Explained: ಕೇರಳದಲ್ಲಿ ನೊರೊವೈರಸ್ ಪ್ರಕರಣಗಳು ಪತ್ತೆ! ರೋಗ ಲಕ್ಷಣಗಳು ಹೇಗಿರುತ್ತೆ?

ಸುಮಾರು ಎರಡೂವರೆ ವರ್ಷದಿಂದ ಬೆಂಬಿಡದೆ ಕಾಡುತ್ತಿರುವ ಕೊರೋನಾ ವೈರಸ್‌ನಿಂದ (Corona Virus) ಜಗತ್ತಿನಾದ್ಯಂತ ಮನುಕುಲ ಬೇಸತ್ತು ಹೋಗಿರುವಾಗ, ಈಗ ಮತ್ತೆ ಹೊಸ ಹೊಸ ಕೋವಿಡ್-19 (Covid-19) ಸೋಂಕಿನ ರೂಪಾಂತರಗಳು ಹುಟ್ಟಿಕೊಳ್ಳುತ್ತಿದ್ದು, ಮುಂಬರುವ ದಿನಗಳಲ್ಲಿ ಹೇಗಿರುತ್ತದೆ ಪರಿಸ್ಥಿತಿ ಅಂತ ನೆನೆಸಿಕೊಂಡರೆ ಜನರಿಗೆ ಭಯವಾಗುತ್ತಿದೆ ಅಂತ ಹೇಳಬಹುದು. ಈಗಂತೂ ಒಂದಲ್ಲ ಒಂದು ರೋಗ ಮನುಷ್ಯನನ್ನು ಕಾಡುತ್ತಲೇ ಇದೆ ಅಂತ ಹೇಳಬಹುದು. ಇಂತಹದೇ ಒಂದು ರೋಗದ ಬಗ್ಗೆ ಭಯ ಈಗ ಕೇರಳದಲ್ಲಿ ಇತ್ತೀಚಿನ ದಿನಗಳಲ್ಲಿ ಜಾಸ್ತಿ ಆಗುತ್ತಿದೆ ಅಂತ ಹೇಳಿದರೆ ತಪ್ಪಾಗುವುದಿಲ್ಲ ನೋಡಿ. ಕೇರಳ ರಾಜ್ಯದ (Kerala State) ಎರ್ನಾಕುಲಂ ಜಿಲ್ಲೆಯ 1ನೇ ತರಗತಿ ವಿದ್ಯಾರ್ಥಿಗಳಲ್ಲಿ ಜಠರಗರುಳಿನ ಸೋಂಕಿನ ಎರಡು ಪ್ರಕರಣಗಳನ್ನು ಕೇರಳ ಆರೋಗ್ಯ ಇಲಾಖೆ ಸೋಮವಾರ ಎಂದರೆ ಜನವರಿ 24ನೇ ತಾರೀಖಿನಂದು ದೃಢಪಡಿಸಿದೆ.

ಅತಿಸಾರ, ಕಿಬ್ಬೊಟ್ಟೆ ನೋವು, ವಾಂತಿ, ವಾಕರಿಕೆ, ಜ್ವರ, ತಲೆನೋವು ಮತ್ತು ದೇಹದ ನೋವುಗಳಂತಹ ರೋಗಲಕ್ಷಣಗಳು ಕಾಣಿಸಿದ ನಂತರ 62 ಜನರ ಎಂದರೆ ವಿದ್ಯಾರ್ಥಿಗಳು ಮತ್ತು ಅವರ ಪೋಷಕರ ಎರಡು ಮಾದರಿಗಳನ್ನು ಪರೀಕ್ಷಿಸಲಾಯಿತು. ಏನಿದು ನೊರೊವೈರಸ್ ಮತ್ತು ಏನಿದರ ರೋಗಲಕ್ಷಣಗಳು ಅಂತ ನಿಮಗೆ ಅನೇಕ ಪ್ರಶ್ನೆಗಳು ಈಗಾಗಲೇ ತಲೆಯಲ್ಲಿ ಓಡಾಡುತ್ತಾ ಇರಬೇಕಲ್ಲವೇ? ಬನ್ನಿ ಹಾಗಾದರೆ ಇದರ ಬಗ್ಗೆ ಇನ್ನಷ್ಟು ವಿವರವಾಗಿ ತಿಳಿದುಕೊಳ್ಳೋಣ.

ನೊರೊವೈರಸ್ ಎಂದರೇನು ಮತ್ತು ಈ ಸೋಂಕು ಎಷ್ಟು ಸಾಮಾನ್ಯ?

ನೊರೊವೈರಸ್ ಹೆಸರನ್ನು ಕೇಳದವರಿಗೆ ಹೊಸತು ಅಂತ ಅನ್ನಿಸಬಹುದು, ಆದರೆ ಇದು 50 ವರ್ಷಗಳಿಂದ ಮಾನವರಲ್ಲಿ ಹರಡುತ್ತಿದೆ ಮತ್ತು ಗ್ಯಾಸ್ಟ್ರೋಎಂಟರೈಟಿಸ್ ನ ಪ್ರಾಥಮಿಕ ಕಾರಣಗಳಲ್ಲಿ ಒಂದಾಗಿದೆ ಎಂದು ಭಾವಿಸಲಾಗಿದೆ. ಈ ವೈರಸ್ ಜಾಗತಿಕವಾಗಿ ಪ್ರತಿವರ್ಷ 200,000 ಜನರನ್ನು ಕೊಲ್ಲುತ್ತದೆ ಎಂದು ಅಂದಾಜಿಸಲಾಗಿದೆ, ಹೆಚ್ಚಿನ ಸಾವುಗಳು ಐದು ವರ್ಷಕ್ಕಿಂತ ಕಡಿಮೆ ವಯಸ್ಸಿನವರು ಮತ್ತು 65 ವರ್ಷಕ್ಕಿಂತ ಮೇಲ್ಪಟ್ಟವರಲ್ಲಿ ಸಂಭವಿಸುತ್ತವೆ ಅಂತ ಹೇಳಲಾಗುತ್ತದೆ.

ವೈರಸ್ ಕಡಿಮೆ ತಾಪಮಾನದಲ್ಲಿ ಬದುಕುಳಿಯುವ ಸಾಮರ್ಥ್ಯವನ್ನು ಹೊಂದಿದೆ ಮತ್ತು ಚಳಿಗಾಲದಲ್ಲಿ ಮತ್ತು ತಂಪಾದ ದೇಶಗಳಲ್ಲಿ ಹೆಚ್ಚು ಸಾಮಾನ್ಯವಾಗಿದೆ. ಅದಕ್ಕಾಗಿಯೇ ಇದನ್ನು ಕೆಲವೊಮ್ಮೆ "ಚಳಿಗಾಲದ ವಾಂತಿ ರೋಗ" ಎಂದು ಕರೆಯಲಾಗುತ್ತದೆ. ನೊರೊವೈರಸ್ ನ ವರದಿಯಾದ ಪ್ರಕರಣಗಳು ಸಾಂಕ್ರಾಮಿಕ ಸಮಯದಲ್ಲಿ ಯುನೈಟೆಡ್ ಕಿಂಗ್ಡಮ್ ನಲ್ಲಿ ಕುಸಿತವನ್ನು ಕಂಡಿವೆ, ಬಹುಶಃ ಅನಂತರದಲ್ಲಿ ಇದರ ಮೇಲೆ ಹೆಚ್ಚು ಗಮನ ಹರಿಸದೆ ಇರುವುದರಿಂದ ಈ ಪ್ರಕರಣಗಳು ಹೆಚ್ಚಾಗಿದೆ ಅಂತ ಹೇಳಬಹುದು. ಯುಕೆ ಹೆಲ್ತ್ ಸೆಕ್ಯೂರಿಟಿ ಏಜೆನ್ಸಿ (ಯುಕೆಎಚ್ಎಸ್ಎ) 2022 ರಲ್ಲಿ ನಿರೀಕ್ಷೆಗಿಂತ 48 ಪ್ರತಿಶತದಷ್ಟು ಹೆಚ್ಚಿನ ಪ್ರಕರಣಗಳನ್ನು ವರದಿ ಮಾಡಿದೆ.

ಪೀರ್ ರಿವ್ಯೂಡ್ ಜರ್ನಲ್ ವೈರಸ್ ನಲ್ಲಿ ಪ್ರಕಟವಾದ 2022 ರ ಅಧ್ಯಯನವು ಹೆಚ್ಚಿನ ಆದಾಯದ ದೇಶಗಳಲ್ಲಿ ನೊರೊವೈರಸ್ ಸೋಂಕುಗಳು ಹೆಚ್ಚಾಗಿ ಪತ್ತೆಯಾಗುತ್ತವೆ ಎಂದು ಹೇಳುತ್ತದೆ, ಸುಮಾರು 40 ಪ್ರತಿಶತದಷ್ಟು ಪ್ರಕರಣಗಳು ದೀರ್ಘಕಾಲೀನ ಆರೈಕೆ ಸೌಲಭ್ಯಗಳಲ್ಲಿ ಕಂಡು ಬರುತ್ತವೆ. ಇದಕ್ಕೆ ವ್ಯತಿರಿಕ್ತವಾಗಿ, ಭಾರತದಲ್ಲಿ ಪ್ರಕರಣಗಳು ಹೆಚ್ಚಾಗಿ ಶಾಲೆಗಳು ಮತ್ತು ಹಾಸ್ಟೆಲ್ ಗಳಂತಹ ವ್ಯವಸ್ಥೆಗಳಲ್ಲಿ ಪತ್ತೆಯಾಗಿವೆ, ಅಲ್ಲಿ ಜನರು ಆಹಾರವನ್ನು ಹಂಚಿಕೊಳ್ಳುವುದೇ ಒಂದು ಮುಖ್ಯವಾದ ಕಾರಣವಾಗಿರಬಹುದು.

ಭಾರತದಲ್ಲಿ ಈ ಸೋಂಕಿನ ಅಬ್ಬರ ಈಗ ಹೇಗಿದೆ?

ನೊರೊವೈರಸ್ ಪ್ರಕರಣಗಳು ಇತರ ಅನೇಕ ಸ್ಥಳಗಳಲ್ಲಿರುವಂತೆ ಭಾರತದಲ್ಲಿ ಸಾಮಾನ್ಯವಾಗಿಲ್ಲ. ಅದೇ ಸಮಯದಲ್ಲಿ, ಕೇರಳದಲ್ಲಿ ಇತ್ತೀಚಿನ ಪ್ರಕರಣಗಳು ಯಾವುದೇ ರೀತಿಯಲ್ಲಿ ವಿಶಿಷ್ಟ ಅಥವಾ ವಿಭಿನ್ನ ಅನ್ನುವಂತಿಲ್ಲ. ಈ ಸೋಂಕು ಹಿಂದಿನ ವರ್ಷಗಳಲ್ಲಿಯೂ ವರದಿಯಾಗಿದ್ದವು, ಮುಖ್ಯವಾಗಿ ದಕ್ಷಿಣ ಭಾರತದಿಂದ ಮತ್ತು ವಿಶೇಷವಾಗಿ ಕೇರಳದಿಂದ ಹೆಚ್ಚು ಪ್ರಕರಣಗಳು ವರದಿಯಾಗಿದ್ದವು.

ಸಾಂಕೇತಿಕ ಚಿತ್ರ

ವೆಲ್ಲೂರಿನ ಕ್ರಿಶ್ಚಿಯನ್ ಮೆಡಿಕಲ್ ಕಾಲೇಜು ನಡೆಸಿದ 2016 ರ ಅಧ್ಯಯನವು ಮೂರು ವರ್ಷಗಳ ಕಾಲ 373 ಜನನ ಸಮೂಹವನ್ನು ಅನುಸರಿಸಿ, 1,856 ಅತಿಸಾರದ ಪ್ರಸಂಗಗಳು ಮತ್ತು 147 ವಾಂತಿ ಪ್ರಸಂಗಗಳನ್ನು ಪತ್ತೆ ಮಾಡಿದೆ. ಅತಿಸಾರ ಪ್ರಕರಣಗಳಲ್ಲಿ 11.2 ಪ್ರತಿಶತದಷ್ಟು ಮತ್ತು ವಾಂತಿ ಪ್ರಸಂಗಗಳಲ್ಲಿ 20.4 ಪ್ರತಿಶತದಷ್ಟು ನೊರೊವೈರಸ್ ಸೋಂಕು ಪತ್ತೆಯಾಗಿದೆ ಎಂದು ಅಧ್ಯಯನ ತಿಳಿಸಿದೆ.

ತೀವ್ರವಾದ ಗ್ಯಾಸ್ಟ್ರೋಎಂಟರೈಟಿಸ್ ಹೊಂದಿರುವ ಮಕ್ಕಳ 10.3 ಪ್ರತಿಶತದಷ್ಟು ಮಾದರಿಗಳಲ್ಲಿ ನೊರೊವೈರಸ್ ಸೋಂಕು ಪತ್ತೆಯಾಗಿದೆ ಎಂದು ಹೈದರಾಬಾದ್ ನ 2021 ರ ಒಂದು ಅಧ್ಯಯನವು ವರದಿ ಮಾಡಿದೆ.

ಈ ಸೋಂಕಿನ ಬಗ್ಗೆ ಏನ್ ಹೇಳ್ತಾರೆ ತಜ್ಞರು?

ಕೇರಳದ ಇನ್ಸ್ಟಿಟ್ಯೂಟ್ ಆಫ್ ಅಡ್ವಾನ್ಸ್ಡ್ ವೈರಾಲಜಿಯ ನಿರ್ದೇಶಕ ಡಾ.ಇ.ಶ್ರೀಕುಮಾರ್ ಮಾತನಾಡಿ, ಇತ್ತೀಚಿನ ವರ್ಷಗಳಲ್ಲಿ ನೊರೊವೈರಸ್ ಪ್ರಕರಣಗಳು ಹೆಚ್ಚುತ್ತಿವೆ. "ನಾವು ಈ ಹಿಂದೆ ವೈರಸ್ ನ ಬಗ್ಗೆ ಗಮನ ಹರಿಸಿಲ್ಲ ಅನ್ನೋ ವಿಚಾರ ಒಂದು ಕಾರಣವಾಗಿರಬಹುದು. ಈಗ ನಾವು ಈ ವೈರಸ್ ಅನ್ನು ಮಾತ್ರವಲ್ಲದೆ ಇತರ ಹಲವಾರು ವೈರಸ್ ಅನ್ನು ಪತ್ತೆ ಹಚ್ಚುವ ವ್ಯವಸ್ಥೆಗಳನ್ನು ಹೊಂದಿದ್ದೇವೆ.

ಚಿಕಿತ್ಸೆ ನೀಡುವ ವೈದ್ಯರು ಶಂಕಿಸಬಹುದಾದ ಒಂದು ವೈರಲ್ ಸೋಂಕನ್ನು ಪರೀಕ್ಷಿಸುವ ಬದಲು ರೋಗಿಯ ಮಾದರಿಗಳನ್ನು ಪರೀಕ್ಷಿಸಲು ರೋಗಿಯ ರೋಗಲಕ್ಷಣಗಳು ಮತ್ತು ಚಿಹ್ನೆಗಳ ಆಧಾರದ ಮೇಲೆ ಕ್ಲಿನಿಕಲ್ ನಿರ್ಧಾರಗಳನ್ನು ತೆಗೆದುಕೊಳ್ಳಲು ತಮ್ಮ ಸಂಸ್ಥೆ ಸಿಂಡ್ರೊಮಿಕ್ ವಿಧಾನವನ್ನು ಅನುಸರಿಸುತ್ತದೆ ಎಂದು ಡಾ.ಶ್ರೀಕುಮಾರ್ ಹೇಳಿದರು.

"ನಾವು 83 ವಿಭಿನ್ನ ವೈರಸ್ ಗಳನ್ನು ಪತ್ತೆಹಚ್ಚಲು ಸಮಿತಿಯನ್ನು ಹೊಂದಿದ್ದೇವೆ. ಕೇವಲ ಕೋವಿಡ್-19 ಅಥವಾ ಜ್ವರವನ್ನು ಪರೀಕ್ಷಿಸುವ ಬದಲು, ಉಸಿರಾಟದ ರೋಗಲಕ್ಷಣಗಳಿಗೆ ಕಾರಣವಾಗುವ 12 ವೈರಲ್ ಸೋಂಕುಗಳನ್ನು ನಾವು ಪರೀಕ್ಷಿಸುತ್ತೇವೆ. ಅಥವಾ, ಒಬ್ಬ ವ್ಯಕ್ತಿಯು ಜಠರಗರುಳಿನ ರೋಗಲಕ್ಷಣಗಳನ್ನು ಹೊಂದಿದ್ದಾನೆ ಎಂದು ವೈದ್ಯರು ಹೇಳಿದರೆ, ನಾವು ಆರು ಅಥವಾ ಏಳು ವೈರಸ್ ಗಳಿಗಾಗಿ ಪರೀಕ್ಷೆಯನ್ನು ನಡೆಸುತ್ತೇವೆ. ಈ ರೀತಿಯಾಗಿ ನಾವು ನೊರೊವೈರಸ್ ಪ್ರಕರಣಗಳನ್ನು ತೆಗೆದುಕೊಳ್ಳುತ್ತಿದ್ದೇವೆ” ಎಂದು ಡಾ.ಶ್ರೀಕುಮಾರ್ ಹೇಳಿದರು.

ಸಾಂಕೇತಿಕ ಚಿತ್ರ

ಸಂಸ್ಥೆಗಳು ಮಾದರಿಗಳ ಜೀನೋಮಿಕ್ ಅನುಕ್ರಮವನ್ನು ಮಾಡಲು ಪ್ರಾರಂಭಿಸಿದರೆ, ಹೆಚ್ಚಿನ ವೈರಸ್ ಗಳು ಪತ್ತೆಯಾಗುವ ಸಾಧ್ಯತೆಯಿದೆ ಎಂದು ಅವರು ಹೇಳಿದರು.

ವಿಶೇಷವಾಗಿ ಕೇರಳದಲ್ಲಿ ಏಕೆ ಈ ಸೋಂಕು ಹೆಚ್ಚಾಗಿದೆ?

ಇದು ಬಹುಶಃ ಯಾವುದೇ ದೌರ್ಬಲ್ಯಗಳಿಗಿಂತ ಕೇರಳದ ಸಾಮರ್ಥ್ಯಗಳೊಂದಿಗೆ ಹೆಚ್ಚು ಸಂಬಂಧ ಹೊಂದಿದೆ. ರಾಜ್ಯವು ಬಲವಾದ ಸಾರ್ವಜನಿಕ ಆರೋಗ್ಯ ವ್ಯವಸ್ಥೆಯನ್ನು ಹೊಂದಿದೆ, ಅದು ಸೋಂಕಿನ ಕ್ಲಸ್ಟರ್ ಗಳನ್ನು ತೆಗೆದುಕೊಳ್ಳುವ ಮತ್ತು ಅವುಗಳನ್ನು ತ್ವರಿತವಾಗಿ ಪರೀಕ್ಷಿಸುವ ಸಾಮರ್ಥ್ಯವನ್ನು ಹೊಂದಿದೆ ಎಂದು ಡಾ.ಶ್ರೀಕುಮಾರ್ ಹೇಳಿದರು.

ನೊರೊವೈರಸ್ ಸೋಂಕಿನ ಪ್ರಮಾಣ ಹೆಚ್ಚಾಗಲು ಕಾರಣವೇನು?

ಇಲ್ಲ. ನೊರೊವೈರಸ್ ನ ಹೆಚ್ಚಿನ ಪ್ರಕರಣಗಳು ಪತ್ತೆಯಾಗುತ್ತಿದ್ದರೂ, ಇದು ದೊಡ್ಡ ಪ್ರಮಾಣದ ಏಕಾಏಕಿ ಕಾರಣವಾಗುವ ಸಾಧ್ಯತೆಯಿಲ್ಲ ಎಂದು ತಜ್ಞರು ಹೇಳುತ್ತಾರೆ.

"ಈ ಪ್ರಕರಣಗಳ ಸಾಂಕ್ರಾಮಿಕ ರೋಗಶಾಸ್ತ್ರೀಯ ಸಹ-ಸಂಬಂಧಗಳನ್ನು ನಾವು ಅಧ್ಯಯನ ಮಾಡದಿದ್ದರೂ, ನೊರೊವೈರಸ್ ಪ್ರಕರಣಗಳು ವಿರಳವಾಗಿವೆ ಮತ್ತು ಜನರು ಒಂದೇ ಆಹಾರವನ್ನು ಸೇವಿಸುವ ಶಾಲೆಗಳು ಅಥವಾ ಹಾಸ್ಟೆಲ್ ಗಳಲ್ಲಿನ ಸಣ್ಣ ಗುಂಪುಗಳಲ್ಲಿ ಕಂಡು ಬರುತ್ತವೆ. ಸೋಂಕಿನ ಹರಡುವಿಕೆಯು ಸ್ವಯಂ-ನಿರ್ಬಂಧಿತವಾಗಿದೆ. ಇದು ವೈಯಕ್ತಿಕ ಸಮಸ್ಯೆಯೇ ಹೊರತು ಸಾರ್ವಜನಿಕ ಆರೋಗ್ಯ ಸಮಸ್ಯೆಯಲ್ಲ ಎಂದು ಡಾ.ಶ್ರೀಕುಮಾರ್ ಹೇಳಿದ್ದಾರೆ.

ಇದರ ರೋಗಲಕ್ಷಣಗಳು ಯಾವುವು ಮತ್ತು ಅದರ ಹರಡುವಿಕೆಯನ್ನು ಹೇಗೆ ತಡೆಗಟ್ಟುವುದು?

ನೊರೊವೈರಸ್ ಅತಿಸಾರ, ವಾಂತಿ, ವಾಕರಿಕೆ ಮತ್ತು ಕಿಬ್ಬೊಟ್ಟೆ ನೋವಿಗೆ ಕಾರಣವಾಗುತ್ತದೆ. ಅತಿಸಾರದ ಕಾಯಿಲೆಯಾಗಿರುವುದರಿಂದ, ಇದು ನಿರ್ಜಲೀಕರಣಕ್ಕೆ ಕಾರಣವಾಗಬಹುದು, ಆದ್ದರಿಂದ ಸಾಕಷ್ಟು ದ್ರವಗಳನ್ನು ಕುಡಿಯಲು ಶಿಫಾರಸು ಮಾಡಲಾಗಿದೆ.

ವೈರಸ್ ನಿಂದ ಕಲುಷಿತಗೊಂಡ ಆಹಾರಗಳು, ವೈರಸ್ ನಿಂದ ಕಲುಷಿತಗೊಂಡ ಮೇಲ್ಮೈಗಳನ್ನು ಸ್ಪರ್ಶಿಸುವುದು ಮತ್ತು ನಂತರ ಬಾಯಿಯನ್ನು ಸ್ಪರ್ಶಿಸುವುದು ಮತ್ತು ಸೋಂಕಿಗೆ ಒಳಗಾದವರೊಂದಿಗೆ ನೇರ ಸಂಪರ್ಕದಲ್ಲಿರುವುದು, ಅವರನ್ನು ನೋಡಿಕೊಳ್ಳುವುದು ಮತ್ತು ಅವರೊಂದಿಗೆ ಆಹಾರ ಮತ್ತು ಪಾತ್ರೆಗಳನ್ನು ಹಂಚಿಕೊಳ್ಳುವ ಮೂಲಕ ಸೋಂಕು ಹರಡಬಹುದು.

ಸೋಂಕನ್ನು ತಡೆಗಟ್ಟಲು ಉತ್ತಮ ಕೈ ನೈರ್ಮಲ್ಯವು ಉತ್ತಮ ಮಾರ್ಗವಾಗಿದೆ. 20 ಸೆಕೆಂಡುಗಳ ಕಾಲ ನಿಮ್ಮ ಕೈಗಳನ್ನು ಸಾಬೂನು ಹಚ್ಚಿಕೊಂಡು ಚೆನ್ನಾಗಿ ತೊಳೆದುಕೊಳ್ಳಿರಿ. ಹ್ಯಾಂಡ್ ಸ್ಯಾನಿಟೈಸರ್ ನೊರೊವೈರಸ್ ವಿರುದ್ಧ ಉತ್ತಮವಾಗಿ ಕಾರ್ಯನಿರ್ವಹಿಸುವುದಿಲ್ಲ ಎಂದು ಭಾವಿಸಲಾಗಿದೆ.

ಇದನ್ನೂ ಓದಿ: ಪದ್ಮ ಪ್ರಶಸ್ತಿಗಳು ಏಕೆ ಶ್ರೇಷ್ಠ? ಈ ಅವಾರ್ಡ್‌ಗೆ ಸಾಧಕರನ್ನು ಹೇಗೆ ಆಯ್ಕೆ ಮಾಡಲಾಗುತ್ತದೆ?

ಸೋಂಕು ಆಹಾರದಿಂದ ಹರಡುವುದರಿಂದ, ಅನಾರೋಗ್ಯ ಪೀಡಿತ ವ್ಯಕ್ತಿಯು ಇತರರಿಗೆ ಆಹಾರವನ್ನು ತಯಾರಿಸಬಾರದು ಎಂದು ಸೂಚಿಸಲಾಗುತ್ತದೆ. ಎಲ್ಲಾ ಆಹಾರ ಪದಾರ್ಥಗಳನ್ನು ಎಚ್ಚರಿಕೆಯಿಂದ ತೊಳೆಯಬೇಕು ಮತ್ತು ಹೆಚ್ಚಿನ ತಾಪಮಾನದಲ್ಲಿ ಬೇಯಿಸಬೇಕು. ನೊರೊವೈರಸ್ 60 ಡಿಗ್ರಿ ಸೆಲ್ಸಿಯಸ್ ತಾಪಮಾನದಲ್ಲಿ ಬದುಕುಳಿಯಬಲ್ಲದು. ಅಸ್ವಸ್ಥ ವ್ಯಕ್ತಿಯು ವಾಂತಿ ಮಾಡಿದ ಅಥವಾ ಅತಿಸಾರ ಹೊಂದಿದ್ದ ಪ್ರದೇಶಗಳನ್ನು ಸೋಂಕು ನಿವಾರಕಗಳು ಅಥವಾ ಬ್ಲೀಚ್ ಬಳಸಿ ಸ್ವಚ್ಛಗೊಳಿಸಬೇಕು.