನಿಂಗ್ಸ್​ ಬೌಲಿಂಗ್ ವೇಳೆ ಇಬ್ಬನಿ ಇಲ್ಲದಿರುವುದು ನಮಗೆ ಅನುಕೂಲವಾಯಿತು. ರಿಷಭ್ ಪಂತ್ ಇಬ್ಬನಿ ಇರಲಿದೆ ಎಂದೇ ಮೊದಲು ಫೀಲ್ಡಿಂಗ್ ಆಯ್ದುಕೊಂಡಿದ್ದರು. ಆದರೆ ಇಬ್ಬನಿ ಇಲ್ಲದಿದ್ದಕ್ಕೆ ದೊಡ್ಡ ಥ್ಯಾಂಕ್ಸ್ ಹೇಳುತ್ತೇನೆ. ಹೀಗಾಗಿ ಡ್ರೈ ಬಾಲ್​ನಲ್ಲೇ ಬೌಲಿಂಗ್ ಮಾಡಲು ಆರ್​ಸಿಬಿಗೆ ಸಾಧ್ಯವಾಯಿತು ಎಂದು ಕೊಹ್ಲಿ ತಿಳಿಸಿದ್ದಾರೆ.

ಇನ್ನು ಇದೇ ವೇಳೆ ಆರು ಬೌಲರುಗಳನ್ನು ಬಳಸಿಕೊಂಡಿರುವ ಬಗ್ಗೆ ಮಾತನಾಡಿದ ಕೊಹ್ಲಿ, ಗ್ಲೆನ್ ಮ್ಯಾಕ್ಸ್​ವೆಲ್ ರನ್ನು ನಾನು 7ನೇ ಆಯ್ಕೆಯಾಗಿ ಬಳಸಲು ಬಯಸುತ್ತೇನೆ. ಆದರೆ ಅದರ ಅಗತ್ಯತೆ ಇನ್ನೂ ಬಂದಿಲ್ಲ ಎಂದು ಕೊಹ್ಲಿ ಹೇಳಿದರು. ಅಲ್ಲದೆ ಈ ಗೆಲುವಿನ ಸಂಪೂರ್ಣ ಕ್ರೆಡಿಟ್ ಎಬಿ ಡಿವಿಲಿಯರ್ಸ್​ಗೆ ಸಲ್ಲುತ್ತೆ. ಒಂದಾರ್ಥದಲ್ಲಿ ಆತ ನಮ್ಮ ತಂಡದ ಆಸ್ತಿ. ಏಕೆಂದರೆ ಕಳೆದ ಐದು ತಿಂಗಳಿಂದ ಯಾವುದೇ ಮ್ಯಾಚ್ ಆಡದೇ ಎಬಿಡಿ ಅದ್ಭುತ ಬ್ಯಾಟಿಂಗ್ ಮೂಲಕ ಗೆಲುವು ತಂದುಕೊಟ್ಟಿದ್ದಾರೆ. ಮುಂದೆಯೂ ಕೂಡ ಅವರ ಅದ್ಭುತ ಪ್ರದರ್ಶನ ನೋಡಲಿದ್ದೀರಿ ಎಂದು ಕೊಹ್ಲಿ ತಿಳಿಸಿದರು.