CSK vs RR: ರಾಜಸ್ಥಾನ್ ರಾಯಲ್ಸ್​ಗೆ ಸೋಲುಣಿಸಿದ ಚೆನ್ನೈ ಸೂಪರ್ ಕಿಂಗ್ಸ್​

ಇಂಡಿಯನ್ ಪ್ರೀಮಿಯರ್ ಲೀಗ್​ನ 12ನೇ ಪಂದ್ಯದಲ್ಲಿ  ಚೆನ್ನೈ ಸೂಪರ್ ಕಿಂಗ್ಸ್ ತಂಡ ರಾಜಸ್ಥಾನ್ ರಾಯಲ್ಸ್​ ವಿರುದ್ದ 45 ರನ್​ಗಳ ಭರ್ಜರಿ ಜಯ ಸಾಧಿಸಿದೆ. ಸಿಎಸ್​ಕೆ ನೀಡಿದ 189 ರನ್​ಗಳ ಟಾರ್ಗೆಟ್ ಬೆನ್ನತ್ತಿದ ರಾಜಸ್ಥಾನ್ ರಾಯಲ್ಸ್​ 143 ರನ್​ಗಳಿಸಲಷ್ಟೇ ಶಕ್ತರಾದರು.

ಇದಕ್ಕೂ ಮುನ್ನ ಸಿಎಸ್​ಕೆ ನೀಡಿದ 189 ರನ್​ಗಳ ಬೃಹತ್ ಗುರಿ ಬೆನ್ನತ್ತಿದ ರಾಜಸ್ಥಾನ್ ರಾಯಲ್ಸ್​ಗೆ ಆರಂಭಿಕರಾದ ಜೋಸ್ ಬಟ್ಲರ್ ಹಾಗೂ ಮನನ್ ವೋಹ್ರಾ ಉತ್ತಮ ಆರಂಭ ಒದಗಿಸಿದರು. 3.5 ಓವರ್​ನಲ್ಲಿ ಈ ಜೋಡಿ ಮೊದಲ ವಿಕೆಟ್​ಗೆ 30 ರನ್​ ಪೇರಿಸಿತು. ಇದೇ ವೇಳೆ ಸ್ಯಾಮ್ ಕರನ್ ಎಸೆತದಲ್ಲಿ ಮನನ್ ವೋಹ್ರಾ (14) ಜಡೇಜಾಗೆ ಕ್ಯಾಚ್ ನೀಡಿ ನಿರ್ಗಮಿಸಿದರು. ಇದಾಗ್ಯೂ ಮತ್ತೊಂದೆಡೆ ಆರ್ಭಟ ಮುಂದುವರೆಸಿದ ಬಟ್ಲರ್ 5 ಓವರ್​ ಮುಕ್ತಾಯದ ವೇಳೆಗೆ ತಂಡದ ಮೊತ್ತವನ್ನು 43 ಕ್ಕೇರಿಸಿದರು. ಆದರೆ ಪವರ್​ಪ್ಲೇನ ಕೊನೆಯ ಓವರ್​ನಲ್ಲಿ ಸಂಜು ಸ್ಯಾಮ್ಸನ್ (1) ಕೂಡ ಸ್ಯಾಮ್ ಕರನ್​ಗೆ ವಿಕೆಟ್ ಒಪ್ಪಿಸಿ ನಿರಾಸೆ ಮೂಡಿಸಿದರು. ಅದರಂತೆ ಮೊದಲ 6 ಓವರ್​ನಲ್ಲಿ ಆರ್​ಆರ್​ 45 ರನ್​ಗಳಿಸಲಷ್ಟೇ ಶಕ್ತರಾದರು.

ಈ ಹಂತದಲ್ಲಿ ಜೋಸ್ ಬಟ್ಲರ್ ಜೊತೆಗೂಡಿದ ಶಿವಂ ದುಬೆ ಉತ್ತಮ ಸಾಥ್ ನೀಡಿದರು. ಪರಿಣಾಮ ಮೊದಲ ಹತ್ತು ಓವರ್ ಮುಕ್ತಾಯದ ವೇಳೆಗೆ ರಾಜಸ್ಥಾನ್ ರಾಯಲ್ಸ್ ಮೊತ್ತ 81 ಕ್ಕೆ ಬಂದು ನಿಂತಿತು. ಆದರೆ 12ನೇ ಓವರ್​ನಲ್ಲಿ ಜಡೇಜಾ ಎಸೆದ ಮೊದಲ ಎಸೆತವನ್ನು ಗುರುತಿಸುವಲ್ಲಿ ಎಡವಿದ ಜೋಸ್ ಬಟ್ಲರ್ 35 ಎಸೆತಗಳಲ್ಲಿನ ತಮ್ಮ 49 ರನ್​ಗಳ ಇನಿಂಗ್ಸ್ ಅಂತ್ಯಗೊಳಿಸಿದರು. ಇದರ ಬೆನ್ನಲ್ಲೇ ಶಿವಂ ದುಬೆ (17) ಅವರನ್ನೂ ಕೂಡ ಜಡೇಜಾ ಎಲ್​ಬಿ ಬಲೆ ಬೀಳಿಸಿದರು.

ಇನ್ನು ಡೇವಿಡ್ ಮಿಲ್ಲರ್ (2) ಬಂದ ವೇಗದಲ್ಲೇ ಮೊಯೀನ್ ಅಲಿಗೆ ವಿಕೆಟ್ ಒಪ್ಪಿಸಿ ಹೊರ ನಡೆದರು. ಇನ್ನು 15ನೇ ಓವರ್​ನ ಮೊದಲ ಎಸೆತದಲ್ಲಿ  ಪರಾಗ್ (3) ವಿಕೆಟ್ ಪಡೆದ ಮೊಯೀನ್ ಅಲಿ 3ನೇ ಎಸೆತದಲ್ಲಿ ಕ್ರಿಸ್ ಮೋರಿಸ್ (0) ವಿಕೆಟ್ ಪಡೆದರು.

8ನೇ ವಿಕೆಟ್​ಗೆ ಜೊತೆಗೂಡಿದ ರಾಹುಲ್ ತೆವಾಠಿಯಾ ಹಾಗೂ ಜಯದೇವ್ ಉನಾದ್ಕಟ್ 27 ಎಸೆತಗಳಲ್ಲಿ 42 ರನ್​ ಜೊತೆಯಾಟವಾಡಿದರು. 19ನೇ ಓವರ್​ನಲ್ಲಿ ತೆವಾಠಿಯಾ (20) ಬ್ರಾವೊಗೆ ವಿಕೆಟ್ ಒಪ್ಪಿಸಿದರೆ, 20ನೇ ಓವರ್​ನಲ್ಲಿ ಉನಾದ್ಕಟ್ (24) ಶಾರ್ದುಲ್ ಠಾಕೂರ್​ ವಿಕೆಟ್ ನೀಡಿದರು. ಅಂತಿಮವಾಗಿ ರಾಜಸ್ಥಾನ್ ರಾಯಲ್ಸ್​ ನಿಗದಿತ 20 ಓವರ್​ನಲ್ಲಿ 9 ವಿಕೆಟ್ ನಷ್ಟಕ್ಕೆ 143 ರನ್​ಗಳಿಸುವುದರೊಂದಿಗೆ 45 ರನ್​ಗಳಿಂದ ಶರಣಾಯಿತು. ಸಿಎಸ್​ಕೆ ಪರ ಮೊಯೀನ್ ಅಲಿ 3 ಓವರ್​ನಲ್ಲಿ 7 ರನ್ ನೀಡಿ 3 ವಿಕೆಟ್ ಪಡೆದರೆ, ರವೀಂದ್ರ ಜಡೇಜಾ ಹಾಗೂ ಸ್ಯಾಮ್ ಕರನ್ ತಲಾ 2 ವಿಕೆಟ್ ಕಬಳಿಸಿದರು.

ಇದಕ್ಕೂ ಮುನ್ನ ಟಾಸ್ ಗೆದ್ದ ಆರ್​ಆರ್ ನಾಯಕ ಸಂಜು ಸ್ಯಾಮ್ಸನ್ ಬೌಲಿಂಗ್ ಆಯ್ದುಕೊಂಡರು. ಅದರಂತೆ ಇನಿಂಗ್ಸ್ ಆರಂಭಿಸಿದ ಆರಂಭಿಕರಾದ ಫಾಫ್ ಡುಪ್ಲೆಸಿಸ್ ಹಾಗೂ ರುತುರಾಜ್ ಗಾಯಕ್ವಾಡ್ ಚೆನ್ನೈ ಸೂಪರ್ ಕಿಂಗ್ಸ್​ ತಂಡಕ್ಕೆ ನಿಧಾನಗತಿಯ ಆರಂಭ ಒದಗಿಸಿದರು. ಮೊದಲ 4 ಓವರ್​ನಲ್ಲಿ ಈ ಜೋಡಿ 25 ರನ್​ ಕಲೆಹಾಕಿತು. ಈ ವೇಳೆ ಮುಸ್ತಾಫಿಜುರ್ ಎಸೆತದಲ್ಲಿ ಬಿರುಸಿನ ಹೊಡೆತಕ್ಕೆ ಮುಂದಾದ ರುತುರಾಜ್ (10) ಕ್ಯಾಚ್ ನೀಡಿ ವಿಕೆಟ್ ಒಪ್ಪಿಸಿದರು.

ಜಯದೇವ್ ಉನಾದ್ಕಟ್ ಎಸೆದ 5ನೇ ಓವರ್​ನಲ್ಲಿ ಅಬ್ಬರಿಸಿದ ಫಾಫ್ ಡುಪ್ಲೆಸಿಸ್ 3 ಬೌಂಡರಿ ಹಾಗೂ 1 ಸಿಕ್ಸ್ ಸಿಡಿಸಿ 19 ರನ್​ ಕಲೆಹಾಕಿದರು. 17 ಎಸೆತಗಳಲ್ಲಿ 33 ರನ್​ಗಳಿಸಿದ್ದ ಡುಪ್ಲೆಸಿಸ್ ಪವರ್​ಪ್ಲೇನ ಅಂತಿಮ ಓವರ್​ನಲ್ಲಿ ಬಿರುಸಿನ ಹೊಡೆತಕ್ಕೆ ಮುಂದಾಗಿ ಕ್ರಿಸ್ ಮೋರಿಸ್​ಗೆ ವಿಕೆಟ್ ಒಪ್ಪಿಸಿದರು. ಪರಿಣಾಮ 6 ಓವರ್​ ಮುಕ್ತಾಯದ ವೇಳೆಗೆ ಚೆನ್ನೈ ಸ್ಕೋರ್ 46 ಕ್ಕೆ ಬಂದು ನಿಂತಿತು.

ಈ ಹಂತದಲ್ಲಿ ಜೊತೆಗೂಡಿದ ಮೊಯೀನ್ ಅಲಿ ಹಾಗೂ ಸುರೇಶ್ ರೈನಾ ಉತ್ತಮ ಹೊಂದಾಣಿಕೆಯ ಆಟ ಪ್ರದರ್ಶಿಸಿದರು. ಇದರ ಫಲವಾಗಿ 33 ರನ್​ಗಳ ಜೊತೆಯಾಟ ಮೂಡಿಬಂತು. ಆದರೆ 10ನೇ ಓವರ್​ನ ಎರಡನೇ ಎಸೆತದಲ್ಲಿ ಬಿಗ್ ಹಿಟ್​ಗೆ ಮುಂದಾದ ಮೊಯೀನ್ ಅಲಿ (26) ಬೌಂಡರಿ ಲೈನ್​ನಲ್ಲಿ ಕ್ಯಾಚ್ ನೀಡಿ ನಿರಾಸೆ ಮೂಡಿಸಿದರು. ಹಾಗೆಯೇ ಮೊದಲ ಹತ್ತು ಓವರ್​ನಲ್ಲಿ ಸಿಎಸ್​ಕೆ 82 ರನ್​ ಕಲೆಹಾಕಿತು.

ಈ ವೇಳೆ ಕ್ರೀಸ್​ಗಿಳಿದ ಅಂಬಾಟಿ ರಾಯುಡು ಆರಂಭದಿಂದಲೇ ಬಿರುಸಿನ ಬ್ಯಾಟಿಂಗ್​ಗೆ ಒತ್ತು ನೀಡಿದರು. ಪರಿಣಾಮ 12ನೇ ಓವರ್​ ವೇಳೆಗೆ ಸಿಎಸ್​ಕೆ ಮೊತ್ತ 100ರ ಗಡಿದಾಟಿತು. ತಂಡದ ಮೊತ್ತ 123 ರನ್ ಆಗಿದ್ದ ವೇಳೆ ಚೇತನ್ ಸಕರಿಯಾ ಎಸೆತದಲ್ಲಿ ಬಿರುಸಿನ ಹೊಡೆತ ಬಾರಿಸಿದ ರಾಯುಡು (27) ಬೌಂಡರಿ ಲೈನ್​ನಲ್ಲಿದ್ದ ಪರಾಗ್​ಗೆ ಕ್ಯಾಚ್ ನೀಡಿದರು. ಇದರ ಬೆನ್ನಲ್ಲೇ ಸುರೇಶ್ ರೈನಾ (18) ಕೂಡ ಕ್ಯಾಚ್ ನೀಡಿ ನಿರ್ಗಮಿಸಿದರು.

ರೈನಾ-ರಾಯುಡು ವಿಕೆಟ್ ಪತನದೊಂದಿಗೆ ಸಿಎಸ್​ಕೆ ತಂಡದ ರನ್ ಗತಿ ನಿಧಾನಗೊಂಡಿತು. ಈ ಹಂತದಲ್ಲಿ ಕ್ರೀಸ್​ನಲ್ಲಿದ್ದ ಧೋನಿ-ಜಡೇಜಾ ದೊಡ್ಡ ಹೊಡೆತ ಬಾರಿಸಲು ಒದ್ದಾಡಿದರು. ಪರಿಣಾಮ 17 ಓವರ್​ ಮುಕ್ತಾಯದ ವೇಳೆಗೆ 143ಕ್ಕೆ ಬಂದು ನಿಂತಿತು. 18ನೇ ಓವರ್​ನ 2ನೇ ಎಸೆತದಲ್ಲಿ 17 ಎಸೆತಗಳಲ್ಲಿ 18 ರನ್​ ಬಾರಿಸಿದ್ದ ಧೋನಿ ಕ್ಯಾಚ್ ನೀಡಿದರು. ನಾಯಕನ ಬೆನ್ನಲ್ಲೇ ಜಡೇಜಾ ಕೂಡ 8 ರನ್​ಗಳಿಸಿ ಮೋರಿಸ್​ಗೆ ವಿಕೆಟ್ ಒಪ್ಪಿಸಿದರು.

ಕೊನೆಯ 9 ಬಾಲ್​ಗಳು ಬಾಕಿ ಇರುವಾಗ ಕ್ರೀಸ್​ಗೆ ಆಗಮಿಸಿದ ಡ್ವೇನ್ ಬ್ರಾವೊ ತಾವು ಎದುರಿಸಿದ ಮೊದಲ ಎರಡು ಎಸೆತಗಳಲ್ಲಿ ಬೌಂಡರಿ ಬಾರಿಸಿದರು. 20ನೇ ಓವರ್​ನ ಮೊದಲ ಎಸೆತದಲ್ಲೇ ಸ್ಯಾಮ್ ಕರನ್ (13) ರನೌಟ್ ಆದರು. ಕೊನೆಯ ಓವರ್​ನಲ್ಲಿ 15 ರನ್ ಬಾರಿಸುವ ಮೂಲಕ ಡ್ವೇನ್ ಬ್ರಾವೋ ತಂಡದ ಮೊತ್ತವನ್ನು 9 ವಿಕೆಟ್ ನಷ್ಟಕ್ಕೆ 188 ಕ್ಕೆ ತಂದು ನಿಲ್ಲಿಸಿದರು. ರಾಜಸ್ಥಾನ್ ರಾಯಲ್ಸ್ ಪರ 4 ಓವರ್​ನಲ್ಲಿ 36 ರನ್​ ನೀಡಿ 3 ವಿಕೆಟ್ ಪಡೆದ ಚೇತನ್ ಸಕರಿಯಾ ಯಶಸ್ವಿ ಬೌಲರ್ ಎನಿಸಿಕೊಂಡರು.

A look at the Playing XI for #CSKvRR

Follow the game here - https://t.co/gNnQUUgwcg #VIVOIPL https://t.co/tkj4lrYSyC pic.twitter.com/4dkuuBG4s4

— IndianPremierLeague (@IPL) April 19, 2021

ಉಭಯ ತಂಡಗಳು ಐಪಿಎಲ್​ನಲ್ಲಿ ಇದುವರೆಗೆ 24 ಬಾರಿ ಮುಖಾಮುಖಿಯಾಗಿವೆ. ಅದರಲ್ಲಿ ಧೋನಿ ನಾಯಕತ್ವದ ಚೆನ್ನೈ ಸೂಪರ್ ಕಿಂಗ್ಸ್ 15 ಬಾರಿ ಜಯ ಸಾಧಿಸಿದರೆ, ರಾಜಸ್ಥಾನ್ ರಾಯಲ್ಸ್ 9 ಬಾರಿ ಗೆಲುವಿನ ರುಚಿ ನೋಡಿದೆ.