World Lion day 2021: ವಿಶ್ವ ಸಿಂಹ ದಿನವನ್ನು ಯಾಕೆ ಆಚರಣೆ ಮಾಡಲಾಗತ್ತೆ ಗೊತ್ತಾ?

World Lion Day 2021: ಸಿಂಹದ ಬೇಟೆಯ  ಹಲವಾರು ವರ್ಣಚಿತ್ರಗಳು, ರಾಜ ಲಾಂಛನಗಳು, ಸಾಹಿತ್ಯ ಮತ್ತು ದಾಖಲೆಗಳು ಸಿಂಹಗಳು ಭಾರತೀಯ ಪುರಾಣ ಮತ್ತು ಅದರ ಸಾಂಸ್ಕೃತಿಕ ಗುರುತಿನ ಭಾಗ ಎಂಬುದನ್ನ ತಿಳಿಸುತ್ತದೆ.

ಸಾಂದರ್ಭಿಕ ಚಿತ್ರ

ಸಾಂದರ್ಭಿಕ ಚಿತ್ರ

  • Share this:
ಪ್ರತಿವರ್ಷ ಆಗಸ್ಟ್ 10 ರಂದು ವಿಶ್ವ ಸಿಂಹ ದಿನವನ್ನು ಆಚರಣೆ ಮಾಡಲಾಗುತ್ತದೆ.   ಈ ದಿನವನ್ನು ಸಿಂಹಗಳ ಬಗ್ಗೆ ಜಾಗೃತಿ ಮೂಡಿಸಲು ಮತ್ತು ಕ್ಷೀಣಿಸುತ್ತಿರುವ  ಅವುಗಳ ಜನಸಂಖ್ಯೆ ಮತ್ತು ಸಂರಕ್ಷಣೆಗೆ  ಹೆಚ್ಚಿನ ಜನರ ಬೆಂಬಲವನ್ನು ಸಂಗ್ರಹಿಸಲು ಒತ್ತು ನೀಡಲಾಗುತ್ತದೆ. ಪ್ರಸ್ತುತ, ಅವುಗಳನ್ನು ಇಂಟರ್ನ್ಯಾಷನಲ್ ಯೂನಿಯನ್ ಫಾರ್ ಕನ್ಸರ್ವೇಶನ್ ಆಫ್ ನೇಚರ್ (ಐಯುಸಿಎನ್)  ಸಂಸ್ಥೆಯು ಕೆಂಪು ಪಟ್ಟಿಯಿಂದ ಅಳಿವಿನಂಚಿನಲ್ಲಿರುವ ಜಾತಿಗಳೆಂದು ಪಟ್ಟಿ ಮಾಡಿದೆ. ಏಷಿಯಾಟಿಕ್ ಸಿಂಹವು ಭಾರತದಲ್ಲಿ ಕಂಡುಬರುವ ಐದು ದೊಡ್ಡ ಬೆಕ್ಕುಗಳಲ್ಲಿ ಒಂದಾಗಿದೆ, ಇತರ ನಾಲ್ಕು  ದೊಡ್ಡ ಬೆಕ್ಕುಗಳೆಂದರೆ ರಾಯಲ್ ಬೆಂಗಾಲ್ ಟೈಗರ್, ಇಂಡಿಯನ್ ಚಿರತೆ, ಮೋಡದ ಚಿರತೆ ಮತ್ತು ಹಿಮ ಚಿರತೆ.

ಕಳೆದ ವರ್ಷ ಜೂನ್ ನಲ್ಲಿ ಗುಜರಾತ್ ಸರ್ಕಾರ ನಡೆಸಿದ ಸಿಂಹಗಳ  ಜನಗಣತಿಯ ಪ್ರಕಾರ,   ಸಿಂಹಗಳ  ಜನಸಂಖ್ಯೆಯಲ್ಲಿ ಸ್ವಲ್ಪ ಏರಿಕೆ ಕಂಡಿದೆ.  ಭಾರತದಲ್ಲಿ  2015 ರ ಸಿಂಹಗಳ ಜನಸಂಖ್ಯೆ ಸಮೀಕ್ಷೆಯಲ್ಲಿ 523 ಗಳಿವೆ ಎಂದು ವರದಿಯಾಗಿತ್ತು. ಆದರೆ  2020 ರಲ್ಲಿ  ಜನಸಂಖ್ಯೆ 674 ಕ್ಕೆ ಏರಿದೆ.

ಇದನ್ನೂ ಓದಿ:2 ಡೋಸ್ ಲಸಿಕೆ ಪಡೆದವರು ಈ ಕೋವಿಡ್‌ ನಿಯಮಗಳನ್ನು ಪಾಲಿಸಬೇಕೆ..? ಇಲ್ಲಿದೆ ಸಂಪೂರ್ಣ ಮಾಹಿತಿ

ವಿಶ್ವ ಸಿಂಹ ದಿನ ಆಚರಣೆಯ ಇತಿಹಾಸ

ಸಿಂಹಗಳು ಏಷ್ಯಾ, ಆಫ್ರಿಕಾ, ಮಧ್ಯಪ್ರಾಚ್ಯ ಮತ್ತು ಯುರೋಪಿನಾದ್ಯಂತ ಮೂರು ಮಿಲಿಯನ್ ವರ್ಷಗಳ ಹಿಂದೆಯೇ ಮುಕ್ತವಾಗಿ ಸಂಚರಿಸುತ್ತಿದ್ದ ಪ್ರಾಣಿಗಳಲ್ಲಿ ಒಂದು. ಆದರೆ ಕಳೆದ 100 ವರ್ಷಗಳಲ್ಲಿ ಅವುಗಳ ಸಂಖ್ಯೆ ಬಹಳ ಕಡಿಮೆಯಾಗಿವೆ.  ತಮ್ಮ ಐತಿಹಾಸಿಕ ವ್ಯಾಪ್ತಿಯಲ್ಲಿ 80 ಪ್ರತಿಶತಕ್ಕಿಂತಲೂ ಹೆಚ್ಚು ಸಿಂಹಗಳ ಸಂತತಿ  ಕಣ್ಮರೆಯಾಗಿದೆ. ಸಿಂಹಗಳು ಪ್ರಸ್ತುತ 25 ಕ್ಕೂ ಹೆಚ್ಚು ಆಫ್ರಿಕನ್ ದೇಶಗಳಲ್ಲಿ ಮತ್ತು ಒಂದು ಏಷ್ಯಾದ ದೇಶದಲ್ಲಿ ಮಾತ್ರ   ಅಸ್ತಿತ್ವದಲ್ಲಿದೆ ಎಂದು ಹೇಳಲಾಗುತ್ತದೆ. ಇತ್ತೀಚಿನ ಸಮೀಕ್ಷೆಯ ಪ್ರಕಾರ ವಿಶ್ವದಲ್ಲಿ ಅವುಗಳ ಸಂಖ್ಯೆಯು ಸರಿಸುಮಾರು 30,000 ದಿಂದ ಸುಮಾರು 20,000 ಕ್ಕೆ ಇಳಿದಿದೆ ಎನ್ನುವ ಆಘಾತಕಾರಿ ಅಂಶ ಬೆಳಕಿಗೆ ಬಂದಿದೆ.  ಈ ಹಿನ್ನೆಲೆಯಲ್ಲಿ ಸಿಂಹಗಳ ರಕ್ಷಣೆಯ ಮಹತ್ವವನ್ನು ಸಾರುವ ಉದ್ದೇಶದಿಂದ ವಿಶ್ವ ಸಿಂಹ ದಿನ ಆಚರಣೆಯನ್ನು ಆಚರಿಸಲಾಗುತ್ತದೆ.

ಭಾರತದಲ್ಲಿ ಕಂಡುಬರುವ ಏಷಿಯಾಟಿಕ್ ಸಿಂಹಗಳು ಹೆಚ್ಚಾಗಿ ನಿರ್ಬಂಧಿತ ಗಿರ್ ಅರಣ್ಯ  ಪ್ರದೇಶ ಮತ್ತು ರಾಷ್ಟ್ರೀಯ ಉದ್ಯಾನವನ ಮತ್ತು ಅದರ ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ಕಂಡುಬರುತ್ತವೆ. ಆದರೆ ಈ ಹಿಂದೆ, ಸಿಂಹಗಳು  ಇಂಡೋ-ಗಂಗಾ ಬಯಲಿನಲ್ಲಿ  ಮುಕ್ತವಾಗಿ ಸಂಚರಿಸುತ್ತಿದ್ದವು. ಪಶ್ಚಿಮದಲ್ಲಿ ಸಿಂಧ್  ಪ್ರದೇಶದಿಂದ ಪೂರ್ವದ ಬಿಹಾರದವರೆಗೂ ಅವುಗಳ ಸಂಚಾರವಿತ್ತು. ಸಿಂಹದ ಬೇಟೆಯ  ಹಲವಾರು ವರ್ಣಚಿತ್ರಗಳು, ರಾಜ ಲಾಂಛನಗಳು, ಸಾಹಿತ್ಯ ಮತ್ತು ದಾಖಲೆಗಳು ಸಿಂಹಗಳು ಭಾರತೀಯ ಪುರಾಣ ಮತ್ತು ಅದರ ಸಾಂಸ್ಕೃತಿಕ ಗುರುತಿನ ಭಾಗ ಎಂದು ತಿಳಿಸುತ್ತದೆ.  ಆದರೆ ಬ್ರಿಟಿಷ್ ಅಧಿಕಾರಿಗಳ  ಆಳ್ವಿಕೆಯಲ್ಲಿ ಮಾತ್ರ ಸಿಂಹಗಳನ್ನು ದೊಡ್ಡ ಪ್ರಮಾಣದಲ್ಲಿ ಬೇಟೆಯಾಡಲಾಯಿತು. ಅವುಗಳನ್ನು ಬೇಟೆ ಆಡಿದ ಪರಿಣಾಮ ಅವುಗಳ ಸಂಖ್ಯೆಯಲ್ಲಿ ಕಡಿಮೆಯಾಗಿದ್ದಲ್ಲದೇ, ಅವುಗಳ ಸಂಚಾರದ ವ್ಯಾಪ್ತಿ ಕೂಡ ಕಡಿಮೆಯಾಯಿತು.

ಇದನ್ನೂ ಓದಿ:ವಿಶ್ವ ಮೂಲನಿವಾಸಿಗಳ ದಿನ: ಪರಿಸರ ರಕ್ಷಣೆಯಲ್ಲಿ ಮೂಲನಿವಾಸಿಗಳ ಪಾತ್ರ ಎಷ್ಟು ಮುಖ್ಯ ಗೊತ್ತಾ?

ಭಾರತ ಸರ್ಕಾರವು ಈಗಾಗಲೇ  ಸಿಂಹಗಳ ರಕ್ಷಣೆಗೆ ವಿವಿಧ ಯೋಜನೆಗಳನ್ನು ಜಾರಿಗೆ ತಂದಿವೆ.  ಈ  ಯೋಜನೆಗಳ ಮೂಲಕ ಕಾಡಿನ ರಾಜನನ್ನು ಸಂರಕ್ಷಿಸಲು ಪ್ರಯತ್ನಗಳನ್ನು ಮಾಡುತ್ತಿದೆ.  ಭಾರತದಲ್ಲಿ ಸಿಂಹಗಳ ಜನಸಂಖ್ಯೆ ಸಹ ಹೆಚ್ಚಾಗುತ್ತಿದೆ. ಅವುಗಳ ಜನಸಂಖ್ಯೆಯಲ್ಲಿನ ಹೆಚ್ಚಳದ ಕಾರಣ ಮತ್ತು ನೈಸರ್ಗಿಕ ಆವಾಸಸ್ಥಾನಗಳು, ಅರಣ್ಯ ಪ್ರದೇಶಗಳು ಅವುಗಳನ್ನು ಮನುಷ್ಯರಿಗೆ ಹತ್ತಿರ ಮಾಡುತ್ತಿದೆ. ಅಲ್ಲದೇ, ಅವುಗಳು ಕೆಲವೊಮ್ಮೆ ತಮ್ಮ ಬೇಟೆಯನ್ನು ಅರಸಿ ಮತ್ತು ಸುರಕ್ಷಿತ ಸ್ಥಳವನ್ನು ಹುಡುಕಿಕೊಂಡು ಹೋಗುತ್ತಿವೆ.

ನಮ್ಮ ಪರಿಸರದ ಸಮತೋಲನ ಕಾಪಾಡಿಕೊಳ್ಳಲು ಎಲ್ಲ ಪ್ರಾಣಿಗಳ ಅವಶ್ಯಕತೆ ಇರುತ್ತದೆ. ಯಾವ ಪ್ರಾಣಿಗಳು ನಶಿಸಿ ಹೋದರೂ ಸಹ ಅದು ಪರಿಸರಕ್ಕೆ ಹಾನಿಕಾರಕ. ಇನ್ನು ನಾವು ಈ ಸಿಂಹಗಳನ್ನು ರಕ್ಷಿಸದಿದ್ದರೆ, ಇತರ ವಿವಿಧ ಜಾತಿಗಳು ಮತ್ತು ಪರಸ್ಪರ ಸಂಬಂಧ ಹೊಂದಿರುವ ಪರಿಸರ ವ್ಯವಸ್ಥೆಗಳು ತೊಂದರೆಗೊಳಗಾಗುತ್ತವೆ.
Published by:Sandhya M
First published: