David Warner| ಸಿಎಸ್​ಕೆ ಜರ್ಸಿ ಧರಸಿ ಪೋಟೋ ಹಂಚಿಕೊಂಡ ವಾರ್ನರ್​; CSK ಪಾಲಾಗಲಿದ್ದಾರಾ SRH ನಾಯಕ?

ದುಬೈ; ವಿಶ್ವದ ಶ್ರೀಮಂತ ಕ್ರಿಕೆಟ್​ ಟೂರ್ನಿ ಎಂದು ಖ್ಯಾತಿ ಪಡೆದಿರುವ ಐಪಿಎಲ್​-2021 (IPL 2021) ಕೊರೋನಾ (CoronaVirus) ಕಾಟದ ನಡುವೆ ಕೊನೆಗೂ ಮುಕ್ತಾಯವಾಗಿದೆ. ಕೆಕೆಆರ್ ತಂಡವನ್ನು ಮಣಿಸುವ ಮೂಲಕ ಸಿಎಸ್​ಕ್ (CSK) 4ನೇ ಬಾರಿ ಟ್ರೋಫಿಗೆ ಮುತ್ತಿಟ್ಟಿದೆ. ಆದರೆ, ಈ ಪಂದ್ಯ ಆರಂಭಕ್ಕೂ ಮುನ್ನವೇ ಸನ್​ರೈಸರ್ಸ್​ ಹೈದ್ರಾಬಾದ್ (SRH) ತಂಡದ ಮಾಜಿ ನಾಯಕ ಡೇವಿಡ್ ವಾರ್ನರ್​ ಟ್ವಿಟರ್​ನಲ್ಲಿ ಹಂಚಿಕೊಂಡಿದ್ದ ಪೋಟೋ ಇದೀಗ ಭಾರೀ ಕುತೂಹಲ ಮೂಡಿಸಿದೆ. ಡೇವಿಡ್​ ವಾರ್ನರ್​ (David Warner) ಮತ್ತು ಆತನ ಮಗಳು ಸಿಎಸ್​ಕೆ ಜರ್ಸಿ ಧರಿಸಿರುವ ಪೋಟೋವನ್ನು ಸಾಮಾಜಿಕ ಜಾಲತಾಣದಲ್ಲಿ (Social Media) ಹಂಚಿಕೊಳ್ಳುವ ಮೂಲಕ ತಮ್ಮ ಬೆಂಬಲ ಯಾರಿಗೆ? ಎಂಬುದನ್ನು ವಾರ್ನರ್ ಬಹಿರಂಗವಾಗಿ ಘೋಷಿಸಿದ್ದರು. ಆದರೆ, ಸಿಎಸ್​ಕೆ ಬೆಂಬಲ ಘೋಷಿಸಿರುವ ಆ ಪೋಟೋ ಇದೀಗ ಹಲವಾರು ಚರ್ಚೆಗೆ ಕಾರಣವಾಗಿದೆ.

ಚೆನ್ನೈ ಸೂಪರ್​ ಕಿಂಗ್ಸ್​ ಪಾಲಾಗಲಿದ್ದಾರಾ ವಾರ್ನರ್?

ಕಳಪೆ ಫಾರ್ಮ್​ನಲ್ಲಿದ್ದ ಡೇವಿಡ್​ ವಾರ್ನರ್ ಅವರನ್ನು ಸನ್​ರೈಸರ್ಸ್​ ಹೈದ್ರಾಬಾದ್​ ತಂಡ ಇತ್ತೀಚೆಗೆ ನಾಯಕತ್ವದಿಂದ ಕೆಳಗೆ ಇಳಿಸಿತ್ತು. ಅಲ್ಲದೆ, ಅವರೊಂದಿಗಿನ ಒಪ್ಪಂದವನ್ನೂ ಮುರಿದುಕೊಳ್ಳುವ ಸಾಧ್ಯತೆ ಇದೆ ಎನ್ನಲಾಗಿದೆ. ಮುಂಬರುವ ಮೆಗಾ ಹರಾಜಿನಲ್ಲಿ ಪ್ರತಿ ತಂಡವು ಗರಿಷ್ಠ ಎರಡು ಆಟಗಾರರನ್ನು ಮಾತ್ರ ಉಳಿಸಿಕೊಳ್ಳು ಅವಕಾಶವನ್ನು ಪಡೆಯುತ್ತದೆ. ಹೀಗಾಗಿ ಸನ್​ರೈಸರ್ಸ್​ ತಂಡ ವಾರ್ನರ್ ಅವರನ್ನು ಕೈಬಿಡುವ ಎಲ್ಲಾ ಸಾಧ್ಯತೆಗಳೂ ಇದೆ ಎನ್ನಲಾಗಿದೆ.



ಈ ನಡುವೆ ಮುಂದಿನ ವರ್ಷ ಐಪಿಎಲ್​ನಲ್ಲಿ ಇನ್ನೂ ಎರಡು ತಂಡಗಳು ಹೆಚ್ಚಾಗಿ ಭಾಗವಹಿಸಲಿದ್ದು, ಆ ತಂಡಗಳ ನಾಯಕತ್ವ ವಹಿಸಲು ನಾನು ಉತ್ಸುಕನಾಗಿದ್ದೇನೆ ಎಂದು ಇತ್ತೀಚೆಗೆ ಸ್ವತಃ ಡೇವಿಡ್ ವಾರ್ನರ್ ಸಹ ತಿಳಿಸಿದ್ದರು. ಈ ಹೇಳಿಕೆ ಅವರು ಎಸ್​ಆರ್​ಹೆಚ್​ನಲ್ಲಿ ಉಳಿಯುವುದಿಲ್ಲ ಎಂಬುದನ್ನು ಖಚಿತಪಡಿಸಿತ್ತು. ಈ ನಡುವೆ ನಿನ್ನೆ ಅವರು ಸಿಎಸ್​ಕೆ ಜರ್ಸಿಯಲ್ಲಿ ಕಾಣಿಸಿಕೊಂಡಿರುವುದು ಮುಂದಿನ ಹರಾಜಿನಲ್ಲಿ ಅವರು ಚೆನ್ನೈ ಸೂಪರ್​ ಕಿಂಗ್ಸ್​ ಪಾಲಾಗಲಿದ್ದಾರ? ಎಂಬ ಊಹಾಪೋಹಗಳಿಗೆ ಕಾರಣವಾಗಿದೆ.

ಇದನ್ನೂ ಓದಿ: CSK Champions- ಕೆಕೆಆರ್ ನಿರಾಸೆ; ಚೆನ್ನೈ ಸೂಪರ್ ಕಿಂಗ್ಸ್ 4ನೇ ಬಾರಿ ಐಪಿಎಲ್ ಚಾಂಪಿಯನ್

ಸನ್​ರೈಸರ್ಸ್​ ಬಗ್ಗೆ ವಾರ್ನರ್​ ನಿರ್ಧಾರ?

ಸನ್​ರೈಸರ್ಸ್​ ಹೈದ್ರಾಬಾದ್​ ತಂಡವನ್ನು ಪ್ರತಿನಿಧಿಸುವ ಮತ್ತು ಅದೇ ತಂಡದಲ್ಲಿ ಉಳಿಯುವ ಬಗ್ಗೆಯೂ ಇತ್ತೀಚೆಗೆ 'ಸ್ಪೋರ್ಟ್ಸ್ ಟುಡೆ'ಗೆ ಜೊತೆಗೆ ಮಾತನಾಡಿದ್ದ ಡೇವಿಡ್ ವಾರ್ನರ್, "ನಾನು ಸನ್ ರೈಸರ್ಸ್ ಅನ್ನು ಪ್ರತಿನಿಧಿಸುವುದಕ್ಕಿಂತ ಹೆಚ್ಚೇನೂ ಇಷ್ಟಪಡುವುದಿಲ್ಲ. ಆದರೆ ನಿಸ್ಸಂಶಯವಾಗಿ, ಆ ನಿರ್ಧಾರವು ಮಾಲೀಕರದ್ದಾಗಿದೆ" ಎಂದು ಹೇಳಿದ್ದರು. ತಂಡದ ತರಬೇತುದಾರರಾದ ಟ್ರೆವರ್ ಬೈಲಿಸ್, ವಿವಿಎಸ್​ ಲಕ್ಷ್ಮಣ್, ಡಾಮ್ ಮೂಡಿ ಮತ್ತು ಮುತ್ತಯ್ಯಾ ಮುರಳೀಧರನ್ ಒಟ್ಟಾಗಿ ಡೇವಿಡ್ ವಾರ್ನರ್​ ಬಗೆಗಿನ ನಿರ್ಧಾರವನ್ನು ತೆಗೆದುಕೊಳ್ಳಲಿದ್ದಾರೆ ಎನ್ನಲಾಗಿದೆ.

"ಸನ್​ರೈಸರ್ಸ್​ ಹೈದ್ರಾಬಾದ್​ಗಾಗಿ ನಾನು 100ಕ್ಕೂ ಅಧಿಕ ಪಂದ್ಯಗಳಲ್ಲಿ ಕಣಕ್ಕಿಳಿದಿದ್ದೇನೆ. ಆದರೆ, ಈ ಋತುವಿನಲ್ಲಿ ಚೆನ್ನೈನಲ್ಲಿ ಆಡಿದ ಮೊದಲ 5 ಪಂದ್ಯಗಳಲ್ಲಿ ನಾನು ಕಳಪೆ ಆಟವನ್ನು ಪ್ರದರ್ಶಿಸಿದ್ದೆ. ಈ ಕಷ್ಟದ ದಿನಗಳನ್ನು ಸಹಿಸಿಕೊಳ್ಳುವುದು ಕಷ್ಟ. ನನ್ನ ಮುಂದೆ ಹಲವು ಪ್ರಶ್ನೆಗಳಿದ್ದು, ಅವಕ್ಕೆ ಉತ್ತರವನ್ನು ಕಂಡುಕೊಳ್ಳುವುದೂ ಕಷ್ಟ" ಎಂದು ಡೇವಿಡ್ ವಾರ್ನರ್​​ ಈ ವೇಳೆ ವಿಷಾಧಿಸಿದ್ದರು.

ಇದನ್ನೂ ಓದಿ: Beautiful Girls in IPL- ಐಪಿಎಲ್​ನಲ್ಲಿ ಪ್ರೇಕ್ಷಕರ ಕಣ್ ಸೆಳೆದ ಚಂದುಳ್ಳಿ ಚೆಲುವೆಯರು ಇವರು

ನಾಲ್ಕನೇ ಬಾರಿ ಪ್ರಶಸ್ತಿ ಗೆದ್ದ ಚೆನ್ನೈ ಸೂಪರ್​ ಕಿಂಗ್ಸ್

ಮಹೇಂದ್ರ ಸಿಂಗ್ ಧೋನಿ ನೇತೃತ್ವದ ಚೆನ್ನೈ ಸೂಪರ್ ಕಿಂಗ್ಸ್ 2021ರ ಐಪಿಎಲ್ ಚಾಂಪಿಯನ್ ಆಗಿದೆ. ಫ್ಯಾಫ್ ಡುಪ್ಲೆಸಿ ಅವರ ಅಮೋಘ ಬ್ಯಾಟಿಂಗ್ ಹಾಗೂ ಬೌಲಿಂಗ್ ಪಡೆಯ ಅದ್ಭುತ ಪ್ರದರ್ಶನದ ನೆರವಿನಿಂದ ಚೆನ್ನೈ ಸೂಪರ್ ಕಿಂಗ್ಸ್ ತಂಡ ಐಪಿಎಲ್ ಫೈನಲ್​ನಲ್ಲಿ ಕೆಕೆಆರ್ ತಂಡವನ್ನು 27 ರನ್​ಗಳಿಂದ ಸುಲಭವಾಗಿ ಮಣಿಸಿತು. ಗೆಲ್ಲಲು 193 ರನ್​ಗಳ ಬೃಹತ್ ಮೊತ್ತದ ಗುರಿಗೆ ಪ್ರತಿಯಾಗಿ ಕೋಲ್ಕತಾ ನೈಟ್ ರೈಡರ್ಸ್ ತಂಡದ ಇನ್ನಿಂಗ್ಸ್ 165 ರನ್​ಗೆ ಅಂತ್ಯಗೊಂಡಿತು. ಈ ಗೆಲುವಿನೊಂದಿಗೆ ಚೆನ್ನೈ ಸೂಪರ್ ಕಿಂಗ್ಸ್ ತಂಡ ನಾಲ್ಕನೇ ಬಾರಿ ಐಪಿಎಲ್ ಪ್ರಶಸ್ತಿ ಗೆದ್ದಂತಾಗಿದೆ.