Bettanagere Shankara: ಬಿಜೆಪಿ ಸೇರಲು ಮುಂದಾಗಿರುವ ಬೆತ್ತನಗೆರೆ ಯಾರು? ಇಲ್ಲಿದೆ ಶಂಕರನ 'ರಕ್ತ'ಚರಿತ್ರೆ!

ರಾಜ್ಯ ರಾಜಕೀಯ ರಂಗೇರುತ್ತಿದೆ. ಮುಂಬರುವ ವಿಧಾನಸಭಾ ಎಲೆಕ್ಷನ್‌ನಲ್ಲಿ (assembly elections) ಗೆದ್ದು ಅಧಿಕಾರ ಹಿಡಿಯಲು ಬಿಜೆಪಿ (BJP), ಕಾಂಗ್ರೆಸ್ (Congress), ಜೆಡಿಎಸ್ (JDS) ಸೇರಿದಂತೆ ಎಲ್ಲಾ ಪಕ್ಷಗಳು ಶತಾಯಗತಾಯ ಪ್ರಯತ್ನ ಮಾಡುತ್ತಿವೆ. ಈಗಾಗಲೇ ಗೆಲ್ಲುವ ಕುದುರೆಗಳಿಗೆ ಹುಡುಕಾಟ ಶುರುವಾಗಿದೆ. ಹಿಂದೆಲ್ಲ ವಿವಿಧ ಕ್ಷೇತ್ರದ ಸಾಧಕರು, ಸಮಾಜಸೇವಕರಿಗೆ ರಾಜಕೀಯ ಪಕ್ಷಗಳು ಮಣೆ ಹಾಕುತ್ತಿದ್ದವು. ಅವರ ಜನಪ್ರಿಯತೆಯನ್ನು ಎನ್‌ಕ್ಯಾಶ್ ಮಾಡಿಕೊಂಡು, ಅಭಿಮಾನಿಗಳು, ಬೆಂಬಲಿಗರನ್ನು ಪಕ್ಷಕ್ಕೆ ಸೆಳೆದು, ಅದನ್ನು ವೋಟ್ (Vote) ಆಗಿ ಕನ್ವರ್ಟ್ ಮಾಡಿಕೊಳ್ಳುವುದು ಇದರ ಉದ್ದೇಶ. ಆದರೆ ಇದೀಗ ಟ್ರೆಂಡ್ ಚೇಂಜ್ ಆಗಿದೆ. ಈಗ ರೌಡಿ ಶೀಟರ್‌ಗಳು (Rowdy Sheeter), ಅಪರಾಧ ಹಿನ್ನೆಲೆ ಇದ್ದವರಿಗೂ ಕೂಡ ಪಕ್ಷಗಳು ಮಣೆ ಹಾಕುತ್ತಿವೆ. ಈಗಾಗಲೇ ರೌಡಿಶೀಟರ್‌ ಫೈಟರ್ ರವಿ (Fighter Ravi) ಬಿಜೆಪಿ ಸೇರಿದ್ದಾನೆ, ಮತ್ತೊಂದೆಡೆ ಕುಖ್ಯಾತ ರೌಡಿಶೀಟರ್ ಸೆೈಲೆಂಟ್ ಸುನೀಲ (Silent Sunil) ಬಿಜೆಪಿ ಸೇರಲು ತುದಿಗಾಲಲ್ಲಿ ನಿಂತಿದ್ದಾನೆ. ಈ ನಡುವೆಯೇ ಮತ್ತೋರ್ವ ಕುಖ್ಯಾತ ರೌಡಿ ಬೆತ್ತನಗೆರೆ ಶಂಕರ (Bettanagere Shankara) ಕೂಡ ಬಿಜೆಪಿ ಸೇರಲು ಪ್ರಯತ್ನಿಸುತ್ತಿದ್ದಾನೆ ಎನ್ನಲಾಗಿದೆ. ಹಾಗಾದರೆ ಬೆತ್ತನಗೆರೆ ಶಂಕರ ಯಾರು? ಈತನ ಹಿನ್ನೆಲೆ ಏನು? ಈತನ ರಕ್ತಚರಿತ್ರೆಯ ಪರಿಚಯ ಇಲ್ಲಿದೆ

ನೆಲಮಂಗಲ ರಕ್ತಚರಿತ್ರೆಯಲ್ಲಿ ಬೆತ್ತನಗೆರೆಯದ್ದೇ ಮೊದಲ ಪುಟ!

ಹೌದು, ಇದು ಅಕ್ಷರಶಃ ಸತ್ಯ. ಶಂಕರನ ರಕ್ತಚರಿತ್ರೆ ಭಯಾನಕವಾಗಿದೆ. ಇತ್ತೀಚಿನ ವರ್ಷಗಳಲ್ಲಿ ಬೆಂಗಳೂರು ಕಂಡ ಕುಖ್ಯಾತ ದರೋಡೆಕೋರರಲ್ಲಿ ಬೆತ್ತನಗೆರೆ ಬ್ರದರ್ಸ್ ಪ್ರಮುಖರು. ಬೆತ್ತನಗೆರೆ ಸೀನ ಹಾಗೂ ಆತನ ಸಹೋದರ ಸಂಬಂಧಿಗಳಾದ ಬೆತ್ತನಗೆರೆ ಶಂಕರ, ಬೆತ್ತನಗೆರೆ ಮಂಜ ಮತ್ತಿತರರು ಭೂಗತಲೋಕದಲ್ಲಿ ಹವಾ ಮಾಡಿದವರು. ಅಂದಹಾಗೆ ಬೆಂಗಳೂರು ಗ್ರಾಮಾಂತರದ ನೆಲಮಂಗಲದಲ್ಲಿ ರಕ್ತಚರಿತ್ರೆಯ ಮೊದಲ ಪುಟ ಬರೆದದ್ದೇ ಬೆತ್ತನಗೆರೆ ಬ್ರದರ್ಸ್.

ಬೆತ್ತನಗೆರೆ ಶಂಕರ

ಕುಖ್ಯಾತ ಬೆತ್ತನಗೆರೆ ಬ್ರದರ್ಸ್

ಬೆತ್ತನಗೆರೆ ಶಂಕರ ಮತ್ತು ಇತರ ಬೆತ್ತನಗೆರೆ ಬ್ರದರ್ಸ್ ಬೆಳವಣಿಗೆಯು ಕಳೆದ ದಶಕದಲ್ಲಿ ನೆಲಮಂಗಲ, ದೇವನಹಳ್ಳಿ ಮತ್ತು ಇತರ ಉತ್ತರ ಬೆಂಗಳೂರು ಪ್ರದೇಶಗಳಲ್ಲಿ ರಿಯಲ್ ಎಸ್ಟೇಟ್ ವ್ಯವಹಾರದೊಂದಿಗೆ ಜಾಸ್ತಿ ಆಯ್ತು. ನೆಲಮಂಗಲದ ಬೆತ್ತನಗೆರೆ ಎಂಬ ಕುಗ್ರಾಮವು ಬೆತ್ತನಗೆರೆಯೊಂದಿಗೆ 80 ಕ್ಕೂ ಹೆಚ್ಚು ರೌಡಿ ಶೀಟರ್‌ಗಳನ್ನು ಹುಟ್ಟುಹಾಕಿದೆ. ಈ ಪೈಕಿ ಬೆತ್ತನಗೆರೆ ಸೀನ ಅಲಿಯಾಸ್ ಶ್ರೀನಿವಾಸ, ಶಂಕರಗೌಡ ಅಲಿಯಾಸ್ ಬೆತ್ತನಗೆರೆ ಶಂಕರ ಪ್ರಮುಖರು.

ಬೆತ್ತನಗೆರೆ ಸೀನ

ರಿಯಲ್ ಎಸ್ಟೇಟ್ ವ್ಯವಹಾರದಲ್ಲಿ ರಕ್ತ ಹರಿಸಿದ ಬ್ರದರ್ಸ್

ರಿಯಲ್ ಎಸ್ಟೇಟ್ ವ್ಯವಹಾರದಲ್ಲಿ ಸೋದರ ಸಂಬಂಧಿಗಳ ಪೈಪೋಟಿ ರಾಜಕಾರಣಿ 'ಬಿಇಎಂಎಲ್' ಕೃಷ್ಣಪ್ಪ ಸೇರಿದಂತೆ ಹತ್ತಕ್ಕೂ ಹೆಚ್ಚು ಜನರ ಕೊಲೆಗೆ ಕಾರಣವಾಯಿತು. 2013ರಲ್ಲಿ ಪೊಲೀಸ್ ಎನ್‌ಕೌಂಟರ್‌ನಲ್ಲಿ ಸೀನಾ ಸಾವನ್ನಪ್ಪಿದ್ದ.

ಬಿಎಸ್‌ವೈ ಜೊತೆ ಬೆತ್ತನಗೆರೆ ಶಂಕರ

ಇದನ್ನೂ ಓದಿ: Silent Sunil and Fighter Ravi: ಸೈಲೆಂಟ್‌ ಆಗಿಯೇ ಸದ್ದು ಮಾಡುತ್ತಿರುವ ಸುನೀಲ ಯಾರು? ಫೈಟರ್ ರವಿ ಇತಿಹಾಸ ನಿಮಗೆ ಗೊತ್ತಾ?

ಬೆತ್ತನಗೆರೆ ಬ್ರದರ್ಸ್ ನಡುವೆ ಪೈಪೋಟಿ

ಬೆತ್ತನಗೆರೆ ಶಂಕರ ಮತ್ತು ಅವನ ಸೋದರ ಸಂಬಂಧಿ ಬೆತ್ತನಗೆರೆ ಸೀನ (ಶ್ರೀನಿವಾಸ) ನಡುವಿನ ಪೈಪೋಟಿಯು ಭೂಗತ ಲೋಕದ ಕಥೆಯಾಗಿದೆ. ಬಾಳೇಕೈ ಮಂಡಿ ಬಸವಯ್ಯನ ಕೊಲೆಯ ಮೂಲಕ ಸೋದರ ಸಂಬಂಧಿಗಳು ಸಾರ್ವಜನಿಕವಾಗಿ ಅಪಖ್ಯಾತಿಗೆ ಗುರಿಯಾದರು. ಬಸವಯ್ಯ ಅವರು 2004ರಲ್ಲಿ ತಾಲೂಕಿನ ಹಾಲು ಉತ್ಪಾದಕರ ಸಹಕಾರ ಸಂಘಗಳ ಚುನಾವಣೆಯಲ್ಲಿ ಹನುಮಂತಯ್ಯ ಅವರನ್ನು ಸೋಲಿಸಿದ್ದರು. ಅಭ್ಯರ್ಥಿ ಹನುಮಂತಯ್ಯ ಅವರ ಮಗ ಸೀನ ಮತ್ತು ಅವರ ಸೋದರ ಸಂಬಂಧಿ ಶಂಕರ ಅವರನ್ನು ಸೋಲಿಸಿದರು. ಇದೇ ಕಾರಣಕ್ಕೆ ಅವರನ್ನು ಕೊಲೆ ಮಾಡಲಾಯ್ತು.

ವಿಜಯೇಂದ್ರ ಜೊತೆ ಬೆತ್ತನಗೆರೆ ಶಂಕರ

ಶಂಕರ್‌ನ ಮೇಲೆ ಸೀನಾ ಕಿಡಿಕಿಡಿ

ರಾಜಕಾರಣಿ ಬಿಇಎಂಎಲ್ ಕೃಷ್ಣಪ್ಪ ಅವರು ಶಂಕರ ಅವರಿಗೆ ಜಾಮೀನು ಪಡೆಯಲು ಸಹಾಯ ಮಾಡಿದ್ದರು ಎಂದು ಹೇಳಲಾಗುತ್ತದೆ. ಆದರೆ ಸೀನಗೆ ಯಾವುದೇ ಸಹಾಯ ಮಾಡಿರಲಿಲ್ಲ. ಸೀನಾ ಅವರ ಸಂಬಂಧಿ ಯಡಿಯಾಲ್ ದೇವೇಂದ್ರ ಅವರು ಕೃಷ್ಣಪ್ಪ ಅವರ ರಾಜಕೀಯ ಪ್ರತಿಸ್ಪರ್ಧಿಯಾಗಿದ್ದರು ಮತ್ತು ಅವರ ಸೋದರ ಸಂಬಂಧಿ ಶಂಕರ ಶತ್ರುವನ್ನು ಸೇರುತ್ತಿದ್ದಾರೆ ಎಂದು ಸೀನ ಕಿಡಿಕಿಡಿಯಾಗಿದ್ದ.

ಬಿ.ಸಿ.ಪಾಟೀಲ್ ಜೊತೆ ಬೆತ್ತನಗೆರೆ ಶಂಕರ

ಜೈಲಿನಲ್ಲೇ ಕೊಲ್ಲಲು ಯತ್ನ

ಇಬ್ಬರು ಸೋದರ ಸಂಬಂಧಿಗಳು ಪರಸ್ಪರರ ಮೇಲೆ ಅನೇಕ ಹಲ್ಲೆ ಪ್ರಯತ್ನಗಳನ್ನು ಮಾಡಿದರು. ಈ ವೇಳೆ ಸೀನನನ್ನು ಮೂರು ಬಾರಿ ಕೊಲ್ಲಲು ಪ್ಲಾನ್ ಮಾಡಲಾಗಿತ್ತು. ಮೈಸೂರು ಜೈಲಿನೊಳಗೆ ಒಮ್ಮೆ ಕೊಲೆ ಯತ್ನ ನಡೆಸಿತ್ತು. ಅಲ್ಲಿ ಕೈದಿಯೊಬ್ಬನಿಗೆ ದೇಶಿ ನಿರ್ಮಿತ ಪಿಸ್ತೂಲ್ ಅನ್ನು ಪೂರೈಸಲಾಯಿತು. ಸೀನಾಗೆ ಆರು ಬಾರಿ ಗುಂಡು ಹಾರಿಸಲಾಯಿತು, ಆದರೆ ಒಂದೇ ಒಂದು ಗುಂಡು ಅವನ ಭುಜಕ್ಕೆ ತಗುಲಿತು. ಆದರೆ ಪವಾಡ ಸದೃಶ ರೀತಿಯಲ್ಲಿ ಸೀನ ಪಾರಾಗಿದ್ದ.

ಸಮಾಜಸೇವೆಯ ಬ್ಯಾನರ್

ಸಂಬಂಧಿಗಳಿಂದಲೇ ಸಾಕ್ಷ್ಯ

ಸ್ಥಳೀಯ ರಾಜಕಾರಣಿ ಗಂಗೊಂಡನಹಳ್ಳಿ ರಾಮಮೂರ್ತಿ ಬೆತ್ತನಗೆರೆ ದರೋಡೆಕೋರರ ಮೇಲೆ ಸೇಡು ತೀರಿಸಿಕೊಳ್ಳಲು ಯತ್ನಿಸುತ್ತಿದ್ದರು ಎನ್ನಲಾಗಿದೆ. ಆದರೆ ಅವನೂ ಕೊಲೆಯಾದ. ಮತ್ತೊಂದೆಡೆ ಸೋದರ ಸಂಬಂಧಿ ಯಡಿಯಾಳ್ ದೇವೇಂದ್ರ ಸೀನಗೆ ಬೆಂಬಲ ನೀಡುತ್ತಿದ್ದ ಎಂಬ ಕಾರಣಕ್ಕೆ ಶಂಕರನ ಗ್ಯಾಂಗ್ ಹತ್ಯೆ ಮಾಡಿತ್ತು. ಇದಕ್ಕೆ ಪ್ರತೀಕಾರವಾಗಿ ಸೀನಾ ಗ್ಯಾಂಗ್ ಶಂಕರನಿಗೆ ಆಪ್ತನಾಗಿದ್ದ ರೀಲರ್ ಲೋಹಿತ್ ಗೌಡನನ್ನು ಕೊಲೆ ಮಾಡಿತ್ತು ಎನ್ನಲಾಗಿದೆ. ಸೀನ ಮತ್ತು ಶಂಕರನ ವಿರುದ್ಧ ಸಾಕ್ಷಿ ಹೇಳಲು ಯಾವುದೇ ಪ್ರತ್ಯಕ್ಷದರ್ಶಿಗಳು ಸಿದ್ಧರಿಲ್ಲದ ಕಾರಣ ಅವರನ್ನು ಬಂಧಿಸಲು ಪೊಲೀಸರಿಗೆ ಸ್ವಲ್ಪ ಸಮಯ ಹಿಡಿಯಿತು. ಕೊನೆಗೆ ರೈತ ಕೃಷ್ಣಮೂರ್ತಿ ಹಾಗೂ ವಕೀಲ ದೇವರಾಜ್ ಮುಂದೆ ಬಂದು ಸಾಕ್ಷಿ ಹೇಳಿದ ಮೇಲೆ ಸೋದರ ಸಂಬಂಧಿಗಳನ್ನು ಬಂಧಿಸಲಾಗಿತ್ತು.

ಬೆತ್ತನಗೆರೆ ಸಿನಿಮಾ

ಬೆತ್ತನಗೆರೆ ಶಂಕರ್‌ನ ರಕ್ತ ಚರಿತ್ರೆಯ ಪುಟಗಳು!

• ಜಮೀನು ವಿವಾದದಲ್ಲಿ ಬಾಳೆಕಾಯಿ ದೇವರಾಜ್ ನನ್ನ ಕೊಲೆಗೈದ ಶಂಕರ್


• ಬಾಳೆಕಾಯಿ ದೇವರಾಜ್ ಕೊಲೆಯ ನಂತರ ನೆಲಮಂಗಲ ರಕ್ತಚರಿತ್ರೆ ಆರಂಭ


• ನೆಲಮಂಗಲಕ್ಕೆ ರಕ್ತಮಂಗಲ ಎನ್ನುವ ಕುಖ್ಯಾತಿ ಬಂದದ್ದೆ ಶಂಕರನಿಂದ


• ಬಾಳೆಕಾಯಿ ದೇವರಾಜು ಬಾಳೆಕಾಯಿ ಬಸವಯ್ಯನ ಕೊಲೆ


• ಗ್ರಾಮದ ಹಾಲಿನ ಡೈರಿ ಅಧ್ಯಕ್ಷೀಯ ಚುನಾವಣೆ ವಿಚಾರಕ್ಕೆ ಆರಂಭವಾದ ರೌಡಿಸಂ


• ಚುನಾವಣೆಯಲ್ಲಿ ಬಸವಯ್ಯನ ವಿರುದ್ದ ಪರಾಬವ ಗೊಂಡಿದ್ದ ಶಂಕರ


• 16/06/2005 ರಲ್ಲಿ ಬಾಳೆಕಾಯಿ ಬಸವಯ್ಯನ ಕೊಲೆ


• 05/05/2006ರಲ್ಲಿ ಲಾಯರ್ ದೇವರಾಜು & ಕೃಷ್ಣಮೂರ್ತಿ ಜೋಡಿ ಕೊಲೆ


• ಬಾಳೆಕಾಯಿ ಬಸವಯ್ಯನ ಕೊಲೆ ಪ್ರಕರಣದಲ್ಲಿ ಮುಖ್ಯಸಾಕ್ಷಿಗಳಾಗಿದ್ದ ಲಾಯರ್ ದೇವರಾಜು ಮತ್ತು ಕೃಷ್ಣಮೂರ್ತಿ


• ತನ್ನ ವಿರುದ್ದ ಸಾಕ್ಷಿ ಹೇಳುತ್ತಾರೆಂದು ಕೊಲೆ ಮಾಡಿಸಿರುವ ಆರೋಪ


• 18/04/2008 ರಲ್ಲಿ ಬೈಲಪ್ಪನ ಕೊಲೆ


• ಈಗಾಗಲೆ ಶಂಕರನಿಂದ ಕೊಲೆಯಾಗಿದ್ದ ಲಾಯರ್ ದೇವರಾಜು ತಂದೆ ಬೈಲಪ್ಪ


• ನ್ಯಾಯಾಲಯದಲ್ಲಿ ಸಾಕ್ಷಿ ಹೇಳುತ್ತಾರೆ ಎಂದು ಕೊಲೆ


• 02/10/2008 ರಲ್ಲಿ ಉದ್ಯಮಿ ಪುಟ್ಟಚನ್ನಪ್ಪನವರ ಮನೆ ಮೇಲೆ ದಾಳಿ, ಕೊಲೆ ಯತ್ನ


• 15/12/2008 ರಲ್ಲಿ ಲ್ಯಾಂಡ್ ಡೆವಲಪರ್ ರಂಗಧಾಮಯ್ಯ ಅಪಹರಣೆ


• ಅಪಹರಣ ಮಾಡಿ ಹಣಕ್ಕೆ ಆಮೀಷವೊಡ್ಡಿ, ಕೊಲೆ ಯತ್ನ


• 17/03/2009 ರಲ್ಲಿ ಬೆತ್ತನಗೆರೆ ಸೀನನ ಅಕ್ಕನ ಗಂಡ ದೇವೇಂದ್ರಪ್ಪನ ಕೊಲೆ


• ದೇವೆಂದ್ರಪ್ಪ @ ಹ್ಯಾಡಾಳ್ ದೇವಿಯನ್ನ ಕೊಲೆ ಮಾಡಿದ್ದ ಶಂಕರ


• ದೇವಾಲಯದ ಮುಂಭಾಗದ ಸಿನಿಮೀಯ ರೀತಿಯಲ್ಲಿ ಅಟ್ಯಾಕ್ ಮಾಡಿ ಮರ್ಡರ್


• 29/09/2009 ರಲ್ಲಿ ಶಂಕರ ಹಾಗೂ ಸಹಚರರಿಂದ ಬಂಡೆ ಮಂಜನ ಮೇಲೆ ಅಟ್ಯಾಕ್


• 24/12/2009 ರಲ್ಲಿ ವಡೇರಹಳ್ಳಿ ಜಯರಾಮಯ್ಯನ ಮೇಲೆ ಅಟ್ಯಾಕ್


• ಬೆತ್ತನೆಗೆರೆ ಸೀನನಿಗೆ ವಡೇರಹಳ್ಳಿ ಜಯರಾಮಯ್ಯ ಆರ್ಥಿಕ‌ ನೆರವು ನೀಡಿತ್ತಿದ್ದ ಎಂದು ಅಟ್ಯಾಕ್


• ಜಯರಾಮಯ್ಯನ್ನ ತಲೆಗೆ ಗನ್ ಪಾಯಿಂಟ್ ಮಾಡಿದ್ದ ಶಂಕರನ ಹುಡುಗರು


• ಮಿಸ್‌ಫೈರ್ ಆಗಿ ಜಯರಾಮಯ್ಯನ ಕೆನ್ನೆ ಸೀಳಿದ್ದ ಗುಂಡು


• 09/01/2010ರಲ್ಲಿ ಗನ್ ಮ್ಯಾನ್ ಗಂಗರಾಜು ಮೇಲೆ ಹಲ್ಲೆ


• ಪ್ರೇಮ ಪ್ರಕರಣವೊಂದರಲ್ಲಿ ಮದ್ಯ ಪ್ರವೇಶಿಸಿದ್ದ ಗನ್ ಮ್ಯಾನ್ ಗಂಗರಾಜು


• 03/07/2010 ರಲ್ಲಿ ಲಾಯರ್ ರವಿ ಕೊಲೆ


• ಕಾರು ಚಾಲನೆ ಮಾಡುತ್ತಿರುವುದು ಬಂಡೆ ಮಂಜ ಎಂದುಕೊಂಡು ಲಾಯರ್ ರವಿ ಕೊಲೆ


• 10/02/2011ರಲ್ಲಿ ಬಂಡೆ ಮಂಜನ ಮೇಲೆ‌ ಮಾರಕಾಸ್ತ್ರಗಳಿಂದ ದಾಳಿ


• 10/03/2011ರಲ್ಲಿ ಮೈಸೂರು ಕಾರಗೃಹದಲ್ಲೇ ಬೆತ್ತನಗೆರೆ ಸೀನನ ಮೇಲೆ ದಾಳಿ


• 2007 ರಲ್ಲಿ ಪೀಣ್ಯ ಪೊಲೀಸ್ ಠಾಣೆಯ ಮೊಕದಮ್ಮೆ ಸಂಖ್ಯೆ 152/2004 ರ ಪ್ರಕರಣಕ್ಕೆ ಸಂಬಂಧಿಸಿದಂತೆ ಬೆಂಗಳೂರು 7ನೇ ಎಸಿಎಂಎಂ ನ್ಯಾಯಾಲಯದ ಮುಂದೆ ಶರಣಾಗಿದ್ದ


• ಬೆತ್ತನಗೆರೆ ಸೀನಾ ಹಾಗೂ ಶಂಕರ ಇಬ್ಬರ ಹಗೆತನದಲ್ಲಿ ಬಲಿಯಾದ ಬೆಮೆಲ್ ಕೃಷ್ಣಪ್ಪ


• ಶಂಕರನಿಗೆ ಬೆಮೆಲ್ ಕೃಷ್ಣಪ್ಪ ಸಾಥ್ ನೀಡುತ್ತಾರೆ ಎಂದು ಕೃಷ್ಣಪ್ಪನನ್ನ ಕೊಂದಿದ್ದ ಬೆತ್ತನಗೆರೆ ಸೀನಾ


• 25/07/2012 ರಂದು ಬೆಮೆಲ್ ಕೃಷ್ಣಪ್ಪನನ್ನ‌ ಕೊಲೆ ಮಾಡಿದ ಸೀನ್ ಅಂಡ್ ಗ್ಯಾಂಗ್


• 20/09/2012 ರಂದು ಇಬ್ಬರು ಜೈಲಿ ಅಧಿಕಾರಿಗಳು ಅಮಾನತ್ತು


• ಮಾದ್ಯಮದವರಿಗೆ ಕರೆ ಮಾಡಿ ಮಾತನಾಡಿದ್ದ, ಐಶಾರಾಮಿ ಜೀವನ ನಡೆಸುತ್ತಿದ್ದ ಶಂಕರ


• ಶಂಕರನಿಗೆ ಸೌಲಭ್ಯ ಕಲ್ಪಿಸಿದ್ದಕ್ಕಾಗಿ ಅಧಿಕಾರಿಗಳು ಸಸ್ಪೆಂಡ್


• ಜೈಲಿನಲ್ಲಿದ್ದುಕೊಂಡೆ ಹಫ್ತಾ ವಸೂಲಿ ಮಾಡುತ್ತಿದ್ದ ಶಂಕರ


• 22/09/2009ರಲ್ಲಿ ಹಫ್ತಾ ವಸೂಲಿ ಸಂಬಂಧ ನೆಲಮಂಗಲ ಟೌನ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲು

ಬಿಜೆಪಿ ನಾಯಕರೊಂದಿಗೆ ಕಾಣಿಸಿಕೊಳ್ಳುತ್ತಿರುವ ಶಂಕರ್

ಇಷ್ಟೆಲ್ಲಾ ಹಿನ್ನೆಲೆಯಿರುವ ಶಂಕರ್ ಇದೀಗ ಬಿಜೆಪಿ ನಾಯಕರ ಜೊತೆ ಕಾಣಿಸಿಕೊಳ್ಳುತ್ತಿದ್ದಾನೆ. ಈಶ್ವರಪ್ಪ ಸೇರಿದಂತೆ ಘಟಾನುಘಟಿಗಳ ಜೊತೆ ಕಾಣಿಸಿಕೊಂಡಿದ್ದಾನೆ. ಈತನ ಹೊಸ ಹೆಜ್ಜೆ ಈಗ ರಾಜ್ಯ ರಾಜಕೀಯದಲ್ಲಿ ಸಂಚಲನ ಮೂಡಿಸಿದೆ.