CSK vs MI- ಗಾಯಕ್ವಡ್, ಬ್ರಾವೋ ಅಮೋಘ ಆಟ; ಮುಂಬೈ ತಂಡವನ್ನು ಬಗ್ಗುಬಡಿದ ಸಿಎಸ್​ಕೆ

CSK vs MI IPL match- ಚೆನ್ನೈ ಸೂಪರ್ ಕಿಂಗ್ಸ್ ತಂಡದ 156 ರನ್​ಗೆ ಪ್ರತಿಯಾಗಿ ಮುಂಬೈ ಇಂಡಿಯನ್ಸ್ ತಂಡದ ಆಟ 136 ರನ್​ಗೆ ಅಂತ್ಯಗೊಂಡಿತು. ಈ ಗೆಲುವಿನೊಂದಿಗೆ ಸಿಎಸ್ಕೆ ತಂಡ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರಿತು.

ಚೆನ್ನೈ ಸೂಪರ್ ಕಿಂಗ್ಸ್ ಬೌಲರ್ ದೀಪಕ್ ಚಹಾರ್

ಚೆನ್ನೈ ಸೂಪರ್ ಕಿಂಗ್ಸ್ ಬೌಲರ್ ದೀಪಕ್ ಚಹಾರ್

  • Cricketnext
  • Last Updated :
  • Share this:
    ದುಬೈ, ಸೆ. 19: ಋತುರಾಜ್ ಗಾಯಕ್ವಡ್ (Ruturaj Gaikwad) ಅವರ ಅಮೋಘ ಬ್ಯಾಟಿಂಗ್ ಹಾಗೂ ಡ್ವೇನ್ ಬ್ರಾವೋ (Dwayne Bravo) ಅವರ ಆಲ್​ರೌಂಡ್ ಆಟದ ನೆರವಿನಿಂದ ಚೆನ್ನೈ ಸೂಪರ್ ಕಿಂಗ್ಸ್ ತಂಡ (Chennai Super Kings) ಮುಂಬೈ (Mumbai Indians) ವಿರುದ್ಧದ ಐಪಿಎಲ್ ಎರಡನೇ ಲೆಗ್ ಪಂದ್ಯದಲ್ಲಿ ರೋಚಕ ಗೆಲುವು ದಾಖಲಿಸಿತು. ಮೂವರು ಟಾಪ್ ಆಟಗಾರರು ಶೂನ್ಯ ಸುತ್ತಿದರೂ ಗಾಯಕ್ವಡ್ ಅವರ ಅದ್ಭುತ ಬ್ಯಾಟಿಂಗ್​ನಿಂದಾಗಿ ಚೆನ್ನೈ ಸೂಪರ್ ಕಿಂಗ್ಸ್ ತಂಡ 156 ರನ್​ಗಳ ಉತ್ತಮ ಮೊತ್ತ ಪೇರಿಸುವಲ್ಲಿ ಯಶಸ್ವಿಯಾಯಿತು. ಗೆಲ್ಲಲು 157 ರನ್​ಗಳ ಗುರಿ ಪಡೆದ ಮುಂಬೈ ಇಂಡಿಯನ್ಸ್ ತಂಡ ಗೆಲುವಿನ ದಡ ಮುಟ್ಟಲು ತಡವರಿಸಿತು. ಮುಂಬೈ ಇಂಡಿಯನ್ಸ್ ಬ್ಯಾಟ್ಸ್​ಮನ್​ಗಳ ಓಟಕ್ಕೆ ಚೆನ್ನೈ ಬೌಲರ್​ಗಳು ಕಡಿವಾಣ ಹಾಕಿದರು. ದೀಪಕ್ ಚಹರ್, ಶಾರ್ದೂಲ್ ಠಾಕೂರ್, ಮೊಯೀನ್ ಅಲಿ ಅವರು ಮುಂಬೈ ಬ್ಯಾಟುಗಾರರನ್ನ ಕಟ್ಟಿಹಾಕುವಲ್ಲಿ ಯಶಸ್ವಿಯಾದರು. ಬ್ಯಾಟಿಂಗ್​ನಲ್ಲಿ ಗಾಯಕ್ವಡ್ ಜೊತೆ ಉತ್ತಮ ಜೊತೆಯಾಟ ನೀಡಿದ್ದ ಡ್ವೇನ್ ಬ್ರಾವೋ 3 ವಿಕೆಟ್ ಪಡೆದು ಸಿಎಸ್​ಕೆ ಗೆಲುವಿನ ರೂವಾರಿಗಳಲ್ಲೊಬ್ಬರೆನಿಸಿದರು.

    ಇದಕ್ಕೆ ಮುನ್ನ ಟಾಸ್ ಗೆದ್ದು ಮೊದಲು ಬ್ಯಾಟ್ ಮಾಡಿದ ಚೆನ್ನೈ ಸೂಪರ್ ಕಿಂಗ್ಸ್ ತಂಡ 7 ರನ್​ಗೆ 3 ವಿಕೆಟ್ ಹಾಗೂ 24 ರನ್​ಗೆ 4 ವಿಕೆಟ್ ಕಳೆದುಕೊಂಡು ಶೋಚನೀಯ ಸ್ಥಿತಿ ತಲುಪಿತು. ಫ್ಯಾಫ್ ಡುಪ್ಲೆಸಿಸ್, ಮೊಯೀನ್ ಅಲಿ ಮತ್ತು ಅಂಬಾಟಿ ರಾಯುಡು ಶೂನ್ಯಕ್ಕೆ ಔಟಾದರು. ಸುರೇಶ್ ರೈನಾ ಮತ್ತು ಎಂಎಸ್ ಧೋನಿ ಕೂಡ ಎರಡಂಕಿ ಮೊತ್ತ ದಾಖಲಿಸಲಿಲ್ಲ. ಈ ವೇಳೆ ಆರಂಭಿಕರಾಗಿ ಬಂದ ಋತುರಾಜ್ ಗಾಯಕ್ವಡ್ ಮಾತ್ರ ಹೆಬ್ಬಂಡೆಯಂತೆ ನಿಂತಿದ್ದರು. ಐದನೇ ವಿಕೆಟ್​ಗೆ ಜೊತೆಯಾದ ರವೀಂದ್ರ ಜಡೇಜಾ ಮತ್ತು ಗಾಯಕ್ವಡ್ ಇಬ್ಬರೂ 81 ರನ್ ಸೇರಿಸಿದರು. ಬಳಿಕ ಡ್ವೇನ್ ಬ್ರಾವೋ ಮತ್ತು ಗಾಯಕ್ವಡ್ 6ನೇ ವಿಕೆಟ್​ಗೆ 39 ರನ್ ಅಮೂಲ್ಯ ಜೊತೆಯಾದಲ್ಲಿ ಭಾಗಿಯಾದರು. ಋತುರಾಜ್ ಗಾಯಕ್ವಡ್ ಕೇವಲ 58 ಬಾಲ್​ನಲ್ಲಿ ಅಜೇಯ 88 ರನ್ ಗಳಿಸಿದರು. ಇವೆರಡು ಉತ್ತಮ ಜೊತೆಯಾಟದ ಫಲವಾಗಿ ಚೆನ್ನೈ ತಂಡ 156 ರನ್ ಗಳಿಸಿತು. ಗಾಯಕ್ವಡ್ ಅವರ ಈ ಅಜೇಯ 88 ರನ್ ಐಪಿಎಲ್​ನಲ್ಲಿ ಅವರ ಗರಿಷ್ಠ ಸ್ಕೋರೆನಿಸಿದೆ. ಅವರ ಈ ಆಟಕ್ಕೆ ಪಂದ್ಯ ಪುರುಷೋತ್ತಮ ಗೌರವ ಕೂಡ ಲಭಿಸಿತು.

    ಮುಂಬೈ ಇಂಡಿಯನ್ಸ್ ತಂಡದ ಬ್ಯಾಟಿಂಗ್​ನಲ್ಲಿ ಹೈಲೈಟ್ ಆಗಿದ್ದು ಸೌರಬ್ ತಿವಾರಿ ಅವರ ಆಟ ಮಾತ್ರವೇ. ಅಜೇಯ ಅರ್ಧಶತಕ ಭಾರಿಸಿದ ತಿವಾರಿ ಹೊರತುಪಡಿಸಿ ಉಳಿದ ಸಿಎಸ್​ಕೆ ಆಟಗಾರರು ಉತ್ತಮ ಪ್ರತಿರೋಧ ತೋರಲಿಲ್ಲ. ಚೆನ್ನೈ ತಂಡದ ನಾಯಕ ಧೋನಿ ಅವರು ತಮ್ಮ ಬೌಲರ್​​ಗಳನ್ನ ಸಮರ್ಪಕವಾಗಿ ಬಳಸಿಕೊಂಡರು.

    ಟೂರ್ನಿಯ ಆರಂಭದಲ್ಲಿ ಯಾವಾಗಲೂ ಹಿನ್ನಡೆ ಕಾಣುವ ಮುಂಬೈ ಇಂಡಿಯನ್ಸ್ ತಂಡ ನಂತರದ ಪಂದ್ಯಗಳಲ್ಲಿ ಲಯಕ್ಕೆ ಮರಳುತ್ತದೆ. ಇದು ಅನೇಕ ಐಪಿಎಲ್ ಸೀಸನ್​ನಲ್ಲಿ ಕಂಡಿರುವ ಅಂಶ. ಈ ಐಪಿಎಲ್​ನ ಮೊದಲ ಲೆಗ್​ನಲ್ಲೂ ಮುಂಬೈನದ್ದು ಸ್ಲೋ ಸ್ಟಾರ್ಟ್ ಆಗಿತ್ತು. ನಂತರ ಅದು ಚೇತರಿಸಿಕೊಂಡಿತ್ತು. ಈಗ ಎರಡನೇ ಲೆಗ್​ನಲ್ಲೂ ಅದೇ ರೀತಿ ಆಗಿದೆ.

    ಇದನ್ನೂ ಓದಿ: ಬೆಂಗಳೂರಿಗೆ ಶಾಕ್ ಕೊಟ್ಟ ವಿರಾಟ್; ಆರ್​ಸಿಬಿ ಕ್ಯಾಪ್ಟನ್ಸಿಗೂ ಕೊಹ್ಲಿ ವಿದಾಯ

    ಧೋನಿ ನೇತೃತ್ವದ ಚೆನ್ನೈ ಸೂಪರ್ ಕಿಂಗ್ಸ್ ತಂಡ ಈ ಗೆಲುವಿನೊಂದಿಗೆ ಪಾಯಿಂಟ್ ಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರಿದೆ. ಚೆನ್ನೈ 8 ಪಂದ್ಯಗಳಿಂದ 12 ಅಂಕ ಗಳಿಸಿದೆ. ಇಷ್ಟೇ ಪಾಯಿಂಟ್ ಗಳಿಸಿರುವ ಡೆಲ್ಲಿ ಕ್ಯಾಪಿಟಲ್ಸ್ ತಂಡ ಎರಡನೇ ಸ್ಥಾನದಲ್ಲಿದೆ. ಆರ್​ಸಿಬಿ ತಂಡ ಮೂರನೇ ಸ್ಥಾನದಲ್ಲಿದೆ.

    ನಾಳೆ ಸೋಮವಾರ ಕೋಲ್ಕತಾ ನೈಟ್ ರೈಡರ್ಸ್ ಮತ್ತು ಆರ್​ಸಿಬಿ ಮಧ್ಯೆ ಪಂದ್ಯ ನಡೆಯಲಿದೆ. ಅಬುಧಾಬಿಯಲ್ಲಿ ನಾಳೆ ಸಂಜೆ 7:30ಕ್ಕೆ ಪಂದ್ಯ ಆರಂಭವಾಗುತ್ತದೆ.

    ಸ್ಕೋರು ವಿವರ:

    ಚೆನ್ನೈ ಸೂಪರ್ ಕಿಂಗ್ಸ್ 20 ಓವರ್ 156/6
    (ಋತುರಾಜ್ ಗಾಯಕ್ವಾಡ್ ಅಜೇಯ 88, ರವೀಂದ್ರ ಜಡೇಜಾ 26, ಡ್ವೇನ್ ಬ್ರಾವೋ 23 ರನ್ – ಅಡಂ ಮಿನ್ಲೆ 21/2, ಜಸ್​ಪ್ರೀತ್ ಬುಮ್ರಾ 33/2, ಟ್ರೆಂಟ್ ಬೌಲ್ಟ್ 35/2)

    ಮುಂಬೈ ಇಂಡಿಯನ್ಸ್ 20 ಓವರ್ 136/8
    (ಸೌರಬ್ ತಿವಾರಿ ಅಜೇಯ 50, ಕ್ವಿಂಟನ್ ಡೀಕಾಕ್ 17, ಅಮೋಲ್​ಪ್ರೀತ್ ಸಿಂಗ್ 16, ಕೇರಾನ್ ಪೊಲಾರ್ಡ್ 15 ರನ್ – ಡ್ವೇನ್ ಬ್ರಾವೋ 25/3, ದೀಪಕ್ ಚಾಹರ್ 19/2)
    Published by:Vijayasarthy SN
    First published: