IPL 2021: ಮಾಲ್ಡೀವ್ಸ್​ಗೆ ತೆರಳಲು ಮುಂದಾದ ಆಸ್ಟ್ರೇಲಿಯಾ ಆಟಗಾರರು..!

IPL 2021 ರದ್ದಾದ ಬಳಿಕ ಆಸ್ಟ್ರೇಲಿಯಾದ ಆಟಗಾರರು, ತರಬೇತುದಾರರು ಮತ್ತು ಸಹಾಯಕ ಸಿಬ್ಬಂದಿ ಮಾಲ್ಡೀವ್ಸ್‌ಗೆ ಹಾರಲು ಸಜ್ಜಾಗಿದ್ದಾರೆ. ಕೊರೋನಾ ಕಾರಣದಿಂದ ಭಾರತ-ಆಸ್ಟ್ರೇಲಿಯಾ ನಡುವಣ ವಿಮಾನಯಾನವನ್ನು ರದ್ದುಗೊಳಿಸಲಾಗಿದ್ದು, ಹೀಗಾಗಿ ಐಪಿಎಲ್​ನಲ್ಲಿ ಭಾಗವಹಿಸಿದ ಆಟಗಾರರು ತವರಿಗೆ ಮರಳಲು ತೊಡಕಾಗಿದೆ. ಹೀಗಾಗಿ ಐಪಿಎಲ್‌ನ ಬಯೋ ಬಬಲ್​ನಲ್ಲಿದ್ದ 40 ಆಸ್ಟ್ರೇಲಿಯಾ ಸದಸ್ಯರು ಮಾಲ್ಡೀವ್ಸ್​ಗೆ ತೆರಳಲು ಪ್ಲ್ಯಾನ್ ಮಾಡಿಕೊಂಡಿದ್ದಾರೆ. ಅದರಂತೆ ಪ್ಯಾಟ್ ಕಮ್ಮಿನ್ಸ್, ಸ್ಟೀವ್ ಸ್ಮಿತ್, ಗ್ಲೆನ್ ಮ್ಯಾಕ್ಸ್ ವೆಲ್, ಸೈಮನ್ ಕ್ಯಾಟಿಚ್ ಸೇರಿದಂತೆ ಆಸ್ಟ್ರೇಲಿಯಾದವರು ಮಾಲ್ಡೀವ್ಸ್​ಗೆ ತೆರಳಲಿದ್ದಾರೆ.

ಈಗಾಗಲೇ ಐಪಿಎಲ್ ಕಮೇಂಟೇಟರ್ ಮೈಕೆಲ್ ಸ್ಲೇಟರ್ ಮಾಲ್ಡೀವ್ಸ್​ಗೆ ತೆರಳಿದ್ದಾರೆ. ಇನ್ನುಳಿದವರು ಶೀಘ್ರದಲ್ಲೇ ಮಾಲ್ಡೀವ್ಸ್​ಗೆ ತೆರಳಲಿದ್ದು, ಮೇ. 15 ರವರಗೆ ಅಲ್ಲಿಯೇ ಉಳಿದುಕೊಳ್ಳಲಿದ್ದಾರೆ. ಮೇ 15 ರ ಬಳಿಕ ಆಸ್ಟ್ರೇಲಿಯಾ ವಿಮಾನಯಾನ ಆರಂಭಗೊಳ್ಳುವ ನಿರೀಕ್ಷೆಯಿದ್ದು, ಹೀಗಾಗಿ ಅಲ್ಲಿಂದಲೇ ತವರಿಗೆ ತೆರಳಲು ಆಸೀಸ್ ಕ್ರಿಕೆಟಿಗರು ನಿರ್ಧರಿಸಿದ್ದಾರೆ.

ಇದಾಗ್ಯೂ ಆರ್​ಸಿಬಿ ತಂಡದಲ್ಲಿದ್ದ ಆಸ್ಟ್ರೇಲಿಯಾ ಆಟಗಾರ ಡೇನಿಯಲ್ ಕ್ರಿಶ್ಚಿಯನ್ ಈ ಪ್ಲ್ಯಾನ್​ನಿಂದ ಹೊರಗುಳಿಯಲಿದ್ದಾರೆ. ಕ್ರಿಶ್ಚಿಯನ್ ಬ್ರಿಟನ್‌ನಲ್ಲಿ ಆಡಲು ಸಹಿ ಹಾಕಿದ್ದು, ಹೀಗಾಗಿ ಅವರು ಭಾರತದಿಂದ ಇಂಗ್ಲೆಂಡ್​ಗೆ ತೆರಳಲಿದ್ದಾರೆ. ಆದರೆ ಇದೀಗ ಬ್ರಿಟನ್ ತನ್ನ ದೇಶದವರನ್ನು ಮಾತ್ರ ಭಾರತದಿಂದ ಮಾತ್ರ ಕರೆಸಿಕೊಳ್ಳುತ್ತಿದೆ. ಹೀಗಾಗಿ ಡೇನಿಯಲ್ ಕ್ರಿಶ್ಚಿಯನ್ ದುಬೈಗೆ ತೆರಳಿ ಅಲ್ಲಿಂದ ಇಂಗ್ಲೆಂಡ್​ನತ್ತ ಮುಖ ಮಾಡಲಿದ್ದಾರೆ ಎನ್ನಲಾಗಿದೆ.

ಆಸ್ಟ್ರೇಲಿಯಾ ಆಟಗಾರರ ಪ್ಲ್ಯಾನ್ ಬಗ್ಗೆ ಮಾತನಾಡಿರುವ ಪ್ಯಾಟ್ ಕಮಿನ್ಸ್, ದೇಶದ ಗಡಿಯನ್ನು ಮುಚ್ಚಲಿದೆ ಎಂದು ಅಂದುಕೊಂಡಿರಲಿಲ್ಲ. ಇದೀಗ ಮೇ 15 ರ ಬಳಿಕ ವಿಮಾನ ಸೌಲಭ್ಯ ದೊರೆಯುವ ಸಾಧ್ಯತೆಯಿದ್ದು, ಹೀಗಾಗಿ ನಾವು ಯೋಜಿಸಿದ ಯೋಜನೆಗೆ ಅನುಗುಣವಾಗಿ ನಾವು ಮನೆಗೆ ತಲುಪಲು ಸಾಧ್ಯವಾಗುತ್ತದೆ ಎಂದಿದ್ದಾರೆ.

ಕ್ರಿಕೆಟ್ ಆಸ್ಟ್ರೇಲಿಯಾದ ಹಂಗಾಮಿ ಸಿಇಒ ನಿಕ್ ಹಾಕ್ಲೆ ಮತ್ತು ಆಸ್ಟ್ರೇಲಿಯಾ ಕ್ರಿಕೆಟಿಗರ ಸಂಘದ ಸಿಇಒ ಟಾಡ್ ಗ್ರೀನ್‌ಬರ್ಗ್ ಕೂಡ ಮಂಗಳವಾರ ಈ ವಿಷಯದ ಬಗ್ಗೆ ತುರ್ತು ಸಭೆ ನಡೆಸಿದ್ದು, ಐಪಿಎಲ್​ನಲ್ಲಿರುವ ಆಸ್ಟ್ರೇಲಿಯಾ ಆಟಗಾರರು, ತರಬೇತುದಾರರು, ಅಧಿಕಾರಿಗಳು ಮತ್ತು ಕಮೆಂಟೇಟರ್​ಗಳನ್ನು ಸುರಕ್ಷಿತವಾಗಿ ಕಳುಹಿಸಿಕೊಡುವ ಬಗ್ಗೆ ಬಿಸಿಸಿಐ ಜೊತೆ ಸಂಪರ್ಕದಲ್ಲಿದೆ ಎಂದಿದ್ದಾರೆ.