Fact Check: ತಾಲಿಬಾನ್​ನ ಹೆಲಿಕಾಪ್ಟರ್ ಕೆಳಗೆ ನೇತಾಡುತ್ತಿರುವ ದೇಹ; ವೈರಲ್ ಆದ ವಿಡಿಯೋ

ತಾಲಿಬಾನ್​ನ ರಕ್ಕಸೀ ಪ್ರವೃತ್ತಿ ಬಗ್ಗೆ ಮಾಧ್ಯಮಗಳಲ್ಲಿ ಬಹಳಷ್ಟು ವರದಿಗಳು ಬರುತ್ತಲೇ ಇರುತ್ತವೆ. ಸೋಷಿಯಲ್ ಮೀಡಿಯಾಗಳಲ್ಲಿ ತಾಲಿಬಾನ್​ಗೆ ಸಂಬಂಧಿಸಿದ ಅನೇಕ ಸುದ್ದಿ, ವಿಡಿಯೋ, ಫೋಟೋಗಳು ವೈರಲ್ ಆಗುತ್ತಲೇ ಇರುತ್ತವೆ. ಮೊನ್ನೆ ಕಂದಹಾರ್​ನಲ್ಲಿ ಹೆಲಿಕಾಪ್ಟರ್​ನಲ್ಲಿ ತಾಲಿಬಾನಿಗಳು ಚಲಾಯಿಸುತ್ತಿದ್ದ ಹೆಲಿಕಾಪ್ಟರ್​ನ ವಿಡಿಯೋವೊಂದು ತಾಲಿಬ್ ಟೈಮ್ಸ್ ಎಂಬ ಹೆಸರಿನ ಟ್ವಿಟ್ಟರ್ ಖಾತೆಯಿಂದ ಅಪ್​ಲೋಡ್ ಆಗಿತ್ತು. ಅದೀಗ ಭಾರೀ ವೈರಲ್ ಆಗಿದೆ. ಅಮೆರಿಕ ಸೇನೆ ಸಂಪೂರ್ಣ ಕಾಲ್ತೆಗೆದ ಬೆನ್ನಲ್ಲೇ ತಾಲಿಬಾನ್ ಪ್ಯಾಟ್ರೋಲಿಂಗ್ ನಡೆಸುತ್ತಿರುವ ಚಿತ್ರ ಇದಾಗಿತ್ತು. ಆದರೆ, ಈ ದೃಶ್ಯದಲ್ಲಿ ಇರುವ ಹೆಲಿಕಾಪ್ಟರ್​ನಲ್ಲಿ ಕೆಳಗೆ ಹಗ್ಗದಿಂದ ಒಬ್ಬ ವ್ಯಕ್ತಿಯ ದೇಹ ನೇತಾಡುತ್ತಿತ್ತು. ಈ ವಿಡಿಯೋ ಹಾಕಿದ ತಾಲಿಬ್ ಟೈಮ್ಸ್ ಈ ವ್ಯಕ್ತಿ ನೇತಾಡುತ್ತಿದ್ದ ಬಗ್ಗೆ ಏನೂ ಬರೆದಿರಲಿಲ್ಲ. ತಾಲಿಬಾನ್​ನಿಂದ ಪಹರೆಯಾಗುತ್ತಿದೆ ಎಂದು ತಿಳಿಸಿದ್ದು ಬಿಟ್ಟು ಬೇರೆ ಯಾವ ಮಾಹಿತಿಯನ್ನೂ ಹಂಚಿಕೊಂಡಿರಲಿಲ್ಲ. ಆದರೆ, ಸೋಷಿಯಲ್ ಮೀಡಿಯಾದಲ್ಲಿ ಈ ಪೋಸ್ಟ್ ತರಹಾವೇರಿ ಚರ್ಚೆಗೆ ಒಳಗಾಗಿದೆ. ತಾಲಿಬಾನ್​ನ ರಕ್ಕಸ ಪ್ರವೃತ್ತಿಗೆ ಈ ಚಿತ್ರಕ್ಕಿಂತ ಬೇರೆ ಸಾಕ್ಷ್ಯ ಬೇಕಿಲ್ಲ ಎಂದೇ ಬಹಳಷ್ಟು ಮಂದಿ ಕಮೆಂಟ್ ಮಾಡಿದ್ದಾರೆ. ವ್ಯಕ್ತಿಯನ್ನ ಹೆಲಿಕಾಪ್ಟರ್​ನಲ್ಲಿ ನೇಣುಬಿಗಿದು ಹೊತ್ತೊಯ್ಯಲಾಗುತ್ತಿದೆ ಎಂಬ ಅಭಿಪ್ರಾಯಗಳೇ ಹೆಚ್ಚಾಗಿ ಕಂಡುಬಂದಿವೆ. ಅಮೆರಿಕದ ರಿಪಬ್ಲಿಕನ್ ಪಕ್ಷದ ಸಂಸದ ಟೆಡ್ ಕ್ರಜ್ ಅವರು ಈ ವಿಡಿಯೋ ಶೇರ್ ಮಾಡಿಕೊಂಡು ಬೈಡನ್ ಸರ್ಕಾರವನ್ನು ಕಟುವಾಗಿ ಟೀಕೆ ಕೂಡ ಮಾಡಿದ್ದಾರೆ.

ಆದರೆ, ಜನರು ಅಂದುಕೊಂಡಂತೆ ಈ ವಿಡಿಯೋದಲ್ಲಿ ವ್ಯಕ್ತಿಯನ್ನ ನೇಣುಬಿಗಿದು ಹೊತ್ತೊಯ್ಯುತ್ತಿಲ್ಲ ಎಂದು ಆಲ್ಟ್ ನ್ಯೂಸ್ ಎಂಬ ಫ್ಯಾಕ್ಟ್ ಚೆಕಿಂಗ್ ವೆಬ್​ಸೈಟ್ ವಿಮರ್ಶಿಸಿದೆ. ವಿಡಿಯೋದಲ್ಲಿರುವ ದೃಶ್ಯವನ್ನು ಝೂಮ್ ಮಾಡಿ ನೋಡಿದರೆ ಆ ವ್ಯಕ್ತಿಯ ಕತ್ತಿಗೆ ಅಲ್ಲ ತೋಳಿನ ಕೆಳಗೆ ಹಗ್ಗ ಕಟ್ಟಿರುವುದು ಕಂಡುಬರುತ್ತದೆ. ಅಲ್ಲದೇ ವಿಡಿಯೋದಲ್ಲಿ 15 ಸೆಕೆಂಡುಗಳ ಬಳಿಕ ಆ ವ್ಯಕ್ತಿಯ ದೇಹದಲ್ಲಿ ಚಲನೆ ಕಾಣಿಸುತ್ತದೆ. ಇದರಿಂದ ಆ ವ್ಯಕ್ತಿ ಸತ್ತಿಲ್ಲ ಎಂಬುದು ದೃಢಪಡುತ್ತದೆ ಎಂದು ಆಲ್ಟ್ ನ್ಯೂಸ್ ಅಭಿಪ್ರಾಯಪಟ್ಟಿದೆ.

Another landmark picture taking the world in a new era of terror.
Taliban hang a person, presumed to be an American interpreter, from a U.S. Blackhawk helicopter.
The left over US helicopters will now be used in #Afganistan like this. pic.twitter.com/8q6C5bo4IB

— Sudhir Chaudhary (@sudhirchaudhary) August 31, 2021

ಅಷ್ಟೇ ಅಲ್ಲ, ಕಂದಹಾರ್ ರಾಜ್ಯಪಾಲರ ಕಚೇರಿಯ ಖಾತೆಯಿಂದಲೂ ಇಂಥದ್ದೇ ಒಂದು ವಿಡಿಯೋ ಅಪ್​​ಲೋಡ್ ಆಗಿದೆ. ತಾನು ಆ ಖಾತೆಯೊಂದಿಗೆ ಡಿಎಂ ಮೂಲಕ ಸಂಪರ್ಕ ಸಾಧಿಸಿ ವಿಚಾರಿಸಿದೆವು. ರಾಜ್ಯಪಾಲರ ಕಟ್ಟಡದಲ್ಲಿದ್ದ ಧ್ವಜವನ್ನು ಸರಿಪಡಿಸಲು ಹೆಲಿಕಾಪ್ಟರ್​ನಿಂದ ಆ ವ್ಯಕ್ತಿಯನ್ನ ಹಗ್ಗಕಟ್ಟಿ ಕೆಳಗಿಳಿಸಲಾಗಿತ್ತು ಎಂಬ ವಿಚಾರ ಗೊತ್ತಾಯಿತು ಎಂದು ಆಲ್ಟ್ ನ್ಯೂಸ್ ತಿಳಿಸಿದೆ.

Black Hawk over the #Kandahar governor office. #Kandahar #Afghanistan pic.twitter.com/9dLT46L2Ut

— Aśvaka - آسواکا News Agency (@AsvakaNews) August 30, 2021

ಅಫ್ಘಾನಿಸ್ತಾನದ ಸ್ಥಳೀಯ ಪತ್ರಕರ್ತರೂ ಕೂಡ ಈ ವಿಡಿಯೋವನ್ನು ಅಪ್​ಲೋಡ್ ಮಾಡಿ, ಇದು 100 ಮೀಟರ್ ಎತ್ತರದ ದ್ವಜಸ್ತಂಭದ ಮೇಲೆ ಬಾವುಟ ಕಟ್ಟಲು ತಾಲಿಬಾನ್ ಮಾಡುತ್ತಿರುವ ಪ್ರಯತ್ನ ಎಂದು ಬರೆದಿದ್ದಾರೆ. ಇನ್ನೂ ಅನೇಕ ಸ್ಥಳೀಯರೂ ಕೂಡ ಈ ವಿಡಿಯೋವನ್ನು ಸೋಷಿಯಲ್ ಮೀಡಿಯಾಗಳಲ್ಲಿ ಅಪ್​ಲೋಡ್ ಮಾಡಿದ್ಧಾರೆ. ಅವರ್ಯಾರೂ ಕೂಡ ಇದು ತಾಲಿಬಾನಿಗಳಿಂದ ಸಾರ್ವಜನಿಕವಾಗಿ ವ್ಯಕ್ತಿಯನ್ನ ನೇಣು ಹಾಕಿದ್ದಾರೆಂದು ಹೇಳಿಲ್ಲ ಎನ್ನಲಾಗಿದೆ. ಹಾಗೆಯೇ, ಈ ವಿಡಿಯೋವನ್ನು ಅಪ್​ಲೋಡ್ ಮಾಡಿದ್ದ ತಾಲಿಬ್ ಟೈಮ್ಸ್ ಹೆಸರಿನ ಟ್ವಿಟ್ಟರ್ ಖಾತೆ ಸದ್ಯ ಸಸ್ಪೆಂಡ್ ಆಗಿದೆ.

ಇದನ್ನೂ ಓದಿ: Fact Check: ಭಾರತದ ಅಧ್ಯಕ್ಷತೆಯಲ್ಲಿ ಯುಎನ್ಎಸ್‌ಸಿ ತಾಲಿಬಾನ್ ಅನ್ನು ಭಯೋತ್ಪಾದಕ ಪಟ್ಟಿಯಿಂದ ತೆಗೆದುಹಾಕಿದೆಯೇ..?

(ನ್ಯೂಸ್​​​18 ಕನ್ನಡ ಕಳಕಳಿ: ಕೊರೋನಾ ಪಾಸಿಟಿವ್​ ಕೇಸ್​ಗಳ ಸಂಖ್ಯೆ ರಾಜ್ಯದಲ್ಲಿ ತಗ್ಗಿದೆಯಾದರೂ ಸೋಂಕಿನ ಅಪಾಯದಿಂದ ಸಂಪೂರ್ಣವಾಗಿ ಇನ್ನೂ ಯಾರೂ ಸುರಕ್ಷಿತರಲ್ಲ. ಹೀಗಾಗಿ ಪ್ರತಿಯೊಬ್ಬರು ಕೋವಿಡ್​​ ನಿಯಮಗಳಾದ ಮಾಸ್ಕ್​​ ಧರಿಸುವುದು, ಸಾಮಾಜಿಕ ಅಂತರ ಕಾಯ್ದುಕೊಳ್ಳುವುದನ್ನು ಮರೆಯಬಾರದು. ಆದಷ್ಟು ಶೀಘ್ರವೇ ಲಸಿಕೆ ಪಡೆದು ಸೋಂಕಿನ ವಿರುದ್ಧದ ಯುದ್ಧದಲ್ಲಿ ಪ್ರತಿಯೊಬ್ಬರೂ ಕೈ ಜೋಡಿಸಬೇಕು.)